اليتيمة الهاربة { سيف و ملك } _ باللهجة الجزائرية 🇩🇿 _

بارت 7

الزينات كي تكملوا البارت اقراو واش مكتوب مع الاخر كامل 💜

دارتلها براسها ايه و سعاد خرجت مخليتها براحتها اما ملك جبدت كابتها و سيات تلقى حاجة مليحة تلبسها فالاخر رفدت روبة طويلة تاع الدار سامبل و مليحة راحت مع سعاد لي داتها للدوش ..... دخلت ملك و غلقت موراها الباب دوشت و حست العيا كامل طاح عليها .... جاز بين عينيها كامل واش عاشت .... منبعد تفكرت مريم و رتيل زعما راهم مقلقين عليها زعما كانت انانية كي هربت و مخممتش فلي راح يصرالهم ... منبعد رجعت تفكرت وقت خالد بيتها مع الكلب قلبها كحال ملك لي عمرها ما شدت حقد ولا كره فقلبها هي لي دايمن تسامح و تنسى بصح هنا ما قدرت تسامح ولا تنسى ..... كملت غسلت شعرها و خرجت ... وقت سمعت الحس لتحت شدت روبتها و هبطت بلعقل مترددة حتى تلقى سعاد قاعدة مع اسراء و حبيبة يقسرو فالكوزينة

سعاد : هااا ملك ارواحي اقعدي

اسراء و حبيبة لي خزروا فبعضهم ما فاهمين والو دنات ملك و قالتلهم

ملك : مساء الخير
سعاد : هادي ملك وحدة من معارف باباك الله يرحمو و والديها ماتو على هادي جبتها تقعد عندنا ؛ ملك هادي اسراء بنتي و حبيبة ختي و تسكن قدامنا
اسراء : اههه جامي سمعت بيها !

سعاد لي كبرت فعين ملك بلي دارتو يعني محبتش تبهدل بيها و تقوللهم بلي هربت من دارهم

سعاد : اذا تشفاي بكري روحنا قعدنا فدار موسى وليد عم باباك كنتي صغيرة و كنتيو تلعبو مع بعضكم المعم طلعيها معاك تعرفو على بعضكم
اسراء : ايه .... هيا ملك
ملك : متشرفين طاطا

حبيبة لي تبسمت معاها فوق فوق و طلعتها و هبطتها بعينها ؛ ملك و اسراء طلعوا لشمبرتهم و حبيبة دارت لسعاد

حبيبة : شكون هادي سعاد
سعاد : ..... فالحق انا محبيتش نهدر قدامهم و مدابيك متهدريش لي راح نقولو يقعد بيناتنا .... ( حكاتلها حكايتها ) ... و غاضتني بزاف على هادي من اليوم راح تعيش معانا
حبيبة : صحا الطفلة صح تغيظ بصح كيفاش دخلي طفلة تعيش معاكم و زيد متعرفيهاش مليح ممبا بلاك تسرقكم بلاك ديرلكم مشاكل يعني هادي مجاتش تضيف راح تعيشيها معاك و زيد هاربة من دارهم لوكان خاوتها يجيو يحوسوا عليها و يلقاوها نتي لي تحصلي
سعاد : انا باباها نعرفو مليح و هو وقت دخلنا لداروا مدارش هاد الحكايات فراسو كيفاش حابتني نخلي الطفلة وحدها فالوقت لي باباها رفدنا عندو وقت الشدة ؛ ياك جبتها لداري مجبتهالكش ليك
حبيبة : ايه دبري راسك غدوة اذا كاش ما صرا متقوليش موصيتكش
سعاد : ايه ايه

......

اسراء : ايه معرفتينيش بروحك
ملك : انا ملك و عندي 18 سنة .... هاد العام جوزت الباك كنت scientifique
اسراء : اههه كيما الما بنت خالتي و انا لغات هاد العام راح نجوزوا الباك
ملك : ان شاء الله جيبوه
اسراء : امين ... و نتي شحال ديتيه
ملك : 16.78
اسراء : الله يبارك واش راكي حابة ديري
ملك : تامني معلباليش بصح درت شحال من تخصص فراسي
اسراء : ايه مالا راح تسجلي فالجامعة هنا !!
ملك : مشكيتش هاد العام نسجل بلاك نخلي للعام الجاي ان شاء الله و اصلا التسجيلات عنظهم يامات ملي بداو  لازم نحوس على خدمة و نحوس وين نكري قبل يعني انا جيت هنا باش نقعد يامات برك منبعد لازم نروح
اسراء : متقلقيش روحك راكي معانا منا و فينا ... بصح اذا يعني ... يعني تقدري تقوليلي ... خاوتك عمومك خوالك وين راهم قصدي وعلاش حابة تعيشي وحدك
ملك : منحبش نهدر على دارنا بزاف
اسراء : ايه خودي راحتك .... اسمحيلي نروح نجيب حاجة و نجي

جابت الساشيات لي كان فيهم واش شرات مع الما و قعدت توري لملك لي عجبوها بزاف ... باينين غاليين غير الحوايج الله الله المكياج و الروايح غير الماركة حاجات لي جامي شافتهم يعني دوكا هي بحوايجها هادو راهي تبانلهم كافية بصح ملك متهتمش بزاف لراي الناس

ملك : بصحتك بزاف شابين
اسراء : الله يسلمك

رفدتهم اسراء تستف فيهم فالخزانة و لاكوافوز حتى دخلت سعاد

سعاد : ايه كيفاش راكم يا بنات
اسراء : ملاح ماما ... و انا و ملك تعرفنا مليح على بعضنا
سعاد : مليح ؛ ملك بنتي حطي حوايجك فالخزانة اسراء ديريلها بلاصة
ملك : لالا طاطا متشقيوش روحكم خليهم فالكابة
سعاد : بصح ...
ملك : ميشقاش طاطا
سعاد : دبري راسك ... اسراء ارواحي تشوفي معايا عاونيني نحطو العشاء يطيب دوكا خير
اسراء : ايه
ملك : تحبي نعاونك طاطا
سعاد : لالا غير ريحي بنتي تكوني عيانة دوكا

خرجت سعاد و اسراء و راحو للكوزينة

اسراء : ماما حبيت نقولك حاجة بصح متفهمينيش غالط
سعاد : قولي
اسراء : وقتاش راح تروح ملك ؟
سعاد : راح تعيش معانا اسراء و اذا فرج ربي عليها راهي تروح
اسراء : يعني .... حنا لوكان ماشي سيف الخبز منلقاوش بيمن نشريوه منين راح نصرفوا عليها ماما
سعاد : تاكل تشرب تلبس و تعيش معانا بلي كان ... ربي يقول " وَمَا مِن دَابَّةٍ فِي الْأَرْضِ إِلَّا عَلَى اللَّهِ رِزْقُهَا " متخمميش بزاف 
اسراء : ايه

.....

فالليل كامل :

حبيبة : اهههه الباب هدا سيف سوور

راحت فتحت الباب تلقاه سفيان معرفت تفرح ولا تزعف كي ماشي سيف

حبيبة : سفيان

سوطا عنقها و هي زيرت عليه حتى عينيها تعمرو بالدموع

حبيبة : توحشتك وليدي وعلاش مقلتلناش بلي راك جاي
سفيان : سوربريز حبيبة سوربريز ... الموووووش

دخل يحوس على الما و حبيبة ضحكت و غلقت موراها الباب مدخلة معاها الكابة تاعو حتى سمعت العياط تاع الما

حبيبة : نقصي حسك يا عرة البنات كامل سمعوك

طلعت الما يدها تمسح على شعرها

الما : المصعور تاع وليدك شنشفني

جبدها معنقها يضحك

سفيان : متزعفيش الموش

هادو هما حلقات اليوم ان شاء الله يكونوا عجبوكم خليولي ارائكم فالتعليقات و اقترحاتكم مدولي شوية احداث رومنسية بين سيف و ملوكة و احسن احداث نخيرها بارسكو كتبت كتبت و دوكا ملقيتش احداث بزاف بين الابطال شغل الحكاية بصفة عامة علبالي احداثها بصح هدوك التفاصيل بين الابطال حابة نكثر منهم سما حطولي افكاركم باش نزيدها و الى الملتقى ان شاء الله 💚💚