طلع لقاها طايحة فالحمام
علي.سهى سهى كنك نوضي بطلي طروح سهى.اااه
علي.كنك
سهى.بطنيي ورجعت سائل اصفر."وبدت تبكي"
علي.تغديتي انت"عرفها يوجعن فيها أعصاب المعدة ومش واكلة"
سهى.لالا
علي.صبي لسريرك
و عده للكوجينه جابلها حبة مهدء وكباية امية وجاها لقاها عالسرير
علي.هاكي
سهى.علي انا
علي بصوت عالي شويه.اسكتي توا وخوذي الحبة وارقدي
سهى زادت تبكي اخرى.مانبيش ناخد
علي.عليش
سهى.خليني نموت بيش تتريح
علي.اعصاب المعدة مايقتلنش يعذبنك بس خودي الحبة بلا عناد توجعش راسي نبي نرقد
"وحطها عالزيانة مع الكباية وجا رقد في الجيهة الاخرى قعدت تبكي"
علي.خلاص تو يوجعنك اخرى اسكتي
سهى.تو نطلع تبكي برة
علي.تطلعي نقتلك قايلك الحركة هذي نحبهش
ماردتش عليه
علي.خودي الحبة
سهى.مانبش ناخدها"وردت تبكي اخرى"
علي.ييييييه علينا
وقعمز ومد يده خذا الحبة ومسك فمها بيده وثبت وجها وحطها لها في فمها
علي.ازمطي
سهى.اممم مام ااام
علي بنت.ازمطي
سهى زمطتها وخدت امية
رد رقد
سهى سكتت شوية وردت تبكي اخرى
علي حط يديه علي عيونه وزفر و مابش يدويلها صبت من مكانها وطلعت للصالة ارقدت عالكنبة
علي.سهاااا
سهى.نعم
علي.ردي للدار قتلك الحركة هذي نحبهش
سهى مابتش ترد عليه
شويه وجاها
علي.صبي لدار
سهى.مانبيش
علي.عليش
سهى.هك مضايقه بنرقد بروحي
علي قعمز على نهاية الصالون ووطه راسه بين يديه بدت تبكي اخرى
علي.تو من يضايق انا ولا انت فهميني
سهى.مش عارف"غطت وجها بالمخدة"
علي تربع عالصالون.بحتي فيا صبي وبلا بكا
سهى قعمزت.نعم
علي .ليش ماقلتليش عليه ايام الخطبه
سهى.عمرك ماسالت والبنات قالنلي تفضحيش روحك وتحكي دام انك مستورة وربي ساترك دسيها
علي.بس هذا اسمه ضحك يعني كيف كان احساسك تمشي فيا وتحبي غيري
سهى.علي والله ماهكي باهي انت اول ايام الخطبه مارنيتش عليااا بككل وانا وقتها فته ومعش دويتله اساسا انا كنت معش نبيه لاني عرفت انه يدوي مع كمين بنت اخرى وهوا سكن بكل رغم انه دوتنا مع بعضنا شهرين بس وكلها كلها كانت انا نشكيله لكن انت انا حبيتك وهذا الي خلاني نزيد نتمسك بيك اخرى ونقولكش خفت نقولك تسيبني وقتها كنت تحب اسيل بس انا نحبك وبعد العملية كان تذكر وهكي انا نسيت موضوعه بكل اصلا نين رد الاسبوع الي فات ودوالي قتله متزوزة وخطاني وعديت وسيبته اليوم رد اخرى وقالي الي قلته لكي بس والله انا عمري ماحبيته كان نزوة وكنت نبي حد نشكيله لانه وقتها بابا وماما كانوا يبوا ينفصلوا وانت عارف القصه هذي"وبدت تبكي بعبرة"
علي مسك وجها وبده يمسح في دموعها.خلاص بس بطلي بكاء وخلينه ندووا كويس
سهى حضناته بقوة.ماتطلقنيش انا والله نحببك وهو كان نزوة وكنت فارغة بككل ومستحقه حد يسمعني وخلاص
وقعدت تبكي فترة وهو ساكت وماتحركش بكل وهي حاضنته
سهى.بتطلقني صااح
علي.ماردش
سهى.وين كنت باه
علي.عديت للأخ
سهى وخرت بسرعة.هيييييه شن درت
علي عديتله وربيته وريته الادب
سهى.هيييه وكان بلغ عليك معقوله تخطفه هبال هوا حييي علياااا تو شن بيصير مرات ينتقم منك ولا يدير الي هددني بيه
علي.مايصيرش شي حتى لو سيبتك مش حيستجرا يجي شورك
سهى سكتت وبدت تبحت فيه
علي.كنك
سهى.يعني تبي تطلقني صاح
علي.شن رأيك انت
سهى.بس
علي.بس شنو
سهى.بس انا نحبك والله وهو كان مجرد نزوة أرجوك علي تحاسبنيش على حاجة صارت في الماضي وانت المستقبل أرجوك
علي قعد يبحت فيها وساكت
سهى.خلاص مش حنقول أكثر من هكي انت واضح اتخذت قرارك
وصبت للدار وخذت شنطتها وبدت تلم في دبشها
علي قعد يفكر بينه وبين روحه.ياراجل معقولة تطلقها تي مذكر كيف صبرت عليك وعلى حبك لاسيل زمان ولا ناسي انت كيف متوقع منها تحكيلك وحضرتك تحب غيرها حتى هي انسان وتحس، لكن لا مستحيل نخلي وحدة حبت قبلي تعيش معايا في نفس الحوش وفي غيري حاكي معاها ويمكن حتى استغفر الله مستحيل سهى تديرهش وشن دراك تديرهش لو دايرتها كانت هي ولا الزفت الآخر قالوها، تي انت نسيت انك ماكنتش تكلم فيها اصلا أيام الخطبة ومع ذلك حباتك يعني ماكانش حب كان هروب!بس لا هي حباتك لما كنت تدويلها يااارب حرت حرت شن ندير!
ومشت الليلة علي يخمم وسهى لمت دبشها وخذاها النوم على الكرسي وهي تبكي بصوت مكتوم
#عندي_انا
بعد رقدنا نضت قيس ال4نسمع فيه يتوجع
انا.فارس حبيبي كنك"وحطيت يدي على جبهته
فارس.شكلي مرضت
انا.حي ساااخن بكككل
فارس.حاس روحي حامي بكل
انا قعدت نفك في بطم البجامة وبعدين حولتها لاه وصبيت للكوجينة جبت كمادات وجيته
فارس.ارقدي بس تو بكرة نعدي لدكتور
انا.حرارتك عالية لازم كمادات
فارس.اكيدة من تعباية المية امبدرري
انا.اكيدة"وحطيت الكمادات على جبهته"
فارس.مسققعه
انا.اها تلج حطيت فيها
فارس.راسي صدااع
انا.تو نجيبلك بنادول
"وطلعت للمطبخ جبت حبتين بنادول وكباية مية وجيته"
انا.نوض اتكي عليا قعمز بيش تاخد الحبه "ومسكته من يده وسندته عالسرير"
فارس.قوية ياطشة قدرتي ترفعيني
انا ابتسمت وحطيتله الحبه في فمه عضني في صبعي
انا.يامتوحش تو مريض انت حالك حال منابشه
فارس.ماهو الدوا مر يبي حاجة حلوة معاه
انا.باهي اشرب هي"وشربته المية وقعدت نمسح في لحيته من المية الي انكبت وهو يبوس في صوابعي"
فارس.تعرفي حاس الدنيا تدوور
انا.رد ارقد تو نديرلك كمادات
فارس نخش ندوش بمية مسقعه احسن
انا.باهي خش هي"وسندته للحمام كان يدروخ فارس مايمرضش واجد لكن مرضته بالمرضاات"
خش للحمام وانا قعدت في الدار بدلت المية ووتيتله دبش خفيف وطلعت للمطبخ درتله عصير ليم مسقع رديت لقيته راقد فالسرير
انا.هاك عصير يبرد عليك
فارس.فوتي توا بنرقد بس
انا.غير خوده حرارتك عالية بكل
فارس.هاتي به"وخذاه شربه كله"
انا.صحة
فارس.سلمك
انا.بردت توا
فارس.احسن من امبدري
انا.كويس تمام ارقد هي
فارس رقد وشويه وخذاه النوم وانا قعدت واعية ماجانش النوم خفت عليه وجه حمر وحرارته عالية خفت تصيرله حاجة قعدت مقعمزة عالسرير وماسكة يده ونبحت فيه نين طلع الصبح حطيت يدي على جبهته لقيتها خافة ششويه تطمنت تكيت راسي على حافة السرير وخداني النوم فطنت لفارس سقمني لوطة وحضني لكن كنت شبه راقدة مسكت فيه وكملت نومي
نضت لقيته مش يلايا انفجعت طلعت من الدار بسرعة لقيته فالصالة
انا تنفست.باهي تمام
فارس.كنك
انا.خفت عليك
فارس صبه من مكانه وجاني حط يده علي قلبي
فارس.اهدي كنك
انا.انفجعت خفت تكون صارتلك حاجة وطلعت
فارس.وجك اصفر وقلبك يدق اهدي
انا.تخيلت في لحظة تكون صارتلك حاجة نموت بعدها
فارس لمني بيديه الاثنين وحط يده على شعري.حبيبتي بلاها الدوة هذي خلاص اهدي انا كويس ومستحيل نسيبك
انا مسكت فيه زيين
"خذاني قعمزنا عالصالون"
فارس. فجعتك صاح حيوو اووي وينك
انا طبعا خداني النوم من التعب ورقدت فارس سقمني ورقد معايا
فارس.نوضي حبيبتي خلاص ساد نوم انا الي مريض صحصحت ونضت وانت لا
انا.خلاص خلاص سكنت
فارس.ههههههه سكنانك عالصبح هذا جربيه
انا.بنرقد يافارس من الاخير
فارس.هههههه ياطيرتي لازم تنوضي مش بتعدي للنادي
انا.حي صح باهي هي
"ونضت من مكاني خشيت للحمام دوشت عالسريع وطلعت للدار لبست سترتش وبدي ولفيت شعري كعكه وطلعت للمطبخ بديت ندير في قهوة درتها ليا سادة وهوا بحليب كالعادة"
فارس خش من السور.تمام بكل قهوة
انا.ااه تعال اشرب هيا
فارس.شن السماحة هذي
انا.نهبل صاح
فارس.بككل اخرى
انا.عيونك السمحات حبيبي
فارس.لا هكي مش حيصير من النادي
انا.لاخلاص سكتت
فارس.هههههه"وقعمز عالطاولة وحطيت صفرة المقين ومعاهن تبسي مقروض"
فارس.مقروضك عمرش ذقت كيفه من قبل فيه حاجة غريبة
انا.نحطله في سمن يعطي طعمه نحب نحطه في كل حاجة حتي البسبوسة
فارس.اوو خطرتيها عليا لكي واجد درتيهش
انا.تي سادك كل يوم حلو رايح سامن حتى تفاحة ادم بدة تختفي
فارس.معقوله
انا.ااه شوف انا قاعدة سمبتيك
فارس.تسمني فيا ومحافظه على روحك ياشينه صار
انا.هههههههه ماقتلكش كول بالغصب
فارس.هيا صبي البسي عبايتك توا خمسه الا ربع
انا.هيا هي
"وركبت للدار لبست العباية والكويش ابتاع هذك اليوم وبخيت عطر ونزلت ركبت فالسيارة"
فارس.بنت عطرك فايحة وحلوة
انا.حي صاااح بخيتش الا رشة
فارس.تو تحول قبل مانوصلو غادي دام انه كله صبايا عادي
انا.تمام
فارس.كنك حسيك تمشي فيا تمشاي
انا.كيف
فارس.مش عاجبك النادي
انا تلقائيا تعابير وجهي تغيرن
فارس.طلع وجه الطفلة الي خدوا لعبتها كنك ياطشه
انا.نبي نقرا
فارس.القصه نفسها مرة اخرى خلاص انسيها ضحي عشاني بالحاجة هذي بس
انا.باهي وهذا الي صار ورضيت بموضوع النادي انت الي تدقق
فارس.نحبش نحقهها النظرة الي كانت في عيونك امبدري تقهر فيا
انا.باهي تو شويه وتحول
فارس.نبيها تحول بنقاعة
انا تنهدت.اقنعني ان كل الاسباب الي قلتهن كافيات لانك تمنعني من القراية بغير وجه حق تو تختفي النظرة
فارس.نغار عليك من الاختلاط؛خايف عليك من التفجيرات والخطف والحرب فالبلاد؛مانبيش الدكاترة يمزطوك لانهم مجرد مايعرفوك متزوجة حيدرهوا كبدك انا نعرفهم
انا.امبه
فارس.امبه بتكشيخه جو فوتني
انا.به فوتني
فارس.مانش فايتك
انا.عليش
فارس.عشان نحبك وخايف عليييك من الهواء علي جمالك يشوفوه الانذال الي نحق فيهم فالمجتمع على ثقافتك وعقلك وتفكيرك هذينه حاجات مغريات يخلن واجدين يعجبوا بيك علي طبعك وشخصيتك المتكبرة الي تخليهم يحاولوا يدووا معاك بأي طريقة ويوصلولك
انا هزيت كتوفي وتنهدت.يسجن العصفور بذنب جماله
فارس قعد يضحك
انا.كنك تضحك صاح كان شينه ولا غبية راك خليتني نعدي
فارس.هههههههههههه اااه
انا.ياريتني شينه
فارس.تي عاساس سمحة انت"ومسك خشمي بين صوابعه"
انا.تي صدع عليت
فارس.ياصقع انت انزلي وصلنا
انا.هيا
"ونزلت نزل معايا"
انا.عليش نزلت
فارس.نخش معاك
انا.لا ممنوع نساء فقط
فارس.ااه تمام به خشي هي
انا.باي"وحركت فمي بلا صوت"نحبك
فارس حط يديه على عيونه.في الشارع ليش هكي بس
انا ضحكت علي هباله وخشيت للنادي سجلت وبديت ساعة مع الكوتش فالتمارين كانت حلوة
وقعمزت بعد التمارين نرجا في فارس يجي عديت يلا البنات هدرزت معاهن لين جاني روحت للحوش"
فارس.شن جو النادي
انا.ماشي حاله عادي يعني
فارس.كنه
انا.المدربة دمها ثقيل وتقولي الدلوعة الي غادي
فارس.هههههه عليش دلوعة
انا.عشان ماقدرتش نلمس صوابع كرعيا
فارس.احلفي
انا.والله
فارس قعد يضحك
انا.يييي حتى انت تضحك
فارس.عنجده لدرجة هذي مرخية
انا.اوووف ياسامط
فارس.ههههههههههه مستحيييل
انا.والله
فارس.جربي بس
انا طبست.هه نقدرش
فارس.صدقت امي الي تقول مرخية
انا.امك هذي لو نطير طيارة ماهو عاجبها
فارس. هههههههه
انا.فارس
فارس.ياعيونه
انا.نبي نعدي لدكتورة نراجع
فارس.تو كان جاتك نعدوا
انا.بس جتني الشهر هذا هي
فارس.اممممم خليها توا
انا.خلينه نعدوا اقل شي نطمن عااد
فارس.باهي ياستي بكرة نعدوا وتطمني
انا.به
فارس.نعدوا السبت بكرة جمعة
انا.عليك،قصة
فارس.شنو
انا.بكرة بنعدوا لهلك صاح
فارس.اكيد يعني
انا.اووووففف
فارس.هكي تزعلي فيا منك كنك مش طايقة هلي يعني
انا بحتت فيه.حرام عليك والله انت عارف كيف تعامل فيا امك وهذا كله صابرة وساكته وماتبينيش حتى ندوي يعني
فارس.تي غير بالشويه بس علي شن صابرة شن تغيريلها ولا توكلي فيها
انا.به به خلاص سكتت
فارس سكت وقعد يتفرج
#عند_سهى_وعلي
سهى كانت تلم في حاجتها وساكته بكل ليييين طلعت الشمس
سهى.انا ماشية لهلي ياعلي بس أذكر اكويس أن حتى انا صبرت عليك وعلى حبك لاسيل زمان ودرت الي ماتديراش بنت وتحملتك وانت تحكيلي عليها انا في يوم كان ممكن نخسر حياتي عشان حضرتك تبيني نقعد وتحكيلي عن اسيل
علي.شن لازمته الدوة هذي توا وحدة بوحدة يعني
سهى.ولا شي ولا ليها لزمة
"وطلعت من الحوش حطت الشنطة في السيارة من لاورة وردت خذت شنطة اليد وجاية بتطلع
علي. سهى
سهى.خلاص مافيش داعي تقول كلام أخرى وتجرحني بيه انا آسفة اني خشيت حياتك وعدي دور وحدة تانية شريفة مادوتش من قبل مع ذكر"وطلعت وصكرت الباب"
علي.معقولة بنسيبها تعدي
وصبى من مكانه طلعلها
ركبت في السيارة وبدت تبكي ولعت وجت بتوخر
علي دق عالقزاز.انزلي
سهى.مافيش داعي اتشيلني تو نعدي بروحي
علي.انزلي بلا هبال انزلي ينعنشكلك خليتيش فيا عقل
سهى.مانيش نازلة خليني نعدي خلاص
علي فتح الباب وشمرها ونزلها
سهى.في الشارع رانا شن تبي خليني نعدي
علي.تي شارع فاضي يااخت طالعة من فجور ربي
سهى.علي أرجوك سيبني خلاص بنعدي
علي تو نشيلك انا
سهى انصدمت حساته سطل مية انكب عليها
سهى.باهي هي
وركبت من الجنب علي ركب وبده يسوق
سهى.مش من هنا ولا نسيت
علي.لخبطت تو نعدي من مكان تاني
وطول وهو يبرم نين وقف قدام حوش هلها
سهى.باي
#يتبع
غياب حيو توا عشان الحلقات الجاية حيكونن كلهن عليها💙
