طفولة ضائعة

الجزء 52

غير خرج محسيتش براسي حتا بديت تنغوت غير بوحدي، هرست ضربت بكيت مخليت مدرت و لكن الحرقة ديال ديك الكلمة مبغاتش تحيد، الغضب اللي كان فيا مبغاش يخمد، الألم اللي سببو ليا مبغاش يحبس، جات مروة لقاتني فديك الحالة تخلعات، بقات تتحاول تهدني ولكن والو، تتشدني و انا تندفعها، مابانت ليا غير المراية قدامي ضربتها حتا تهرسات و بقا الدم تيسيل، مروة شافت الدم تخلعات، و انا من كثرة مكنت معصبة محسيت لا بألم لا بوالو، حتا طحت، فاش فقت عرفت راسي فالطبيب، حسيت بيدي تتوجعني، كانت مخيطة و مربوطة بفاصمة بيضا، بان ليا بابا جالس حدا الكرسي و مروة شاداليا يدي و متكية عليها، تحركت شوية و هي تنوض .
مروة : زينب ختي خلعتينا عليك حرام عليك ديري لينا هاكا، باش تتحسي شوية
انا (بصوت متيتسمعش) : الحمد لله
بابا : بنتي كيبقيتي شوية، باش تتحسي دابا ؟
أنا : متنحسش بوالو
مروة : انا نخليكم على خاطركم
بابا : مالكي ابنتي شنو واقع ليك
انا : والو
بابا : لاكانت تضرك شي حاجة متخبيهاش عليا
انا : بابا تنعس حدايا ؟
بابا : نعس حدا الكبيدة ديالي
نعس حدايا بابا و انا زيرت عليه و بلا منحس بديت تنبكي، تنبكي و تنتنخصص، و هو معنقني مزير عليا و تيربت بلطف على راسي، معقلتش امتا و كيفاش نعست، فالصباح فيقاتني الممرضة و عطاتني الدوا و الفطور، من بعد جات عندي مروة بقات جالسة معايا و مسولاتني على والو، خرجت من الطبيب، دازو أيام و انا غير فالفراش، بابا خلا خدمتو و كلشي و بقا معايا و مروة كل نهار تتشرح ليا الدروس اللي فاتوني، قلت ليها را تفرقت مع علي و لكن معاودتش ليها لا علاش لا على كيفاش، بديت تنحس بالموت داخلاني، الدوا قتلني، واحد النهار كان بابا خارج عيطت على مروة، جات جلسات حدايا .
انا : مروة انت عارفة مكانتك قداش عندي ياك
مروة : معلوم حتا انت
انا : و عارفة شحال تنبغيك و شحال تنتيق فيك
مروة : شوية ههه
انا : هههه را تنهضر معاك بصح يا هاد البنت
مروة : آه كملي
انا : الموت هادي معرفنا شكون السابق و شكون اللاحق
مروة : دابا مالكي على هاد الهضرة دابا؟
أنا : بغيت نقوليك شي حاجة و تواعديني تنفيذها لمت
مروة : اوووف صافي حبسي من هدشي
انا : رآ تنهضر معاك بكل جدية، حلي ودنيك و سمعيني مزيان، هاد الهضرة أول مرة غنقولها لشي واحد، ماما الله يرحمها فاش مشات للرباط و داتني معاها كانت حاملة
مروة : اشنوووو
انا : كيفما سمعتي
مروة : يعني دابا انت عندك شي خوك ولا ختك آخر
انا : آيه بالضبط
مروة : و فينو و لا فينها دابا؟
أنا : معرفتش حيت من مور ما ولدات انا مبقيت عرفت لا فين داتو ولا شنو دارت ليه ولا والو و مكنتش نقدر نسولها
مروة : و شنو اديري دابا؟
أنا : اذا مت قولي هاد الهضرة لبابا
مروة : الله يستر، عرفتي دابا انا شحال مصدومة
انا : نقدر نتصور
مروة : و علاش مقلتيهاش ليه هادي شحال
انا : معرفتش واش خفت ولا مبغيتش نزيدو هم على هم والله معرفت
مروة : صافي كوني هانية و لكن طلبي الله يطول ليك عمرك متبقايش تقولي فحال هاكا
انا : المهم هايا فراسك دابا
مروة : ناااري عرفتي بعد المرات تنبقا نقول حسن عوانك كيتاديري تحملي هدشي كامل بزاف
انا : نقوليك كيتندير؟
مروة : اه قولي
انا : حيت عندي أب ديما فجنبي عارفة را عمرو يتخلى عليا، عندي أم واخا متكونش هي اللي ولداتني ولكن تنعتابرها الأم ديالي و كلشي، عندي خواتات فحال القمر ديما فجنبي مسانديني، و عندي شخص أقرب ليا من نفسي و اللي هو أنت، أنت اللي كثر من صحبتي بزاف، كثر من ختي بزاف، كثر من كلشي انت الكل فالكل، و عندي ربي سبحانه وتعالى و هذا هو الأهم
مروة : الصراحة عندك الحق، واعديني عمرك تخليني
انا : تنواعدك متفرقنا غير الموت
مروة : متفرقنا غير الموت
دازو أيام و ايام، علي كل نهار تيعيط كل دقيقة حتا بدلت النمرة، كل نهار تيجي لعندي تيحاول يعتذر مني، فعينيه باينة انه ندمان بزاف ولكن فاش اتنفع الندامة، سعد مبقينا عرفنا عليه حتا خبار، الامتحانات ديال آخر العام قربو و حنا بدينا نوجدو ليهم، وصلو دوزنا كلشي مزيان و بما أننا سالينا الامتحانات قررنا نخرجو من مور السونطر مع 8 نمشيو انا و مروة لشي ريسطو نتعشاو عاد نرجعو، و دكشي اللي كان، مشينا كلينا و ضحكنا كان كلشي عادي فحال كل مرة، خرجنا ركبنا فطونوبيل و تحركنا راجعين للدار، وقفنا فالضو لحمر حتا شعل لخضر، كانت الدنيا خاوية، وقع كلشي فلمح البصر، آخر حاجة عقلت عليها هي الصوت ديال الفران بالجهد و الصرخة ديال مروة و المنظر ديال الدم طاير فكل بلاصة، هدشي اللي قدرت تنفكر .