سفيان : متمديليش دراهم راني خارج يما و معندي حتى دورو
حبيبة : الشلاغم دارولك و مزالك تدي فمصروفك من عند يماك ... نسيت واش هدرنا البارح
سفيان : كنتي تهدري من نيتك ؟؟
حبيبة : واش حسبتلك
سفيان : ههه يعني نتي و وليدك تفاهمتو على راسك
حبيبة : حاشى حبيت برك نشوف صحابك هادو كيفاش راح يعاونوك ... ياك يقولك الصديق وقت الضيق
سفيان : ايه معليش يعطيك الصحة
حبيبة : بلا مزية
خرج مشنف و هي دارت يدها على حزامها
حبيبة : الله يهديك يا وليدي و يصلح بينك و بين خوك ان شاء الله
.........
بدات تتفاطن تشوف فالحالة بيضة شوية بشوية بدات تبانلها ؛ هو لي وقف وقت شافها تفاطنت
سيف : ملك
وقت سمعتو دارت ليه و سيات تتقعد
ملك : واش جابني لهنا
شدلها يدها معاونها باش تقعد ؛ طلعت راسها للسيروم لي كانو مدايرينهولها
سيف : وقت كنتي تهدري معايا لقيتك تغميتي على هادي جبتك للسبيطار .... الطبيب قال بلي عندك لانيمي لازم تاكلي مليح و تلتهاي بصحتك
دارتلو براسها ايه
سيف : تحبي نجيبلك حاجة تاكليها
ملك : لالا صحا ... دوك نروح للدار و ناكل كاش حاجة
سيف : ...... كنتي راح تقوليلي حاجة مقبيل على خالتي
ملك : امممم ..... بصح .... وعدني ما تروحش تقوللهم و تقول ملك قالت يعني انا هدرت بارسكو طاطا غاضتني
سيف : اهدري منبعد ساهل
ملك : بروميلي قبل
سيف : خلاص منهدرش
ضيقت عينيها
سيف : قتلك منهدرش
ملك : ... اسراء رجعت تتحسس بزاف من حكاية الدراهم لي راك تعاون بيهم طاطا ..... و قالت ليماها بلي نتوما يعني على طاطا و عمو ابراهيم ربي يرحمو مرفدوش مسؤوليتهم و جابوهم للدنيا و خلاوهم يتميزرو .... طاطا غاضها الحال هي اصلا تحشم منكم بزاف .... و اسراء يعني ... بلاك حشمت كي راكم تعاونوهم و تصرفوا عليهم ..... على هادي طاطا راحت تخدم البارح فالعرس و راهي حابة تروح تنقي دار واحد المراة و تخمللها قشها و حتى اسراء حابة تدخل تخدم فالمول لي راني نخدم فيه ..... على هادي محبتش تزيد تشد عليك دراهم
سيف : بصح واش لي تبدل بين ليلة و نهار البارح برك كان كلش نورمال .....
ملك : معلباليش .... هذا لي صرا .... علبالك خالتك مريضة غاضتني كي قالتلي راح تروح تخدم عند الناس يعني هي كبيرة و مريضة و زيد خدمة فيها الشقا بصح محبتش تسمع مني
دارلها براسو ايه
سيف : خلاص السيروم .... اذا راكي قادرة نروحو هداك هو
ملك : ايه
ناضت بلعقل و هي تحس الدنيا دور بيها ..... علبالها بلي راهي هاملة صحتها و بزااف .... من جهة الخدمة لي قتلتها و من جهة تحشم تاكل فدار الناس
ركبو فالطونوبيل و راحو للدار
.......
تلموا على الطابلة و الخدامة بدات تحطلهم فالماكلة
سليمان : وين راهو وليدك جاسر
شراز : .... بابا يكون حصل فالسيركولاسيون ( شحال طويييلة ) سوور
سليمان : هدرت مع جاسر ماشي معاك
سكتت و زيرت على الكاس لي كان قدامها
جاسر : بابا دوك يجي راك تعرف الجيل تاع دوكا يحبو يخرجو و يدورو
سليمان : يخرج على روحو بصح وقت العشاء يكون هنا .... ماشي اليوم قلنا كامل نروحو ل la ferme و هو وين الله اعلم
جاسر : عندك الحق بابا
شوية و يدخل حاط يديه فجيبو و يدندن
بدرو : اوهوووه راكم تتعشاو
قعد و رما يدو للزيتون يرفد و ياكل ؛ سليمان لي قاعد يخنزر فيه و هو ولا على بالو حتى حمحمت شراز
بدرو : احممم واقيلا مزال ما بديتو تاكلو سمحولنااا
خبط يدو على الطابلة حتى ترعدو لي كانوا قاعدين
سليمان : وين كنت اليوم
بدرو : كك ... كنت برا جدي مع صحابي
سليمان : وعلاش عندك كاش خدمة من غير الخرجات .... الطونوبيل وشبيها
بدرو : وشبيها
سليمان : و راك تسقسي وجهك صحيح ...
بدرو : قاسني واحد بالطونوبيل
سليمان : اوووه مسكين قاسوه .... نفس الحكاية لي تتعاود و كل مرة نعاودو نخدموهالك ياك
بدرو : سمحلي جدي
سليمان : السماح ميكفيش ، لازم تتربى و تتعلم تتكل على روحك
بدرو لي تقلق حتى شدو عماد من يدو
عماد : عندك الحق جدي حتى بدرو راح يبدا يخدم فالشركة معانا ياك بدرو
فتح عينيه مشوكي
بدرو : وقتاش قللت
قرصو من يدو
بدرو : ايييه .... نتمنى تخليني جدي نبدا نخدم معاكم
سليمان : اييه ان شاء الله بلاك بديت تتسقم
بداو ياكلو فالسكات و وقت كملوا كل واحد طلع لشمبرتو
......
سعاد : راكي مليحة حبيبة
حبيبة : شوية
سعاد : تعرفي خلعني سيف وقت عيطلي باش نجي نقعد معاك
حبيبة : واش تحبي لاطونسيون راهي تدي و جيب فيا وقيلا راح نشد الفراش
سعاد : بعيد الشر واش هاد الهدرة
حبيبة : واش ندير تعرفي غاضتني عمري
سعاد : بووه حبيبة شحال تزيدي عليها ... نتي ريحي هنا و انا نروح نطيبلك العشاء
حبيبة : منقولكش لالا
ناضت سعاد و حبيبة تبسمت
حبيبة : مليح حبيبة مليح
......
رضا : واش خو وشبيك مزعف هكا
سفيان : والو
رضا : بيك حاجة اهدر
سفيان : .... قلت .... لوكان تسلفلي شوية دراهم محتاجهم
رضا : لوكان عندي لوكان مديتلك بصح راني مزير هاد المرة حتى خويا مراهوش يخدم هاد اليامات رانا قيس قيس فالدار
سفيان : معليش رضا نورمال
رضا : بصح نعرف واحد يقدر يسلفلك
سفيان : شكون ؟؟؟
رضا : واحد لباس بيه يسلفلك قد ما تحب بصح وشنو لازم ترجعهوملوا فالوقت
سفيان : زعما
رضا : ايه موالف نسلف من عندو كي نكون مسحق
سفيان : منبعد نشوف
يتبع 💚💚 ....
أنت تقرأ
اليتيمة الهاربة { سيف و ملك } _ باللهجة الجزائرية 🇩🇿 _
Romanceحكايتنا تحكي على ملك لي هربت من دارهم باش تعيش حياة جديدة بعيدة على الضرب و الاهانة ...... كيفاش راح تكون هاد الحياة لي خيرتها ملك و واش راح يصرا فيها هذا كامل نعرفوه فالكرونيك
