The Ultimate Business Lady [Myanmar Translation ]

Chapter 63

Unicode

Ch-63 ဘဝတစ်သက်စာကြွယ်ဝချမ်းသာမှုနှင့်ဂုဏ်ကျက်သရေ

လမ်းတစ်လျှောက်လုံး သခင်မကျောက်၏အတောမသတ်နိုင်တဲ့မကျေနပ်ချက်တွေကိုနားထောင်ရင်း ရှန့်ကွမ်ယန်လန်စိတ်မရှည်ဖြစ်လာ၏။ သို့သော်ငြား သူမအသက်အရွယ်နဲ့ တစ်ယောက်တည်းသွားမယ်ဆိုရင်လည်း လူတွေဆီကနေအတင်းအဖျင်းစကားတွေထွက်လာမှာကို စိုးရိမ်လို့ သူမစိတ်ထိန်းပြီးသည်းခံရုံသာတတ်နိုင်သည်။

'' လန်အာ တကယ်လို့မင်းသာ ယွင်အိမ်ကနေ ရှန့်ကွမ်ယွမ်ထားခဲ့တဲ့ပစ္စည်းကိုသာ ရအောင်ယူလာနိုင်ခဲ့ရင် မင်းကိုတစ်သက်စာကြွယ်ဝချမ်းသာမှုနဲ့ဂုဏ်သိဏ္ခာရစေရမယ်လို့
ငါ(ပန်ဝမ်)ကတိပေးတယ် ''
ဝမ်ချီလင်းရွှမ်ရဲ့စကားတွေဟာ သူမ့နားထဲမှာ တဝဲလည်လည်ကြားယောင်နေကာ သူမ့ရင်တွေတဒိတ်ဒိတ်ခုန်လာသည်။
[benwang- ပန်ဝမ် = မင်းသားတွေက သူတို့ကိုယ်သူတို့ ခေါ်ဆိုတဲ့အသုံးအနှုန်းပါ ]

ဝမ်ချီလင်းရွှမ်နှင့် အချိန်အတိုင်းအတာတစ်ခုအထိ မိတ်ဆွေအဖြစ်ရင်းနှီးခဲ့ပြီးတဲ့နောက်မှာ ကြွယ်ဝမှုနဲ့ဂုဏ်ကျက်သရေတွေအလယ်မှာ မွေးဖွားလာခဲ့ပြီး ချောမောထက်မြက်တဲ့အရည်အချင်းကောင်းတွေ ပိုင်ဆိုင်ထားသည့်မင်းသားကို သူမတဖြည်းဖြည်း သဘောကျလာခဲ့၏။ မားမားလင်ကလဲ သူမရဲ့အစီအစဥ်တွေကြောင့်သာ ယွင်အိမ်မှာနေပြီး သူမလိုအပ်သမျှကိုတိတ်တဆိတ်လုပ်ကိုင်နေခဲ့တာ။ ရှန့်ကွမ်အိမ်တော်ကို ကြွယ်ဝမှုနဲ့ဂုဏ်ကျက်သရေတွေယူဆောင်လာဖို့ဆိုရင် သူတို့တွေအရင်ဆုံးယွင်အိမ်ကိုပြိုလဲသွားအောင်လုပ်ရမယ်ဆိုတာကို သူမ့မိဘတွေ ကောင်းကောင်းကြီးနားလည်ပြီးသား။ သို့သော်ငြား ယွင်လင်းရွှမ်တစ်ယောက် ကျန်းနန်ကနေ ပြန်ရောက်လာတဲ့အချိန်ကစပြီး လူတွေအားလုံးမထင်မှတ်ထားလောက်အောင် ပြောင်းလဲသွားခဲ့တယ်။

အရင်ကဆို ယွင်လင်းရွှမ်ကသူမ​ပြောသမျှကို တသွေမတိမ်းနာခံခဲ့ပြီး တစ်ခါမှဆန့်ကျင်တာမျိုးမရှိခဲ့ဘူး။ သူမသာတစ်ခုခုလုပ်ခိုင်းတယ်ဆိုရင် ယွင်လင်းရွှမ်ဟာသူမ့အတွက်နဲ့ သူ့မိဘတွေကိုတောင် အတိုက်အခံလုပ်တဲ့အထိပဲ။ သူတို့နှစ်ယောက်က ညီအစ်မအရင်းထက်တောင်ပိုပြီးရင်းနှီးကြသည်။ သို့ပေမဲ့ယွင်လင်းရွှမ်ဟာ ကျန်းနန်ကပြန်ရောက်ပြီးကတည်းက သူမ့မိဘတွေကိုအကြိမ်ကြိမ်အခါခါ မသိကျေးကျွန်ပြုထားပြီး သူမ့ကိုလဲ အဖက်မလုပ်ဘူး။ သူ့အချိုးတွေကသိပ်ဒေါသထွက်စရာကောင်းတယ်။