طفولة ضائعة

الجزء 58

فعمري دابا 22 عام، خديت الشهادة ديالي فإدارة الأعمال و قررت نتكفل بالشركة اللي فوجدة كان خلاها بابا الله يرحمو من بعد ماكان مقابلها صاحبو، فتحت فرع فالرباط و بعد مدة بدات الخدمة الفعلية، كنت صارمة فالخدمة ديالي و لكن ضريفة واخا هاكاك، و تلاقيت من بعد سنين بخويا انس ،كبر وولا راجل و تبدل بزاف، تصدم من التغييرات اللي وقعات ولكن دغيا تأقلم، كان طيلة هاد المدة فكندا أسس مشروع ديالو خاص و تزوج بمغربية عايشة تما و دابا استقر فالمغرب، شريت فيلا صغيرة و سكنت فيها مع إياد و كانو عائلاتنا ديما تيجيو لعندنا تما، حبوبي إياد تيقوليا غير ماما و انا عاجباني هاد الكلمة بزاف، تافقنا انا و ياه أننا نتبناو بنت صغيرة، مشينا للخيرية و كانو تما الدراري بزاف مكرهتش ناخدهم كلهم معايا ولكن للأسف منقدرش، بقات المديرة تتسولني على الأوصاف اللي بغيت و قلت ليها حاجة وحدة "تكون سميتها مروة" جابت ليا ثلاثة ديال البنات وحدة فعمرها 5 سنين و وحدة 3 و وحدة 10 ،قررت نتبنى اللي عندها 5 سنين حيت الأخرى صغيرة بزاف منقدرش عليها و الأخرى كبيرة خفت لمتفاهمش هي و إياد ،شهر عاد باش كملنا الإجراءات و ديتها معايا و ولات بنتي رسميا، كانت زوينة بزاف حروفها كوحل و بلقا و عويناتها مرمشين تبارك الله تتحمق، مع المدة ولات متعلقة بيا بزاف و انا كثر، كنت كل ليلة تنعاود ليها على مروة حبيبة قلبي و هي تتفرح بزاف، فالويكاند تنديهم يسافرو و يفوجو و غيرو تيقراو، الحمد لله العلاقة ما بين مروة و إياد زوينة بزاف قليل فاش تدابزو و مفاهمين، أحمد حاول شحال من مرة يتقرب مني ولكن انا كنت واعدت راسي معمري نرتابط مازال، اليوم عيد ميلادي 23 ،هاد اليوم اللي تيعني ليا الكثير، رجعت لدارنا فمكناس و هبطت للاكاف، جبدت الصندوق اللي فيه ذكرياتي كلها و حليتو، تفكرت يامات الليسي و الهبال، دابا صافي درت عقلي، حليت قائمة الأمنيات اللي معاودتش كتبتها من نهار كملت 19 عام
1 : ترجع علاقتي مع سعد فحال قبل
2 : تنقص الغيرة ديال علي عليا من سعد و يرجعو صحاب
3 : نقدر نتخلص من عقدة سميتها الماضي
4 : نتلاقا بخويا أنس ولا غير نسمع عليه شي خبار
5 : نبقا مع علي
6 : نولي خالة
7 : نبقا مع مروة للعام القادم
ضحكت على امنياتي و تفكرت اللحظة اللي كتبتهم فيها و جبدت مذكرة و كتبت
1 : يكبر إياد و يولي شاب صالح ملتزم بدينو و صلاتو
2 : تكبر مروة و تولي شابة صالحة و ملتزمة بدينها و صلاتها
3 : نكمل على النجاح ديالي
4 : نبقا متشبتة بديني و حجابي
5 : نبقا مع إياد للعام القادم
6 : نبقا مع مروة للعام القادم
سديت المذكرة و تبسمت ابتسامة كبيرة و انا تنحس بمروة عنقاتني من اللور و إياد حتا هو و انا ضميتهم لصدري و عنقتهم، الحياة عبارة عن كتاب صفاحيه بيضين، حنا اللي تنعمروه، الا قلبنا الصفحة ميمكنش نعاودو نرجعو ليها، حياتي دوزت فيها حوايج كتار، تعلمت بزاف دالحوايج، أي حاجة طرات فحياتنا سواء كانت زوينة ولا خايبة را فيها حكمة تيعرفها غير ربي سبحانه وتعالى، الحزن متيدومش غير تيكونو لحظات سودوية عابرة تيخصنا نبعدوها علينا، المرأة ماشي عبارة عن نصف للرجل وبلا بيه را متتسوا والو و هو اللي تيكملها لا بالعكس، المرأة ممكن تفرض راسها و شخصيتها و ممكن تنجح و تحقق كل مبغات بالإرادة و الطموح ديالها، و الواحد ميتسناش الناس يحتارموه و لا يعطيوه قيمة هو اللي يفرض الإحترام ديالو عليهم و يعطي لراسو قيمة و كلشي كلشي غيحتارمو، و أهم حاجة هي أن الشهوات ديال الدنيا متتسالاش و كلما دخلتي فطريق الحرام كلما غرقتي كثر و اتلقا راسك تتجر بلا أدنى مقاومة، واخا يتخلى عليك العالم كامل ربي مغاديش يتخلى عليك، ربي كاين معانا فكل بلاصة يكفي أننا نتقربو ليه و غنلقاو حياتنا من أجمل ما يكون، انا زينب و هادي قصتي نتمنى تكون عجباتكم و استفدتو منها، و حكايتي مشات مع الواد الواد
مروة و إياد : و البوليسي طاح فالواد هههههههه