اليتيمة الهاربة { سيف و ملك } _ باللهجة الجزائرية 🇩🇿 _

بارت 24

راحت للكوزينة رجعت الماء ؛ و رمات عينها للبالكون وين كان سيف واقف ... ترددت منبعد راحت عندو
وقت حس بيها سكت منبعد قاللها

سيف : غضتك ولا جاية تقولي وعلاش درت لخوك هكاك
ملك : لا هادي و لا هادي ..... سيف ...

سكتت وقت قالتلو اسمو لاول مرة حتى هو كان ساكت

ملك : وقت جيت لهنا و عرفت سفيان كان يقلقني بارسكو كان يهدر برك نحسو ماشي سيريو بزاف حتى فالوقت لي لازم يكون فيه سيريو بصح مع الوقت عرفت بلي هو جاي هكا و خوك انسان عاقل و مليح بزاف و لي هدرو ليوم مخرجش من قلبو  .... حنا كامل كي نزعفو نوليو نهدرو اي حاجة جي على لساننا و وقت نتكالماو نعرفو بلي هدرتنا غالطة c'est humain  .... سفيان هدر هكاك بارسكو حسكم ظالمينو و حابين تحبسوه و انا رايي النوع لي كيما سفيان لازم الواحد يتعامل معاه بلعقل من هدرتو باين بلي يحسك متحبوش كنت قادر تكون مليح معاه و تساعفوا تنصحوا و تهدر معاه بلعقل كيما دير لألما .... هكا هو راح يزيد يقسح راسو كثر .... و سمحلي اذا دخلت روحي

وقت لقاتو ساكت كانت راح تروح منبعد عينيها دمعو و قالتلو

ملك : انا ليا نتا اخ اكثر من رائع يعني قدرت ترفد داركم و توقف عليهم و متخليهم يسحقو اي حاجة .... البنادم برك ميقدرش نعمة ربي par exemple انا تمنيت مرة خويا يسقسي عليا ولا حتى يعيط عليا على صلاحي بصح الله غالب

دور راسو يخزر فيها ... و هي تقولوا حشمت ولا قاعدة تخزر في خلق ربي 😂 اول مرة تشوفو من قريب هكا ..... قلبها لي قعد يخبط و هو يخزر فيها مفهمتش وعلاش ... تبسم و قاللها

سيف : هدرتك يليق تكون دوا

تبسمت و خدودها حماروا

سيف : شحال في عمرك بينازة

دارتلو بيديها عشرة و زادتلو ثمنية

سيف : لسانك كبير على عمرك علبالك
ملك : علبالي و الحمد لله فرحانة بيه

تبسمتلو و دخلت شوية و رجعت جايبة معاها les glaçons

ملك : هدا حطو على يدك

تبسمتلو و خرجت و هو خزر فيدو لقاها حمرة كي ضرب سفيان بيها ......

.......

دخل للقاراج لي موالفين يقعدو فيه يلقاه قاعد مع صحابو يلعب فالدومين راح جبدو من تريكوه

سفيان : درتها بلعاني قول
رضا : مفهمتش واش راك تهدر ديجا واش بيه وجهك
سفيان : مفهمتش مالا ... وعلاش جايبلي الشارجور للدار اههه علبالك بلي ميحبوش
رضا : دقيقة دقيقة سفيان انا جبتهولك بارسكو قلت تسحقو
سفيان : مديرش روحك نية كي نسحقو انا نجي نديه

خبطو رضا و قالو

رضا : نتا ماشي تاع وجهك الخير انا قلت خوك مكانشو فالدار بارسكو قلتلنا بلي مراهوش يجي يبات فالدار هاد اليامات سما قلت مكانشو و اذا كاين كاش واحد حاب تفرغ فيه زعافك فرغو فخوك لي فسدلك وجهك ..... لوكان جيت تهمو شوية ميديرلكش هكا
عبدو : رضااا
رضا : وشنو راني غالط مراكش تشوف كيفاش فسدلو خليقتو هذا اخ دوكا 
عبدو : بصح خوه باين مضربوش من قلبو
سفيان : ههه عبدو مكالاه نغيضك .... مكانش اخ بلاك يكره خوه قد ما يكرهني سيف

دور راسو وقت دخل ريان

ريان : سفيان راك هنا و انا نحوس عليك ... خالتي راهي تحوس عليك ارواح معايا
سفيان : ولي للدار ريان مراحش نجي
ريان : سفيان خالتي راهي مريضة متزيدش عليها لاطونسيون راهي طالعتلها و راهي تحوس عليك ارواح معايا
سفيان : روح للدار خير ما نضربك

ريان لي عوج فمو و راح ؛ رضا خبط سفيان لكتفو

رضا : سفيان متخافش حنا دايمن معاك و منخليوكش

دارلو براسو ايه و قعد

.....

دخل سيف للصالون وين كانت حبيبة قاعدة و الما تقيسلها فلاطونسيون ؛ سعاد وقت شافتو قالت للبنات ارواحو و خرجوا غالقين موراهم الباب

حبيبة : ارواح سيف

دارتلو بيدها باش يقعد قدامها و هو قعد

حبيبة : هكذا يا سيف اههه قول .... كي خرجولكم الشلاغم وليتو تضاربو و تسيحو الدم لبعضكم شكون نحبس و نتوما الطول و فايتيني قول ولا حابين تقتلوني
سيف : يما ...
حبيبة : خليني نكمل .... كبرتكم و طحت و نضت باش رجعتكم هكذا فالاخر تكافئوني هكذا و زيد في وجهي متحشموش واش كان راح يدير باباكم لوكان كان عايش قول .... انا قلت نتا لي كبير و رزين و تفهم خاوتك تنوض تضربو هكاك .... مرانيش نقول سفيان عندو الحق هو راهو غالط و كثر منك بصح متضربش خوك مديرلوش هكاك و يصرا واش يصرا سيف : يما وليدك راهو رايح للهلاك برجليه ... كاش واحد يدور مع رضا قوليلي برك مرانيش حاب نفسد فالهدرة بصح نتي علبالك طريق هداك السيد ، دخل الحبس و خرج عشرين مرة الحومة كامل تهدر عليه و وليدك يعاشر فيه و نورمال قاع
حبيبة : علبالي سيف بصح متضربوش يا وليدي راح يزيد يكرهك
سيف : معندو ميزيد كثر من هكا

خلاصوا حلقات الويكاند البنات ملتقانا يوم الاحد ان شاء الله 💚💚💚