اليتيمة الهاربة { سيف و ملك } _ باللهجة الجزائرية 🇩🇿 _

بارت 25

سلام البنات ؛ رجعنا بعد غياب يومين برك 😂 سمحولي محطيتلكمش بكري بارسكو دخلت نقرا اليوم سما طحت رقدت و الحلقات لي كنت كاتبتهم خلاصو سما لازم نتقدم شوية على هادي راح نولي نحطلكم حلقتين فبلاصة تلاثة و راني خديت بعين الاعتبار طول البارت اذا لاحظتو بين الكرو لي فاتت و هاد الكرو الحلقات رجعو طوال ... المهم خليولي ارائكم و اقترحاتكم قراءة ممتعة 💚

حبيبة : علبالي سيف بصح متضربوش يا وليدي راح يزيد يكرهك
سيف : معندو مراح يزيد كثر من هكا
حبيبة : سيف وليدي يهديك ربي بلاك تدي عليه خوك رايح فيها و يهدر برك و الدم عمرو ما يولي ما خوك يقعد خوك متنساهاش هادي
سيف : المهم انا نحيت يدي عليه لي حب يصرا يصرا يتهارد مكان مدخلني فيه خليني نشوف اذا صحابو يدومولوا

تبسملها و باسلها راسها

سيف : سمحيلي على لي صرا نبروميلك متتعاودش ان شاء الله .... تعرفيني شحال نحبك صح مرات نزيد فالهدرة معاك بصح منحبش نشوفك هكا .... و غدوة ان شاء الله نديك عند الطبيبة جوزي ياك
حبيبة : بوووه راني مليحة ماشي موالفة بالاكشن برك

ضحك معاها و هي شدتلو وجهو بيدها

حبيبة : يا احسن حاجة جاتني فهاد الدنيا بلاك تزعف و نرجع نقولك بلاك تدي على هدرة خوك

تنهد و حط راسو على كتفها

سيف : قوليلي برك كيفاش يخمم بلي نكرهو ..... انا .... منقدرش ناذي خاوتي و منقبلش تتمس شعرة منهم ......... بابا .... مات على يدي يما .... مات و هو يوصي فيا عليكم .... كيفاش حابني نسرقهم .... حقهم اصلا راهو على اسمهم فالورق
حبيبة : علبالي سيف على هادي قلتلك ما تديش عليه من وقتاش تدي على هدرة خوك ياك علبالك بلي يطرش فالهدرة

.......

و هكذا كل واحد راح لدارو و كل واحد كيفاش جازت ليلتو ..... ملك لي قاعدة تخمم لغدوة و الخدمة الجديدة لي راح تروح ليها .... سعاد لي مرقدتش و هي تخمم فلي صرا و زادتلها بنتها و الهدرة لي هدرتها .... سيف لي بايت يتقلب فالفراش مجاهش النعاس حتى دخل خوه لي جوز الليل مع صحابو و نفس الحاجة مع حبيبة لي قاعدة قدام الباب تستنى فوليدها يدخل

الصباح صباح جديد و احداث جديدة :

هي لي ناضت بكري باش تروح تشوف الناس لي راح تخدم عندهم و اذا مزالهم يحوسوا على خدامة ؛ كيما كان الحال وجدت روحها
و راحت

........

لحقت قدام الدار لي قال عليها ريان ؛ هبطت من التاكسي و هي تخزر فالدار من فوق للتحت

ملك : تبارك الرحمان هذا قصر ماشي داار

كملت تمشي حتى لحقت قدام الباب وين حبسها العساس

👨 : خير مدام وين داخلة
ملك : هااا ... صباح الخير ... قبل .... اممم جيت لهنا بارسكو سمعت بلي كاين طفل يسحقو مراة جي تتلهى بيه
👨 : اههه جاد ... دقيقة دوك نجي

دخل ... شوية و خرج مدخلها معاه

خليني نعرفكم بالعايلة هادي

الجد سليمان .... شيخ ولا نقولو رجل شرقي بامتياز متمسك بالتقاليد الاعراف و الدين بزاف  .... سليمان انسان واعر عصبي مسيطر فارض شخصيتو فالدار كلمته هي الاولى و الاخرى فالدار عندو 78 سنة بصح ما يبانش مزال شاد روحو الشيباني 😂 بصح معدنو صافي و نقي .... انسان لي يغيضو المحتاج و يعاون المسكين قد ما قدر بصح اكثر حاجة يكرهها هو غدر الناس القراب ليه و هذا لي صرا لوليدو الصغير وقت سرق دراهم الحانوت تاع باباه منبعد ما حب يمدلو الحانوت وقتها فقد ثقتو بوليدو لي كان يحبو اكثر من الباقي و حاوزوا .... ايه حاوزوا و محبش يزيد يشوفوا بارسكو فالوقت لي امن فوليدو هو ضربو فظهرو

مرتو زهرة لي عندها 75 سنة مرضت و شدت الفراش عندها واحد 3 شهور

جاسر 55 سنة و هو وليد سليمان مزوج بشراز 43 سنة و لي هي مرتو الثانية مور ما طلق الاولى كي خانها مع شراز و جابها عليها

عندو :

انور 30 سنة مزوج للمرة الثانية تاني ب خلود لي سيفها عليه جدو مور ما ماتت مرتو الاولى ... انور  كان يحب بزاف مرتو و قبل عام وقت ماتت مرتو انور اكتئب مرض هبل بارسكو كانوا يحبوا بعضهم ملي كانو يقراو كيف كيف فالليسي و جابو طفل لي هو جاد و عندو 4 سنين

عماد 27 سنة

بدر الدين 25 سنة

و فالاخر عندنا

تسنيم و هي بنت جاسر من شراز عندها 22 سنة

شراز دايمن فمشاكل مع عماد و انور لي محبوهاش سورتو كي كانت السبة فطلاق باباهم و يماهم عكس بدرو اللي يتفاهم معاها بزاف و حتى هي تحبو بارسكو وقت جات كان هو صغير بزاف فكانت قريبة ليه

.......

و كيما كان الحال دخلت و راحت للصالون بعدما دخلوها تستنى تما شوية و دخلت مراة ؛ دورت راسها وقت سمعت صوت الطالون .... قابلتها مراة شابة طويلة رقيقة و شعرها اورونج طويل ؛ قعدت حاطة رجل على رجل و قالتلها

خلود : مالا نتي هي الطفلة لي راح تكون la nourrisse تاع جاد
ملك : اذا قبلتو ايه انا هي
خلود : واش اسمك
ملك : ملك
خلود : ملك .... شوفي ملك كاين واحد 3 بنات جاو من قبلك و وحدة ما عجبت راجلي فخدمتها الله غاب راجلي مزير شوية .... راح تبداي بالسبت ان شاء الله بارسكو غدوة راح نخرجوا en famille  سينون الجمعة تاني تخدمي فيها