My Wandering Spirit Lady[ဘာသာပြန်]

အခန်း (၂၀) ချစ်ခြင်းမေတ္တာတွင် ရိုးသားခြင်း/

Unicode

အခန်း (၂၀) ချစ်ခြင်းမေတ္တာတွင် ရိုးသားခြင်း

လန်ရှင်းချန် ဆုမော့မော့ကို နားလည်ပါသည်။ သူမ(လန်ရှင်းချန်) သိသည်။ သူမ(ဆုမော့မော့) စိတ်နှင့်ဆိုလျှင် သည်အမှုကိစ္စအား ဆုံးခန်းတိုင် ကိုင်တွယ်တော့ပေမည်။ ဆုမော့မော့ အေးတိအေးစက်နေသည်ထက် နည်းနည်းလောက်ဖြစ်ဖြစ် လက်တွေ့ကျကျ အသက်ပါပါလေး ပို၍နေထိုင်စေချင်စိတ်တို့ လန်ရှင်းချန်ထံတွင် အကြိမ်ရေများစွာ ပေါက်ဖွားလာပေသည်။

သို့သော်လည်း ထို့သို့သာ အမှန်တစ်ကယ် ဖြစ်ခဲ့ပါက သူမသည် ဆုမော့မော့ မဟုတ်တော့ပေ။ လန်ရှင်းချန် ဖြစ်သွားလိမ့်မည် မဟုတ်ပါလား?

လန်ရှင်းချန် မဆိုသလောက် ရယ်မိသည်။ သူမ၏ အကောင်အထည်မရှိသော ဝိဉာဉ်ခန္ဓာသည် လေထဲတွင် မျောလွင့်နေစဉ် သူမ၏ မှတ်ဉာဏ်တို့သည်လည်း ဟိုးဝေးဝေးသို့ လွင့်မျောသွားသည်.....

လွန်ခဲ့သော နှစ်နှစ်ဆယ်နီးပါးက လေးနှစ်သမီးလေး လန်ရှင်းချန်သည် ရှန်းယန်မြို့ မိဘမဲ့ဂေဟာရှိ ကလေးများထဲမှ တစ်ဦးဖြစ်ခဲ့သည်။　　

ထိုအချိန်က သူမသည် မိဘမဲ့ဂေဟာရှိ အခြားသောကလေးလေးများ အနိုင်ကျင့်ခြင်းကို နေ့စဉ်နေ့တိုင်း ခံခဲ့ရသည်။ မန်နေဂျာနှင့် ပရဟိတလုပ်အားလာပေးသူများ ကြည့်မနေသည့်အခါမျိုးတွင် အကောင်ကြီးသောကလေးများသည် သူမကို ချောင်ကျသော ထောင့်သို့ဆွဲခေါ်သွားလေ့ရှိသည်။ သူတို့သည် သူမအား တွန်းထိုးချင် တွန်းထိုးမည်။ ခေါင်းကို ရိုက်ချင်လည်း ရိုက်မည်။ အကယ်၍ လန်ရှင်းချန် မတော်တဆ ခလုတ်တိုက်လဲပါက ရဲတင်းလှသော ကလေးတစ်ချို့က ဆံပင်မှဆွဲကာ ဆွဲခေါ်သွားလိမ့်မည်။

ထိုစဉ်အခါက လန်ရှင်းချန်သည် တစ်ခြားသောကလေးများ၏ အပယ်ခံ ဖြစ်ခဲ့သည်။ သူမ၏ နေ့ရက်များကို မျှော်လင့်ချက်မဲ့စွာ ဖြတ်သန်းခဲ့ရပြီး သူမ၏ နေ့ရက်တိုင်းကို အကြောက်တရားဖြင့် နေထိုင်ခဲ့ရသည်။ သူမကိုယ်သူမ ကာကွယ်ရန် ခက်ခက်ခဲခဲ ကြိုးစားခဲ့ရသော်လည်း လူအုပ်ကြီးအား ပြန်ခုခံရန် အားအင်မဲ့နေခဲ့သည်။