حبيبة : احممم .... سيف كنت حابة نقول لوكان تروحوا غدوة نتا و خوك و تخيرلو كاش طونوبيل نشريوها راك علبالك تاع دوكا يحبو يخرجو و يحوسو و هو كي جا هنا و كمل قرايتو لازملوا باش يخرج و كامل ..... هااا واش رايك
سيف : هي الطونوبيل مليحة و بزاف عندك الحق
سفيان تبسم
سيف : بصح ... مليحة كي جيبها بعرق جبينك
حبيبة : يعني
سيف : يعني انا مراح نحط حتى دورو فيها ... وليدك راح يخدم و يجري على روحو و يديرها ماشي هكا سفيان
حبيبة : بصح يا وليدي وقتاش يخدم و يلم دراهم و يشري يا سيدي عاونو برك
سيف : انا مراح نعاون حتى واحد و اذا على الخدمة لقيتلوا واش يخدم
سفيان لي عوج فمو معجبوش الحال
سفيان : انا لبارح برك كملت لقراية حاب نريح قبل منبعد نخدم
سيف : راح تخدم سفيان راح تخدم مكانش الوقت باش تريح الوقت راهو يمشي .... كاين واحد نعرفو فتح boutique يبيع فيها و يسحق des vendeurs قلتلو عليك تخدم غير الصباح عندو و لعشية زيد حوس على خدمة زيادة
حبيبة : هههه سيف شحال يحب يتمسخر
سيف : مرانيش نتمسخر
حبيبة : كيفاش هادي خليت l'usine و l'hôtel و كامل معارفك و حابو يروح يبيع للناس
سيف : ياك خدمة حلال
حبيبة : علبالي نورمال بصح وليدي قرا و كمل قرايتو و مخصنا والو باش نبعتوه يبيع هكاك خليه يقعد و حنا نصرفو عليه
سيف : باش تعرفي برك بلي كاين ناس قاريين وين يبان وليدك معاهم و راهم يبيعو و يخيطو و يطيبو ما فيها حتى عيب ... حب حب محبش يحوس على خدمة ... لازم يتعلم يكون راجل
سفيان لي زير على يدو و ناض خابط الكرسي موراه
سيف : كشما كاين
سفيان : لالا خويا شبعت انا نطلع لشمبرتي بصحتكم
راح سفيان لي كان راح يطرطق و لحقتو الما ؛ حبيبة لي دارت لسيف لي كان ياكل ببرود
حبيبة : لالا نتا زدت فيها ... حابسو فالدار سكتنا خيرتلو صحابو سكتنا مخليه بلا طونوبيل سكتنا لالا و دوكا حاب تبعتو يخدم عند الناس شوف سيف طونوبيل انا نشريهالو بدراهمي و الخدمة انسى يخدم vendeur
سيف : اذا قلت منشريولوش طونوبيل معنتها لا انا ولا اي واحد يشريها و على الخدمة ياك قلتلو اذا لقى وين يخدم يخدم
حبيبة : نسيت بلي عندو حق فلي خلى باباه
سيف : ههه ضحكتيني علبالك واش خلى باباه .... مخلالكم حتى دورو و l'usine علبالك الحالة لي خلاه فيها و علبالك مليح بلي لاكسيدون لي صراتلو صراتلو كي فلس .... الدراهم الدار الاوتال كلش راهو كاين دوكا هو تعبي هادي واحد بصح متخافيش انا مناكلش حق خاوتي حابو يرجع راجل و بعقليتك نتي راح ترجعيه مراة منحبوش يتصاحب مع رضا و جماعتو طريقهم باينة حابو يعيى يطيح و ينوض و يتعلم بارسكو وليدك فنيااان يحب كلش واجد غدوة لوكان نموت واش يصرالكم
حبيبة : واش جاب الموت دوكا بعيد الشر
سيف : لالا قوليلي واش يصرا ؛ الدراهم لي كاينين يلعب بيهم و ياكلهم الخدمة لي بنيتها تروح فنهار و تقعدو تطلبو من واحد لواحد .... كوبيتولي لابيتي ديجا
......
الما : خلاص دوكا سفيان
سفيان : انا مفهمتش وعلاش خوك يكرهني هكذا عدوي و ميديرليش هكا
الما : ميكرهكش سفيان هو برك عقليتو صعيبة سايسو
سفيان : ههه عقليتو صعيبة معايا برك هداك حق بابانا لي راهو شادو علينا هو بتلاثة طونوبيلات و انا مستخسر فيا وحدة هو زعما حاكم l'usine و انا نروح نبيع هذا اخ دوكا لالا و يقولي شكون لي نعاشر مليحة هادي هو يدير لي فراصو و انا ندير لي فراسي ياك السامط يغلب القبيح
......
سيف لي جاز على شمبرتو و سمعو طلع حواجبو و استغفر و راح لشمبرتو
سيف : راح تكبر و تعرف بلي لي راني ندير فيه لصلاحك سفيان
.......
صباح جديد و احداث جديدة :
ملك لي كانت تغسل فالحوايج حتى دخل ريان و كان باين حشمان
ملك : اههه ريان كشما تسحق
ريان : اههه والو .... هي برك كنت راح نقولك اذا تغسليلي تريكو تاعي باش نلعب بيه ماتش عشية
ملك : ايه بيانسور هاتو
ريان : يعطيك الصحة
و هادي هي عادة ملك هنا كل حاجة تحب تخدمهالهم على الاقل ترد شوية من خير سعاد هي اصلا والفت بالخدمة فالدوار طلعت للسطح نشرت الحوايج و هبطت غير سمعت الباب راحت فتحت لقاتها الما
الما : ملك صباح الخير
ملك : صباح النور جوزي
دخلت الما و راحو للكوزينة وين كانت سعاد تنقي فالجلبانة
الما : صباح الخير خالتو
سعاد : صباح الخير الزينة اقعدي
الما : خالتو ماما قالتلكم ارواحو تتعشاو عندنا اليوم
سعاد : ان شاء الله
الما : ايه ملك لقيتي خدمة
ملك : لالا مزالني نحوس
الما : تحبي نقول لخويا عندو معارف و يلقالك
ملك : اههه لالا مكالاه
الما : دبري راسك ايه وين راهي اسراء
سعاد : هاديك الخميرة تكون مزالها راقدة
الما : اياه لحق وقت الفطور و هي مزالها
ضحكت و طلعت عندها لقاتها هداك وين ناضت
الما : اوهوه هداوين نضتي
اسراء : واش ندير
الما : لعشية راكم معروضين عندنا للعشا
اسراء : صحححح
الما : اييييه
اسراء : سيف جا
الما : ايه جا 😒
اسراء : وشبيك
الما : اسراء راني نظل نقولك سيف يشوفك كيما ختو تعيشي نسايه راكي ضري فروحك برك شفتي واش صرالك كي عرفتي بليلى
أنت تقرأ
اليتيمة الهاربة { سيف و ملك } _ باللهجة الجزائرية 🇩🇿 _
عاطفيةحكايتنا تحكي على ملك لي هربت من دارهم باش تعيش حياة جديدة بعيدة على الضرب و الاهانة ...... كيفاش راح تكون هاد الحياة لي خيرتها ملك و واش راح يصرا فيها هذا كامل نعرفوه فالكرونيك
