اليتيمة الهاربة { سيف و ملك } _ باللهجة الجزائرية 🇩🇿 _

بارت 35

كنزة : ايه مخدمتيش اليوم ماشي اخدمي بالخميس  !!!
ملك : ديت نهار تاع اليوم بارسكو عييت بزاف هاد اليامات راني نخدم كل يوم قلت اوموان نريح شوية كنزة : صح عندك الحق

......

دخلو للجنينة و شدو كرسي قعدو فيه

كنزة : ايه متعرفناش مليح منقبل
ملك : اسمي تعرفيه ملك راني ندير ف 19 سنة جبت الباك هاد العام و جيت هنا عند طاطا سعاد لي هي فاميلتي باش نكمل قرايتي ... بصح حالتي مكانتش تسمح سما كان لازم نبدا نخدم و نرفد روحي شوية منبعد نكمل
كنزة : مليح ... انا جبت الباك تاعي العام لي فات بصح حبست القراية يعني لا انا كنت تاع قراية ولا دارنا شجعوني باش نكمل سما شديت الدار و دوكا عندي 20 سنة
ملك : مليحة تخرجي تخدمي ولا ديري كاش فورماسيون خير ما تقعدي فالدار
كنزة : .... حنا قيسنا قيس روحنا ملك .... عندي زوج خاوتي دراري هوما لي يخدمو علينا و مدخولهم قليل و عندهم عقلية صعيبة نساء تاع دار ملازمش يخدمو شغل عندهم عيب ..... سما راني قاعدة نستنى فمكتوبي و خلاص
ملك : هههه و شكون هذا مكتوبك نشفى بلي قلتيلي منقبل بلي كاين لي دا قلبك
كنزة : لوسك
ملك : لوسي !!!
كنزة : سفيان .... يا ختي هبلني محبش يخرج من عقلي بصح هو ميخزرش ممبا فيا
ملك : دقيقة واش قصدك بلوسي
كنزة : لوسك بمعني خو راجلك ؛ نقصد سيف  ... على كل لوسك المستقبلي
ملك : هههه ضحكتيني
كنزة : وعلاش راني نكذب
ملك : نتي وقيلا راكي دايرتها صح
كنزة : امممم شفتك كيفاش تخزري فيه صباح كي تتلقايه نسيتي بلي انا نظل فالتواقي .... و زيد تتوالموا بزاااف
ملك : و كيفاش نخزر فيه
كنزة : هكا ..... ( و دارتلها بعينيها كيفاش تخزر فيه )
ملك : ههههه نتي وحدك
كنزة : هههه مزية كي ستعرفتي

سكتت منبعد حمحمت و قالتلها

ملك : يعني ... نفرضو لوكان صح ..... هو ... مشكيتش يخزر فيا
كنزة : وعلاش
ملك : من جهة هوما لباس بيهم و انا وحدة راني نخدم على شري و من جهة واحد اخرى هو كبير عليا بيناتنا شحال من عام و زيد هو يحب هديك ليلى سما واش راكي تقولي فيها محال يصرا
كنزة : اذا على ليلى هوما حبسو و اصلا هي راحت تسكن بعيد مشكيتش يوليو و اذا على العمر راكم ملاح مراهوش كبير عليك ب 20 سنة بيناتكم واحد 8 سنين برك ... و على الدراهم ديري فبالك بلي هوما ميشوفوش بزاف للدراهم منقبل كان مع ليلى و ميت عليها و هي كيف كيف زوالية قيسها قيس روحها و فوقها خوها كل يوم فالمشاكل و الديونات ... ولا حنا معندناش الحق نحبو و نزيدلك ملك مكاش كيفاش ميخزرش فوحدة كيما نتي وعلاش راكي تحقري فروحك مخليتي لا فالزين ولا فالسر ولا الظرافة ولا نهدر على اللسان و الشطارة
ملك : ههه خلاص حشمتينا اووو .... و زيد قلنا فرضا ماشي صح
كنزة : امممم .... يعني ميعجبكش
ملك : لالا
كنزة : و يالوكان شوية
ملك : لالا
كنزة : صحا ... واش رايك فيه
ملك : ..... يعني هو مليح ... عقليتو مليحة ناس ملاح .... يخمم بزاف على الناس لي دايرين بيه
كنزة : وشنو هي اكثر حاجة تعجبك فيه
ملك : ..... جاي respectueux ؛ شاد قدر قدرو و يعرف حدوده مع الناس شغل لوكان نهدرلك على واحد نعرفو جاي يدصر بزاف و ميوزنش كلامو معاك و انا نكره عباد هكا
كنزة : امممم ..... صحا واش هي اكثر حاجة متعجبكش فيه
ملك : ... كنزة مرانيش مداصرتو باش نعرفو مليح ديجا وعلاش راكي غير تسقسي عليه
كنزة : هكا حبيت ..... يعني حبيت نعرف اذا يعجبك ولا لالا
ملك : و انا قلتلك لالا
كنزة : لالا يعني باش منبعد مديقلكش كي تشوفي ليلى رجعت دور بيه
ملك : وعلاش .... ولاو
كنزة : لالا بصح شفتها هنا معلباليش اذا جات برك لدارهم ولا رجعت ..... كاينة حاجة ديريها فراسك اذا صح لقيتي روحك طحتي فيه ديري البوسيبل تاعك باش يكون ليك هو الله يبارك دايرين بيه بزاف بنات حتى هديك بنت خالتو و تتلوى كي تشوفو سما يا يكون ليك يا تخليه يروح لواحد اخرى ... هي على كل كل واحد و مكتوبو بصح لازم الواحد ياخذ بالاسباب
ملك : ..... خلينا نوليو للدار رانا طولنا

و هكذا جاز نهار اليوم لي كان عادي .... باش يجي نهار جديد و معاه احداث جديدة

اليوم نهار الجمعة و كيما العادة ملك تكون عند جاد .... خلبنا نروحو لشمبرة جاد و نشوفوا واش راهو يصرا

......

فتخ الباب و خرج يجري يحوس على اي واحد يعيطلو باش يجي معاه حتى خبط فعمو

بدر : اوبااااا وعلاش راك تجري جاد
جاد : عمو ملك ملك
بدر : وشبيها !!!

مسح دموعو و قالو

جاد : ماتت 😭
بدر : كيفاش

راح يجري للشمبرة و جاد لاحقو

...........

دخلت طونوبيل للحومة ... خلات كامل الناس تما تقعد تخزر فيها ..... حبست قدام دار حبيبة و هبط الشوفور يجري فتحلو الباب .... هبط يمشي بكل هيبة حتى لحق للباب دقدق شوية و فتحتلو

حبيبة : عمي !!! .... اتفضل

دخل و راح للصالون و هي غلقت موراها الباب و لحقتو