حكاية حياة

الجزء الثاني

منقوووووووووووووووووولة

#حكاية_حياة
#حلقة70
سالم.هدى نوضي خلاص وصلنا
هدى فتحت عيونها بالشوية وبدت تنوض
سالم.هيا ننزلو
"ونزلو من الطيارة بالشوية وعدوا للفندق تريحوا والعشية مشوا للمستشفى عاودوا التحاليل كلهن من الاول"
الدكتور.للاسف الورم خبيث ومتفشي في منطقة الصدر كلها
هدى قعدت تبحت وساكتة
الدكتور.نحن حنديروا عملية استئصال تحوله لكي كله وبعدين نبدوا في جلسات الكيماوي
سالم.ان شاء الله خير
الدكتور.بالشفاء ان شاء الله وياريت ماتتضايقيش واجد اهم شي العامل النفسي ونسبة الشفاء عالية راه
هدى.ان شاء الله خير
"وصبت بتطلع"
سالم.شكرا يادكتور بس امتى الموعد للعملية؟
الدكتور.بكرة الساعة11بإذن الله حجزتلكم
سالم.تمام
"وروحوا هدى وسالم للحوش"
سالم.بدلي هي نطلعوا ندهوروا
هدى.لالا ماعندش نية نبي نرقد
سالم.نطلع بروحي راه بعدك الاردنيات سمحات
هدى.ههه اطلع عادي
سالم جا مسكها من ايديها.مش وقت رقاد توا في الليل نرقدوا اطلعي معايا يلا
هدى.باهي هي
"《وطلعوا كملوا اليوم كله يتدهوروا في كل مكان ويغيروا في جو"》
#عندي_انا
كان بطني وكبدي زاعمة رنيت على يوسف
انا.الو
يوسف.الو ايوا حيو
انا.يوسف تعال انت ومروة اقعدوا مع العيال انا مش قادرة والله
يوسف.حاضر تو العشية ناخدها ونجوك
انا.تعال توا قتلك مش قادرة
يوسف.ماه قاعدة عند هلها توا
انا.اااه زاير قصدك
يوسف.تيالي ااه
انا.لا خلاص خليها معناها وانت عدي تغدا عندهم
يوسف.لالا مافش داعي
انا.عيب يا فيفا لازم تعدي
يوسف.ان شاء الله هي تبي حاجة
انا.لالا شكرا"وصكرت"
اسو.عميمة
انا.نعم حبيبتي
اسو.وين عمو فارس
انا.مسافر
اسو.نبي نرن عليه
انا.لالا تو لما يروح ساهل
اسو.لالا نبي توا"قعدت تبكي"
انا.حبيبتي خلاص عليش تبكي توا
اسو زادت في البكاء سيبتها قلت تو شوية وتسكت استمرت!
أنا.حبيبتي مايصير شي هكي هو مسافر
واسو.نبي عمو فااااراااس
وردت تبكي
فتتها بعدها شوية وبدت تشهق ونفسها يعلى خفت عليها وليث بده يبكي معاها
عطيتها نقالي.هاكي يا باردة  رني عليه وانت فتحتي فمك معد صكرتيه!عليك عناد فيك
"خطرت عليا كلمة سالم، عناااد طالعتلك"
اسو خداته ورنت على فارس وقلبي معلق بالشاشة اكثر منها
طوووووط طووووووط طوووووووط
فارس.الو
اسو.خيييير ياعمو
فارس.اسو يا صقع سارقة نقال عميمة اخرى
اسو.لالا هي قالتلي رني
انا قعدت نخبط في وجهي عنشكلك يا اسو بكل عليك تزليطة
فارس.هههههههه باهي شن تبي عليش رانة
اسو.نبي كيندر
فارس.حاضر من عيوني لما نروح نجيبلك عرم
اسو.امتى مروح انت باه
فارس.مروح الاسبوع الجاي
اسو.باااه تبيه يا عميمة ولا نصكر
فارس.لالا صكري بالسلامة"وصكر"
انا.ميتة عالحكي معاك على اساس نين ادير في طروح وانت تريحتي بردتي توا؟عليك تزليط
درتيه ليا
اسو تبحت فيا بمنتهى الغباء
انا.عدي عالتيفي"وخديت ليث غسلتله وحطيتله رضاعة شربها ورقد جيت بنرقد قعدت واحلة متعودة على سريري وامخادي هنا سراير العيال ناشفات
انا.اوفففف وطلعت نقالي رنيت على علي
انا.الو
علي.ايوا حيو
انا.علي تعال انت وسعى اقعدوا مع العيال تعبت انا والله
علي.تي كيف خوات هدى قعدنش معاك
انا.لالا حلفتلهن يروحن قلتلهن تو ندير بالي منهم
علي.والله يا حيو سهى عندها محاضرات وانا في العمل
انا.اهاا به تمام"صكرت"
حسيت الموقف تنبيه ليا ان انا مش اولوية في حياتهم وان كل حد وراه حياة يعيشها مش كلهم فاضييلي وغير شن تبي مرة واثنين وبعدين كل واحد يبي يشوف حياته وعيلته ويفوتني!
انا.يااارب القوة والقدرة يارب
قعدت لعند العشية جت هاجر وامها وجاراتهم الاثنين واختها وجا علي جايب سهى قعدنا نهدرزوا عادي
أم هدى.كان غير قعدت وسمعتوا كلامي عندي جارتي تدير في خلطة رآه درتها لها وصحت منه تقوليش بنيتي صغيرة عالهم والتعب والكيماوي
جارتها. لالا فكك لا خلطات لا خلاطي هذا سرطااان والسرطان مايقدره إلا التكواي تعدي لجارنا الشيخ محمد  يكويها وبعدها دوري شي ماتلقي شي
الجارة الثانية.هيييه لا يابتي معقولة!هي كان غير تقرأ ياسين 4مرات في اليوم وتقرأ البقرة في كأس فيه امية وعسل وزيت زيتون وعرعار وتشربهن عالريق مدة40يوم تصح بإذن الشافي العافي
"طبعا هذا كله وانا منذهلة نسمع في هالحلول الغريبة"
سهى.لالا يا عميماتي سامحني الكلام هذا مافيش منه!الخلطات في العادة يكون مفعولهن ممكن قوي ويخليها تبان صاحة لكن الأثر الي بعدهن عادة يكون أقوى والتكواي يزيد يعجن الموضوع ويقدمش بل يأخر ويخلي الدكتور يعجز يديرلها شي نين يصح مكان الكي وهي مرات يكون السرطان منتشر!وطبعا موضوع الآيات هذا صح القرآن فيه الشفاء لكن ربي قال خذوا بالأسباب! يعني ماتعبش عالقرآن بس بعدين مافيش ولا حديث يقول اقروا سورة معينة لعدد معين عشان تصحوا ردن بالكن الرايات هذين يكرنكن لاورة!
طبعا الصبايا اسكتن واقتنعنش بكلام سهى رغم أن كلامها كله علمي ومبني على دراسات ومفروض حتى انتن الي تقرن تمشن عليه وتقولنه للي حولكن لأن في بلادنا نسبة كبيرة من حالات الإصابة لو تتواصل فيهن المريضة مع الدكتور مباشرة تتعالج لكن للأسف يلجأن للطرق الأخرى وبالتالي يعجنن الدنيا ويصعبن مهمة الدكتور اكثر
"مشت العشية في هدرزة ونقاش وجا علي روح بسهى وما خذانيش😊قعدنا نين روحن الجارات وأم هدى"
هاجر.خلاص حيو روحي للحوش بدلي وارقدي انت حامل مش لك التعب وتو نحن نديروا بالنا منهم
انا.به تمام💙
"رنيت على يوسف عشان يروح بيا"
يوسف.ناخد مروة وجايك هي
انا.نرجا فيك
"قعدت نرجا نين بيبلي طلعتله"
انا.السلام عليكم
يوسف ومروة.وعليكم السلام
انا.كيف حالك يا مروة
مروة.تمام الحمدلله وانت
انا.الحمدلله
مروة.بابا يسأل عليك قالي سلميلي عليها
انا.عليك وعليه السلام
مروة.قالك حتى كان سيبتي فارس انا كيف باتك تعالي وزوريني
انا.حاضر تو شي يوم نزوره حتى انا والله مرايفة عليه الوحيد الكويس كان
مروة.بارك الله فيك
انا.وفيك بارك الله كيف حال مودة
مروة.قاعدة تبتت ماما حددت معاهم بعد رمضان الجاي تقعد امها فكت الحزن على سلفتها لان قالت تبي تديرلها عرس
انا.اها!ربي يهنيهم ان شاء الله
مروة.اجمعين
انا.روح هو من تركيا ولالا
مروة.قال مروح الاسبوع الجاي
انا.يوصل طيب
"هذا كله ويوسف ساكت نين وصلنا نزلت وهما عدوا"
يوسف.مروة معش تحكي معاها هكي ااه الا حياة
مروة.هي الي بدت بعدين انا شن قلتلها هي تسأل وانا نرد!
يوسف.كلمة هي معش تدوي معاها هكي
مروة.يادي ستي حياة الي معش افتكينا منها
يوسف بحت فيها
مروة.تي والله درهت كبدي بمعاملتها وكل حاجة سمعتها شن قالت الوحيد  الكويس بابا وهذا كله اكثر من بارك الله فيك ماقلتش!
يوسف.احترام اختي من احترامي!تيالي انا لما عديت عندكم امك على ماعزقت كلام مارديتش عليها ولا كشخت!
مروة.وشن قالت
يوسف.بلا طروح انت فاطنتيلها شن قالت
مروة.به به
يوسف.واضحين اه حياة خط حمر عشان حتى انا نحترم عيلتك
مروة.حاضر
"ونزلوا من السيارة للحوش"
#ثاني_يوم
عدت هدى وسالم للمستشفى ودارولها تعقيم وكل حاجة ورقدت عالسرير خلاص
هدى.حبيبي العيال وكل شي درناه امانة في رقبتك
سالم.اسسسس تقوليش هكي
هدى.صالح حياة  تقعدش انت والزمان عليها
تصدق بحاجتي كلها وخليها صدقة جارية
سالم.حبيبتي معش تقولي هكي انت حتنوضي وتصحي وتردي كويسة زي ماكنتي!
هدى.ان شاء الله وبدت تغمض في عيونها
"وخششوها لغرفة العمليات"
سالم.يااارب مانقدرش نعيش بلاها يارب ماتذوقني مرار فراقها يارب
"وقعد يرجا في العملية تكمل خدت وقت وااجد وماكملت"
انا.الو ياسالم ها شن صار
سالم.مزال ما طلعت يا حيو
انا.ان شاء الله ربي ينوضها بالسلامة
سالم.ان شاء الله
"شوية هكي ورن يوسف وبعده علي وكل مرة حد من هل هدى يرن ويسأل"
طلع الدكتور من غرفة العمليات
سالم.ها يا دكتور شن صار طمني
الدكتور.الحمدلله استأصلنا الورم من الصدر المريضة حاليا تحت الملاحظة والكيماوي يبدا من الاسبوع الجاي بس ممكن نستفسر عن من الشخص الي استأصل الكيس الخارجي!هذا لو عندنا نرفع عليه قضية في نقابة الاطباء يخسر بيها عمله
سالم.للاسف في ليبيا مش عندكم
الدكتور.ان شاء الله بالشفاء"وعدا"
وسالم قعد يرجا قريب ساعتين نين خلوه يخش
سالم.حبيبتي
هدى بدت تفتح في عيونها بالشوية
سالم.الحمدلله على السلامة
هدى مزالت متنحة فيه ووفمها مخدر
سالم.حبيبتي نوضي انت طلعتي من العملية خلاص
هدى بدت توعى بالشوية واول مافطنت حطت يدها على صدرها ولقاته محول كله💔
سالم مسك يدها.مش مهم صدقيني
هدى تنهدت.الحمدلله على كل حال
سالم.ايييوه هذي هدى حبيبتي الي نعرفها الي تسأل ربي قبل كل شي وتحمده
هدى.خلاص عدي تغدا وتريح اكيد من بدري ماكليت شي
سالم.لالا قاعد معاك هننا قوليلي بس انت تحسي في حاجة
هدى.مكان جرح العملية نحس فيه يوزوز بس عادي كيف لما جبت
سالم.اي حاجة  قوليلي
هدى.باهي عدي جيب وكال وتعال انا بروحي خاطري في بانيه وانت اكيد جعان
سالم.الي تبيه حاضر بس  راك ترقدي
هدى.نحاول
"وطلع سالم جاب غداء من برة وهو خاش قالوله ممنوع! طلع وشراء صاكو دبش وحطهن فيه وخش على اساس جايب دبش لمريض جوا"
سالم.ههههههه قالك بيقدروا على ليبيين على اساس
هدى.كنه عليش وكنك جايب الاكل في صاكو دبش
سالم.قالو ممنوع الاكل جبت دبش
هدى.حي علييك
سالم.مانخلش شي في خاطرك
هدى.ربي يخليك ليا يارب '"وبدت تاكل،كلت شوية وبعدين وقفت"
هدى.خلاااص بنرقد
سالم.باهي ارقدي وتو نخفي اثار الجريمة
هدى.ههههههه به"ورقدت وسالم لم الحوسة وطلع شوية"
سالم.يادكتور امتى يبدا الكيماوي
الدكتور.السبت الجاي لو تحب بكرة نديرولها خروج وتجينا السبت
سالم.لالا خليها هنا بيش تبقى تحت رعايتكم
الدكتور.بس ايام الكيماوي لازم تاخد الجرعة وتروح لمكان ثاني لان لو ظلت هون رح تزعج المرضى لانها رح تتألم ويمكن تصرخ وكمان نفسيتها بتتعب لو بتظل هون لأن المحيط بيأثر
سالم.باهي تمام
"وهكي مرن الايام هذين انا نعدي لحوش سالم كل يوم واليل نروح وهاجر واختها يباتن مع العيال وسالم مع هدى في المستشفى والباقيين كل حد عايش حياته الا انا دايرة stopلكل شي!"
#عند_فارس
روح من تركيا لحوشة وثاني  يوم عدا لهله سلم عليهم وقعمز بيتغدا
امه.باهي الي روحت وشفناك
فارس.امي فوتيني
امه.كيف نفوتك والبنت الي خطبتها لك كنك لا معبرها لا مدورها حرام عليك
فارس.نقولها لك من توا راه حتى كان كملت انا وياها وازوزتها نجيبها للحوش وتقعد فيه شغالة مش اكثر
امه.والمنجوهة الي عند هلها
فارس.بعد تجيب كان ردت باهي وكان ماردت تو نشيللها ورقتها البركة فيك طفشتيها
امه.ريت ريت انا الي طفشتها
فارس.قولي عاد مانكش كارهتيها وتبي تطفشيها باي طريقة!قولي انك ماكنتش نازلة عليها
امه.ماشاء الله عليها الي تخليك تحكي مع امك هكي هدك مودة الي عمتها كانت تضرب فيها وماترد بكلمة
فارس.ياامي حرام عليك انت كيف تفكري تي مش هامك انا بكل مش حاسة بيا بتخربيلي حوشي زايد ناقص
امه.ريت هالحوش العامر
فارس.نقولها لك من توا انت خلاص خطبتيها وحددتي حتى موعد عرس وبتديرن صالة وقصة اطول من ايش تحسابنهش زيزتي الثالثة!عادي انا نعدي وناخدها لكن كان ماجتكم طالبة الطلاق بحقها!
امه.حرام عليك بنت الناس ليش
فارس.ومش حرام عليك بنت الناس الاخرى ولا هذي بنت ناس وهذكي لا
امه.اها هذكي لا!
فارس.انت النقاش معاك عدم!والله ماك مقتنعة ولا انك مغيرة كلامك وباتي طبعا طالع من الموضوع!اسمعي انا الي عندي قلته
امه.تو بعد تجيك لوينك تحطحط عليها وتو كيف ماعاملت حياة تعاملها سلم وليدي بنية مسيكينة ماعندها حد
فارس.انت شن تبي مني توا
امه.خود رقمها واحكي معاها واسمع هي ماعندهش مشكلة كان بترد حياة والله
فارس.لا بالك بتشرط عليا نردها ولالا!تي نرد حياة وتقعد شغالة عندها هالي رامية روحها هالرمية
امه.مغير خود رقمها ورن عليها وتو بعدين يحلها 100حلال
فارس.مليه عليا
ملت عليه الرقم وكتبه وطلع
خليل.متريحة هكي منكدة عالعيل حياته
فاطمة.انت اطلع منها انا عارفة مصلحته
خليل.لا حول ولا قوة الا بالله
#عند_فارس
طلع برة دخن سبسي ورن عليها
فارس.الو
مودة.الو من معايا
فارس.معاك خطيبك
مودة. ا اا اهلا
فارس.اهلين شن تبي فيا نين قريب تموتي بيش نكلمك
مودة.انا بنموت على شنو حرام عليك كنك تحكي هكي
فارس خذا نفس دخان بالقوة.ها يا اخت شن تبي عليش تبيني نرن عليك
مودة.فارس انت حياة طلقتها ولا بتردها
فارس.بنردها وبتقعدي شغالة عندها عندك مشكلة
مودة.فارس حرام عليك انت وهلي عليا واجد
فارس.مش عاجبك سيبي مش بالغصب
مودة.لا بالغصب انا من الاول مانبش وهما غاصبيني بيفتكو مني وانا مفش بيدي شي ومحوتك رضيت تجي تقولي هكي!
فارس.ايوااا ابديلي في اسطوانة مابيدي شي وانا مغصوبة
مودة.اذا انت الراجل مغصوب معناها انا شنو
فارس كانه سطل امية انكب عليه.لا مااه لاا انت
مودة.انت راجل لما تقول لا محد يضربك ويحبسك ويقول للناس انك موافق ويقرأ الفاتحة نيابة عنك!
فارس.يعني نفهم من كلامك انك ماتبيش تزوزي
مودة.انا مانبيكش انت مش مانبيش نزوز!
فارس.وكني انا
مودة.مش عاجبني اسفة بس طبعك وستايلك نحبش
فارس ضحك.نعنجدك لما تضربن جو الغرور عاساس ترديلي في كلمتي الي انبدري باه باه
مودة قعدت تضحك وهما الاثنين يضحكو شوية بعدين سكتو
فارس.اسف عالكلام الي قلته كنت حامق وفاهمك غلط
مودة.عادي مش مشكلة مقدرة وضعك بس ارجوك انهي هالمهمزلة
فارس.انا مش قادر ننهيها ولا عارف كيف نخش فيها اصلا
مودة.انا شارطة على هلي انك تطلق حياة او مانزوزش ردها وتو نقوللهم خلاص طالما ردها ومانخليهمش
فارس.انا شكلي بنعدي لخوتك ونقوللهم ان بنفسخ وخلي الي يصير يصير
مودة.حيجي الهم فيا انا هكي
فارس.والحل غير ردت حياة لان شبه مفروغ منه خلاص مش حترد
مودة تنهدت.مش عارفة والله
فارس.خليها للوقت نحن لعند توا حاجة رسمية مافش وتو نلقالها دبارة نحلها بيها
مودة.ان شاء الله خير هي باي
فارس.باي
"وصكرت"
فارس برم وخش لباته
فارس.ياحاج
خليل.نعم
فارس.اسمعني انا فاتحة مش قاري لو كان امي تجنوح وانت ماتقرش
خليل.كيف يعني
فارس.انا مانبيهش وهي ماتبينيش وهلها غاصبينها تي حتى في الدين حرام الكلام الي قاعد يصير!
خليل.باهي انا مانش قاريها ولا ني ماشي وهما اساسا ماحقوش وجهي راه!امك خطبتها  ودارت البيان بدوني وبدونك
فارس.امي هذي ماني عارف كنها
خليل.والله مراتك ماتستاهل بنية يتيمة وكويسة في حالها
فارس.ربي يهديها
خليل.ويهديك حتى انت فارس  حط روحك مكانها قبل ماتظلمها انا عارف انك توا حاسها بدلاتك وزهدت فيك لكن حط روحك مكانها وتخيل روحك في موقفها اذكر كل كلامها وطبقه على نفسك صدقني تحس بيها وتفهمها وزيادة!الصبايا يبنش وعارة واجد ويبنش حل واجد وانت مشكلتك لما تقنط تخنق ولما تحل تشرتع لازم تتوسط
فارس.حاضر ان شاء الله خير
"وروح للحوش"
فارس.الحوش فاقد طعمته بلاك جديات وقعد يذكر في مواقفها وكل حاجة اذكر كلمة باته حط روحك مكانها
حياة.فارس حبيبي خليك معايا بكرة
فارس.مش فاضي عندي شغل
حياة.به
////
حياة.حبيبي كساد جيبلنا واي ماكس اقل حاجة نمشي عليه الوقت
فارس.لالا فوتي"ويفتح نقاله ويعلق نت"
/////
حياة.حبيبي عندي مشية مع البنات ابتاع النادي للكفي تعال شيلني بعدين العشية باهي
فارس.نقدرش عندي عمل
/////
فارس قعد يذكر في مواقف واجد هو كان يحسابهن مرن مرور الكرام لاكن طلع لهن تأثير
مش ساهل ان انسان يعيش عشانك انت بس العمر كله لا طلعة لا خشة لا نت لا اي حاجة وانت تستكثر عليه ولو يوم كامل معاه
يذكر في معاملة امه الي كان يدير في روحه عمى عليها وماكانش يخلي فيها حتى تشكي منها!يذكر في قرايتها الي كان حارمها منها يذكر في كم حاجة وحاجة
فارس.زعمك ظلمتك لهدرجة وانا مش فاطن
أذيتك وانا حاس روحي نسعد فيك وندير في الاحسن لك
تذكر لما قالتله
حياة.الحب مش كلام حلو وحنية وهدايا بس فارس الحب ثقة وتعاون ودعم واهتمام الحب انك تخليني نكون انسان ونحقق الي خاطري نحققه مش بس نكون شي على الركن شي مانكش مستعد تقدم عشانه ولو يوم جمعة نزردو فيه بروحنا بلا حد.
حس الدنيا ضاقت بيه لهدرجة انا اناني لدرجة اني ماعطيتهش ولو يوم!
صكر الشبابيك ورقد وكالعادة حلم بيها لكن هالمرة مش زي قبل تضحك او تلعب او حتى مجرد انها تبحت فيها هالمرة حلم بيها تبكي ومضايقة
فارس.حيو كنك تبكي
بحتت فيه وبدت تختفي من قدامه وهو يبي يجيها ومش قادر قعد يعيط
لدرجة ان ناض خانقته العبرة
طوح المخدة في الساس وناض دوش وكل الي يفكر فيه هو زعمك صايرتلها حاجة
#عند_سالم
جا وقت جرعة الكيماوي ضربتها وهي تبكي وسالم شاد دموعه بالغصب
الدكتور وهو قريب يبكي.بالشفاء ان شاء الله انت صغيرة وعندك اطفال حرام هالسرطان يجيك الله يزيحو عنك يارب
هدى.شعري حيطيح ولالا
الدكتور.لالا ما رح يطيح بعد اكثر من جرعة ممكن وانت مااعتقدش تحتاجيون وتوصلي لهلمرحلة
هدى.ان شاء الله
سالم مسكها وصبت وطلعوا
هدى.حاسة نااار في عروقي تمشي ياسالم
"وصلوا للحوش رقدت على السرير وهو جنبها"
سالم.ها حبيبتي  شن توا
هدى.وجع ياحبيبي وجع جسمي كله مش قادرة خلاص
سالم.باهي شن نديرلك حبيبتي بيش يخف قوليلي
هدى.قولي الشعر الي هذك اليوم
سالم.غير ويش يوجع فيك ياغاليتي قلبي فداك وصحتي وعافيتيي
هدى.ااااااه ياغاليا مش قادرة خلااص مش قادرة
سالم حضنهه وقعدت تبكي وهو يطبطب عليها نين هدت ورقدت وماقدرش يسيبها ولا جاه النوم قعد ماسك فيها نين جا الصبح وطولت في النوم💔
سالم.هدى هدى
حبيبتي هدى نوضي يا قلبي
سالم.😲😳😳😳😳
$$$$$$$$$
هذه الحلقة ضمن الحلقات التوعوية لسرطان الثدي💙إياك عزيزتي واللجوء الي وسائل غير الكشف الطبي والعلاج المعتمد عالمي مثل الكي والخلطات لانها تزيد من سوء الوضع💔
شعر ياغاليتي استخدمته في الرواية لكن مش مقصوده بيه نسخ رواية غاليتي أو سرقتها!لأن موجود قبل الرواية ونعرفوه💙
#BIS