الدكتورة.مدام حياة انت الي صايرلك من اسبوعين هذا نزيف مش دورة لانك حامل من شهر ومعاها
انا.شش ش شنو
الدكتورة.مبروك انت حامل
انا.لالا صدقيني انت ملخبطه راه انا حسيتش بأي اعراض لادوخة لاترجيع لا ولا حاااجة
الدكتورة.ممكن كان في وفطنتش وممكن انت نوعيتك مافش اعراض وحم عادي تصير
انا.يعني انا حامل
الدكتورة.تعالي عالجهاز تفرجي أستاذ فارس ليش الصمت
فارس.مذهول وفرحان للصراحة لاني خشيت للغرفة وانا حاس روحي انحرمت من العيال للابد وتوا اكتشفت اني اب احساس خيالي
الدكتورة.الحمدلله مدام حياة تعالي هنا عالسرير
حيت بنصبي كانت يدي ماسكه في يده فارس رفعه وباسها وبعدها صبه معايا مشينه للسرير ساعدني عالركبا
الدكتورة.حطت السائل وبدت تدير في الجهاز ونحنه نتفرجوا كان منظر مؤثر بكل فرحت بيه منظره في بطني بيبي كائن من صلب فارس قاعد يكبر بداخلي عشان يجي للعالم حنكون ام واخيرا
فارس.قصدك هذا هوا
الدكتورة.ايييواه ههذا هوا
فارس.تي مش باين منه شي
الدكتورة.ههههههه مزالت في بداية التاني راه
فارس.اااه
الدكتورة بدت تمسحلي فالسائل وبعدها صبيت بروحي ونزلت
الدكتورة.حياتك مارسيها طبيعي ماشاء الله حملك ثابت وكل حاجة عندك تمام ابتعدي بس عن الظغط النفسي
انا.اوكي تمام
الدكتورة.وخودي حبوب الحديد من الصيدليه
انا.تو نتكوا ناخدوهن
الدكتورة.لو حسيتي روحك تقدريش تكملي صيام حسيتي بعطش وجوع زائد عن الطبيعي افطري لانه انت جسمك توا المفروض يتغذى مرتين والمرحلة هذي مهمه في نمو الجنين
انا.حاضر نحاول حتى لو صمت نعوض فالليل
الدكتورة.تمام ان شاء الله تشرفينا في غرفة الولادة بعد8شهور
انا.ههههههه خوفتيني من توا
الدكتورة ضحكت
"وانا طلعت انا وفارس"
انا.كنك ساكت
فارس.فرحان بيك
انا.حتى انا فرحانه بيا
فارس.ههههههه
"وركبت للسيارة"
فارس.من يوم وغادي جري فالحوش وهبال وتنقيز عالسرير وحبل ونادي وهذا صالون حكيه وهذكي دولاب مطبخ اغسليه لا اااه راحة ونوم
انا.حاسة روحي مزلت خفيفه مزال بدري علي مرحلة الرقاد
فارس.لالا تريحي بلا حركة واجدة
انا.به
فارس.نقولو لهلي
انا.تو فالليل ناخدوا طبق حلو ونعدولهم
فارس.تمام به
"ووصلنا للحوش نزلت وهوا طلع لشغله خشيت رقدت ونضت قيس ال5درت شربة وبطاطا مبطنه ومكرونة بالخلطه وسلاطه ووتيت السفرة خش فارس"
انا.حبيبي جيت
فارس.جيت شن دايرة فطور
انا.الي عالطاولة
فارس.صحيتي
"وخش للحمام يدوش وانا جيت رفعت جاكته ونقاله شلتهن للدار"
طلع وجاني فالمطبخ
انا.حي عليك المكيف حبيبي "وبديت ننشف في راسه بالمنشف"
فارس.لا هكي يصير شي خليها بعد المغرب
"ووخر"
انا.تفكيرك ديما منحرف
فارس.ههههههههه تي لابسه كت وشرت حرام عليك
انا.هههههههههه
فارس.هيا اذن المغرب
انا.هيا
"وقعمزنا عالطاولة وبدينه نفطروا كملنا وكالنا وقعمزنا نتفرجوا رنت عليا هاجر"
انا.الو
هاجر.حيو شن الجو
انا.تمام
هاجر.بكرة جايين عربي دايرين كيف العيد وبيان وهكي تجي تحضريها
انا.ان شاء الله
هاجر.تمام عني مانفقدك
انا.باي
هاجر.باي"صكرت"
فارس.نوضي هيا كان بنعدوا لهلي نقولولهم قبل التراويح
انا.هيا
"ونضت وتيت روحي وطلعت معاه عدينه لعيت عمو ومعانا طبق بكلاوة"
خشيت انا وباه فتحتلنا مروة
مروة.اهلا
انا.اهلين
مروة بحتت في عيوني ورفعت حاجبها قعدت نضحك.شن سر الزيارة الفجأة هذااه
انا.حامل
مروة عيطت وحضنتني
فارس.انا خاش"وخش وسيبنا"
مروة.صحبتي الكلبة حامل واخيرا
انا.الحمدلله
مروة.يتحرك
انا.بلا هبال فالتاني انا
مروة.وتوا كيف صحلك تقوليها
انا.توا كيف علمتها اصلا
مروة.عنجد هذ مافطنتيش للاعراض
انا.لا الدكتورة قالتلي عادي تصير واكيد في اعراض خفيفه وانت مش ملاحظه
مروة.باخي ربي يتمملك علي خير ونشوفوا وليدنا
انا.ان شاء الله
مروة.خشي هي
"وخشينا نحنه الاثنين"
عميمة.باهي الي خشيتي كان كملتي هدرزتك معاها برة وخلاص
انا جيت سلمت عليها وبستها علي راسها.كيف عاد بنهدرز معاك انت انا
عميمة.وينك يوم لمة سلفت حليمة ماجيتش
انا.فارس مابش يشيلني عنده عمل
فارس.امتى
انا.هذك اليوم الي قتلي عندك افتتاح او حاجة هك
فارس.اوكي اذكرتها
عميمة.كانك بتجي راك رنيتي وقلتي تكوا عليا
فارس.فوتي ياامي انا مانبيهش تعدي اصلا
عميمة.وعليش وانت طول النهار مخليها فالحوش
فارس.كثرت الخلطة والوجيج هذا نحبش سلفت حليمة مرات عمي ماابعدها وسكنتهم معفنه بككل بيش توصل تبي سنه وبتفتحي عليها سريب مشي وجي مش جو بكل خليهاا ضمن حدود اسرية مش حتى عائلة يعني انت ومروة وخوتها وخلاص
انا قعدت نفنص فيه
عميمة.تو كان نشوفك عند هلها نلقاك تشيل فيها لعند لعند سابع عم
انا.والله ماصارت ياعميمة انا اساسا نحبش الطلوع
فارس.باهي ياامي سالتينش عليش طبق الحلو وجايينكم هالوقت
عميمة.قلت بالك مخطظين قالو نهدرزوا مش مانشوف فيكم الا من الجمعع للجمعه
فارس.هههههههههههههههههه
عميمة.كنك تضحك
فارس جا قعمز يلاها.كنها فطومة والعه علينا شن في
عميمة.ماني والعه عليكم لاشي لكن انتم الاثنين تقهروا انشطوا ارواحكم شنو هذا راس كنه نزازي بيها ومانلقهش فالمناسبات بكل وانت لاتزور لاتجي لا شي الا كم وكم كنك عليش شن في
فارس.من يوم يومي عارفتيني دايا ودا محلاتي وشغلي شن تغير توا
عميمة.توا انت متزوج مانك شاب باتك يلقاك معاه فالفواتح وهي تجي معايا فالمناسبات بيش الناس ماتقولش بينهم قطيعه
فارس.حاضر يافطومة تو نسكرهن ونجيك انا وحياة وناخدوا دار هن ووين ماتبي تطلعي نحنه معاك
عميمة.هههههههههه لا ياباتي خليكم في حويشكم
فارس.اوووو تلزي ياحاجة
عميمة.ههههههههه
فارس وطه صوته.اسمعي تو بكرة نطوحوا حياة عند هلها ونطلع نا وياك نعدوا لشي مكان نغيروا جو
عميمة قعدت تضحك
فارس.عجباتك اه هابا منك انت عارفك
عميمة.لا وكني شن بيني وبينها لا تطوحها لا سو خليها في حوشها وتعالي انت
انا قعدت نبحت في فارس ورافعه حاجبي
فارس.باهي بنقوللكم
عميمة.شنو
فارس.جايني عيل فالطريق
عميمة.ماشاء الله ماشاء الله مبرووك ياغالي "وبرمت عليا"تعالي تعالي
انا جيت قعمزت يلاها.
عميمة.من امتى
انا.من شهرين الا
عميمة.وكنك ماقلتي الا توا
انا.توا كيف عرفت
عميمة.فارس صبي لحق علي باتك فالتراويح
انا طلعت لاارادي.اوووو توزيييعا
عميمة قلبت وجها ومروة ضحكت
فارس دارلي بفمه بلا صوت.غبيه"وطلع"
وطبعا وجهي كان متزلللط
عميمة.كيف حامل فالتاني ومافش اعراض
انا.هكي مافش
عميمة.ماحسيتش بدوخة بكل
انا.مرة مرة نحس بيها لكن كنت نحسابها بسبب الهبوط
عميمة.ترجيع
انا.لالا مافش
عميمة.وجع في صدرك ولا بطنك وظهرك
انا.ااه صارتلي كم مرة لكن دققتش
عميمة.اااه به حملك كيف صبيتي رد بالك نهاية الثالث حتتعبي واجد
انا.يستر الله
عميمة.ان شاء الله انت حشيشتك الحلو بطليه مرات سكر الحمل يرقا ويستمر معاك وضغط الحمل كذلك
انا.ان شاء الله
عميمة.والحركةلا تعدميها لاتكتريها امشي واجد بيش تسهل ولادتك لكن ماتجريش
انا.حاضر
عميمة.ان شاء الله ربي يتمملك علي خير
انا.ان شاء الله
شويه هكي وخش فارس كسدنا معاهم وكان جوي متلخبط بكل لين ال1وبعدها روحنا فالسيارة دويتش بكل وصلنا للحوش بدلت لبست قفطان وجيت بنرقد خش فارس
فارس.حبيبتي
انا من تحت الورغان.نعم
فارس.نوضي كنك
انا.بنرقد
فارس.كنك تنفتري
انا حولت الورغان وبديت نبحت فيه
فارس.كنك
انا.ليش قلت لامك نطوح حياة عند هلها ونشيلك لو مضايقتك انت وامك ومش مخليتكم تاخدوا راحتكم عندكش مشكله تو نرد لحوش هلي ماهناك صعيب
فارس.عرفتها رفعة الحاجب الي امبدري وراها كاينة
"وقعمز جنبي عالسرير"
فارس.تو من جدك بتزعلي من بصارة
انا.بصارة في لها حدود لازم تديرلي قدر قدامهم شنو نطوحها هذاه شكارة انا ولا لبسة تطوحها
فارس.ياستي خلاص بلاش زعل تو مرة اخرى نقول نشيل البرنسيسة لهلها
انا.حلفتلك قول والله
فارس خبط يديه.عليك قصة سودة
انا.لو مش مخليتك تاخد راحتك مع امك ومضايقه عليك تو نعدي بروحي ماعندك عليش شايلني
فارس عيط.يييي ياحياة وانت ماسكه فكل كلمة عليك نكد
انا قعدت نبكي.مش هكي لكن امك ديما تحسس فيا اني ننفعش وتزيدها انت بالكلام هذا ليش عاد
فارس.تي ليش البكا نتناقشوا عادي نحنه اسكتي"وقعد يمسح في دموعي"
انا.لا مش عادي دامنك تعيط قتلك سبعين مليون مرة مانحبش الصوت العالي
فارس.ياملاك انت خلاص تو نعزفلك عالكمان
انا.اسفتر اسفتر ناقصاتك هيا"وبديت نبكي اخرى"
فارس حضني وانا زدت نبكي اخرى الموقف مش مستاهل لكن حاسة روحي مضايقه وبنبكي حتى موقف عميمة امبدري لما حكتلي عالحمل وشن ندير تمنيت ماما مكانها تكون معايا نحكيلها وتوريني تقولي حملك جا زي حملي ولا لا تقعد معايا ايام جيابي وكل حاجة
فارس.انت يافي حاجة مضايقتك يااما الحمل يديرلك في اظطرابات مش معقوله هذا كله علي كلمة زي هذي
انا رديت عليه بصوت طفلة حست بيتمها كانها اول مرة.نبي ماما
فارس.شنو
انا وخرت وقعدت نبحت فيه.نبي ماما
حقيت في عيونه نظره حنونة بكل مليانة عطف وحنية تمنيت نسكن فيهن
فارس.حبيبتي الطفلة تبي مامتها
"واسقم عالسرير وحطني علي صدره قعدت نبكي وهوا يمشي بيده علي شعري كان عارف اني نبي نبكي وبس وان كلامه مش حيخفف عليا اساسا مافش كلام ممكن يخفف عليك فقد الام اي شي عادي بس الام مهما كبرت ولو كان عمرك مئات سنين تستحقلها تستحقلها بكيت بكيت لين فشيت غلي وبديت نسكت بروحي
فارس باسني علي راسي.تمام توا
انا.احسن من بدري اقل شي فشيت غلي
فارس.باهي تمام مش حنعطيك محاضرة عارفك تحبيش الدوة الواجدة بس حاولي تصبري روحك وتبكيش عليها هكي ادعيلها ربي يرحمها ويغفرلها واكيد هيا توا فرحانه عشانك
انا.ان شاء الله
فارس.انت اضايقتي من كلمتي صاح
انا.ااه
فارس.باهي اسف عليها توقعتهش توجعك هكي حسيتها عادية
انا.حتى انا اسفه عالكلام الي قلته لكن كنت مضايقه بس
فارس.مرة اخرى حاولي لما تدوي علي امي قولي عميمة وتقوليش امك تحسسي فيا انها سبة بطريقة دوتك
انا بطريقة مستفزة.ماهيا امك
فارس.هههههههههههه فش فايدة
انا.هههههههههههههه
فارس.معش تبكي زي امبدري تقهري فيا
انا.شن ندير
فارس.خليك ديمه فرحانه ولما تضايقي تخليش الدموع ينزلن
انا.يادمعة لا تطيحي تراران
فارس دفني بقوة.عدي ياسامطه
انا ضربته بالمخدة.اااه انت السامط
فارس ردلي الضربه وقعدنا نضاربو بالامخاد نين مسك يديا كتفهن بيد وحدة
فارس.هاها سيطرت عليك توا
انا.اطلقنيي حول ياعملاق مكتفني بيد وحدة حول
فارس.لأ انا فزت عليك لازم ناخد جائزتي
انا.هههههههههه
فارس كرني لاه وطاح عالسرير
انا.ههههههههه وخر رمضان الفجر قريب
فارس.نبي نسحر"وعضني في رقبتي"
انا.ااااه وانت رايح كي الجرو اااه
فارس عضني اخرى.الملافظ سعد من الجرو
انا.ااااه ازح بطل
فارس.ازح مرة وحدة تي حي عليك حي
انا.ااااه رقبتي قطعتها باهي اطلق يديا
فارس.لأ عارفك حتقرصي وتهربي
انا.هههههههه باهي خلاص
فارس قلبني وجا عليا.ماخلاصش
ووووووووو
انا كريت القفطان لبسته.حي علييك مزال ساعة عالفجر
فارس.نلحق بسرعة نخش نسبح
انا نطيت نجري للحمام وصكرته
فارس.ياخاينه
انا عيطت
فارس.هههههههههه حقاته
فتحت باب الحمام لابسه الديشنمبر وقعدت نفنص فيه
فارس.عادي كأنك دايرة نفخ شفايف
انا.تي عندي بيان فالليل حي علييا
فارس.هههههه من هنا للعشيه تخف
انا.به تو تشوف
"ورديت للحمام غسلت ونزلت عالسريع درت روينة وحطيت بطاطا ورز نزل فارس"
انا.بسرعه نص ساعه ويأذن
"هوا كلا وانا شربت،روينة بس"
فارس.كولي
انا.عندش نية
فارس.وتقدري تصيمي
انا.نقدر اااه
فارس.تمام به
انا.فارس راك تنسى عندي مشوار فالليل لهل هدى هجورة جايينها عربها
فارس.خليها بالجو انا الليلة بندير جرد قبل العيد
انا.اجله يوم اخر
فارس.نقدرش متواعد انا وصاحب المحل
انا.يعني
فارس.يعني خليها بالجو لو قدرت نجيك ونشيلك باهي كان هذا فوتي
انا.مافيهش بالجو لازم تشيلني
فارس.يصير خير
انا.خلاص خمس دقايق ويأذن اغسل سنونك بسرعة
فارس.هيا هي"وشرب امية وخش للحمام وانا لميت الحوسة وخشيت لحمام الدار توضيت وراجيته نين أذن صليت الفجر وطلعت لفارس لقيته يصلي فيه فالصاله"
فارس.صليتي الفجر
انا.اااه
فارس.باهي هي نصلو الصبح جماعة
انا.هي
"وصلينا مع بعضنا بعدها خش رقد وانا قريت قرآن ولحقته رقدت"
#تاني_يوم
نضت العشيه درت الفطور وكل حاجة وراجيته لين جا فطرنا وجا بيطلع
انا.فارس طالع
فارس.ااه ماقتلك عالفجر داير جرد بنطلع
انا.بس قتلك عندي مشوار
فارس.باهي اليوم فوتيه وبكرة نشيلك تباركيلها"وطبس يلبس في كويشه.
انا.بنعدي يافارس تطلعش وتسيبني هكي
فارس.حتى لوقتلك نشيلك توا
انا.عنجد تشيلني توا مزال
فارس.قتلك حتى لو شلتك توا مش حنقدر نروح بيك لاني مش حنروح قبل اللاثنين فالليل
انا.ياسلام نبي نعدي يافارس
فارس.وانا قتلك مافش مشي
انا.عناد يعني
فارس.بتديريها عناد ديريها مشي مافش
انا.نبي نعدي
فارس.دوري كيف تعدي انا طالع توا
انا.تي ليش المكر اجلها المشيه
فارس.مانقدرش مواعد الراجل اليوم الجرد مش لعب عيال هوا
انا.والحل
فارس.بكرة نشيلك وتباركيلها
انا.مايصير شي
فارس.ملحي معناته عليك عناد
انا.به تو نشوفو العناد
"وخشيت وطبقت باب الحوش انقهرت منه ومن لقطته وكلامه نملح صار تو نشوف من الي تملح ونعدي نعدي وبديت نوتي في روحي لبست وانتكت وكل حاجة ورنيت علي يوسف"
انا.الو
يوسف.الو حيو شنجو
انا.تمام وين قاعد
يوسف.فاضي والله مكسد في كفي
انا.نبيك تشيلني مشوار غير فارس مش فاضي
يوسف.امممم باهي هيا قريب منك انا اطلعي
انا.به
"ولبست عبايتي وخذيت شنطتي وطلعت"
يوسف.هيا انا فم الباب
ركبت معاه وبده يسوق
يوسف.غريبة فارس يحبش تركبي مع حد شن خطرها قالك قولي ليوسف
انا.اه لا اصل عادي
يوسف.من وراه مه
انا.لالا
يوسف.حيو نعرفك من وراه طالعه كان هذا نردك
انا.لا والله
يوسف.ان شاء الله
"ووصلني للبيان قعدت مرتبكة وخايفه حي علييا شن درت ليش طلعت بس كيف بنحلها معاه توا حيعصب ويهزب كان علمها حي عليا حيي حتى انا نعصب وندير الفالطه وبعدها نندم كملت اللمة كلهها نحرق وماكليتش وماهدرزتش كويس وغير نخمم نين جا وقت المرواح رنيت علي يوسف
انا.الو
يوسف.ها.كملتي
انا.ااه
يوسف.باهي تمام ربع ساعة ونكون عندك"صكر"
هاجر.مزال بدري كنك مستعجله
انا.لا بنروح خلاص
هاجر.حاستك مش على بعضك شن في
انا.لا شي "ورن نقالي بحت في الشاشه وغمضت عيوني"
#يتبع..
طبعا مش متوقعين حلقة ابدا😂!هي صح قصيرة بس خير من ببلاش❤وشن تتوقعوا رد فعل فارس؟
