السلام عليكم .....
اسفه ع التأخير بس كنت مشغولة
و نرجع نكرر الرواية للكاتبة ابتسام مش اني
اني نقلت الروية حتى توصل لي عدد أكبر
و إن شاء الله توصل العبره و تتغير نظرت المجتمع للمرأة
#حكاية_حياة_الجزء_الثاني💙
#حلقة_51
#بعد_شهر_من_عرس_علي
#بداية_شهر3
"مروحين من حوش هل فارس قيس المغرب لحوشنا الجديد فالطابلينو"
انا.خلااص تعبت
فارس.كنك حبيبتي شن في
انا.كان هامك شن فيا راك ماتشيلش فيا كل جمعة لهلك كي الشغالة
فارس.حشاك مش هكي لكن امي تبينه عندها كل جمعة شن نديروا
انا.وكل جمعه يامحشي ياعصبان ياكسكسو يارز بالخلطه يامصير يانوعين سلاطات وكل جمعه مروة ياتقرا يامريضه وامك مرا كبيرة وعيب نخليها تخش للمطبخ وهذا كللله ياريته غير عاجب يكشخن عليا تقول قاتلتلهن واحد تعبببت انا تعبببت
فارس.غير انزلي هي
انا نزلت من السيارة وخشيت للحوش وهو ورايا
فارس.خلاص اهدي كنك معصبة
انا.تعبببببت والله يافارس وانت مش مساعد بكككل
فارس.كني انا
انا.شغل لا قراية لا مغيييير يانخدم فالحوش يانخدم عند هلك
فارس.ياستي كان عالقراية باهي انت حابة الوجيج اوكي تمام تو نسجلك وابدي اقري
انا.وامك الي لا عاجبها عجب ولاصيام في رجب
فارس.حياة امسكي لسانك امي الي تدوي عليها
انا.طبعا وجعاتك فيها امك لكن الكلبة الي تحوس مش واجعتك
فارس.حشاك لكن احترميها عيب
انا.مش محترمه حد حتى هيا ماتحترمش فيا
فارس عيط.حياااة
انا قعدت نعييط.ماتعيطش عليا وترفع صوتك
فارس.وطي صوتك وبطلي عياط
انا بصوت عالي وعياط.شيلني لحوش هلي تعبببببت انا من الحياة هذي ومعش نبيك انت وهلك وتستاهلش اصلا اني نعيش معاك تقول جيابني شغالة لك ولهلك شيلني لحوش هليييييي
فارس ضربني كف.وطي صوت وماتعيطيش!
انا قعدت نبحت فيه وهو نزل يده ووقعد مفنص
انا حطيت يدي علي خدي وقعمزت في مكاني وهو قال كلام وبعدها طلع من الحوش ماعرفتش شن ندير وكيف نصرف قعدت ندور في نقالي نبي نرن على يوسف مالقيتش كنت نسيته في السيارة مصدوووومة حتى بكا مابكيتش مش مصدقه يضربني يمد يده علييا مش مصدددققه عديت للدار وقعمزت نلم في دبشي في شنطتي وبديت نبكي ونشهق بالعبرة بعدها وقفت وقعدت نبكي وخلاص وانا مقعمزة على الوطا وجنبي الشنطة
بعد نص ساعة هكي
خش فارس قعمز يلايا مابحتش فيه ورديت نلم في الدبش مسك يديه وقعد يرد في الدبش لمكانه
انا.حولل
فارس.اسف وانا غلطان
انا.حوللل بنعدي لهلي
فارس.ماتطلعيش من الحوش لو تبي ازعلي هنا ديري اي حاجة بس تطلعيش من الحوش خلييك وانا نطلع ونسيبه لكي
انا قعدت نكر في يديه منه.فارس وخرر وخررر
فارس.وراس امك الي تحبيها من الحوش ماتطلعيش لو تبي انا نطلع ونخليه لكي لكن ماتطلعيش انا نقدرش نعيش بلاك حيو بحتي في عيوني ندويلك"ومسك وجي قعدت نبحت فيه ودموعي يصبن"عاقبيني زي ماتبي عارف روحي غبي وحمار وغلطت فيك لكن تحرمينيش منك.
انا.تمد يدك عليا معقوله انا تمدها علييا ليش هكي وجعاتك اني عليت صوتي وجعاتكش تعبي هذا كله والي ندير فيه عشان بس همه هلك عشان همه هل حبيبي وجعكش خاطري الي يكسرن فيه وكلامهن الي كله سم وجعاتك غير اني عليت صوتي تمد يدك عليا
فارس.غبي عارف روحي ونصرف بلا تفكير اسف والله لو تكررت مرة اخرى عدي لحوش هلك بس المرة هذي اقعدي ونوعدك ماتتكررش والله
انا حولت يديه من وجهي وصبيت للحمام ماعرفتش شن ندير كان منظره زي العيل الي يبيش امه تزعل منه وهذي اول مرة يغلط فيا وانا الي عصبته وعليت صوتي ودويت على امه حتى انا عصبيتي هذي حتودرني غسلت وجهي واستهديت بالله وطلعت للدار لقيته راد الدبش للدولاب وطالع مابيتش نلحقه لكن قعدت نسمع في صوته يحوس برة وفالكوجينه قعدت راقدة فالسرير الموقف كان صدمة بالنسبة ليا قعدت في مكاني دموعي ينزلن بلا صوت نين فطنت للساعة10 ومعاها طلعت من الدار لقيته في دار المعيشه راقد ويبحت في السقف اول ماخشيت قعد يبحت فيا
انا بصوت مخنوق.ظهرك حيوجعك صبي للدار
فارس قعد يبحت فيا عيوني تعبن دموع صبه من مكانه وجاني قعدت نبكي بصوت عالي حضني وقعد يمشي بيده على ظهري
فارس.اششششششش اسف حقك عليا
انا بندوي وماسكتني العبرة ماقدرتش قعدت نشهق وخلاص"وهو يد على ظهري ويد على شعري"
فارس.خلاص بس فاهمك شن بتقولي ووالله كانت لحظة هكي ماقدرتش نتحكم في روحي نوعدك مستحييييل تتكرر وعد بطلي بكا بس دموعك يقهرن فيا
انا بديت نهدى وسكتت قعدت نسمع في قلبه ينبض بقوة
انا.قلبك يدق بقوة
فارس.عشانك قريبة منه
انا تنهدت
شمرني من وسطي مسكت في رقبته
فارس.طفلة انت طفلتي انا بس
انا.بس صدقني نشيل زي عزوز عمرها90سنه
فارس.تشيلي عليا مش سامحتيني
انا.سامحتك بس الجرح يبقى
فارس.ماكنتش نقصد والله فجأة هكي اصرفت بدون قصد
" بحتت فيه شوية وغمضت عيوني وهوا وخر قعمز عالصالون وقعمزني في كتره تكيت راسي علي كتفه وسكتت وهوا سكت حسيته بيدوي بس مش عارف"
انا.ليش مابيتش تخليني نعدي لهلي امبدري
فارس.نبيكش تغيبي عليا مانقدرش بعدين خفت ننحرم منك بكل بسبب خوتك
انا.خوتي؟
فارس.خوك يوسف حالفلي اكثر من مرة ان لو مديت يدي عليك مرة مستحيل يخليك عندي
انا.صاح
فارس.ااه رغم صغر سنه لكن عاقل واجد لما قالها ليا قدرتش نرد عليه
انا.ربي يخليه ليا هو بالذات اقرب الناس ليا واحنهم
فارس.وانا
انا.حتى انت بس في فرق يوسف خويا وانت راجلي
فارس.يعني
انا.يعني يوسف لما نعصبه يخبط في يده فالساس مش في وجهي
فارس باسني علي مكان الكف.اسف
انا.بجد اخر حاجة نتوقعها منك انك تديرها اخرر حاجه
فارس.باهي شن ندير نعوضك عليها
انا.مش عارف
فارس.تو بكرة نديرلك حاجة صدقيني حتحبيها وتنسيك الموقف الغبي هذا
انا.انحبك يافارس تستغلش الشي هذا وتغلط فيا لاني زي ماحبيت نكره وكرهي واعر
فارس.وحتى انا نحبك ونوعدك معش تتكرر خلاص انسي الموضوع بس
انا.حاضر به
"وصبيت خشيت للكوجينة درت مقين نسكافيه وخشيت لدارنا لقيته متكي عالسرير ويبربش فالنقال"
انا.هاك هي
فارس.يعطيك الصحه
انا ابتسمت وقعمزت يلاه قعدت نقرا فكتاب غربة الياسمين ونشرب لين نعست
انا.بنرقد طفي الوناسة
فارس.تصبحي على خير حبيبتي
وطفا الوناسة وانا خشيت فالورغان ورقدت.
نضت تاني يوم لقيته يبحت فيا
انا ابتسمت.صباح الخير
فارس.صباح النور
انا.كنك تبحت فيا
فارس.لاشي
انا حولت الورغان وصبيت للحمام غسلت وجهي بحتت فالمراية عرفته فيش يبحت كانت يده معلمه في وجهي توضيت وطلعت من الدار للمطبخ درت الفطور وحطيته عالطاولة وهو نزل قعمز عالطاولة وانا جبت البراد حطيته وجيت بنقعمز كرني من وسطي قعمزني معاه
انا.كنك
فارس.خليك انا نفطرك
انا.مش حتعرف
فارس.لالا حنعرف
ووكلني قرمة وقعد مرة ياكل مرة يوكلني
فارس.نبي نفتح محل عطور ومواد زينه
انا برمت عليه.نعمممم عليش كنهن محلات اللحوم منشن يشكن
فارس.مش ليا بنديره ونأجره ياهبله
انا.امممممم
فارس.بس حاير شن نجيب عرفتي كيف
انا.كيف
فارس.قصدي احسن نوعيات مكياج وهكي
انا.الفترة هذي ماركة ماك حلوة بكل ارواج وكل حاجة حلوات بكل
فارس.عندك منهن وريهن ليا
انا.لالا عندش منهن حتى الي عندي كمل
فارس.خسارة تو نشوفهن فالسوق ولا عالنت
انا.خطرها عالنت معش شريت واي ماكس
فارس.ماحصلتش واحد كويس
انا.امممم به
فارس.باسني على خدي
انا.معلم فيا
فارس حط يده عليه وكان يدوي وصوته زعلان.فطنتلها فالصبح قويه للدرجة هذي
انا.كان نقولك ماحسيتهش من الصدمه
فارس.نحبك ياطيبة
انا صبيت.نموت فيك هي بسرعه وراك محل
فارس صبا من مكانه بيطلع وانا وراه نين وصل للباب طلع صكرت وراه وخشيت للحوش برمت برمتي العادية وكسدت عالتلفزيون وبعدها بديت نقرا في كتب
#عند_علي
علي فتح عيونه وبعدها نط.سهى سوسو سهى
سهى بصوت نعسان.نعم
علي.نوضي بسرعه تأخرتي اول يوم بعد الاجازة وتأخير
سهى.حي حي'ونطت من مكانها"
علي.هههههههههه شعرك مشفشف
سهى بدت تلم فيه
علي.تي بسرعه وراك محاضرة الساعة9
سهى صبت بسرعه خشت للحمام وعلي ناض للكوجينه حط البراد عالنار ورد لقاها طلعت من الحمام خش هوا وهي لبست وطلعت للكوجينه خلطت الشاهي وحليب ووتت الفطور طلع علي وجاها
سهى.بسرعه حبيبي افطر على ماوتيت روحي
علي.افطري قبل
سهى.لالا تجينيش نية تو نشيل معايا المق غادي
علي.امبه
سهى خشت لبست عالسريع وطلعت
علي.الساعه8ونص تلحقي
سهى.هههههههه تو نجري كان مهذا بعدك البلاد فاضيه يوم السبت
علي.نهارك بعدها ساد خبطة هذك اليوم
سهى.ههههههه يسير خير
"وجت تجري باساته على خده وخذت الشنطه وطلعت"
وعلي صبه غير التوتة بالمهل وطلع للمكتب
#عند_هدى
هدى.ساااللاااام"وعزقت المخدة فيه كانت راقدة عالسرير وهو مفرش فراش لوطة"
سالم.نعم
هدى.نوض وراك عمل
سالم.نوضي قبلي بنرقد شويه
هدى.لالا خودلي اجازة خلاص
سالم.تي في التاني ولا التالت راك عليش الاجازة
هدى.خلاص ارهاق مش متحمله بنقعد فالحوش نين نجيب
سالم.باهي ياكلبوزتي نوضي وتيلي فطور
هدى.فطور صحييح مدلي الفوطه الي فوق وطفي المكيف بنته مقرفه
سالم ناض من السرير وبده يبحت فيها
سالم.ههههههههههه
هدى.كنك
سالم.نسمع بالوحم نين ريته اشر حتى من اسو
هدى.بكل الليل كله حموضه وترجيع
سالم.شكله عيل
هدى.مش عارف تو نعرفوا خلاص هانت
سالم.مزال ست اشهور عليك قصه
هدى غمت وجها بالمخدة.ست اشهور وحم اععععععععععع
سالم.هههههههههههه مسكينه حراااام
هدى.سالم هي من غادي جايتني علييك وكارهتك اطلع وسيبني
سالم.يناري عليا راقد عالوطا ومتبهدل
هدى.ماانت السبب انت السبب انت متريح وانا شاقيه
سالم.هههههههههههه لنقنك توجعي
هدى.اطلع ياانت اطلع
سالم.باهي ياانت باهي
"وطلع سالم من الدار خشت اسو رقدت يلا هدى"
هدى.اسو عدي ارقدي في سريرك
اسو.لالا"وخشت فيها"
هدى.كنك حبيبة ماما
اسو.من في هنا
هدى.في خيك
اسو.لالا نبث خي انا
هدى.لييش
اسو.هك نبيث"وضربتها على بطنها"
هدى.لا يااسو كنك واعرة
سالم خش.كنكم
هدى.تبيش خي هيا
اسو.نبيث انا نبيث
سالم.حبيبة باتها كنك عليش تبيش
اسو.هك نبيث
سالم.تعالي معايا اليوم نعدوا للعمل باهي بنية بابا بس
اسو.به
"وجاته تجري"
سالم.نحصلوا غدى لما نروحوا
هدى.تو ندير لكن انا جيبلي اي حاجة نحبش اوكالي
سالم.باهي به
"وطفا سالم الظي وطلع هو واسو وهدى ردت رقدت"
#عندي_انا
رنت عليا هاجر
انا.الو هجورة
هاجر.اهلين حيو شن الجو
انا.تمام كيف حالك
هاجر.باركيلي
انا.شنو
هاجر.وائل جا خطبني وهلي وافقوا
انا.مبررروووك حبيبتي كيف صار
هاجر.مش عارف سيب الجبهه ورد قالي موضوعهم معش يبي ينتهي ويبوش ينهوه
انا.صدق باهي مببروووك حبيبتي مبروك
هاجر.الله يبارك فيك
انا.باهي امتى بتديروا حاجة رسميه
هاجر.هوا جا دوا لبابا عرفتي كيف بابا قاله نسألوا ونقولك توا قال لماما موافق ويبي يرن عليه يقوله جيب هلك
انا.مبرووك والله فرحتلك
هاجر.تو نرن عليك نعزمك لما بيجوا هله
انا.تمام تو نجيك
هاجر.هي بالسلامه
انا.بالسلامه
"وصكرت منها وقعدت فرحانة فرحتلها واجد قعدت نفكر لنقنه ملل بكل ماعنديش ماندير هوا يطلع ومايجيش الا المغرب وانا مكسدة فالحوش رنيت على يوسف"
انا.الو
يوسف.اهلين شنجو
انا.تمام بكل وانت
يوسف.تمام
انا.شن صار في موضوعك والله شاغلني بقعدتك بروحك فالشقه
يوسف.حيو خليها مزلت صغير تو بعد نستف اموري نزوز
انا.اممم به براحتك
يوسف.هههه باهي يامشفشفه تبي حاجة
انا.لالا سلامتك
"وصكرت"
"قعدت نبرم فالحوش بعدها علقت السماعات ولعت اغاني هندية وبديت ننكت في دولاب المطبخ"
انا نغني ونرقص نين فطنت لحركة ورايا برمت لقيته فارس يبحت فيا ومبتسم
انا عيطت.اااااه امتى جيت
فارس.ههههه من بدري نتفرج عليك
انا.كيف خشيت
فارس.بكرعيا
انا.ها ها ها سامطه
فارس.ههههههههه سيبي الي في يدك وتعالي
انا.شنو
فارس.تعالي بس
"حطيت الليفة ومصمصت يديا وجيته حط يديه على عيوني وقعد ماسكني ويمشي"
فارس حول يده بحتت لقيت باكو فيه مجموعة ميكاب كاملة من بتاعات كيلي وماك ومعاها مجموعة كتب مستفات بطريقة حلوة
انا.ااااااااااااه"وغطيت فمي"
فارس.شن رايك
انا.يهبلو يهبلو يهببببلو
فارس.ههههههههه
انا عديت شور الباكو وقعدت نتفرج عليهن كانت مجموعة كتب الجندي كاملة وكتب احمد مراد كلهن
انا.حييي محلاااهن
فارس جاني وانا صبيت حضنته
انا.شكرا يااحلى حبيب فالدنيا
فارس.عفوا يااحلى حبيبة فالدنيا
انا.نحبببك
فارس.نموت فيك
انا.هذا عليش سألتني عالمكياج
فارس.ااه
انا.وليش سألتش عالكتب
فارس.نعرف ذوقك فيهن اصلا
انا.ههههههه ياخيا
فارس.تبيش تجربيه
انا قعمزت عالعلبة وطلعتها كلها قدامي وتربعت فارس طلع نقاله وصورني
انا.كنك
فارس.هههههه شكلك يهبل
انا.هههههههه
"وقعدت نطللع فالميكاب ونحط فيه"
فارس.حي علي امه غلبتي السمكرة والزوااق شنو هذا
انا.كونتور هذا
فارس.كملي كملي"وتربع وقعد يبحت فيا نين كملت"
انا.شن رايك
فارس.تغيرتي تلاتمية وستين درجة
انا.احلى
فارس.لالا باينة كيف الخليجيات وجهك
انا.عليك احبااط
فارس.تي وانت طبيعيه احلى ياهبله
انا.ههههههههه جامل جامل
وخذيت العلبة والكتب ركبتهن للدار قعدت نستف فيهن عالمراية وفالمكتبة ولحقني فارس
ووووووووووووو
وهكي بدن الايام يمشن وحياتنا حلوة مع بعضنا وجونا حلو وعسل ببكل صح مضايقه من تصرفات امه واخته بس متحملة على خاطرة لأنه يستاهل
نيييين في يوم كان نقالي يرن رقم غريب
فارس.من يرن
انا.مش عارف رقم غريب
فارس خذاه ورد
فارس.الو
الرقم.الو معليش هذا رقم حياة
فارس.من حضرتك
الرقم.لا معليش غالط
فارس.كيف غالط
طوووط طوووط طووووط
#يتبع
شن انطباعاتكم الي خديتوها من الحلقة الاولى وشن تتوقعوا حيكون محور هالجزء؟ انتمنى أنها نالت اعجابكم وتفااااااااعلوا اييييوه❤
