#حكاية_حياة
..................................................
البواب.الو
مجدي.ايوا يامنعم
البواب.الحق ياسعدت البي
مجدي.كنك شن في
البواب.في راجل جي للست حياة وشدها من شعرها خدها معاه وانا ماقدرتش اتدخل وهوا ضربني
مجدي.تي لا ازح باهي خلاص صكر تو نشوف
"صكرت منه"
تو زعمك نرن شن بنقول باهي بنخليها لهم مهناك ماننقذ كان بيديروا حاجه داروها وصار اللي صار والله ماتستاهل البنت كويسه وحسيها كانت صادقه مش كذابه ليش ماوثقت فيها بس والله خسرتها انا
#مروة
كنت راقدة في داري ونبكي خش فارس
مروة.خير
فارس.باتك قاللي يوسف طلقك
مروة خنقتها العبرة.اها
فارس.عليش
مروة.ماتفاهمنش ووو
فارس.عرف بموضوع حياة مه
مروة فنصت عيونها.موضوع شنو
فارس.تحسابي روحك الوحيدة.اللي تعلم
مروة.نعلم شنو
فارس.انه حياة حملت وأسقطت فال2011وانه انا اللي شلتها واسعفتها عاساس مريضه نزلت متدكرة هدك اليوم
مروة.وانته كيف عرفت القصه
فارس.مادخلكش كيف عرفت
مروة.باهي شن تبي توا
فارس.بنعرف القصه كلها من هوا اللي غلطت معاه وليش
مروة.غلطت معاه؟؟ فارس انته شن تعرف بااظبط
فارس.نعرف انها مش شريفة وماصانتش خوتها وحملت بالزنى
مروة.وكيف وصلت انته لهالاستنتاج القوي الفذ
فارس.جاني من وضحلي
مروة.احكيلي بوضوح وبلا فترشة
فارس.بس بعدها تحكيلي انت القصه كلها.
مروة.حاضر
فارس.يوم اللي عديت طلبتها فالليل اغمى عليها وسعفتها غادي جت الممرضه وبحتت فيها ودارتلها تغذيه بعدين قالتلي
الممرضه. انت زوجها
فارس .اها
الممرضه.يناعليا بالله كيف حالها البنت هذي في بالي من ايام ال2011لما جت صايرلها اجهاض كان حالها يقطع القلب جت هيا وسلفتها تيالي جايبهن خو سلفتها ندكر راجلها مصاب وخوها توفا
فارس.شن تقولي انت متأكدة بحتي في وجها متأكده
الممرضه.اها متاكدة وجها هوا هوا
فارس.اهااااااا باهي بارك الله فيك
الممرضه.علي شنو
فارس.شي شي
"وخش علي"
-----
فارس.وهكي فهمت القصه وفهمت ليش هي تبينيش لانها وحدة$$$$وماضيها اسود
مروة بدت تبكي بعلو صوتها.انته غبيييييي انته قهرتها حرام علييييك
فارس.ماتزيدينش يامروة انا نادم لعند توا على كل شي لكن راعيني مش ساهله عليا طلعت البنت &&&
مروة قعدت تمسح في دموعها
فارس.احكيلي توا كيف وشن وليش وطبعا انا ساكت علي موضوع انك تضحكي عليا،وتخليني نشيلها للمستشفى ومن ورا خوتها
مروة.انته غبي وفاهم غلط ومش هكي القصه
فارس.احكي شن فاهم غلط
مروة.القصه انه"وحكتها لاه من اول للاخر"
فارس كان يسمع فيها ومفنص عيونه.مستحيل...مستحيييل
مروة.والله مانكدب ماعندش مصلحه فالكدب توا
فارس قعد يخبط في وجه.انا ظلمتها ظلمتها
مروة قعدت تضحك.هيا يعني جت عليك مش اول واحد يظلمها انضم للطابور
فارس.وانت ليش ساكته
مروة.حضرتك دويت ولاقتلي
فارس.شن بنقولك ماقدرتش
مروة.اطلع
فارس.باهي يوسف ليش طلقك
مروة.الوحيد العالم بالقصه انا وكانت مستحقه شاهد يصبي معاها وانا شهدت ويوسف طلقني عشان كنت داسه عليه
فارس.انت وياها غبيااااات لو دوتلي والله ماكنت حنفضحها كنت حناخدها انا نحبها وعارف اخلاقها عشان هكي انصدمت لما قالتلي الممرضه ليش دسيتن هكي
مروة.كانت خايفتك تسيبها مابتش تحرج روحها قالت ندس سري ونعيش في حوش هلي ونسكت
فارس.باهي انت ليش ماحكيتيلي او حكيتي لخوها
مروة.خفتك تصدقش وتفهم غلط وماكنتش نبي نعشمها فيك
فارس.وعاجبك اللي صار
مروة.ماكنتش متوقعه اللي يصير كنا متفقين انها بتعيش في حوش هلها وبلا زواج
فارس.حتى علي الله يهديه
مرروة.بس معقووله مستشفى كامل تصدفش الا هذك الممرضه
فارس.ماهو لانه الطاقم الممرضات الخاص بالنساء فالمستشفى هذا طشة اصلا معروف
مروة.حظها اسود هالبنت
فارس.ضربوها خوتها
مروة.بيقتلوها مسكينه شكلها يهد العمر
فارس عيونه رقرقرن وصكرهن ومشى يده علي وجه
مروة.يعني توا
فارس.شنو
مروة.شن نديروا
فارس.مش عارف حاير حاس روحي حقير ظلمتها وشكيت فيها وظلمت وداد وروحي حاس روحي متلخبط
مروة.تزوزها عادي
فارس.ووداد ترضى وخوتها يرضو ولالا
مروة.مش عارف خليهم توا فترة بس بجد يافارس طحت من عيني كيف تشك فيها هكي وانته تعرفها
فارس.تزيديهش عليا
مروة.ممكن تطلع وقول لوداد اعتذرلي منها مريضه نبي نتريح
فارس.به
"طلع لقا وداد متحشمه ومقعمزة مع بات فارس ومتخزرطه"
فارس.باهي ياباتي نحنه بنروحوا ونجو مرة اخرى
خليل.باهي بالسلامه
"طلعوا للسيارة"
وداد.وين مروة
فارس.مريضه
وداد.جيتي اعععع بكككل ماكانش مفروض منها قتلك من الاول فوتها امك فالعزا ماتجيش شوف الموقف المحرج اللي حطيتني فيه ومروة ماطلعتش مريضه ووواضح باتك متنرفز،عشان طلاق مروة ليش هالموقف ليش
فارس.وداد نبيش نسمع صوت لاني مضايق اسكتي
وداد.به
روحنا للحوش خشيت للحمام وقعدت تحت المية الساخنه نفكر انا شن درت دمرت حياتي وحياة.اللي نحبها بسوء تفاهم غبي لكن شن بيعرفني وقتها نستاهل كان لازم نسمع منها نشوفها اي حاجه. مرايف عليها عالاخررر بنموت ونشوفها حاس روحي ظااالم ومظلوم في نفس الوقت طلعت من الحمام للسرير دغري نبيش نحق وجه وداد حاس روحي ظلمتها معايا مش طايقها طلعت نقالي وخشيت علي صورها وبديت نتفرج عليهن ووداد كانت فالصاله قعدت نتفرج وفطنت لدمعة نزلت من عيوني كنت نبكي عليها زعمك شن حالك توا ياحياة ياضحية ظلم من الجميع ياللي حتى حبيبك شك فيك وظلمك.
#عندنا
فطنت لروحي.واخدني نوم وليل طلعت لوسط الحوش ماكانش قاعد حد امي في دارها ومسكرة ويوسف مش قاعد سمعت صوت من دار علي عديت جنبها لقيته طارح صلاية ومقعمز
علي.ياربي شن داير انا خلااااااااص معش نتحمل خلااااااص شن ندير وريني شن ندير البنت كسرت ظهري ياباتي تعبت انا الغلطان والله حاولت ندير كل شي في مصلحتها انا عارف اني ظلمتها بضربي لها لكن من حسرتي عليها والله من حسرتي عليها"وبده يبكي"ياباااااااتي ياعزوتي ياسندي فقدتك عليم الله اني فقدتك محتاجلك مستحقلك تعبت والله تعبت ماشفتش يوم مسقم نبي من نشكيله من نعبى عليه حملي كبييييير "وسجد وقعد يبكي انسحبت لاورة،خبطت في حاجة برمت بسرعه لقيته يوسف يبحت فيا كنت نبكي بصوت،مكتوم،رميت روحي عليه بنحضنه متعودة لما نبكي نحضنه بس اللي داره كان اول مرة تصيرلي دفني وخرني وعدى لداره صكرها بالمفتاح انهرت بالبكا في وسط الحوش معش قادرة نتحمل الا يوسف
طلع علي
علي.صبي لدارك.
انا بصوت يادوبك طالع من البكا.اقتلوني خلاااأاااص اقتلوني تعبت تعبت،تعبت عييييييييت"وصبيت نجري للحمام وهوا منفجع مني مسكت شيشه البوطاس وحطيتها علي فمي شبه شربت منها قبل مايفكها مني
علي.شن تديري انت شن،تديري
انا.نبي ننهي حياتي معاناتي ومعاناتكم معايا خلاص.
علي.حياة والله ماعندي لكي لاجهد لانية لا شي سالتك بالله خشي دارك وفكينا من الوجيج
انا.بس
علي.خشي خلاص بلا كترت هرجة تعبتيني معاك
'وسيبني وعدى لداره'
خشيت لداري واطوحت عالسرير وبكيت ليييين خداني النوم
#عند_سالم
بعد كملت القصه في حوشنا ركب للشقه
هدى.بيبي شن في كنكم
سالم.هدى نسمعش حرف بنرقد وبكرة ندوو
هدى.حاضر
#تاني_يوم
فتحت عيوني وانا عارفه انه حياة جديدة بتنفرض عليا مش عارفه شن هيا قلت نطلع نواجها وهذا اللي صار بدلت دبشي ولميت شعري وطلعت للحمام وبعدها صليت ودعيييت نين طاب خاطري وصبيت خشيت للمطبخ لقيت ماما تدير في فطور مادويتش معااها صبيت كباية وعديت بيها لداري شربتها ورديتها للمطبخ قعدت فالدار نقرا في كتب وخلاص استغربت في يوسف ماطلعش بكل بحتت في داره لقيت دبشه وحاجته كلها مش قاعدة مابيتش نسال وشغلني وين عدا وكلا سالم وهدى شفتهمش بكل وعلي خطم من يلايا وانا شايله كباية الحليب للمطبخ مع تبحيتت عندك وجه تاكلي انت
وهكي مشا اليوم وانا فالدار مانحتكش ماندويش الا فالضروري والوكال لما نجوع نخش ناكل لانه يوسف مش قاعد وسالم ياكل فشقته وعلي يطلع الصبح يروح الليل وماما تاكل فالمطبخ ماكنش نلتموا علي سفرة
زعمك فارس علم شن صارلي حكتله مروة ولالا انا ليش نفكر فيه توا اووف
#ومر_شهر
انا في حوش هلي ماما معاملتها الجافه معايا خفت شويه وهدى تنزل تهدرز فالعشيه واضح انها تعلم لكن مادوتش بككل علي فايتني بكل وسالم كذلك ويوسف💔عرفت انه طلق مروة بسببي عشان كانت داسه مسكينه وجعتني ومن قهرته عدى عاش في شقتهم اللي كان بيسكن فيها ومعش شفناه بكل مايجيش مايدورش مجدي حتى هوا اختفى ماحاولش يتدخل بكككل
#عند_مروة
فاطمه.مروة حبيبتي خلاص بكا مش اول وحدة تطلق حرام عليك نوضي
مروة.نعم ياماما شنو
فاطمه.جايتنا صحبتي وبنتها بيهدرزن
مروة.فكيني منهن
فاطمه.عيب غير صبي هيا بس
مروة.به
"صبت مروة لبست حاجه عادية وقعمزت ترجا نين جن الضيوف"
فاطمه.خير يانجوتا كيف حالك
نجاة.خيرات كيف حالك انت كيف حال مروة
فاطمه.الحمدلله كيف حالك ياسوما
ابتسام.كويسه الحمدلله😎
فاطمه.مروة تعالي سلمي
"جت مروة سلمت علينا وقعمزت شويه"
فاطمه.مروة صبي انت وابتسام هدرزن نبي نحكي انا ونجاة
مروة.به😐
"وصبت ابتسام ومروة لدارها"
مروة.كيف حالك
ابتسام.الحمدلله وانت
مروة.الحمدلله
ابتسام.كنك حسيك مضايقه عالاخر
مروة.اه لا شي
ابتسام.عموماً انت مستحقه تفضفضي لانه واضح من جسمك ووجهك وكلامك انك مضايقه ومرهقه نفسياً
مروة خقنتها العبرة.عادي حاجه بسيطه
ابتسام.ماما قالتلي اطلقتي قبل عرسك بشهر او اتنين تيالي
مروة قعدت تبكي.اها
ابتسام.تحبيه
مروة.موووت
ابتسام.وهوا
مروة.يحبني لدرجة الوجع
ابتسام.باهي شن صار ليش اطلقتوا
مروة.نحكيلك بس سر مايعلمش حد حتى ماما لاني مستحقه ندوي بنحكي تعبت من الدس
ابتسام.سرك في بير احكي
مروة.حكت القصه من اولها لعنننننند اخرها
ابتسام.مستحيل مستحيل عليك انسانه وعليك صبر القصه تصدقش
مروة.فعلاً
ابتسام.بس كيف صار هكي هي غلطت واجد وانت والقصه معقدة الصراحة
مروة.غلطنا وعقدنا القصه وتبهدلنا وانا خسرت يوسف وهي خسرت فارس
ابتسام.وشن حالها توا
مروة.مش عارف انقطعت عليها مافيش كيف نواصلها
ابتسام.نبي نتواصل معاها
مروة.ليش
ابتسام.نبي نتعرف عليها وممكن حتى ندير قصتها رواية
مروة تنهدت.رواية مافيهش نهاية سعيدة
ابتسام.نديرلها انا نهاية او ممكن مع الوقت ربي يرزقها بنهاية حلوة.
مروة.ان شاء الله يارب
ابتسام.تريحتي بعد حكيتي
مروة.بكل والله لاني كنت محتاجة لحد نفضفضله بس تعرفي
ابتسام.شنو
مروة.اعقل من عمرك بواجد يعني حسيت روحي ندوي مع مرا كبيرة في.عمري
ابتسام.ههههههه
مروة.صبي نقعمزوا يلاهن هي
#ابتسام
عرفتوني😃انا بيس اللي نكتبلكم فالرواية
هذي كانت بداية معرفتي بمروة وحياة قصتها لما.روحت ماخلتنيش نرقد الليل من كترت مافكرت فيها مش عارفه كيف ممكن نوصلها نبي ندوي معاها نبي نهنيها علي شجاعتها ولا اي حاجه حاسه انها انسانه تستحق كل.التقدير امثال حياة في مجتمعنا واااجد مسكينات ومظلومات ولازم نساعدوهن نصبو معاهن نغيروا نظرة المجتمع لهن ونظرتنا نحنه اول شي!
اها نظرتنا تعالو نديروا ارواحنا نعرفوش القصه بكككل وسمعنا عن وحدة لقوها في شقه بروحها مطلقها راجلها شن حنقولو؟اكيد حنعطوا تفسيرات من سوادها نين الشيطان يذهل
ولا لو سمعنا بي وحدة راجلها طلقها وهي قالت انها مغتصبة دغري حيطلعن اقاويل من نوعية تبي تبرأ روحها بس كان عيطت ولا طلعت من الحوش مش هذا حالها لكن عاجبها
في حتى واجدات قرن الرواية وعلقن قالن هذي تكذب عليك شكلها غلطت مع صاحبها وبتدفها في جماعة معمر وتدير روحها مظلومة
عشان هكي انا حننشر قصة حياة.
#في_حوشنا
كنت في داري كالعادة نقرا في كتب خش علي قعمز فالصاله طلعتله
انا.علي
علي.نعم
انا.نبي حاجتي من شقة مجدي.دبشي ونقالي وحاجاتي كلهن
علي.عندك مفتاحها
انا.لا
علي.خلاص معناته
انا.كيف خلاص
علي.شن تبيني ندير نرن علي مجدي
انا.نبي نقال
علي.تو نجيبلك
وصبيت من يلاه وخشيت للدار
وقعدن يمشن الايام معش حسيت بيهن حياتي بلا طعمه نين في يوم
انا.ماما
ماما.نعم
انا.مزلتي مضايقه مني"قعدت نبكي"
ماما حضنتني وقعدت تبكي.لا يابنيتي انا والله واجعتيني اكثر من ماراقيتلي منك لكن ليش مادويتيلي راني والله صبيت معاك
انا.كنت متحشمه منك وفي نفس الوقت
كنت خايفه علي قلبك والله
ماما مشت بيا للصاله قعمزت ورقدت علي كراعها وقعدت تمشي علي شعري كان احساس حلوووو حسيت بالامان بالراحة اللي ليا فترة فاقدتها
ماما.ورس بنيتي استسمحي خوتك وردو زي ماكنتوا هما راهم عاذرينك وواجعتيهم لكن راقيلهم عشان مادويتيش ادويلهم انت وواصليهم وحاولي تردوا زي قبل وخلي يوسف يرد للحوش العيل هذا واجعني حاله خسر مراته اللي يحبها
انا.حاضر ياماما نحاول اليوم نصالحهم بس ساعديني
ماما.خلاص انت كبيرة وشفتي من الدنيا اللي عطاك اكبر من عمرك بوواااجد وتقدري تكملي بلايا يابنيتي انا خلاص تعبت وكمل وقتي فهالدنيا
انا صبيت وحضنتها قعدت نبكي.تقولليش هكي ربي يخليك لنا يااارب
ماما.اسمعيني ذهبي اللي عندي تبيعوشي ذكرى عندي من المرحوم وصايغه ليا بيديه ماتخلوش حد غيرك انت وبناتك يلبسنه
انا.ماحد غيرك حيلبسه انت ديما معانا وحتلبسيه وانا خلاص معش نبي نزوز ولانبي شي بنقعد معاك ونبي نبقى معاك
ماما.لا ورس بنيتي اوعديني تزوزي وتعيشي حياتك انت مش اول وحدة تطلق وعذرك معاك ازوزي وكملي حياتك واقري
انا.ان شاء الله نجيب شهادتي ونفرحك بيها
ماما.ان شاء الله صبي صبي ديريلي الكسكسو ابتاعك الفايح هذك خاطري فيه
انا.حاضر هي
"وصبيت للكوجينه وبديت ندير فيه تيالي ساعتين بيش كملته كسكسو بالتقليه وقلايا ومصير حطيتهن في صفرة علي خشت علي خش مدلي باكو التلفون وجا بيطلع.
انا.علي
برم عليا.نعم
انا.مزلت شايل عليا
علي قعد يبحت في عيوني وساكت.
انا.سامحتني
علي.انا ياحياة والله نبي مصلحتك نحاول نوفق علي قد مانقدر ماكنتش عارف اني نظلم فيك وانت غلطتي غلطتي واااجد كنتي دويتي في يومها ولا يوم العرس ولا اي حاجه راه وقفنا معاك راه سترناك
انا.عارفه عارفه لكن ماقدرتش كل مرة بندوي نقول اسكتي وتو مرة تانيه ندوي ونكون لقيت حل غلطت في حقكم واجد و"خنقتني العبرة"
علي.خلاص مافش داعي للكلام هذا توا
انا.يعني سا"قاطعني"
علي.نقدرش نشيل عليك انت خيتي الصغيرة"وحضني"قعدت نبكي
علي.خلاص ياهبله اسكتي وحطيلنا الغدا هي بعدك ليا زمان علي كسكسو ابتاعك
ضحكت ومسحت دموعي
ومديتله السفرة شالها وخديت المفرش طلعته معاه ومشينا فالممر
علي.احسن حاجه فالموضوع انه افتكينا من وجه العبيط ومراته
انا قعدت نضحك وهوا يضحك وخشينا لماما فالصاله
حقتنا ماما.ان شاء الله ديما ياربي
علي.ان شاء الله
"قعمزنا بناكلو"
ماما.اركبي نادي هدى وسالم يجو يتغدو اكيد مروحين من العمل وهي مش مسوية
انا.زعمك
ماما.اها علي ماتاكلش اصبر
علي.به هي
"ركبت دقيت الشقه فتحتلي هدى"
انا.سالم قاعد
هدى.اها روحنا توا من العمل
انا.كلميه قالتلكم ماما وانزلو تغدوا معانا
دايرة كسكسو
هدى.ياريت والله بعدك نبي نطلع طبيخه من الفريز طعمته مش سمحه
سالم.من عالباب ياهدى
"وجا للباب وصبى قعد يبحت فيا هدى فهمت الجو وخرت وخشت"
سالم.شن تبي
انا.جايه نقولك انزل تغدا دايرة الغدا
سالم.نبيش منك شي
انا.شن درتلك
سالم.مادرتي شي هذا كله
انا.حرام عليك شن درت
سالم.انا اول من شفتيه بعد الكارثه لو دويتيلي كنت طلعت قتلته
انا.باهي كنت صغيرة وغلطت وماعرفتش نصرف مش عارفه خطورة الموقف
سالم تنهد.
انا قعدت نبكي.خلاص تعبت ياسالم تبقوش انتم والزمان عليا
سالم حط يده علي شعري. خلاص بطلي،بكا يامطرشقه
انا.مش راقيتلك خلاص
سالم ضربني بوني علي كتفي.لا خلاص اسكتي بس وانت دموعك علي سبلع
انا ابتسمت.باهي تمام انزلو كولو هي
سالم. باهي وخودي المشفشفه الاخرى في طريقك
انا.فالنهاية قعد شعرها كيفي غصبا عنك
سالم.ههههههه بنحصل فيها تشبهلك وشينه وطبعها عصبي نسختك الصغيرة
انا.وينها هي
سالم.اسو تعالي بيبت بابا
جت تجري.عميمة
طبست شمرتها وقعدت نبوس فيها.ها حبيبة عميمة
اسو.امممووواه
انا.اجكليا تهبلي
"نزلت بيها وشويه هكي ولحقوني"
ماما.كان ترنولي علي يوسف بنشوفه كم ليا عليه
انا.نرن عليه
ماما.اها رني اصبر ياعلي ماتاكلش
علي.قيسها ليلة
"صبيت طلعت النقال ورنيت عليه"
يوسف.الو
انا.ا اا اا اهلا
يوسف.شن تبي
انا.ماما تبيك قالتلك تعال
يوسف.مريضه هي
انا.اها شويه
يوسف.اني جايكم فالعشيه
انا.تبيك توا هي
يوسف.حاضر انا قريب اصلا
انا.حتى انا نبيك،راه
يوسف.نبيلكش وجه"صكر"
انقهرت توقعتش هالشي من يوسف كلهم يديروا هكي ممكن لكن يوسف انقهرت قعدت نبكي بعدين جففت عيوني وطلعت
ماما.ها يبي يجيي
انا.اها قاللي قريب
ماما.تاكش ياعلي
انا.تو نزيد صفرة اخرى
ماما.لالا خليكم كلكم عنفس الصفرة نبيكم
انا.به معناته حولوها وحطو عالمفرش
ماما.باهي هي
"وحولنا الصفرة وقعدت نرتب فيهن انا وهدى دق الباب"
صبى سالم فتح
سالم.باهي اللي شفناك
يوسف.كنك
سالم.عليش بروحك فالشقه وحالتك حاله وقالولي بديت تدخن
يوسف.خاطاني
سالم.خش خش امك تبيك
يوسف.قالولي مريضه
سالم.لا كويسه مافيها شي غير تبيك تتغدا معاها
يوسف.اهااا
"وخش يوسف بحتت فيه فجعني ناقص عيونه خاشات وحمر ومنسود ومبهدل"
يوسف.خير ياامي كيف حالك
ماما.الحمدلله وينك عليش طلعت من الحوش
يوسف.والله عديت بنقعد في شقتي خلاص
ماما.وكنها دارك هنا منيش.تشكي
يوسف.كويسه انا نبي شقتي
ماما.براحتك هي قدموا كولو
"قعدنا ناكلو وكلهم منسجمين ويدووا عادي الا انا ويوسف نزلتش عيوني من عليه وهوا راسه لوطه ويجامل مش ياكل"
خليته براحته كملو وكال صبينا كلنا كل واحد عدى لحاجته
هدى وسالم.اركبوا
وعلي خش لداره
ويوسف طلع
خشيت ضميت الصفرة وكملتها وطلعت قيلت وماما خشت لدارها قيلت.
نضت فالعشيه درت صفرة نسكافيه وكاكاو جيت بنكلم علي لقيته طالع خشيت لماما فالدار
انا.ماما ماما نوضي
ماما...
ماما نوضي
ماما كنك ردي عليا ماماااا
يامامااااااااااا
يانعلييييييي ياماما نوضي نوضي نوضي
طلعت نجري قعدت ندق علي شقة سالم
هدى.كنك ياحياة
انا.الحقيني بسرعه ماما ياهدى وين سالم وييين
هدى.سالم نزل للشارع توا ونزلنا نحنه الاثنين نجروا طلعت للشارع نجري
انا.سالم سالم
سالم جاني بسرعه.كنك شن في خشي خشي جوا
انا.ماما ياسالم ماما معرقه وساخنه ونواعي فيها تردش عليا
"خش سالم يجري وانا لبست عبايتي وايشاربي"
وجيته للدار لقيت سالم يشوف في قلبها
سالم.بسرعه مزال فيها نبض هيا
وشمرها وطلع وانا وراه
#يتبع
