اليتيمة الهاربة { سيف و ملك } _ باللهجة الجزائرية 🇩🇿 _

بارت 28

حبيبة : ربي يرحمو ..... و ماماك
ملك : ماتت وقت ولدت ختي الصغيرة
حبيبة : ربي يرحمهم ان شاء الله
ملك : امين
حبيبة : اوووه السطر نقصلي ... يعطيك الصحة عودي مرة مرة ديريلي ماساج ... اوههه ريحت
ملك : اول مرة تعجبك حاجة فيا

دورت حبيبة راسها عندها مطلعة حاجبها منبعد ضحكت و خبطتها ليدها

حبيبة : finalement دمك خفيف ... عجبتيني .... هيا نوضي نوضي نروحو نتعشاو جعت

راحو للكوزينة تعشاو منبعد فرزوا الحالة و شدو بلايصهم

.......

At 01:00 am :

واقفة فالبالكون تخزر فالسماء و غايسة .... الحاجة الوحيدة لي تخمم فيها خواتاتها ..... عقدت حواجبها وقت سمعت الحس فالكوزينة .... حبيبة و الما راقدين و الدراري مكانشهم .... دخلت على طراف صباعها حتى تلقاه سيف فاتح الفريجيدار ... هو لي دور راسو وقت حس ببنادم موراه

سيف : نتي .... واش راكي ديري هنا ؟
ملك : اههه .... كي مجانيش النعاس خرجت للبالكون
سيف : ايه

رجع راسو للفريجيدار و هي نطقت

ملك : كشما تسحق
سيف : راني نحوس على العشا وقيلا حبيبة نساتني اليوم
ملك : ايه خلاص حسبتلها تتعشى برا كي طولت
سيف : خلاص معليش

غلق الفريجيدار و هي نطقت

ملك : تحب نديرلك حاجة تاكلها
سيف : منقولكش لالا 

تبسمتلو و هو قعد فالطابلة و هي تمتم وجدتلو سندويش ... قسمتو و حطتهولو فطبسي .... حطتو فوق الطابلة وين كان قاعد

سيف : يعطيك الصحة
ملك : بلا مزية

طبع مورصو و قاللها

سيف : هاكي
ملك : لالا غير كولو بصحتك انا اصلا تعشيت
سيف : كيفاش درتيه و متاكليش و زيد درتيلي بزاف

رجعت شعرها مور وذنها و قعدت جابدة هداك المورصو بلعقل .... رمات عينيها بلعقل تلقاه ياكل فيه و ساكت

سيف : ... مالا جيتي تقراي هنا
ملك : ... هكا كنت حابة
سيف : و دوكا
ملك : ... دوكا حابة نخرج نكري قبل ... بصح كلش غالي هنا سما حابة نتكل على روحي و نلم شوية دراهم منبعد ساهل ... و القراية راح نخلي العام الجاي ان شاء الله و نسجل ... بارسكو جبت الباك هاد العام
سيف : كنتي قادرة ديري اقامة و فليفاكونس و لا كي تحبي فالويكاند جي عند خالتي
ملك : مقدرتش نسجل كي بداو يسجلوا ... كانوا عندي شوية مشاكل و زيد كنت ملقيتش ممبا خدمة
سيف : ... و داركم ... يماك باباك خاوتك ... يعني مقصدتش حاجة ماشي مليحة بصح نورمالمون هوما يتكفلوا بدراهم قرايتك
ملك : ماما و بابا ميتين .... و ... كان لازم نجي هنا و نبدا حياتي مالاول
سيف : ربي يرحمهم ، مكانش علبالي ... بصح نستعرف بيك ماشي ساهلة جي لبلاصة متعرفيهاش و تخدمي و تكملي قرايتك سورتو فهاد اللاج كاين رجال كبار و فنيانين يحبو كلش واجد

تبسمت وقت فهمت بلي يهدر على سفيان

ملك : حتى طاطا سعاد ربي يكثر من امثالها ... عاونتني بزاف
سيف : ايه خالتي ناس ملاح و بزاف ....... المهم ... ملك ياك
ملك : اممم
سيف : يعطيك الصحة على السندويش ... جاك بنين تزيدي تقولي مشكرنيش

ضحكت و قالتلو

ملك : ههه علبالي بلي ماكلتي بنينة
سيف : بسلامتك تشكري روحك ... تصبحي بخير
ملك : bonne nuit

رفد الطبسي و خرج ... و هي تبعتو بعينيها تتبسم
زادت شوية و طلعت للشمبرة

........

صباح جديد :

طبطبت و فتحت الباب

ملك : طاطا نقدر ندخل

تبسمت سعاد و دارتلها بيدها ارواحي .... غلقت بابا الشمبرة و دخلت قعدت قدامها فوق البونك

سعاد : مالا رحتي تباتي عند الما
ملك : ايه طاطا
سعاد : لوكان غير قولتيلي
ملك : ستنيتك بصح مجيتيش بكري و الما هي لي عيطتلي و قلت سور اسراء تقولك ؛ سمحيلي
سعاد : بووه نورمال .... وشنو كاينة حاجة .... يا بنتي ... نتي راكي امانة عندي و حبيبة علبالك عندها ولادها كبار و نتي طفلة وسطهم ... يعني ما جاياش .... ولاد ختي نعرف تربيتهم بصح نتي برانية عليهم و هما عزاب 
ملك : صح عندك لحق طاطا المرة الجاية منزيدش نبات
سعاد : يعيشلي لي يسمع الهدرة
ملك : .... وشبيهم رجليك ( حشاكم ) منفخين هكا
سعاد : البارح نهار كامل و انا واقفة رجليا طابو
ملك : شفتي شفتي ... استناي نجيبلك ما دافي حطيهم فيه تريحي شوية
سعاد : لالا متعبيش روحك
ملك : تعبك راحة طاطا

راحت تمتم دفات الماء و جابتلها باسينة حطت فيها رجليها

ملك : ان شاء الله يزول عليك
سعاد : الله يعطيك و يرضيك بنتي
ملك : امين
سعاد : بلاك يخف عليا السطر شوية بارسكو منبعد لازم نخرج
ملك : .... لوين ... يعني اذا ماشي personnel
سعاد : شفت واحد المراة لبارح فالعرس راهي رايحة ترحل و تسحق نساء يعاونوها باش تفرز دوزانها و تنحي قش الدار .... تفاهمت مع وحدة فالحومة نروحوا و لعشية كامل نروحوا نقيو الدار لجديدة
ملك : .... طاطا
سعاد : اممم
ملك : حكاتلي اسراء لي صرا .... طاطا يعني وعلاش راكي تعبي فروحك فهاد العمر و تخرجي تخدمي ... اذا تسحقي حاجة قوليلي على عيني و راسي صح مدخولي قليل بصح نعاونك بلي قدرت عليه بصح نتي باش تروحي فهاد العمر تخدمي الناس ما جاياش يعني لوكان خدمة لي ما فيهاش تعب كبير ما عليش بصح كيفاش تروحي ترفدي القش و تفرزيه و زيد تنقي مراكيش تخممي على صحتك ..... و اذا على لي قالتو الما مهدرتوش بنية عيانة بنتك عايرتها و هي عايرت بنتك نتي ما كان مدخلك طاطا
سعاد : حكاية الما بجيه ملك .... تعرفي قالتلي اسراء حاجة قعدت تحرق فقلبي ... قالتلي بلي ما دام مقدرناش عليهم وعلاش جبناهم للدنيا و صح ملك انا ما تمرمدتش على ولادي جبتهم و حابتهم يتميزرو صح بلاك الما هدرتها هكاك برك بصح انا منحبش الناس يخزرو فينا بنص عين و لوقتاش سيف راح يقعد يصرف علينا لوقتاش يقعد يقضيلنا حتى هو عندو حياتو غدوة يتزوج و يجيب ولادو راح نستنى منو يقعد يحوس عليا