قالتليا خالتي را جاو شي ناس ثلاثة المرات ولا كثر سولو فماما الله يرحمها و ملقاوهاش و خلاو شي نمرة، خديتها و خليت ليها نمرتي و سلمت عليها و رجعت لمكناس، كنت تنعيط عليهم، فالأول كان تيصوني و يقطع من بعد ولات تتشدني غير البواط فوكال، فوضت أمري لله و نسيتها صافي، داز داك العام بالزربة و فالصيف مشينا كلنا عند ختي سارة كانت حاملة و ولدات توأم فحال القمر بنت و ولد، داز السبوع و دوزنا عندها الصيف و رجعنا، فعمري دابا 21 سنة، تبدلو فيا شي حوايج ولكن ماشي بزاف، اليوم عيد ميلادي و اليوم قررت ندير الحجاب، بدلني 180° و كلشي قاليا زادك نور على نور، كنت جالسة فبيتي حتا صونا تيليفوني .
انا : السلام عليكم
هو : وعليكم السلام، الآنسة زينب هادي ؟
أنا : وي هي هادي شكون بغاني
هو : معرفتش منين نبدا ليك، حنا هوما عائلة داك الولد لي رباوه، لالة عيشة قالت ليا راكي ختو
انا : اه اه اه هي انا و شحال و انا تنقلب عليكم ولكن ملقيتكمش
هو : المهم حنا رانا فالمغرب دابا واش ممكن نتلاقاو لاكان عندك شي وقت خاوي؟
أنا : معلوم نتلاقاو غذا لبغيتي كاع
هو : صافي نتسناك حدا لاگار الكبير غير سيفطيلي شي صورة ديالك باش نعرفك
انا : واخا صافي كون هاني
صيفطت ليه تصويرة ديالي و مشيت تنجمع حوايجي و انا طايرة بالفرحة، اذن عندي أخ ولد، مشيت تنجري قلتها لماما كنت عاودت ليهم كلهم الموضوع كامل، حتا هي فرحات بزاف و بغات تمشي معايا و لكن مخليتهاش، الصباح بكري ركبت فالتران و غير وصلت صونيت للسيد باش نتلاقاه ولكن متيجاوبش، بقيت مخلوعة خفت لميكون والو، شوية هو يوقف عليا شي واحد هزيت راسي و هو بيان ليا نفس الولد اللي كنت تلاقيتو فطنجة و تزادحنا فاش كنت خارجة .
انا : انت
هو : قولي غير السلام بعدا (مد ليا يديه)
انا : متنسلمش على أشباه الرجال
هو : باقي لسانك طويل اسنفورة ناااري كون كانت شي وحدة أخرى كون جمعت معاها بنص
انا : حتا انا كون كان شي واحد آخر كون جاوبتو
هو : شنو تديري هنا
انا : مسوقكش
هو : بلاتي نفكر اه عرفتها جايا تقبلي على خوك
انا : كيدرتي عرفتي؟
هو : حيت را إياد خويا حتا انا
انا : متقولياش انت هواا
هو : اه انا هو و حتا انا تصدمت فحالك ولا كثر منك فاش شفت التصويرة ديالك لبارح
انا : لا ميمكنش مستحيل
هو : الدنيا صغيرة بزاف
انا : و فيناهو؟ سميتو إياد ياك
هو : اه يالاهي معايا للدار تما نتفاهمو
انا : شناهواااا واش حماقيتي ولا شنو؟
هو : واش مريضة ولا مالك را العائلة كلها مجموعة تما تيتسناوك
انا : واخا صافي
الطريق كلها و حنا تندابزو حتا وصلنا لواحد الفيلا كبيرة، توترت بزاف و معرفتش شنو ندير، دخلنا للداخل و استقبلوني بحال شي وحدة منهم .
الأم : أحمد واش هادي هي البنت؟
أحمد : اه هي هادي
الأم : تبارك الله ماشاء الله تتشبهي ليه بزاف
انا : بصح خالتي بغيت نشوفو عافاك
الأم : راه فالمدرسة دابا دخلي نهضرو و فاش يجي تشوفيه
دخلنا و كانت دارهم ممختالفاش بزاف على دارنا تتجمع ما بين الديكور العصري و التقليدي و واسعة بزاف، فالصالون كان شي راجل جالس و جلسات حداه المرأة و جلسنا انا و أحمد .
الأم : الحاج هايا البنت اللي هضرنا معاها لبارح
الرجل : مرحبا مرحبا شحال و حنا تنقلبو عليكم و ملقينا حتا واحد حتا يسر الله
انا : ايوا غير الدنيا و صافي أصلا كنت صغيرة ديك الوقت مكنت عارفة والو
الأم : نسيت مسولتك بعدا آش سماك الله؟
أنا : زينب
الحاج : تبارك الله، المهم هاوا إياد يجي من القراية و تشوفيه حتا تشبعي منو
انا : و ماغاديش يتأثر إلا عرف؟
الحاج : حنا معاودين ليه كلشي، المهم نتلاقا مع باباك و نحلو الأمور بيناتنا
انا : بابا الله يرحمو مات، انا اللي انتكفل بكلشي راني مبقيتش قاصر
الحاج : واخا هانتي غادي نسنيو واحد العقدة انا و ياك و نديرو ليكم تحليل DNA غير باش نتأكدو و صافي و تاخدي الوصاية ديالو
انا : واخا
مشا جاب واحد العقدة قريتها كانو فيها شي شروط على أنهم من حقهم يشوفوه وقتما بغاو و شي حوايج فحال هاكا، وقعت عليها و بقينا تنهضرو حتا دخل فرحان، غير جات عيني فعينو بقا تيشوف فيا و جا تيجري يعنقني و قال : ماما من شحال هادي و انا تنتسناك كنت عارفك اتجي، غير قالها طحت عليه عنقتو و بقينا تنبكيو و كلشي تأثر بداك المنظر، كان بصح تيشبه ليا بزاااف، البشرة ديالو بيضاء و عينيه خضرين فاتحين فحالي و شعرو زعر و عندو غمازات و نشيط بزاف، فعمرو 9 سنين، من بعد بقينا تنهضرو و بقيت معاهم ديك الليلة و هو نعس معنقني و انا تنعاود ليه على خواتاتي اللي هوما خواتاتو حتا هو و على ماما و حياتنا و كلشي، الغد مشينا درنا التحليل و النتائج ايخرجو حتا دوز 10 أيام كنت مضطرة أنني نرجع لمكناس حتا بيانو واخا مبغاش يتفرق عليا، فاش داز الوقت رجعنا كلنا هاد المرة حتا ماما و ندى و النتائج كانو إيجابيين طبعا، خدينا الوصاية ديالو ولكن قررنا يبقا معاهم حتا يسالي هاد العام و ولاو كل مرة تيجيو لعندنا ولا حنا تنمشيو لعندهم و فالصيف خيمنا مجموعين و انا و أحمد فوقما نتلاقاو نبداو ندابزو هههههه .
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
