فاش قال هاكا عاد تفكرت شنو لابسة، شورط فوق الركبة و الفوقاني بالسميطات، طلعت تنجري فالدروج و انا تنضحك على راسي و هبالي، ديت معايا آية للبيت و جبدت الكسوة الكحلة نلبسها، كانت ايفازي حد الركبة و بلا كمام و عندها الكول طالع و فيها سميطة كحلة تتعقد فالجنب، لبست معاها طالون اسود و جمعت شعري مشيطة زوينة و درت مكياج غامق و هزيت آية و هبطنا بجوج، شافتني مروة و جات لعندي تتجري.
مروة : صحبتي فين مشيتي خليتيني بوحدي، و علي من الصباح و هو تيسول فيك
أنا : كنت فبيتي مشيت بدلت و عطيت للبنية تشرب
مروة : وينوو شكون هاد الصغيورة
يونس : هادي ختي
مروة : زوينة تبارك الله، الله يخليها ليك
يونس : شكرا
انا : يالاه هاوا خوك جا سيري معاه
آية : لا انا بغيت نبقا معاك
انا : ماشي مشكل تبقا معايا حتا تبغيو تمشيو؟
يونس : إلى مكانتش تصدعك و صافي
انا : لا بالعكس
تجمعنا عوتاني كاملين و حتا علي و لكن مهضرتش معاه، آية بنية فنة و هضرتها زوينة و تضحك، درناها وسطنا و بقات تتمثل لينا و تتعاود و كلشي مستمتع، حتال ديك اللحظة اللي قالت فيها .
آية : عرفتو زينب عندها بزازل كبار فحال ماما
غير قالتها كلشي دار تيشوف فيا و انا مكرهتش تشق الأرض و ندخل فيها من كترة الحشمة، يونس حاول يتدارك الموقف و يبدل الموضوع و لكن منفع فوالو، شي مصدوم شي حابس الضحكة، انا معرفت مندير نضت بالجري و دخلت للدار و خليتهم تما، و مروة تبعاتني .
مروة : وا زينب حبسي حبسي
انا : اويييلي واش مشفتيش شنو طرا بعينيك مسمعتيش شنو قالت صافي تشوهت قدامهم كاملين اويييلي على فضيحة .
مروة : نتي مدرتي والو و هي بنت صغيرة ماعارفاش الصح من الغلط .
انا : واخا هاكاك
مروة : ومنعرف علاش قالت هاكاك
انا : يمكن حيت بدلت قدامها و لكن قلت را عادي انا شكون يسحابلي غتقول هاكاك اوووف
مروة : هههههه و لكن والله حتا ضحكاتني
انا : تهجريه ،انا طالعة نعس أصلا را قربو يساليو
مروة : باقي الحال بلاتي شوية
انا : لا صافي عييت و معندي منبقا ندير تما، هانتي فاش تبغي تنعسي دخلي بلا حس و متشعليش عليا الضو و نعسي حدايا لبغيتي ولا فوق الفوتوي ولا خودي البيت لاخر لبغيتي المهم را داركم هادي، يالاه بسلامة
مروة : تصبحي على خير
معقلتش على راسي من كثرة مكنت عيانة نعست بحوايجي و مفقت حتال 11 ،لقيت مروة ناعسة حدايا و حتا هي بحوايجها، غسلت وجهي و لبست حوايج الدار و فيقتها ب ستة و ستين كشيفة، هبطنا نفطرو و تفقنا ليوم نبقاو غير فالدار بما أن الشتا مجهدة و حنا باقين عيانين من البارح ،عيطنا على سعد يجي لعندنا و دكشي اللي كان، بقينا قصارين كارطة 3 ديال السوايع حتا استسلمو حيت غلبتهم .
سعد : شنو نديرو دابا؟
مروة : نلعبو أسئلة؟
أنا : صافي مشات ،نلعبو حجرة ورقة مقص الرابح يسول الخاسر
مروة و سعد : صافي يالاه
لعبنا و سعد ايسول مروة : مممم ،بلاتي نفكر، اه اذا خيروك فواحد فينا انا ولا زينب تكملي معاه حياتك شكون تختاري؟
مروة : غنتوحشك أسعد
انا : ههههههه عطيتيه فهاد اللقطة رشقي عليها
سعد : ياكي و دغيا تسخاي
مروة : غير تنضحك بجوجكم عزازين عليا و حتا واحد مياخد البلاصة ديال لاخر
سعد : مزيان زيدو نكملو، زينب سوليني
انا : قولينا شي سر
سعد : حليمة ماشي مي
انا : شناهواااا، ألا ميمكنش
سعد : والله حتا بصح
انا : و ماماك شكون؟
سعد : ماتت فاش كانت تتولدني و الواليد تزوج بختها
مروة : يعنى خالتي حليمة خالتك ماشي ماماك؟
سعد : اه يالاه نكملو
انا : مروة سوليني
مروة : نتي سعيدة فحياتك؟
أنا : سؤال قاسح، عموما سعيدة واخا تيكونو شي اوقات ماشي حتال لهيه و لكن معليش
مروة : آه بصح
سعد : انا انسولك
انا : سول
سعد : علاش لبارح كنتي معصبة؟
أنا : امتا؟
سعد : فاش خليتينا و منعرف فين مشيتي و من بعد رجعتي كاعية و طلعتي لبيتك
انا : اه غير طرات شي حاجة و صافي
سعد : شنو هي؟
أنا : غا شفت شي حاجة ماشي حتال لهيه
سعد : شنو شفتي
انا : هادو را ولاو جوج أسئلة ماشي واحد
سعد : حيت مجوبتيش على السؤال الأساسي
مروة : آه بصح عندو الحق خصك تجاوبي نيشان
انا : غا تناقشت مع علي و صافي
سعد : و فاش خليتينا و مشيتي شنو طرا
انا : غا كان مع شي بنت و صافي
مروة : و نتي غرتي و معجبكش الحال هههههه
انا : الا اشمن غرت نتي تسطيتي
سعد : تانا تيبانليا هدشي اللي كاين
انا : إلا ميمكنش
مروة : واش تتبغيه؟
أنا : ماشي تنبغيه غا اعجاب و صافي
سعد : يعني تيعجبك
انا : الصراحة اه
مروة : و انا آخر من يعلم
انا : حتا واحد معارف من غيركم
سعد : خصني نمشي دابا
انا : علاش باقي الحال
سعد : لا عندي شي شغل ضروري هانا مشيت
انا : هذا مالو كان ناشط و شوية تقلب و ولا عندو الشغل
مروة : حتا انا مفهمتش، المهم خلينا منو و عاوديلي على علي
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
