واحد النهار طلب مني علي نمشي لعندو للرباط نتعرف على ماماه حيت تيعاود ليها عليا و بغات تشوفني ، شحال و انا مترددة و لكن فكرت ان هدشي غيقوي الروابط بيناتنا و غيخليه يتيق فيا كثر باش يعاود ليا على ختو ، و دكشي اللي كان ، وصلنا لدارهم كانت عبارة عن فيلا ، فيها جردة زوينة و حوض ديال البط ، دخلني سلمت على ماماه كانت من اطيب الناس اللي عرفتهم ، رحبات بيا و فرحات بزاف ،كانت حتا جداه تما ، مرة كبيرة ولكن باقة زوينة ، بيضة و عينيها كحلين و مدايرة الكحل و غير تضحك ،باباه خدام برا تيجي من العطلة للعطلة ، دوزت معاهم النهار كان زوين بزاف ، و فاش بغيت نمشي ماماه مخلاتنيش قالت لي والو غتباتي ، شحال و هي تطلبني حتا حشمت منها ، صونيت لبابا و قلتها ليه و وافق ، سولني علي واش نبغي نعس بوحدي قلت ليه اللي كان ، عطاني بيت فيه ناموسية كبيرة و ماريو و واحد الشرجم كبير فحال البالكون ، انا حشمت نقوليه را متنقدرش نعس بوحدي ، حيت من نهار ماتت ماما و انا تنخاف نفيق شي نهار نلقا راسي بوحدي فحال اللي طرا ليا معاها ، نهار نبقا بوحدي تنبقا نشوف غير الكوابيس ،تنحس فحال شي واحد غيتعدا عليا و تنفيق تنغوت ،عييت نحاول نبدل هدشي و مقدرتش ،حتا الطبيب النفساني مقضا ليا والو ،كنت ديما تينعس حدايا بابا ولا ندى ، اصلا حتا هي متقدرش تنعس بوحدها تيخصها ضروري تنعس قابطة لشي واحد فحوايجو ، لمكانش متنعسش ،كنا تنعسو معانقين و تتعاود ليا و انا تنسمع ليها ،كنت تنحاول نحسسها بأنها ماشي بوحدها، مبغيتهاش تعيش اللي عشتو ،ندى عندها حال و عقل ،لتبعتيها تحمقك........عندنا ذكريات كثيرة مع بعضنا ،تكيت فوق الناموسية و هضرت مع مروة شوية فالتيليفون شبعاتني غا ضحك فحال ديما ، مشات تنعس و انا درت ليكيت و حاولت نعس مي مقدرتش ،شوية حتا تنسمع الدقان ، حليت لقيتها مامات علي .
هي : زينب باقا منعستي ياكما جاك البرد؟ ولا فيك الجوع ؟واش بغيتي تهضري مع باباك ؟ قوليلي راني فحال ماماك.
انا :لا أ خالتي غي ممولفاش نعس بوحدي و صافي.
هي : ههه قولي هاكاك اوا كون قلتيها ليا فالأول، تمشي تنعسي حدا جدة فالبيت ولا حدايا ؟
أنا : فينما كان معنديش مشكل .
هي : ايوا هي غتنعسي حدا جدة هي تتبقا سهرانة و الهضرة معاها غتعجبك.
انا : واخا و سمحيليا .
هي : مبيناتناش احبيبة يالاهي .
مشينا للبيت كان بلدي فيه ناموسية كبيرة و ماريو ديال الخشب و تلفازة صغيرة عادية ، و فالأرض محطوطة زريبة ديال الصلاة و مصحف ،كانت جدة جالسة كتفرج و دايرة نضاضر فعينيها و لابسة بينوار بيض .
خالتي مليكة (مامات علي) : الحاجة تبغي شي ضياف ؟
جدة :اوا لكانت غا بنيتي مرحبا، شي واحد آخر نجري عليه من العتبة ديال الباب .
انا : هههه ربي يخليك ا جدة .
جدة : اجي تخشاي حدايا را البرد تحرك هاد الليلة.
خالتي مليكة : يالاه خليتكم على خير انا انمشي نعس .
انا : تصبحي على خير.
جدة : قربي مني نعنقك، ايه فكرتيني غا فيام كانت تجي عندي بنتي تنعس حدايا ساعا دغيا تجوجات ومشات لبرا و كتجي غا من عامين لعامين راجلها عندو العطلة قصيرة مكتصيبش تجي كل عام .
انا : علاش خالتي مليكة ماشي بنتك .
جدة : مليكة غا مرت ولدي ولكن راها فمعزة بنتي .
انا : سبحان الله اللي يشوفكم يحلف حتا بنتك كون كانو الناس كاملين بحالكم كورا مكاينين لمشاكل ولا والو ، عرفتي انا ديما تنقول إلا كانت عندي شي عجوزة ضريفة نديرها فعينيا و نحسبها فحال ماما.
جدة : اوا حتا مليكة را ضريفة انا اللي معاشراها،عرفتي باينة راكي عزيزة على علي غير يدور يدور و يهضر عليك، و معمر باتت عندنا شي بنت تيعرفها، نتي اللولة .
انا : حتا هو عزيز عليا بلاصتو بوحدها .
جدة : اوا راه بعدا تيعرف يختار، الزين و التباتة و العقل و حلاوة اللسان، يعيا ميضور و ميجبرش فحالك.
انا : ربي يخليك.
جدة : ايه ابنيتي كون تشوفي، علي كانت عندو واحد ختو تتحمق بالزين، اشمنك يا شعر مسبسب اشمنك يا عينين ربيتها على يدي ساعا غير كبرات و تغرات بزينها ولات تجي معطلة و متخرج حتا تلبس و تقاد ، ملقات اللي يحكمها، علي صغر منها و لقات باها ملاهي مع الخدمة و حنا غي جوج عيالات كدير مبغات، ضيعات شرفها و سمحات فراسها ،نهار تجوجات و مشات لفرنسا طلقها الراجل على دكشي و سمح فيها و من تما مبقينا سمعنا عليها خبار ، كلنا تكوينا فيها.
انا : شنو سميتها ؟
جدة : سميتها إيمان ابنيتي .
انا : و معمرها عيطات عليكم ولا جات لعندكم ولا شي حاجة ؟
جدة : هي ماجات معيطات و حنا مبقينا سولنا فيها.
آو زعما صافي وصلت لطريق مسدودة، صافي تسالا كلشي، شهور و انا نبلاني و شحال باش نوصل ليهم باش فاللخر نسمع هدشي ،شنو خصني ندير دابا ،نستسلم و نكمل حياتي عادي فحالا مكان والو؟ و علي؟ شنو ندير معاه ؟ صافي خصني نحبس البازار كامل كان هدا هو قراري .
جدة : زينب واش نعستي ابنتي؟
أنا : لا نعام باقي.
جدة :باينة داك النعاس يالاه تغطاي مزيان انا نصلي و نجي نعس حداك .
انا : واخا جدة تصبحي على خير.
أنت تقرأ
طفولة ضائعة
Cerita Pendekقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
