My Wandering Spirit Lady[ဘာသာပြန်]

အခန်း (၅၀) ရှောင်လွှဲ၍မရနိုင်သော

Unicode

အခန်း (၅၀) ရှောင်လွှဲ၍မရနိုင်သော

ထိုနေ့ညက ဆုမော့မော့နဲ့လန်ရှင်းချန်သည် ဆုမိသားစုအိမ်တွင်နေခဲ့ကြသည်။ လန်ရှင်းချန်သည် အမွှေးပွဝက်ဝံရုပ်ကြီးတွင် ကပ်တွယ်နေဆဲဖြစ်ပြီး သူတို့နှစ်ယောက် တစ်ကုတင်တည်းအိပ်ခဲ့ကြသည်။

လန်ရှင်းချန်သာအနားမှာရှိနေရင် ဆုမော့မော့ စိတ်လုံခြုံခြုံနှင့်အိပ်ပျော်သည်။ သို့သော် မနေ့ကလိုပဲ ဆုမော့မော့ ပုံမှန်အနေအထားဖြင့် လှဲနေသော်လည်း အိပ်မောကျသွားချိန်တွင် ဝက်ဝံရုပ်ကြီးပေါ်သို့ လက်ရောခြေပါခွထားတော့သည်။ ခေါင်းကလည်း ခေါင်းအုံးပေါ်ကနေ အရုပ်ကြီးပေါ်သို့ရောက်သွားပြီး ခန္ဓာကိုယ်တစ်ဝက်လောက်က အရုပ်ပေါ်ရောက်နေလေသည်။

ထိုအနေအထားတို့သည် လန်ရှင်းချန်အပေါ် ဘာအကျိုးသက်ရောက်မှုမရှိပေ။ သူမသည် ဝိဉာဉ်ခန္ဓာသာရှိပြီး ဆုမော့မော့ သူမကိုမထိတွေ့နိုင်ပေ။

ညတွင် လန်ရှင်းချန် နှစ်နှစ်ခြိုက်ခြိုက်အိပ်မောကျနေသောဆုမော့မော့ကို ကြည့်နေသည်။ ကလေးလေးတစ်ယောက်ကဲ့သို့ ဖြူဖြူစင်စင်အိပ်ပျော်နေသောမျက်နှာလေးကိုကြည့်နေသည်။ ကလေးဘဝကအဖြစ်အပျက်များကို ပြန်မတွေးဘဲမနေနိုင်တော့။

သူတို့တွေ့ဆုံပြီးနှစ်နှစ်မြောက်တွင် ဆုမော့မော့တို့အိမ်သို့ လန်ရှင်းချန် ပထမဆုံးအကြိမ်ရောက်ခဲ့သည်။ ထိုအချိန်က မေမေဆုသည် ဆုကျယ်ယွီကိုကိုယ်ဝန်မဆောင်ရသေးပေ။ ထို့အပြင် ဆုမိသားစုသည် အသေအချာစဉ်းစားပြီးနောက် လန်ရှင်းချန်ကိုမွေးစားရန် ဆုံးဖြတ်ထားပြီးဖြစ်သည်။

ထိုနေ့သည် ကမ္ဘာ့ကလေးများနေ့ဖြစ်သည်။ မနက်စောစောအချိန်တွင် ဆုမော့မော့ရဲ့မိဘများသည် ဆုမော့မော့ကို မိဘမဲ့ဂေဟာသို့ခေါ်သွားပေးသည်။ ဆုမော့မော့သည် ကျစ်ဆံမြီးလေးနှစ်ဖက်ကျစ်ထားပြီး အနီရောင်ကြိုးသိုင်းစကပ်လေးထားပြီး စကပ်ပေါ်တွင်ဖဲပြားလှလှလေးလည်းပါသည်။ အနီရောင်သားရေဖိနပ်လေးစီးထားကာ ကြွေရုပ်လေးတစ်ရုပ်လိုလှနေသည်။

ဆုမော့မော့အမေသည် လန်ရှင်းချန်အား အခန်းလွတ်တစ်ခုထဲခေါ်သွားပြီး အဝတ်အစားအသစ်တစ်စုံနှင့် ဖိနပ်အသစ်တစ်ရံကို သူမအိတ်ထဲမှ မျက်လှည့်တစ်ခုသဖွယ်ထုတ်ပေးလာသည်။ ဆုမော့မော့ဝတ်ထားသည်နှင့် ပုံစံတူပြီး အရောင်သာကွဲသည်။ အဝါရောင်ဖျော့ဖျော့လေးဖြစ်သည်။