اليتيمة الهاربة { سيف و ملك } _ باللهجة الجزائرية 🇩🇿 _

بارت 3

نروحو لبلاصة واحد اخرى فواحد الحومة لي تسمع منها غير حس الصغار لي يلعبو برا ؛ و الرجال لي متلايمين فالقهوة ... عجايز هابطين و فيدهم قفات باش يقضيو و شوية بنات يقسرو من التاقة

......

هو لي كان دوش نشف شعرو و راهو يدير فالبارفان تاعو باش يخرج لخدمته رفد تليفونو و هبط وين لقى يماه تحط فالقهوة و معاها ختو صبح عليهم و قعد كان باين مقلق

خليني نعرفكم بالبطل تاعنا

سيف لي عندو 27 سنة احم احم واش نحكيلكم واش نخليلكم زين و رجولية بارد و عصبي لابعد درجة بصح مع الناس لي قراب ليه يكون انسان اخر عايش مع يماه و ختو و خوه ؛ يماه هي حبيبة عندها 50 سنة بصح تبان صغيرة و مالغري لكبر بصح مزالها شادة روحها و معالم الزين مزالها محفورة فوجهها ... العين الزرقاء و الشعر لي كل مرة بكولار قصيرة نوعا ما مراة لي طاحت و ناضت باش كبرت ولادها و باش قدرت تكون ليهم الاب و الام مراة لي قلبها كبير و حنينة بصح قاسية فاغلب الاحيان معلباليش كيفاش نفهمكم بصح هي من هداك النوع لي قبيح و يبان واعر و قاسي بصح من داخل قلبو صافي و نقي و بالنسبة للعقليات راح تعرفوهم بالتفصيل مع الحكاية
و ختو لي عندها 17 سنة واسمها ألما طفلة عاقلة و مسرارة و هي لمفششة تاع الدار و خوه سفيان 24 سنة حتى هو زل و ما عندو ما خصو و راهو عايش فالاقامة فولاية اخرى و الحمد لله هذا اخر عام ليه فلفاك بعدما طلع عوامو بسيف بالراتراباج و المعاودة تاع العوام حتى لحق يعني نقولو دارهم طبعوه سينون هو ميحب يقرا ميحب يكسر راسو هو عكس سيف تماما .... طوايشي و يحب يعيش اما سيف كالم و سيريو عليه و سورتو سفيان يحب كلش يجيه واجد و ميحبش يعيي روحو بزاف .... سيف و حتى خاوتو كبرو فهاد الحومة و عاشو طفولتهم هنا وقتها باباهم كان ميسور الحال و مع الوقت ربي فتحها عليه و فتح usine و شوية بشوية شرا دار فالخارج و حب يعيشوا فيها بصح حبيبة محبتش تتغرب سورتو وقتها يماها ربي يرحمها كانت مريضة و زيد والفت البلاصة لي عايشة فيها فقعدوا طالعين هابطين و سيف كمل قرايتو لهيك حتى نهار لي مات فيه باباهم اكسيدون مع راجل اخت حبيبة لي كان يخدم عندو و راح نشوفوا حكايتهم منبعد بالمختصر راجل حبيبة كان مخدم عندو راجل خالة سيف و وقتها كي كانوا راجعين للدار ماتوا اكسيدون و بعدها سيف استلم خدمة باباه و مع الوقت قدر يكبرها و عاشوا فهاد الحومة لي كبروا فيها خليني نحكيلكم شوية على الحومة لي راح نعيشو فيها فهاد الكرونيك .... هي شغل حومة فوق حومة ههه بصح فمنطقة واحدة فيها ديار لي بسيطة فيهم طابقين لا علينا ان شاء الله تكونوا فهمتوني

حط من القهوة و قعد يشرب فيها حتى تقعدت حبيبة و هي تنطق

حبيبة : خير سيف وشبيك مشنف صباح ربي
سيف : والو يما عيان شوية برك
حبيبة : و لي يعيا يتشنف علينا

قلب عينيه يعرف يماه كي تبدا تهدر معاهم متسكتش

سيف : انا نوض خيرلي ياك متسحقوا والو

عوجت فمها و قالتلو

حبيبة : لالا والو اتهلى فروحك

خرج و الما دارت ليها

الما : ماما وعلاش تنقرشي بزاف
حبيبة : اسكتي خير ما نجي نكسرلك هذاك الفم مراكيش تشوفي فيه مزعف هاد اليومين
الما : يكون ضارب مع ليلى هدا ما كان
حبيبة : و مزالك تقولي ليلى حابة نضربك صح وقيلا
الما : وشنو ماما علبالك بلي وليدك يحبها مشفتيش البراسلي تاعو لي ناقش فيه اسمها
حبيبة : معندو مراح يحب فيها ؛ حاجة فيها متعجب
الما : المهم عجباتو هو الطفلة كي العسل و ...
حبيبة : نووووضي عليا خفي

ناضت تجري و حبيبة خبطت المغرفة لي كانت فيدها

حبيبة : غير لي يجي يطلعلي لاطونسيون و يروح

.......

طبطب شحال شوية و تفتح الباب و خرجت سمية اخت ليلى

سمية : اوهوه سيف ○○○○ وشمن ريح جابتك عندنا
سيف : وشكون قالك جيت عندك ؛ عيطي لليلى خفي
سمية : ليلى مكانشها
سيف : كيفاش مكانشها
سمية : راحت عند ماني معلبالكش !
سيف : وقتاش جي

دورت راسها وقت سمعتهم يعيطولها من داخل

سمية : دقيقة ماما هادي غير الجارة دوك نجي .... هااا سيف ليلى مراحش ترجع راحت تعيش عند جدتها و حتى الخدمة راهي لقات تما
سيف : راكي تحرشي بيا
سمية : لالا و هاك هاد البرية خلاتهالك

شدها عليها و راح للطونوبيل ؛ فتحها و بدا يقرا فيها

" سيف حبيبي و عمري و كامل دنيتي نتا كلش عندي فهاد الحياة ..... جا النهار لي لازم نتفارقوا فيه حابك تعرف بلي نحبك بصح الله غالب انا و نتا محال نكملوا كيف كيف انا راح نسيي ننساك و نتا تاني و مكالاه تحوس جي عندي بارسكو راح تعيي روحك برك و نيميرو تاعي نحيه راني بدلتو ..... ليلى ..... "

زير على يدو حاسة الدنيا ظلامت عليه شوية و ديمارا

.............

فتح و دخل للبيرو يلقاه رايح جاي و الحالة مكسرة كامل

مروان : سيف وشبيك خير

غلق موراه الباب و سيف قعد حاط يديه مور راسو

مروان : سيف خير .... واش هاد الورقة

رفدها قراها منبعد عقد حواجبو

مروان : اهههه كيفاش .... وعلاش حبستو
سيف : نهار لي نفهم نفهمك .... هدا يومين و هي جابدة روحها و اليوم كي رحت نحوس عليها قالتلي ختها بلي راحت تعيش عند جدتها و خلاتلي هاد البرية
مروان : بلاك راح تضيف برك و هاد البرية مكانش منها
سيف : مفهمتش لبروبلام هاد الكتيبة تاعها خطها نعرفو مليح علبالك مخي دار erreur هادي في عقلها سيف نحبك بصح لازم نحبسو تتقعد بيا
مروان : تحب نحوسولك وين راهي
سيف : لالا مكالاه خو .... نعرف وين جاية دار جدتها حكاتلي عليها خطرة ، غدوة صباح نروح نشوفها اليوم عندي خدمة بزاف مكاش كيفاش نخليها
مروان : فيها خير ان شاء الله

........

  يتبع 💚💚 ....