اليتيمة الهاربة { سيف و ملك } _ باللهجة الجزائرية 🇩🇿 _

بارت 1

كملت سقيت القبر و وقفت نمسح فدموعي لي محبوش يحبسو تنهدت منبعد خرجت راجعة للدار غير دخلت سمعت عياطها ملداخل

جميلة : ملللللك جيتي

دخلت عندها لقيتها قاعدة تمشط فشعر بنتها

ملك : ايه
جميلة : روحي وجدي الفطور خفي دوك شوية يجي خالد ميلقاش واش ياكل و زيد ختك و ولادها جايين
ملك : صح

خنزرت فيا و قالتلي

جميلة : و اغسلي الحوايج راهم تلايمو ديجا محمد وسخ حوايجو وقت خرج لبرا البارح و كي تروح ختك نسحق الحالة تنقيها ولادها الهوايش يوسخوا الحالة و انا داري نسحقها تكون نقية
ملك : الدار هادي دار بابانا ماشي دارك
جميلة : حابة نخلي خالد يدقدقلك لحمك وقيلا

خرجت مخليتها تهدر وحدها ؛ هادي انا ملك عندي 18 سنة نعرفكم على دارنا ولا خليوني انا بصفتي الكاتبة نعرفكم عليهم خير

ملك 18 سنة طفلة دات حقها من الزين و بالزيادة وجها مدور و هي بيضة شعرها شاتان كلار حتى يبان رايح فالذهبي يوصل لاخر ظهرها عينيها عسلين كبار مع شفارتيها الطوال ما شاء الله طولها متوسط
عندها زوج خواتات مريم اكبر وحدة 22 سنة مزوجة و عندها زوج دراري بحكم هنا فالدوار اغلبية البنات ميفوتوش العشرين يكونوا بولادهم و ختها الصغيرة رتيل لي عندها 15 سنة و عندها خوها الكبير خالد 40 سنة مزوج بجميلة و عندهم محمد 12 سنة  و نجمة 7 سنين

.....

رحت نطيب و انا دمعتي على خدي ..... ماما كي ولدت رتيل ماتت وقتها ماني دات رتيل رباتها هي و خالتي و اليوم هو الربعين تاع بابا ربي يرحمو
قد ما نحكيلكم شحال صعيبة تفقدوا واحد من والديكم منقدرش نوصفلكم و اذا كانوا بين زوج وقتها راح تحس روحك وحيد بلا سند و بلا امل تحس كتافك طاحو و اكثر واحد تاثر بموت بابا هو انا .... رتيل عاشت حياتها مع دار خوالي و مريم مع ولادها و راجلها مراحش تحس بالنقص لي نحسوا انا و خالد كبير و مزوج و بولادو ..... بابا كان دايمن حنين معانا سورتو انا بحكم انا لي قعدت عايشة معاه صح مقدرش يوفرلنا كامل واش نسحقوا بصح كنا مهنيين كان دايمن يشجعني باش نقرا و ننجح و نخرج من الدوار عكس باقي الرجال هنا كان يقولي نتي هي لي ترفدينا بصح الله غالب ربي رفد امانته قبل ما نحققلوا الحلم تاعو ؛ فاليامات الاخرين مرض و شد الفراش وقتها كنت جوزت الباك و هداك النهار كانوا خرجوا النتائج
..... هداك النهار رحت مع رتيل لي جات عندنا لليسي بارسكو حنا معندنا لا تليفون ولا انترنت من غير بابا و خالد بصح تليفون عادي ( كيما نقولو حطبة ) يعني حياتنا كانت بسيطة بزاف بزاف لدرجة متقدروش تتصوروها المهم وقت رحت و عرفت بلي ديت الباك فرحتي كانت متتوصفش طلعت نجري للدار باش نقول لبابا و وقت لحقت لقيت الغاشي فدارنا .... كان بابا مات .... هبلت و دخلت فاكتئاب مامنتش بلي بابا راح و مراحش نزيد نشوفوا .... صعيبة بزااف كي تخسروا والديكم ترجعوا تتفكروا غير فذكرياتكم معاهم و تقولوا لوكان غير درتلهم هكا لوكان غير مزعفتهمش مني على هادي بلاكو عليهم بارسكو من غيرهم واحد ميخمم عليكم حتى لوكان يكون خوكم ..... و هادي هي حالة خالد لي يهمو ولادو و بس و جميلة اسوء مرت اخ شفتها فبلاصة متوصي خويا على اليتامى لي خلاهملوا باباه لالا هي تحرضوا علينا ..... بابا كان يخدم فلاح هو و خويا فواحد الجنان صح مدخولوا كان قليل بصح على الاقل كان معيشنا وقت مات قعد خويا يصرف من عندو و ليومنا هذا دورو مشفتو من عندو يعني كي نسحق نشري اي حاجة حتى من الاساسيات تاع البنات لوكان مجيبليش مريم وقت جي نبقى هكاك .... دايمن يفكرني بلي راهو داير فيا مزية كي راهو يوكلني ..... و فالحق انا لي دايرة فيهم مزية و باطل انا لي نغسل انا لي نطيب انا لي نقريلوا ولادو و نمسحلهم و نفرش اصغر حاجة فالدار انا نديرها و جميلة غير الرقاد و الماكلة و رجعت جيب خواتاتها و يماها يباتو و انا لي نخدم عليهم و فوق هذا كامل يعايروني و يعيطو عليا صح مرات نرد عليهم بصح فاغلب الاوقات نسكت بارسكو معندي مندير ..... مسحت دمعتي لي طاحت و كملت نطيب منبعد غسلت الحوايج شوية و جا خالد حطيتلو يفطر باش يولي للخدمة و موراه جات مريم ..... عنقتها نبوس فيها و نعاود ..... مريم و رتيل هما الشخصين الوحيدين لي قعدولي فهاد الدنيا دخلنا للكوزينة و قعدنا غير انا وياها

مريم : واشراكي ملك

هبطت راسي منبعد قلتلها

ملك : كيفاش حابتني نكون .... حالتي حالة الخديمة هنا
مريم : متهدريش هكا و زيد خالد يقعد خوك
ملك : ميقدرش يكون خويا .... من وقت راح بابا مقعدش لي يوقفلو فوجهو و يحامي عليا
مريم : تعرفيني بلي ما نشد عليك والو متمنية لوكان جيت لاحقة روحي لوكان جبتك تعيشي عندي بصح علبالك راني فشمبرة انا و راجلي و ولادي و زيد ناس داري عقليتهم شوية شوية مكانش كيفاش نجيبك و حتى من دار ماني متقدريش تروحي تقوليلهم نعيش عندكم راهم رافدين رتيل بزاف عليهم
ملك : علبالي مراني نلوم فحتى واحد
مريم : اصبري بلاك يجي مكتوبك و تخرجي منا تتهناي
ملك : مريم انا ماشي نتي مزالني صغيرة على الزواج
مريم : مالا اقعدي تتعذبي هنا

قعدنا نقسرو حتى لحقت لعشية و هي راحت و انا نضت نفرز و نغسل ظهري حسيتو تكسر زدت طيبت لعشا و حطيتو فوق الطابلة و عيطتلهم ......

............

تلموا على الطابلة ياكلوا فالسكات من غير خالد لي مرة مرة يضحك و يهدر مع نجمة

نجمة : بابا عمتو قاتلي بلي راح تولي تعاوني فالقراية
خالد : برافو بنتي
نجمة : و عمتو راح تولي معلمة و هي لي تقريني فالمسيد صح عمتو

تبسمت ملك معاها و دارتلها براسها ايه ضحكت جميلة باستهزاء

جميلة : ههه ماشي مليح تشدي فاحلامك بزاف ملك
ملك : وعلاش منشدش فيهم
جميلة : شوفي نتي .... راكي تشوفي فينا قيسنا قيس ماكلتنا منين حابة تصرفي على الجامعة تاعك هااا
ملك : اذا تحتمت نخرج نخدم
خالد : معندناش بنات يخدمو فهمتي
ملك : يعني
خالد : يعني مراحش تكملي قرايتك اشكري ربي لي راني رافد مسؤوليتك