علي جلسني فوق الكرسي و شد المشطة بيديه و بدا تيمشط ليا شعري، جمعو ليا بلاستيك و دار ليا الكاسكيطة الكحلة فوق راسي.
علي : يالاه دابا كلشي واجد ، آري يديك
شد ليا يدي فحال شي بنوتة صغيرة غادة للمدرسة و هبطنا لتحت، لقيت بابا بستو و خرجنا نجريو ،كنا ديما فالعطل تنخرجو انا و بابا كل صباح مع روكس و تويكسي نجريو، روكس و تويكسي هما الكلاب ديالي تنتسطا عليهم كتر من شي ناس، بقينا غاديين تنتمشاو و تنهضرو، الهضرة معاه عندها طعم خاص، تمنيت كون الوقت حبس ديك الساعة و نبقاو غير تنتمشاو بجوج، نبقا غير معاه، كلما هضر تنتمنى لو أنه ميحبسش من الهضرة، كلامو زوين و نظراتو فاش تيشوف فيا تتخليني نغوص فعينيه كثر و نذوب فيه ،اويلي اش جالسة نخربق انا دابا، هاد الأفكار ديال شي وحدة فشي فلم مكسيكي جالسة تتفكر ففارس أحلامها .
علي : اينا أفكار ؟
أنا : اينا أفكار؟
علي : دابا عاد قلتي هاد الأفكار ديال شي وحدة فشي فلم مكسيكي جالسة تتفكر ففارس أحلامها .
انا : اويلي انا قلتها
علي : اه و سمعتك
انا : ولكن انا كنت هاضرة غير معا راسي
علي : ولكن انا سمعتك ،يالاه قوليلي اينا أفكار و تنواعدك يبقا سر بيناتنا
انا : آسير انا مقلت والو انت باغي تجبد ليا الهضرة من لساني و صافي
علي : اينا هضرة؟
اويلي شنو جالسة نخربق انا من الصباح ، حط يديه على راسي و يد أخرى على راسو
علي : مافيكش السخانة
انا : لا مفياش
علي : متأكدة؟
أنا : صافي صافي نسا مممم شنو الأكلة المفضلة ديالك؟
علي : الرفيسة و نتي؟
انا : انا تنتسطا على البايلا
علي : الناس ديال البايلا يا سلام
انا : أوف عييت
علي : جلسي نستاراحو هنا
انا : اوكي ، شوف كاينة محلبة تما شنو بان ليك نمشيو نفطرو تما ؟
علي : مكنتش متوقع نسمع فحال هاد الهضرة منك
انا : علاش مالها؟
علي : غير حيت مقارنة مع فين ساكنة و شنو تتلبسي و المستوى الاجتماعي ديالكم مكنتش تنظن بنت فحالك ترضى تاكل فمحلبة و لكن صدقتي رجولة
انا : ههه ياك اعشيري ايوا رشق عليها
مشينا فطرنا و رجعنا للدار، دوشت بالزربة و خرجنا نتساراو دوزنا وقت ولا اروع تغدينا فماكدونالدز و دزنا على مروة للدار خرجنا بثلاثة بينا كملنا المسارية و فالليل رجع علي للرباط و خلاني سارحة فأفكاري، تفكرت كل لحظة دوزتها معاه من نهار تعرفت عليه، تفكرت فالصباح فاش مشط ليا شعري، فاش ختار معايا شنو نلبس، فاش شدني من يدي ،تفكرت كيفاش تيشوف فيا،تنكون سعيدة فاش تنكون معاه ،تنسا كاع المشاكل ديالي و كاع آلامي، تنكون سعيدة حتا فاش تنكون مع سعد و مروة و مراد، و لكن فاش تنكون معاه إحساس مختلف، زعما يكون تيعجبني؟ ربما، وعلاش اللي ميعجبنيش هو بوكوس و شخصيتو قوية و تفكيرو نقي و زوين و معمرني شفت منو حاجة خايبة ، اصلا حتا سعد تيعجبني ،ولكن مع علي شي احساس مختلف ،بقيت سارحة فأفكاري حتا داني النعاس .
ضرباتني الفيقة مع الفجر ،توضيت و صليت حسيت بالراحة، طلعت للسطح كان باقي الظلام، بقيت تنفكر كيفاش ندوز ما بقا من هاد العطلة، ممشيتش هاد العام لتركيا حيت جدي و جدة هوما اللي جاو لعندنا، طاحت على بالي واحد الفكرة ولا أروع ،جبت المذكرة ديالي و بديت تنخطط للفكرة اللي جاتني و تندرسها، فاش ساليت هبطت لبست حوايجي و وصلني سعيد عند مروة، لقيتها باقا مافاقت، حلات ليا غير خالتي الباب و طلعت تنجري لعندها .
انا : مروة نوضي بغيت نهضر معاك
مروة : مراد واش كل صباح غتصدعني بحال هاكا
انا : وا را انا هادي زينب نوضي بغيت نهضر معاك
مروة : خليني نعس
انا : ماغاديش تنوضي ياكي انا غنوريك
تلاحيت فوقها و هي تنوض تقفز ،يالاه غتبدا تغوت و انا طحت تنتكرشخ بالضحك فالأرض على المنظر ديالها، هادو غير فعايل مراد، وجهها كلو مزربق بالفوترات و الكتابة بالستيلو و حالتها حالة و هي مجايبة للدنيا خبار، دخل مراد و شافني تنضحك و حدايا مروة مفاهمة حتا حاجة، غمزني باش نسكت و انا درت براسي را فهمتو، ناضت هي تغسل وجهها و تبدل حوايجها و تتقول الله يستر، هبطنا نفطرو بنما تلحق علينا، شوية تنسمعوها تتغوت و باينة معصبة .
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
