The Ultimate Business Lady [Myanmar Translation ]

Chapter 69

Unicode

Ch-69 ညနက်မှရောက်ရှိလာသည့်ဧည့်သည်

ထိုစကားက ကိုယ့်ပေါင်ကိုယ်လှန်ထောင်းလိုက်သလိုဖြစ်မနေဘူးလား။ ထိုအမျိုးသားကနောက်တောက်တောက်မျက်နှာပေးဖြင့် နှာခေါင်းကိုလက်ဖြင့်အသာကုတ်လိုက်ပြီး လေးလေးနက်နက် ပြောလာသည်။
'' အိမ်တော်ရဲ့အခြေအနေက အတော်လေး ရှုပ်ထွေးနေတာပဲ။ ဒီတစ်ညတည်းနဲ့တင် လော့ဟယ်ခြံဝန်းထဲကို ခိုးဝင်လာတာ အဖွဲ့သုံးဖွဲ့ရှိသွားပြီ။ သူတို့ဘာလာရှာမှန်းတော့မသိပေမယ့် သူတို့အားလုံးလက်ဗလာနဲ့ပဲ ပြန်သွားကြတယ်... ပြီးတော့ တစ်ဖွဲ့နဲ့တစ်ဖွဲ့ မဆုံအောင်ရှောင်နေတာကို ကြည့်ရတာအရမ်းစိတ်ဝင်စားဖို့ကောင်းတယ် ''

'' အဖွဲ့သုံးဖွဲ့တောင်လား?! '' လင်းရွှမ်အံ့အားသင့်သွားတယ်။ ဝမ်ချီလင်းရွှမ်ရဲ့လူတွေကလွဲရင် မားမားလင်ပဲရှိတယ်လို့ သူမတစ်လျှောက်လုံးထင်နေခဲ့တာ။ ဒီလောက်လူတွေအများကြီး သူမ့အိမ်ထဲမှာ ဝင်ချည်ထွက်ချည်လုပ်နေလိမ့်မယ်လို့ မထင်ထားခဲ့ဘူး။ နဖူးမှာအရေးအကြောင်းပေါ်သည်အထိ မျက်မှောင်ကြုတ်ကာ ခပ်တိုးတိုးရေရွတ်လိုက်မိတယ်။ '' သူတို့တွေ ဘာလာရှာကြတာလဲ? လော့ဟယ်ခြံဝန်းက အရမ်းကြီးကျယ်နေတာလဲမဟုတ်ဘူး။ သူတို့ နေ့တိုင်းလာနေတာ မပျင်းဘူးလားမသိဘူး! ''

သူမလော့ဟယ်ခြံဝန်းကို အစောင့်မထားဘဲ
ဒီတိုင်းပိတ်ထားရတာက မားမားလင်ဝင်ရထွက်ရအဆင်ပြေအောင်လုပ်ထားတာ။
ဒါပေမယ့် ဝတ်စုံအနက်နဲ့လူတွေအတွက်ပါ အခန့်သားဝင်ထွက်လို့ရသွားအောင် ဖန်တီးပေးသလိုမျိုး ဖြစ်သွားလိမ့်မယ်လို့ မထင်ထားဘူး။

သို့သော် သူမသာလော့ဟယ်ခြံဝန်းကို အစောင့်တွေနဲ့သေချာပိတ်ထားလိုက်မယ်ဆိုရင် အဲ့ဒီရက်စက်တဲ့လူတွေက ယွင်အိမ်ကလူတွေကို ထိခိုက်အောင်မလုပ်ဘူးလို့ ဘယ်သူကပြောနိုင်မှာလဲ။ ဒါတွေအားလုံးကိုတွေးမိတဲ့နောက်မှာတော့ လင်းရွှမ်ပြောမပြတတ်လောက်အောင် စိတ်သက်သာရာရမိတယ်။ ယွင်အိမ်တစ်ခုလုံးမှာ အစာကျွေးတဲ့လက်ကိုပြန်ကိုက်တဲ့ မားမားလင်ကလွဲပြီး ကျန်တဲ့သူတွေကို ဖြစ်ရပ်ဆိုးနဲ့မကြုံစေချင်ဘူး။