صباح جديد :
طالعة تمشي و دندن حتى جازت قدامها موطو قاستها و طيحت الساشي لي فيدها
كنزة : يا الحابس مراكش تشوف قدامك .... جايح ( هبطت ترفد الساشي ) .... لوكان اوموان قال سمحيلي ياخي ناس ياخي
هو لي كان طالع موراها و شافها وقت قاستها الموطو قعد يضحك على حالتها و هي تهدر وحدها ؛ هي لي غير طلعت راسها شافتو واقف و يضحك
سفيان : هبلتي وقيلا وليتي تهدري وحدك
كنزة ( ببرود ) : تقلقت من مول الموطو لي قاسني برك
سفيان : ايه شفتو
دارتلو براسها ايه و راحت ... طلع حاجبو و هو يشوف فيه كيفاش تجاهلتو و هدرت ببرود معاه و هي لي كانت وقت تشوفوا تحمار و ذوب فبلاصتها .... هبط راسو لجيبو وقت صونا تليفون و جبدو
سفيان : الو وي
....... : الو سفيان
سفيان : وشراك مسيو جمال
جمال : ما كان لا وشراك لا زوج ؛ سفيان عندي 15 يوم و انا نقولك رجلي دراهي مسحقهم راح نبدا بروجي و راني محتاج
سفيان : بصح حنا كنا تفاهمنا بلي ما زال باش نرجعلك دراهم
جمال : ما تفهمش قتلك نسحقهم عندك زوج سوايع فيدك تكون بعتلي دراهمي
سفيان : بصح ..... الو .... الووو
نحا تليفون وقت كوبا عليه و راح يجري للقاراج وين لقا رضا قاعد يتفرج
سفيان : رضا
....
رضا : واش خو
سفيان : عيطلي جمال ... يسحق دراهمو
رضا : و الحل
سفيان : شوف كيفاش تعاونني .... متنساش الموطو نتا لي درتلي بيها اكسيدون
رضا : بصح ماشي انا لي ديت من عندو دراهم ؛ شوف خوك ياك عندكم دراهم وعلاش جاي تكسرلي فراسي
سفيان : فالدار راح يسقسيوني واش درت بيهم علبالك بلي معلبالهمش بالموطو
رضا : دبر راسك
سفيان : ايه صحا معليش
خرج و راح لدارهم
......
تفاطنت على صوت الرافاي .... خزرت فالشمبرة تبسمت كي ملقاتهاش و صبحت عليها ناضت غسلت صلات و دارت روتينها كيما العادة و هبطت .... لقات سعاد مع الخياطة
ملك : صباحو طاطا
سعاد : صباح الخير ملك
ملك : طاطا راني خارجة مدام خلود قالتلي باش نقعد مع جاد هاد اليامات كي مبعتوهش للاكراش
سعاد : و الحانوت
ملك : ديت يامات
سعاد : معليش ؛ انا غدوة و نروح للتالث
ملك : ان شاء الله
سعاد : نوض معاك نغلق الباب بارسكو ما كان حتى واحد
و كيما كان الحال خرجت ملك و سعاد غلقت موراها الباب
........
دخل للكوزينة لقا يماه قاعدة تشرب فحليبها غير شافتو ناضت
حبيبة : نحطلك تشرب القهوة
راح ديراكت حط ليه فنجان و خرج للبالكون يتكيف ..... غمضت عينيها بقهرة و قعدت .... شوية و دخل سفيان لي كان باين عليه مقلق قعد قدام يماه و جبد تليفونو يدير بيه .... حتى دخل سيف حط الفنجان وقتها خزر فيه سفيان حاب يهدر معاه و ما قدرش اما سيف كان يخزر فالتليفون تاعو لي رفدو و خرج
سيف : منين جاب دراهم
حبيبة : انا ممديتلوش
سيف : منين راهو يصرف و التليفون هداك غالي طاحو عليه الدراهم
حبيبة : معلباليش وليدي ؛ قالي صحابو راهم يعاونوه و هو راهو يبريكولي
سيف : وشمن خدمة لي بين ليلة و نهار يشري بيها هداك تليفون
حبيبة : معلباليش سيف مراني مخبية والو عليك
طلع حاجبو و جا خارج
حبيبة : قلت لوكان جوز تفطر هنا منبعد راني دايرة طعام كيما تحبو
سيف : راني مشغول
خرج و خلاها
.........
هووراح يركب فالطونوبيل يلمحها خارجة من الدار .... ربع يديه و قعد يشوف فيها و مطلع حاجبو
هي لي جازت قدامو بلا ما تخزر فيه ولا تهدر معاه .... واش دار لبارح و لهدرة لي هدرها مراحش جوزهالو على خير بارسكو اذا سكتت مرة معنتها راح تعيش نفس الحاجة ميات مرة
سيف : متعرفيش تقولي صباح الخير
دارت ليه و قالتهالو فوق فوق
سيف : وين رايحة
ملك : نخدم
سيف : الدار ولا الحانوت
ملك : نتا هكا مع كامل الناس
سيف : كيفاش هكا
ملك : اذا نسيت انا ضيفة عند خالتك مراني ختك مراني مرتك جاي تستجوب فيا
سيف : راكي حابة نفسدلك خليقتك صباح ربي
ملك : اذا كملت نقدر نروح
سيف : وشبيك تهدري معايا هكا
ملك : نسيت واش درت معايا البارح .... هدرتك و عياطك عليا عاود راجع روحك .... معندك حتى حق تهيني بهديك الهدرة
سيف : يعني قعدتي لاسقة فزوج كلمات قلتهم
ملك : ايه و نهر تعرف الغلطة تاعك هداك نهار ارواح هدر معايا
طلع حاجبو من الهدرة و الجراة تاعها ؛ راحت و خلاتو ؛ مسح على وجهو و ركب فالطونوبيل و راح
.........
حاطة يدها على راسها و قاعدة .... قلبها من صباح و هو يوجع فيها حاسة حاجة ماشي مليحة راح تصرا .... و فوق هذا كامل سيف لي مراهوش حاب يهدر معاها ممبا ...... استغفرت و ناضت وقت سمعت الخبيط فالباب
حبيبة : راني جيييت
هي غير فتحت الباب شهقت و رجعت للور .... حاسة بالدم جمد فعروقها ...... و ضربتهااااا بعيطة تسمعت فكامل الحومة
يتبع 💚💚 ......
أنت تقرأ
اليتيمة الهاربة { سيف و ملك } _ باللهجة الجزائرية 🇩🇿 _
Romanceحكايتنا تحكي على ملك لي هربت من دارهم باش تعيش حياة جديدة بعيدة على الضرب و الاهانة ...... كيفاش راح تكون هاد الحياة لي خيرتها ملك و واش راح يصرا فيها هذا كامل نعرفوه فالكرونيك
