البنات راني زدتلكم حلقتين يعني حطيتلكم قيس يومين فيوم واحد سما تهلاو شوية فالتفاعل ... قراءة ممتعة 💚💚
ملك لي قاعدة دور راسها تشوف فالدار لي كانت مخدومة مليح و فيها غير القش الغالي عكس دار سعاد لي كانت سامبل بزااف ؛ كانت حابة تسقسيهم على باباهم وين راه واش يديرو فحياتهم بصح نحات الفضول تاعها بجيه ..... قعدو يحكيو فبزاف حاجات و ملك مرة مرة تهدر ولا تضحك معاهم .... شوية و دخل سفيان و معاه ريان و راحوا للصالون
الما : اوهوه شكون جا
سلمت على ريان و سفيان ضحك مع اسراء و قعد
سفيان : شكون هادي ؟
الما : ملك و هي ضيفة عند خالتو ، ملك هذا سفيان خويا
ملك : متشرفين
طلعها و هبطها بعينيه منبعد تبسم و غمزلها
سفيان : الشرف ليا ملك
.......
نروحو لبلاصة واحد اخرى نروحو للدوار و بالضبط لدار ملك ؛ مريم لي قاعدة و حاطة يدها على خدها عينيها تنفخوا و رتيل حاطة راسها على كتفها اما جميلة قاعدة و تخنزر فيهم شوية و دخل خالد
مريم : خالد ... كاش خبر على ملك
خالد : مكان لا خبر لا زوج ختك مكانش هربت ؛ شافوها الناس رايحة فالكار ..... الدوار كامل راهو يهدر عليها و يقول بلي راحت عند كاش راجل
مريم : ضحكتنييي خالد ... منين ختك راح تعرف واحد و هي من الدار متخرجش حتى تليفون معندهاش ..... شوف خالد
ناضت ليه و رفعت صبعها تهدد فيه
مريم : لوكان نعرف بلي نتا كاش ما درتلها و لا نتا السبة لي خلاتها تهرب راح ...
خالد : واش راح ديري هااا قولي تحلبتي و وليتي ترفعي صوتك عليا
جميلة : مليح هكا تربيتي تعيطي على خوك لكبير
مريم : ترباي نتي برك
خالد : مريييييييم
خنزرت فيه و شدت فرتيل و دارت ليه
مريم : تبان حكاية ملك برك يا خالد اذا مبعتش الدار و قسمنا دراهمو منتسماش وقتها تشرد نتا و مرتك برا
خرجت هي و رتيل دمها حستو يفور و قلبها يحرق على ختها لي ربي عالم واش راهو صاريلها
.........
قدام البحر كانت حابسة طونوبيل تشوف منها غير اليد لي تخرج القارو تاع دخان و ترجعو
سيف يحكي **** :
حاس عقلي راح يطرطق ؛ كلما نقول خلاص نسيتها و راح نحبس ما نخمم فيها نلقى روحي مزالني فنفس الحاجة ندور ...... لوكان ماشي هدرتها المرة لي فاتت لوكان كركرتها و جبتها بسيف ماشي هي لي تحبس وقتما حبت ، هي اول وحدة حبيتها و اول وحدة كنت سيريو معاها اكثر وحدة وقفت معاها و فالاخر دورت عليا ظهرها و السبة مزال معرفتهاش .... زعما صح انا لي كرهتها فيا كي كنت مزيرها على هديك راحت .... نعرفها شحال كانت تحبني متقدرش بين ليلة و نهار تنقلب هكاك .....
.......
صوت التليفون لي قاطعلوا تفكيرو وقت رفدوا و لقاها يماه تنهد
سيف : خير يما
حبيبة : بسم الله ؛ تقول حرشوك عليا
سيف : يما
حبيبة : ايه خلاص عيطتلك باش نقولك ارواح قريب العشاء
سيف : يما اذا جيت جيت و اذا مجيتش تعشاو بصحتكم
حبيبة : عيب سيف عيب خالتك هنا و نتا مكانش
حط يدو على راسو علبالو دوك تكسرلو راسو
حبيبة : واش حبيتها تقول اههه تقول كي جيت هو محبش يجي و ....
سيف : خلااااص راني جاي
حبيبة : صحا وليدي و بلاك فالطريق
كوبا و ديمارا
سيف : لي يغلبها يجي يحاسبني
...........
دخلت آلما و ملك لشمبرة آلما
آلما : و هادي شمبرتي
ملك : الله يبارك شابة
الما : اقعدي
قعدوا البنات فوق البونك منبعد نطقت الما
الما : اممم كيما شفتي هنا كاينة غير انا و ماما و عندي زوج خاوتي سفيان لي عرفتيه مقبيل كان يقرى فولاية واحد اخرى و كاين خويا الكبير سيف مشفتيهش معلباليش اذا يجي منبعد و لا لالا
الما لي كانت حابة تفتح معاها اي موضوع باش تهدر شوية بارسكو ملي عرفتها و هي ساكتة و جابدة روحها حستها حزينة بزاف على هادي حبتها تندمج معاهم
ملك : الله يبارك
الما : يسلمك ... و نتي ... عندك خاوتك
ملك : امممم .... حنا 3 بنات و خونا 4 ... خويا خالد هو الكبير منبعد مريم منبعد انا باش ختي رتيل
الما : اههه مليح ..... و منين تعرفي خالتي يعني اذا مشفتيش بلي راني نقرعج ههه
ملك : نعرفها من لبعيد عمو ابراهيم يكون وليد عم بابا .... بصح كثر خيرها عاونتني بزاف
الما : ايه خالتي بزاااف حنينة تعرفي ههه مرات نغير من اسراء ؛ يعني حتى ماما حنينة بصح فتعاملها قاسية شوية معانا عكس خالتو
ملك : ..... روماركيت .... ههه حتى يماك باينة محبتنيش بزاف
الما : هههه ماما هكذا متحمل حتى واحد بصح مع الوقت راح تعرفوا بعضكم كثر و راني سوور بلي رايكم يتبدل ..... اييه مقلتليش خاوتك وين راهم
ملك : ..... زوج لكبار مزوجين و رتيل ماما وقت ولدتها ماتت على هادي خوالي رباوها .... و انا قعدت مع خويا منبعد ........ منبعد كان لازم نجي لهنا باش نكمل قرايتي فالجامعة
الما : .... ملا بديتي تسجلي
ملك : راح نخلي للعام الجاي ان شاء الله .... لازم نلقى خدمة و نتكل على روحي بارسكو خويا .... قيسو قيس روحو و ولادو
ملك : اههه فهمتك بصح متخمميش نتي هنا معانا حاجة متخصك
ملك : تعيشي
وقت تفتحت الباب و دخلت اسراء طلعوا البنات راسهم
اسراء : راكم هنا و انا نحوس عليكم
الما : ايه وريت لملك الدار
اسراء : ايه ....... المهم خليونا نهبطوا نوجدوا الطابلة قريب يحطو العشاء
أنت تقرأ
اليتيمة الهاربة { سيف و ملك } _ باللهجة الجزائرية 🇩🇿 _
Romanceحكايتنا تحكي على ملك لي هربت من دارهم باش تعيش حياة جديدة بعيدة على الضرب و الاهانة ...... كيفاش راح تكون هاد الحياة لي خيرتها ملك و واش راح يصرا فيها هذا كامل نعرفوه فالكرونيك
