ركبت فالكار نخمم فالبلاصة لي راح نروح ليها البلاصة لي لا علاقة بوين كنت عايشة ناس جدد حياة جديدة هادي هي الحياة لي خيرتها
ملك تحكي :
معرفتش كيفاش حتى لقيت روحي رفدت كابتي و هربت من الدار هربت و مخلية كلش مورايا وقتها مهمني والو .... خالد جا فطر و راح و جميلة ما رجعتش لحقت الستة تاع لعشية عرفتها بلي خالد كي يخرج من خدمته يجوز يجيبها يسلم على نسابو و يشيتلهم شوية و يجي ..... قعدت ندور و نخمم فالحاجة لي جاتني فراسي وقت شفت الكارني هداك لي حسيتو اشارة باش نكمل حياتي كيما الناس و بلا سابق انذار و كي لقيت الدار فارغ خرجت قبل ما يدخل خالد مكنت نشوف فوالو من غير حريتي و قرايتي ......... بكري وقت كان عندي واحد الخمس سنين بابا جاب وليد عمو ابراهيم و مرتو و بنتهم يقعدو عندنا .... وقتها هدا عمو براهيم صراو مشاكل كبااار بين مرتو و دارهم فخرج و بابا و مالغري الضيق و الفقر لي كنا فيه جابهم عندنا قعدو قريب عام منبعد راحو سمعت بلي واحد من فاميلتهم راح يعاونهم المهم خرجو من الدوار و من وقتها مزدتش تلاقيتهم حتى نهار موت بابا كانت جات مرت عمو ابراهيم يعني شفتها بصح مهدرتش معاها وقتها كنت فحالة غير ربي لي عالم بيها ....... معلباليش اذا راح ندير مليح كي نروح لدار عمو ابراهيم بصح على الاقل نسقم اموري نلقى خدمة نعرف الولاية هادي و نرجع نتكل على روحي ..... علبالي بلي خويا يكون مقلب الحالة عليا و لوكان يلقاني يقتلني بصح مهمنيش ياك دايمن يقولولي متهورة و متخافيش راني تهورت اليوم بصح لي غاضتني خواتاتي لي مقدرتش نشوفهم و علبالي راح يهبلو كي يعرفو بصح الله غالب مريم بدارها و رتيل خوالي رافدينها و انا لي قعدت نتحرق فالدار هديك ..... مرات لازم حنا لي لازم نبدلو من حياتنا و منقعدوش واقفين نستناو فالمعجزات يصراو ..... و مرانيش نادمة على القرار لي ديتو بارسكو انا مقعدتليش بلاصة فهداك الدار و خويا كيما بيتني ليلة برا الدار غدوة يرميني برا و ميشوفش فيا اذا يماه و باباه مكانش يحن عليهم راح نستناه يخمم عليا .....
..........
حبست الطونوبيل قدام الدار هبط و هبط معاه الساشيات و راح لدار خالتو لي كانت لاسقة مع دارهم طبطب شوية و يفتحولو
خليني نعرفكم بعائلة خالتو سعاد
سعاد هي خالة سيف عندها 45 سنة مراة قدما نوصفلكم شحال نية و عاقلة و حنينة منوفيش بحقها و عندها زوج اولاد
اسراء فنفس عمر الما و يقراو كيف كيف يعني نفس العام
و ريان لي عندو 14 سنة
و هادي هي خالتو لي راجلها مات مع بابات سيف ( عبد النور ) و من وقتها و هوما مع بعضهم بارسكو ترباو اصلا مع بعضهم
دخلها حطلها القضيان و فرفش على شعر ريان لي كان فتحلو شوية و خرجت سعاد من الكوزينة
سعاد : اوووه مرحبا بالغالي
أنت تقرأ
اليتيمة الهاربة { سيف و ملك } _ باللهجة الجزائرية 🇩🇿 _
Romanceحكايتنا تحكي على ملك لي هربت من دارهم باش تعيش حياة جديدة بعيدة على الضرب و الاهانة ...... كيفاش راح تكون هاد الحياة لي خيرتها ملك و واش راح يصرا فيها هذا كامل نعرفوه فالكرونيك
