طفولة ضائعة

الجزء 1

قصة بعنوان "طفولة ضائعة"
الكاتبة:  khullo
لا احلل النشر بدون ذكر الإسم
.........................................................................................................................................................
سلام معاكم زينب و اليوم بغيت نشارك معاكم قصتي و نعاود ليكم على حياتي اللي فيها بزاف ديال المغامرات و الأحداث ،نبداو من الطفولة ديالي ،انا من أسرة ميسورة الحمد لله، كنت عايشة فدار كبيييرة أفرادها كثار، كنا حنا 3 ديال البنات و جوج ولاد ،كان عندي خمس سنين داك الوقت كنت كأي طفل فالسن ديالو عزيز عليا اللعب و التحنقيز و كنت فتاة نشيطة و كلها حيوية و كنت أنا و خوتي نوفل اللي كان عندو 12 عام و انس 13 مدايرين عصابة، كنت تلعب معاهم و تنتفاهم معاهم كثر من خواتاتي البنات حيت هما فنظرهم البنت خصها تكون متبتة و تلعب لعاب مهدنين و انا هدشي مكانش تدخل ليا لراسي فمرة ،كانو عزازين عليا الحيوانات كنت مربية 3 ديال الكلاب و كانت عندنا فيرما خارجة على مدينتي شوية كنت تنمشي ليها مع عمي علال.
هو كان راجل كبير شوية كان تيقابلها و تيوكل البقر و الحوالا و دكشي ،و كنت ديما تنمشي لعندو و تيعلمني نحلب البقر و نوكل الحوالا و المعاز و هدشي خلاني نكون منفتحة كثر و منكبرش معقدة و متكبرة فحال بزاف دالبنات، كنت تنعتابرو أب ثاني ليا ،كان تيحطني فوق ركابيه و يعاود ليا الحكايات و تيعاودلي على مشاكلو وعلى حياتو و بزاف ديال الحوايج، كان تيسحابليه متنفهمش حيت صغيرة و لكن كنت تفهموا و تنحس بيه، و جا واحد النهار اللي كان من أسوء أيام حياتي ،داني بابا لعندو بحال ديما و جلست معاه و بقينا تنهضرو و شوية انقض عليا بحال الوحش و اغتصبني و اغتصب الطفولة ديالي و البراءة كلها اللي كانت فيا تمحات فديك الوقت،قتل الصورة ديال الشخص الحنون اللي كنت واخداها عليه ، و كانت هديك اكبر صدمة ، خلاني غارقة فدماياتي، ناض و هو كيلهث، و شاف فيا و مشا و خلاني فديك الحال ،هدشي طرا و انا عاد كملت 5 سنين .
فقت و لقيت راسي ناعسة فالطبيب و بابا تيشوف فيا من مورا الزاج، دخل الطبيب و هضر معايا و لكن مقدرتش نجاوبو ،بقيت تما مدة حتا بريت و داني بابا نيشان عند طبيب نفسي، و طول هاد المدة و اللي هي 10 أيام مشفتش خوتي و مشفتش ماما ، هضر معايا الطبيب و قال لبابا نبقا متبعا معاه و دكشي اللي كان ،دازت المدة و مع العلاج قدرت نتحسن و نرجع شوية كيف كنت .
دازو 5 سنين على دكشي و علال من داك النهار و حسو مقطوع و حتا انا نسيتو و حيدتو من بالي،ماما ولدات بنية أخرى بحال الشميسة و انا سميتها "ندى" فعمري دابا 10 سنين، و نوفل خويا عندو 17 عام و عقلو صغر مني كان باقي باغي يلعب ،تنعقل كانت عندي واحد المونيكا لابسة كسوة و طربوش خضرين كانت عزييييزة عليا و كان ديما تيبغي يعصبني.
نوفل : زينب جري جري تشوفي.
انا : (مشيت تنجري طليت من البالكون تنلقاه هازها من الطربوش و مخرج لسانو تيفقصني ) نوفااااااال انقتلك حطها.
نوفل : لسميتك زينب آجي خوديها بيديك .
انا : (هبطت تنجري للجردة و غير شافني مشا تيجري و انا تابعاه حتا سخفني، ملقيت حتا حل من غير سلاح المرأة هههه و انا نطلقها عليه بالبكا ) شفتيني بنت حكرتي عليا منك لله.
نوفل :وا صافي راكي عارفاني غير تنضحك معاك مبغيتش نبكيك صافي هاكي.
غير قرب ليا و انا نتلاح عليه تنقمشو و نضربو و بقينا هاكاك حتا عيينا و قلبناها ضحك.
نوفل :والله اشنيولا حتا راكي عزيزة عليا انت المفضلة عندي و لكن خلي هاد الهضرة بيناتنا ،إلى سمعاتني ندى غتكون هادي هي اللخرة ليا معاها.
انا :و أخيرا لقيت مناش تتخاف.
هاكدا كانو ياماتي تيدوزو، كان أقرب واحد ليا هو بابا و نوفل واخا كبر مني و لكن تنتفاهمو، كان هو توأم روحي و مخليناش شي كارثة إلا و درناها، و أنس كنا تنجروه ديما معانا تنزرفوه واخا هو مول العقل و لكن الغالب الله ههه.
سلمى و سارة كانو كبر مني و مقاربين و مفاهمين بيناتهم، و انا و انس و نوفل تنشكلو عصابة، و ندى هي الصغيرة و الدلوعة كلشي تيشد ليها الخاطر، ماما و بابا تيبغيو بعضهم و عمرهم تخاصمو ولا دابزو واخا بعد المرات تيكونو نقاشات بسيطة و لكن تيحلوها بالخاطر و التفاهم بيناتهم، ماما حياة كانت خدامة عندنا من الصغر و هي اللي رباتني و تنعتبرها أمي الثانية، و غيثة اللي كانت مربيا عندنا باباها مكانش فحالو و حالتهم المادية صعيبة، ماماها كانت تتخدم عندنا و تتجيبها معاها و فاش مرضات بابا قرر يخليها عندنا و نيت تنقص من مصاريفها عليهم و دكشي اللي كان،و كنت تنشوفها بنظرة كثر من بنت العروبية، اصلا حتا واحد ما ختار شكلو ولا عائلتو ولا مستواه المعيشي فعلاش التكبر ؟