انا : شوف ديك السكوليطة كيف تتحنزز فينا
سعد : اه تنعرفها
انا : تتعرفها؟
سعد : كانت هضرات معايا فالفيس و بغاتني نتصاحب معاها
انا : ايوا مالك متصاحبتيش معاها ؟
سعد : آش فيها ميعجب
انا : ايوا نتا بو بنات مخليتي معامن مشيتي و معامن تصاحبتي
سعد : دكشي كان غير تبرهيش ديال الاعدادي الواحد تيكبر و تيدير عقلو، و اصلا معمرني بغيت شي وحدة فيهم غا تنتفلا و صافي
انا : زعما بصح عمرك بغيتي ؟
سعد : بغيت مرة وحدة و صافي
انا : ياك و مقايلهاش ليا
سعد : مكانتش الفرصة و صافي
انا : و شكون هادي؟ تنعرفها؟ تتقرا هنا؟ فايتة شفتها؟ زوينة؟
سعد : غا بشوية عليك ،حتال من بعد و نعاود ليك هايا مروة جاية
انا : صبحنا على الله
سعد : علاش مالكي
انا : ماماليش
مروة : سلاااام
سعد : و عليكم السلام
مروة : جيتو بكري
سعد : اه
مروة : زينب كيبقيتي؟
أنا : (مخنزرة) غا هادي جوج دقايق كنت لاباس
مروة : مالكي عوتاني؟
أنا : مايل ليا على زين فعالك
سعد : زينب مالكي عاد كنا هاضرين عادي، واش مدابزين ولا
مروة : آه دابا عاد فهمت، نتي معجبكش الحال حيت قلت لباباك راكي مريضة ياك
انا : أختي تشكيت عليك حياتي هاديك و انا حرة، و دابا بسلامة
دخلنا نقراو و كل وحدة جلسات فقنت، كلشي عرف را طارية شي حاجة ماشي حتال لهيه حيت فأصلنا متنتفارقوش و لكن مسوقيش هي مكانش عليها تقولها ليه ،و مكلفات راسها حتا تقول سمحيليا، ولكن حتا انا زربت عليها، كانت جالسة حدايا عائشة كل مرة نغزها تشوف شي حاجة ولا نقوليها شي حاجة، تنسا را ماشي مروة اللي حدايا، الصراحة دازت الحصة مملة و السكات حيت حنا اللي موالفين تنهضرو متنسكتوش، سالات ديك جوج سوايع بستة و ستين كشيفة، خرجنا مع العشرة و مشيت للدار، دوزت العشية فحال الصباح، كنت تنتسناها غير تبغي تهضر معايا ولا تعتذر و نرجعو فحال قبل، ولكن لا ،دازو 3 أيام على نفس الحال، كنت غنموت، حسيت براسي مقطوعة من شجرة،سعد حاول يصلح بيناتنا و لكن والو، انا حلفت لهضرتها، اليوم عندنا عطلة فيها يومين و جات مع السبت و الحد هي 4 أيام اصلا السبت عندنا خاوي، الدار كلها مقلوبة و الروينة نايضة، عندنا حفلة فالدار بمناسبة التقاعد ديال بابا، كان طبيب جراح و فنفس الوقت عندو عدة مشاريع بشراكة مع عمي قاسم صديقو الحميم، الحفل أيكون نهار السبت فالعشية و ليوم الخميس، خرجت مع خواتاتي نديرو الشوبينغ، تمنيت كون كانت مروة معايا، فكرت نعتاذر منها ولكن هي اللي خطئات، شريت 3 ديال الكسوات مع الاكسسوارات اللي يجيو معاهم، و مستلزمات التجميل، و صبابط ديال الطالو، و حوايج آخرين، حتا خواتاتي نفس الشيء، رجعنا للدار عيانين مشينا نيشان نعسو، نعسات حدايا ندى ، ختي ندى تنبغي ندلعها تنقوليها ندوش، الغد داز النهار عادي، هضرت مع علي و طلبت منو يجي و وافق، سعد ضروري يجي حيت باباه صاحب بابا، و مروة نفس الشيء، نعست بكري و الغد فقت، خرجت نجري مع (louki) فحال كل نهار فالعطلة، رجعت دوشت و مشيت للصالون انا و ندى، صايبت بروشينغ بوكلي و ندى صايباتو عادي ،رجعنا للدار و بقينا تنختارو شنو نلبسو .
انا : شنو اللي حسن هادي و لا هادي، امكن هادي حسن.
ندى : ديري الكحلة نشوفها عليك.
انا : هايا.
ندى : و ديري هاد الزرقة، ممم صافي لبسي الزرقة جات معاك .
انا : حتا انا هدشي اللي بان ليا
سارة : شنو تديرو؟
ندى : تنشوفو شنو الكسوة اللي تلبسها زينب هاد العشية.
سارة :وريوني شنو عندكم
انا : كاينة هادي و كاينة هادي
سارة :بجوجهم زوينين ولكن تنقول الزرقة غتجيك حسن
ندى : حتا انا نفس الشيء
انا : صافي هي اللي انلبس
سلمى : زينب واخا نشوف لعندك شي اكسسوارات يجيوني مع هادي ؟
أنا : الله أودي شوفي اللي بغيتي ، عرفتو تيعجبني فاش تنتجمعو حنا بنات فحال هاكا.
ندى : حتا انا
سارة : حنا رانا تنتجمعو ديما نتي اللي اما تتكوني مع مروة و سعد ولا مع علي.
انا : ايوا معندي مندير و لكن را نتوما هوما لولين
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
