سعاد : متهدريش هكذا يا بنتي ربي جامي يظلم عبدو هذا غير اختبار ليك و متعرفي بلاك لي مخبالك راح ينسيك فلي عشتيه واش يقول ربي عسى ان تكرهوا شيئا و هو خير لكم
ملك : بصح يا طاطا انا عييت مزالني صغيرة على هاد العذاب
سعاد : نحكيلك واحد الحكاية .... واحد المراة راحت عند نبي قاتلوا قولي اذا ربي عادل ولا ظالم .... النبي هذا معجبوش الحال و قاللها كيفاش تقولي هكذا قالتلو انا ارملة و عندي ربع بنات و انا لي معيشتهم بالمدخول لي يدخللي من القماش لي كنت نبيعو لا علينا كيما كل مرة وجدت القماش باش نبيعو و هبطت للسوق حتى يجي واحد الطائر رفد هديك الرزمة لي فيها القماش و هكذا تعبي راح و الدراهم لي كنت راح نصرف بيهم راحو تاني ..... تعرفي واش صرا منبعد
ملك : واش صرا
سعاد : دخلوا واحد التجار عند النبي و هاد التجار كيما نقولو فوقتها كانوا من الناس لي مرفهين بزاف فالمجتمع قالولو بلي يا نبي الله كنا فالبحر و ثقب البابور لي كنا فيه حتى جا واحد الطير و رمالنا هاد الرزمة لي سدينا بيه الثقب مور ما كنا نقولوا خلاص راح نموتوا و كي سلكنا حبيناك تعرفلنا صاحب هاد القماش حبينا نكافئوه .... و هو نفسو هديك المراة و دات دراهم عمرها ما كانت تحلم تلمهم هنا تعرفي بلي فالوقت لي المراة كانت تبكي و تقول ربي ظلمني ربي كان يتاجرلها فالبر و البحر ..... ربي جامي يخلي عبدو ملك نتي برك كوني على يقين بيه و راح يجي نهار و تتفكري كلامي
تبسمت ملك
ملك : الحكاية شابة بزاف .... طاطا نوعدك نسيي منطولش عندك يعني ندبر اموري و نتكل على روحي برك و نروح
سعاد : وين راح تروحي من اليوم راكي منا و فينا ... انا اصلا عندي غير زوج دراري و صدقيني مراحش تعذبيني كامل و زيد على هذا خيركم سبق يا بنتي
......
مع دخل للحومة تاع جدتها يلقاها تتمشى و فيدها قفة باين بلي راحت قضات صونالها بالطونوبيل حتى حبست و دارت وقت شافتو يبست فبلاصتها ... فتح الكارو و قاللها و هو عاقد حواجبو
سيف : اطلعي
ترددت و معرفتش واش دير وقت شافتو طرطق فيها عينيه طلعت و غلقت الباب ديمارا و هوما ساكتين غير بعد شوية من الحومة هديك حبس الطونوبيل و دار ليها جبد البرية لي خلاتها و رماها عليها
سيف : واش هاد ***** قولي
ليلى : .... كيما قريت سيف .... جابلي ربي من حقي نحبس لي بيناتنا وقت ما نحب
سيف : حاجة ماتحبس اذا انا ما قلتش تحبس ... تتقعدي بيا رحتي من داركم و مخليتلي هاد الورقة ... نحبك و ما نعرف واش بصح لازم نحبسو ... مجهلينيش ليلى
ليلى : سيف لازم تحترم القرار لي ديتو
سيف : صحا مديلي السبة .... غلطت معاك فحاجة كاش واحد هدر معاك واش صرا باش subitement ديسيديتي نحبسو
ليلى : خممت مليح فيها سيف .... انا ونتا منقدروش نكملو كيف كيف و مدابيك متزيدش تلحقني خليني نعيش حياتي
سيف : تعيشي حياتك و نتي هاربة مني هكا
ربع يديه يخزر فيها و هي تنهدت و طلعت يدها رجعت بيها شعرها للور .....
ليلى : تخنقت سيف تخنقت .... منقدرش نكمل معاك افهم حاجة ما جي بسيف .... حابة نعيش حياتي و نتا .... نتا زيرتني بزاف متحكم و متسلط بزاف غيرتك و رايك لي تفرضو عليا كرهني من هاد la relation
سيف : هذا هو رايك فيا
ليلى : .... ايه ..... مكالاه تقعد لاسق فحاجة مراهيش حابتك ..... ( خرجت كلماتها بسيف ) ... وين راهي كرامتك لي ظل تحكي عليها
غمض عينو يسيي يستوعب فكلامها و يسيي يشد يدو باش ميضربهاش
سيف : لوكان كان واحد اخر فبلاصتك لوكان راني قتلتو فهمتي الله غالب .... حبيتك 💔 .... بصح مدام حابة تروحي روحي الله يسهل بصح ديري مليح فراسك بلي نهار لي تولي فيه مراحش تلقاي سيف هذا
خزرت فيه مليح منبعد قاللها
سيف : اهبطي
هبطت و هي غير غلقت الباب هو ديمارا .... حطت يدها على صدرها و طاحو دموعها
ليلى : مراحش نسمحلك ... بسبتك تفارقنا ... مراحش نسمحلك محاال
........
سعاد : .... ارواحي نوريلك الشمبرة لي راح تقعدي فيها
دارتلها براسها ايه و تبعتها فتحت الباب و دخلتها
سعاد : هادي شمبرة بنتي اسراء اذا شفتيلها كي كانت صغيرة دوك شوية و جي هذا البونك لي من جهة الباب تاعها و لي قدام التاقة دايرينو بارسكو مرات الما بنت خالتها جي تبات عندها و دوكا ولا تاعك وجدي حوايجك و ارواحي تدوشي تنحي العيا عليك
دارتلها براسها ايه و سعاد خرجت مخليتها براحتها اما ملك جبدت كابتها و سيات تلقى حاجة مليحة تلبسها فالاخر رفدت روبة طويلة تاع الدار سامبل و مليحة راحت مع سعاد لي داتها للدوش ..... دخلت ملك و غلقت موراها الباب
يتبع 💚💚 ....
أنت تقرأ
اليتيمة الهاربة { سيف و ملك } _ باللهجة الجزائرية 🇩🇿 _
Romanceحكايتنا تحكي على ملك لي هربت من دارهم باش تعيش حياة جديدة بعيدة على الضرب و الاهانة ...... كيفاش راح تكون هاد الحياة لي خيرتها ملك و واش راح يصرا فيها هذا كامل نعرفوه فالكرونيك
