حكاية حياة

الجزء الثاني

منقووووووووولة

.................................

#حكاية_حياة
#حلقة69
الدكتور.التحليل الي جبته حضرتك أثبت أن صاحب الكيس عنده ورم خبيث
سالم.نعم لا مستحيل حضرتك ملخبط الدكتور قاللنا مجرد كيس!
الدكتور.لا يااستاذ هذا ورم خبيث وانكم درتوله إزالة هذا أخطر شي لأن اكيد توا استفشى في المكان الي تحول منه كله
سالم.به شن ندير.انا وخطير ولالا وكيف!
الدكتور.رغم ان مش من اختصاصي لكن نصيحة عدوا لبرة الأردن أفضل مكان تعالجو فيه  حاليا
سالم.حاضر حاضر"وصكر"
اول مرة يحس الدنيا ضاقت بيه إحساس انك تبي تفقد حبيبك فجأة هذا أسوء شي ممكن تحس بيه في الدنيا
هدى.حبيبي كنك شن في وجك تقول في حاجة شينة
سالم قعد يبحت فيها وعيونه تعبن ادموع يمرن عليه ذكرياتهم وضحكهم وكل شي
سالم.هدى
هدى.عيوني كنك تبكي شن في حد صارتله حاجة
سالم جا مسكها وقعمزوا
هدى.كنك شن في فجعتني
سالم.مافيش شي بس متذكرة تحليلك ابتاع الكيس
هدى.تي يييه مزلت شاقي بيه خلاص حولناه وانتهى الموضوع
سالم.اليوم طلع التحليل ابتاعه
هدى ملامح وجها بدن يتغيرن.باهي
سالم.الدكتور قال إن مش مجرد كيس قال إن ورم
هدى.ورم حميد مه؟ احكي ورم حميد صاح وخلاص داروله إزالة وانتهى الموضوع
سالم.خبيث ياهدى
هدى.به عادي عليش مضايق خلاص هما حولوه يعني سواء مجرد كيس ولا حتى خبيث طالما حولوه يبقى خلاص سالم رد عليا احكي ماتسكتش احكي خلاص مه!
سالم.هدى حبيبتي اهدي هذا قضاء ربي وبإذن الله من بكرة نعدو الأردن ونعالجوه وتروحي خير من قبل وأحسن
هدى قعدت تبكي.بس هما قالولي حولوه وهو مجرد كيس وحتى الجرح على الجنب بسيط بس لو خبيث انا حنتشوه ويقعد منظري شين شعري حيطيح وحندير كيماوي سالم انا حنموت حنموووت وحنسيب عيالي صغار حنخليهم أيتام حيتيتمو بدري حينحرمو من امهم 
سالم حضنها وقعد يهدي فيها وهي تحكي وتبكي نين سكتت
سالم.صبي بس ابدي لمي دبشك على ماحجزت وطلعنا من بكرة"ولما وخرها لقاها دايخة"
هدى
هدى
هدى نوضي
هدى
رقدها عالكنبة وقعد يواعي فيها وجابلها أمية جت أسو شافتها هكي
أسو.ماما ماما كنك بابا كنها ماما راقدة هكي
سالم.ماما تعبانة شوية خليها بس وبخ عليها أمية
هدى بدت تنوض بالشوية
سالم.اسو عدي خليك مع ليث
هدى.سالم عدي جيبه ليا
سالم عده جابه وخذاته منه هدى وحضناته هو واسو وقعدت تبكي
سالم.خلاص حبيبتي حرام عليك اهدي ترعشي فيهم معاك حنعدو بكرة  وحتتعالجي نعرفك قوية
هدى.قوية في كل شي إلا عيالي الي حيقعدو أيتام وحياتي الي حتنتهي  انا انتهيت ياسالم خلاص خسرتك وخسرت حياتي وكل شي
سالم جا حضنها هي والعيال كان يحاول يسكتها ويسكتهم لكن هو بروحه كان يبكي
سالم.خليك معاهم لازم نطلع توا
"وطلع وسيبها عدا لحوش هله"
علي طلع من الباب.اوووو مش مصدق سالم سيب هدى وهلها وجاي لخوه
سالم قعد يبحت فيه وسااااكت
علي.داير كاينة وتبيني نطلع منها ولا تبي مبلغ انا قايلك من قبل تدير حاجة تحمل مسؤوليتها ولا خلي هدى وهلها يساعدوك انا مش شوري!
سالم ماكانش قادر يرفع عيونه فيه كان عارف روحه شن داير وكيف ساحب منه ومن عيلته وكيف علي قاله حتوقف عليا ومش حنساعدك
علي حس روحه كثر عليه وسالم ماحكش بكل وعيونه في الأرض
علي.سالم
سالم كان باين في صوته الكسرة وخنقت العبرة.سامحني
علي.سالم تبكي؟تي كنك خش خش يارا 
سالم خش للحوش ماحكش ولا كلمة نين وصل للمربوعة وطاح على اركابه
علي.تي كنك ياراجل شن في وطبسله
سالم.انا انتهيت ياعلي انتهيييت وحتى مساعدتكم نستاهلهش
علي. كنك شن في غير احكي وماتقولش هكي نحن خوتك مهما يصير
سالم.هدى عندها الخبيث ياعلي وفي مرحلة خطرة واحتمال يكون منتشر
علي.لا ياراجل ياحول الله وشن تبي تدير توا
سالم.مش عارف حااير طول عمري لما نحير نعديلها توا مش عارف لمن نعدي شن ندير فلوسي في المصرف ولازم نطلع نسافر بيها
علي.اهدى توا وأذكر الله وصبي نطلع انا وياك احجز تذكرتين عدو للأردن زي مادرت مع يوسف زمان وانت تعرفها ماهيش جديدة عليك وعالجها وان شاء الله تروحو طيبين وفلوسك ساهله تو نحولهن لكي وانت برا
سالم قعد ساكت ويبكي وخلاص
علي.لهدرجة تحبها؟
سالم.واكثر ياعلي وأكثر عايش معاها كل حاجة بكل ملي حياتي وحوشي وشغلي كل شي هي معايا فيه بديت معاها مساعد مدير في شركة ووصلت لمرحلة مدير شركة وبدون حتى شركاء ماكانتش مرا عادية نحبها ياعلي ومانقدرش نكمل بلاها والله مانقدر نكمل "وقعد يبكي"
علي قعد ساكت ويبحت فيه وجعه خوه ووجعاته هدى
علي.صبي ياراجل صبي انت مفروض الي تدعمها تخليها أقوى بيش تتعالج تنوض تبكي
سالم مسح دموعه وصبى
علي.صبي ولع السيارة علي ماجيتك
طلع سالم يولع في السيارة وعلي خش
علي.سهى سهى
سهى.نعم
علي.نقالي ومفتاح الخزنة
سهى.حاضر بس شن في وجهك تقول في حاجة
علي.هدى مرات سالم عندها الخبيث
سهى.هيييييه يناعلي مسكينة
علي.ااه والله وجعتني "وخش للدار جاب فلوس ونقاله"
وركبلي فوق دق الباب طلعتله
انا.خير علي
علي.خيرات حيو اسمعي بنقولك حاجة بس تهدي ااه
انا.كنك شن في حد صارتله حاجة
علي.هدى مرات سالم
انا.كنها
علي.عندها الخبيث
انا.هييييه يناري وكيف عرفتها
علي.سالم جا لوطة بيطلع بيها بكرة البسي وانزلي نشيلك لها اقعدي معاها عاونيها نيين بكرة يسافرو
انا.حاضر هي
"وخشيت لبست  عبايتي ووشاحي وطلعت ركبت في السيارة"
انا.يشفيها ربي ياسالم
سالم.ان شاء الله
وعلي بده يمشي بالسيارة نين وصلنا للحوش
نزلت ومعايا  علي وسالم مابش ينزل اول ماخشيت لقيت هدي سلمت عليها اظبطتني قعدت هي تبكي وانا نبكي
علي.تي خلاص معقولة هكي جايبك تهديها انا
انا.سكتت وقعدت نمسح في دموعي
علي.لا بأس ياهدى وان شاء الله ربي ينزل عليك شفاءه هذا ابتلاء من الله وانت قده
هدى.ان شاء الله بس وين سالم وانتم كيف عرفتو
علي.قاعد برة عطيني جوازاتكم انتم الاثنين ولا قولي لحياة مكانهن تو تجيبهن
صبت للدار جابتهن وجت
علي خذاهن وطلع وانا قعدت معاها وهي كانت ساااكته حكتلي كيف ووين وكل حاجة وبس وبعدها كل مانحاول نحكي ترد باختصار عرفتها مش قادرة تحكي خذيت اسو وليث وقعدت نسكت فيهم ونلعب معاهم
.
.
علي خذاه وعدو للمكتب حجزو تذاكر للأردن ورن على صاحبه قاله يطلعلهم تأشيرة على أساس انهم مرضى حرب قاله تأخذ 3ايام أقل شي
علي.خلاص هكي تمينا كل شي والفلوس انت مجرد ماتعدي غادي نحولهن لكي دولار
سالم.تمام منور وجميلك هذا مش حننساه
علي.ماتقولش هكي نحن خوت والي يجي شورك يجي شوري انت بس معش تسحب روحك منه
سالم.حاضر حاضر
وصلو للحوش خش سالم وعلي روح لحوشه
انا كنت وقتها دايرة العشا تعشو وهدى كانت راقدة وسالم ماجاتش نية مغير هك وخلاص
انا.سالم أن شاء الله ربي يشفيها
سالم.ان شاء الله خير
انا.تخش ترقد ولا تقعد معايا
سالم.والله شن نقولك انا عارف انك جاية عشانه ومفروض نقعد معاكم لاكن والله ماني قادر نصبي وحاس روحي مرررهق
انا.لا عادي  ولا يهمك خش تريح وراك عرم مشاوير بكرة وانا مع العيال في الدار
سالم.تمام ربي يعطيك الصحة
انا جيت بنعدي
سالم.حياة انا اسف
انا.على شنو
سالم.على اني درت هكي لما انت تطلقتي وصبيت ضدك وضد يوسف
انا.ماتقولش هكي نحن خوت وحتى مصارين البطن يتعاركن
سالم.يعني معش راقيلك مني
انا.زعلانة من انك ماوقفتش معايا وقت احتجتك للمرة الثانية مش أكثر بس مع ذلك عادي
سالم.انا آسف اني خذلتك بهالطريقة ومرتين سامحيني
انا.ربي يسامحك انا اختك ومانشيلش عليك
سالم.ربي يخليك ليا
"وخش للدار"
قعد مصبي ويبحت في هدى ماكانتش راقدة كانت تبكي وخلاص
جا قعمز في جيهتها
هدى.سالم جيت
سالم حضنها ردت تبكي
سالم.خلاص حبيبتي  سادك بكاء طول عمرك قوية ونبيك تبقي هكي حنكملو العلاج مع بعض وحتردي زي قبل وأقوى الجمعه أن شاء الله نسافرو ونديرو تحاليل جدد وبإذن الله نروح بيك ويقعدن ذكرى هالاحداث
هدى.بس
سالم.مابسش الكلام الي قلته حيصير وتوا تعالي نرقدو عشان انا تعبااان
وخذاها في  حضنه ورقدو
#عندي_انا
مش عارف ليش الي صار اليوم فكرني بفارس
زعمه لو كنت مكانها شن كان حيدير
متأكدة كان حيصبي معاي
صبيت جبت النقال وقعدت نقلب ونذكر في القصة وكل حاجة صارت
انا.زعمك ظالمتك يافارس ولا ظالمة روحي
زعمك مكالماتك بنية نظيفة زي ماتقول وان الي كنت تدير فيه مجرد غيرة ولا انت فعلا شاك فيا
باهي لو شاك فيا ليش تزوجتني من الأول
ولو شكك جا بعد هذك الرسالة معناها توا خلاص انتهى لأنك عرفت سببها لكن ليش تشك اصلا
ولا انت ماكنتش شاك والنقص الي فيا هو الي مخليني نقول هكي ياربي عيني ياربي والله ماعاد عارفة شن ندير ولا وين نعدي ومرايفة عليه وعلى حوشي وفكرة أن يأخذ غيري واااعرة عليا بكل خذيت نقالي وفتحت صفحته عالفيس لقيته ناشر
"الحياة حب والحب حرب، والحرب امرأة، فلا حب بلا حرب ولا حرب بلا امرأة وأعلن اني في حرب ضد امرأة تحاربني وتحارب نفسها ولكن
أحبها "
حرب ضدي يافارس ضدي انا ولا ضد نفسك ولا ضد الحب وحربي انا الي قعدت ضد نفسي انت كيف حسيت بيها!
شن القرار الي مفروض نأخذه نرد ولالا
واذا بنرد هو اصلا يبيني ولالا مكالمته الأخيرة كان فيها قاسي بكل وحكا عن مودة وكأنها خير مني عنده!
أنا مستحيل في لحظة نحارب على راجلي ضد غيري اذا يبيني مستحيل يشوف غيري أما نفرض روحي عليه ضدها هضا مستحيل سكرت النقال ورقدت
#عند_علي
علي.الو
يوسف.الو
علي.يوسف امتى مروح انت
يوسف.مزال ياعلي كنك في حاجة
علي.انقنك روح ساد وزيادة الي قعدته بعدين نبيك معايا
يوسف.خير في حاجة
علي.مرات سالم عندها الخبيث ومسافر بيها اليومين هذين
يوسف. لا ياراجل ماتقولهش
علي.والله هذا الي صار  روح نبيك معايا مانقعدش بروحي في البلاد
يوسف.حاضر حاضر حنحجز نروح بكرة
علي.توصل بالسلامة
مروة.حبيبي كنك شن في
يوسف.مراة سالم عندها الخبيث نبي نروح بكرة
مروة.ياحول الله ربي يشفيها مسكينة لكن شن دخل هذي في هذي عليش مروحين ونحن حتى شهر عسلنا ماكملناه
يوسف.مش برادة هي المرا مريضة ونحن مهيجين بعدين علي يبيني معاه مايقعدش ماسكها كلها بروحه
مروة.اوفف عاد تي نحن ماصدقنا ازوزنا مانحصلوش شهر عسل مسقم!
يوسف.غير كان صحت مرآة سالم وهدن الأوضاع نوعدك نردوا باهي
مروة.وعد
يوسف.وعد نوضي توا نطلعوا نحجزوا
مروة.لالا عدي انت وانا بنقعد
يوسف.غريييبة  تبيش تطلعي يستر الله
مروة.ههههه بنديرلك مفاجأة غير عدي بس
#عند_علي
كمل مع سالم حاجته وشغله كلها وروح للحوش
سهى.شن صار حبيبي
علي.الحمدلله تمينا كل حاجة وتو يسافر هاليومين ان شاء الله ربي يشفيها
سهى.ان شاء الله"وكانت لابسة قفطان حوش قصير ونزيك"
علي.تعالي انت قوليلي شن السماحة هذي
سهى.ههههههههه السماحة هذي قاعدة لكن بتبخ عطرها قبل
علي.ههههههه باه عدي على ماكليت حاجة من التلاجة"وطلقها خشت للدار فتحت الدولاب خذت حبة وجت"
علي حضنها وجابها على صدره
علي.تي وين العطر شميتش
سهى.اه نسيته
علي.تي مالا عليش عديتي
سهى.ههههه خلاص فوته
علي.باااه
ووووووووو
#ثاني_يوم
نضت انا وتيت الفطور للعيال وهدى وسالم ودقيت عليهم طلع سالم
انا.صباح الخير
سالم.صباح النور معليش تعبناك معانا
انا.لا عادي كيف حالها توا
سالم.تبكي وخلاص الليل كله ترقد شوية وتنوض تبكي
انا.كان الله في عونها وشفاها يارب
سالم عيونه دمعن.امين
انا.تعال أفطر هي
سالم.لالا فوتي عندش نية بنطلع في كم حاجة لازم نديرهم بيش نسافر
انا.باهي براحتك
سالم.زعمك نواعيها
انا.لالا خليها راقدة مادام الليل كله واعية وتبكي
سالم.باهي السلام عليكم هي
"وطلع"
قعدت مع العيال نلعب فيهم ودايرة بالي منهم وبطني كانت توجع بكل وكبدي زاعمة ربي يصبرني خلااص تعبت
شوية هكي وقيس ال11 جا علي حط سهى وعدا
انا.اهلا
سهى.طولت عليك آسفة لكن الغداء محوتك طاب
انا.تي غير عليش غداء كنت بنسوي توا
سهى.عادي ريت هالحاجة الكبيرة وين هدى
انا.راقدة
سهى.باهي خليها معناته نهدرزو نين تنوض
وهدرزنا شوية بعدين جاعوا العيال وجا سالم وعلي
انا.نواعوا هدى
سهى.تعالي نحطو وبعدين نواعوها
انا.باهي هي
"وحطينا الغداء ووتينا كل شي وخشينالها"
انا.هدى هدى
هدى فتحت عيونها بالشوية
انا.نوضي خلاص الساعة1راه
هدى.حي اسفة خداني النوم
انا.هي نوضي حطينا الغداء
هدى.ماشاء الله ربي يعطيك الصحة نعني مانفقدك
انا.لا مش انا دايرته سهى دايرته وقاعدة برة
هدى.ربي يعطيها الصحة ان شاء الله مانفقدك سلم خياتي
انا.سلمك غير نوضي هي
"وناضت طلعت سلمت على سهى وقعمزنا نتغدو ماكانتش تتغدى مغير توكل في العيال وتمشي في الجو وتجامل وخلاص"
انا.هدى والنبي ماتزعلي روحك المؤمن مصاب حبيبتي وان شاء الله تعدي وتعالجي وتروحي لعويلتك طيبة
سهى.صاح والله بعدين اهم عوامل الشفاء النفسية راه لو كنت ضعيفة ومستسلمة كيف تبي
تقاومي المرض
هدى.ان شاء الله خير
"ونحن مزلنا نتغدوا خشوا هل هدى "
"هدى اول ماحقت امها اظبطتها وقعدن هن الاثنين وحدة اشر من الاخرى بكاء!وانا قعدت نبكي معاهن كان منظرهن يوجع القلب ربي يكون في عونهن،؛ويشفيها يارب"
قعدن البنات يفكن فيهن وهدى وخرت وقعدت امها تمسح في دموعها
سلمت على باقي خواتها وانا سلمت عليهن وعلى هاجر
هاجر.معقولة  ياحيو عارفة من امس وماكلمتيش قلتي
انا.والله ماقدرت نقولها لكم ياهاجر قلت تو سالم يجيكم وخلاص
هاجر.مهما  كان مفروض من امس احنى معاها
انا.انا جيتها من امس معاها ومع العيال
هاجر.باهي ربي يعطيك الصحة
شوية هكي وعالمغرب رن الباب فتحته لقيته يوسف
انا.فيفااا"وحضنته"
يوسف.عنشكلك رايفت عليك يانكد
انا وخرت.حتى انا والله معقولة هكي كنك ماترن
يوسف.هههههههه مش فاضي انا توا شخص مرتبط
انا.اشيه اشيه غيراتك مروة
مروة.مغير عبريها مروة وسلمي عليها
انا.تي وينك انت اصلا" طلعت من ورا يوسف"
انا.اهلا اهلا"حضنتني"
مروة.كيف حالك وشخبارك وكيف حال بنتنا
انا.بنتي قصدك!
مروة وجها انقلب.
يوسف.كيف الجو جوا قسمابالله ماني قادر نشوفها هدى بالذات خشت فينا كيف الاخت
انا.خش شوفها والله حالها يقطع القلب ساكتة وخلاص والليل كله تبكي وخلاص يطلع سالم يقولي راهي مارقدتش
يوسف.ربي يشفيها ويعافيها يارب
انا.ان شاء الله
وخشينا مضت العشية كلها وفي الليل روحوا عيت يوسف وعلي وانا معاهم وخواتها قعدن
"ومشن يومين ونحن نجوا في العشية ونروحوا نين جا يوم سفرها بتنا كلنا ونضنا عالفجر"
هدى.حيو بالله كان صارتلي حاجة العيال ديري بالك منهم
انا.هدى تقوليش هكي عيالك حتروحيلهم كويسين وطيبين باذن الله
هدى.ان شاء الله بالسلامة
انا.بالسلامة
وعدت ودعت امها وخواتها وسلمت عليهم كلهم وطلعت للسيارة
سالم.شهر عسلنا الثاني
هدى ابتسمت شوية وخلاص
يوسف ولع السيارة ووصلهم عند المطار نزلوا وكيف بيركبوا
يوسف.هدى يعلم الله انك كيف معزة حيو وانك ربي يسامحك من يوم خشيتي فينا كيف اختنا ولا عمره صار بينا حسس
هدى.وحتى انتم والله كيف خوتي مانعزهم عليكم بشي
يوسف.ان شاء الله ربي يعافيك وتروحوا طيبين
هدى.امين
سالم.توصي بحاجة
يوسف.كلمنا اول ماتوصل ولما تستحق حاجة دغري قول ونحن هنا الي تبيه يكون عندك
سالم.تسلم عارفكم ماتقصروش
"وركبوا للطيارة ويوسف روح للحوش"
سالم.حبيبتي
هدى.نعم
سالم.كنك ساكتة احكي
هدى.ماعندش نية ولا رغبة ولا اي شي نحكي
سالم مسك يدها وباسها وقعد ماسكها بيديه الاثنين
هدى.سالم نحبك
سالم.وانا نحبك ونموت فيك ومانبيش ساعة من عمري بلاك
هدى.حتبقى تحبني حتى لو اشوهت؟لو شعري طاح ولو وجهي شحب و"سالم حط يده على فمها"
سالم.نحبك في جميع صورك وحالاتك وزي ماحبيتك وانت سمحة ومافيك شي نحبك وانت مريضة ونحبك مهما كان شكلك لاني حبيت فيكي الروح يا هدى مش الوجه
هدى.حتبقى تحبني حتى لو متت
سالم.فكينا من الكلام الشين حبيبي توا
هدى.لو متت ماتحبش غيري ياسالم ازوز عادي بس ماتحبش ماتقولش نحبك لوحدة غيري
سالم.اششششش مانبيش نسمع الي تقولي فيه انت حتبقي معايا طول العمر
هدى حطت راسها على كتفه ورقدت لييين وصلوا
سالم.هدى هدى هدى نوضي وقعد يحرك فيها
#يتبع
هذه الحلقة ضمن فعاليات حملات التوعية ضد السرطان الوردي✋كل التفاصيل فيها حقيقية وطبية، لازم من الفحص كل فترة وفترة عزيزتي💙ورد بالك تخلي حد يدير أي شي لجسمك بدون ماتكوني فاهمة وواعية الي قاعد يصثر #السرطان_الوردي
#شهر_اكتوبر #سرطان_الثدي