مروان : جبتلك معايا الفطور علبالي بلي تكون مزال ما فطرت
سيف : هاك خرجت تفلح
ضحك و فتحو الساشي جابدين منهم السندويش ..... بلع لي ففمو و قال
مروان : موليتش عند ليلى
دارلو براسو لالا و كمل ياكل
مروان : تاخد رايي ... ولي عندها و سيي اهدر معاها
سيف : هدرنا بزاف مروان و باينة بلي راهي حابة نحبسو و مولاش يهمني اذا شافت من جهة واحد اخرى ولا لالا
مروان : على هاديك مزالك لابس البراسلي تاعها .... سيف مراك خاسر والو ارجع عندها و سمعلها
سيف : لي سمعتو المرة لي فاتت يكفيني ؛ ديجا انا سوق النساء هذا جبدت روحي عليه
مروان : هههه مالا معول تقعد حياتك كامل سيليباتار
سيف : ان شاء الله
مروان : سيف الخلاط يحبس التخلاط مشكيتش
ضحكو و كملو ياكلوا
مع العشية :
في دار سعاد لي كملو العشاء
ملك : طاطا اذا كملتو نرفد الطابلة
سعاد : ايه اسراء نوضي اغسلي و هي تفرز
اسراء : ماما راني عيانة
ناضت و طلعت لشمبرتها و سعاد لي معجبهاش الحال
ريان : خلاص دوك انا نعاون ملك ياك ملك
تبسمتلو ملك و ناضو رفدوا كيف كيف و تعاونوا حتى فرزوا كامل الكوزينة ؛ منبعد ملك طلعت للشمبرة لقات اسراء طل من البالكون حتى سمعت صوت تليفونها خرجت عندها
ملك : اسراء تليفونك راه يصوني
اسراء : خليه تكون صحبتي
هبطت راسها تشوف وين راهي تخزر لقاتو سيف هابط من الطونوبيل
ملك : هذا ماشي وليد خالتك
اسراء : امممم سيف
تبسمت اسراء و هي تخزر فيه ؛ ملك لي شافت فيه و هي تتبسم منبعد خزرت فاسراء لي لقاتها غايسة فيه فهمت بلي طايحة فيه و شكون ميقدرش يفهمها و هي كل ما تشوفو ذوب فبلاصتها ؛ دخلت ملك مخليتها رفدت ساكها من البونك حتى يطيحو منو دراهم بحكم كان مفتوح
ملك : منين هادو
رفدتهم تجري خافت يشوفوهم يقولوا سرقت ولا حتى تلقى ورقة معاهم
ملك : واش هذا تاني
فتحتها و هي تقرا لي مكتوب فيها .... " هادو باش تفطري "
ملك : يعني واحد من الحانوت حطهم سوور ... بصح شكون
زربت دخلتهم وقت حست باسراء داخلة
........
و هكذا جازوا اليامات و جاز شهر ؛ شهر روتيني ملك مع خدمتها بدات تتاقلم و سيف دايمن مع خدمته و فليل يرجع للدار و اليوم .... اليوم العيد ناضت ملك صباح بكري مع الفجر صلات لبست جبة و دارت لشعرها ضفيرة ..... خرجت طل من التاقة تلقى الرجال رايحين لصلاة العيد و معاهم دراري صغار تبسمت و هي تشوف فالحومة لي والفتها و حبتها بزاف ..... تفكرت العياد لي كانت جوزهم مع دارهم توحشتهم و توحشت لمتهم قسرتهم و ضحكتهم .... و دوكا قعدولها غير الذكريات لي تتفكرهم وقت تتوحشهم تنهدت و دخلت للداخل لقات اسراء جاية تعيطلها هبطوا لتحت شربوا قهوتهم و راحو لدار حبيبة
الما : خالتو صباح الخير جوزوا جوزوا راكم طولتو
سعاد : راكي تعرفي ريان يسهر للصباح ماجيت نوضتو غير بسيف
ضحكت الما و فرفشتلو شعرو
دخلوا للصالون وين كانت حبيبة قاعدة سلموا على بعضهم و قعدوا
حبيبة : و نتا ريان وعلاش مرحتش تصلي فالجامع
ريان : منضتش ممبا خالتي و زيد راني مدوخ كامل
حبيبة : بووه على الجيل تاع دوكا
سعاد : شفتي
حبيبة : اليوم البنات يفرحونا ان شاء الله انا و سعاد نعاونوكم شوية و الباقي عليكم
اسراء : خالتو متهدريش هكا تعرفينا نعيفو نمسو
الما : ايه غير متتكلوش
حبيبة : مكسرات اليدين كيفاش راح ديرو الدار نتوما
سعاد : الماكلة تعرفوا تاكلوا و الخدمة لالا
حبيبة : اممم و نتي ملك موالفة ترمي يدك ولا والو
ملك : ايه مور ما ماتت ماما ربي يرحمها ولينا حنا البنات لي نخدمو كلش سما تعلمت
حبيبة : اممم ربي يرحمها .... سعاد ارواحي نجبدو المواس نوجدوهم قريب يخرجوا من الجامع
سعاد : ايه
ناضو و راحو للكوزينة منبعد حبيبة دارت لختها
حبيبة : سعاد هادي ملك محوسوا عليها دارهم ما والو العيد يا لعيد و هي هاربة منهم
سعاد : حبييبة متخلينيش نندم لي حكيتلك
حبيبة : مفهمتش كيفاش راكي مقعدتها عندك بلاك راهي تكذب بلاك كشما دارت فضيحة و هربت و نتي مخبيتيها عندك
سعاد : و حبيتيني نخلي طفلة وحدها هنا مسكينة
حبيبة : لوكان جاو كامل الناس كيما نتي خلات
سعاد : المهم نتي مراكيش كيما انا
حبيبة : متزعفيش مني سعاد راني نهدر فصلاحك يعني سعاد لوقتاش راح تقعدي رافدتها نتي روحك مراكيش كافيتها
سعاد : حبيبة طفلة راهي تخدم و جيب مصروفها متخافيش مرانيش نمدلها من دراهم وليدك و اذا على الماكلة انا طبسي هداك ما دا ما جاب
حبيبة : سعاد انا مقصدتش على دراهم يعني مفهمتش كيفاش فهمتيها
سعاد : انا فهمت لي كان لازم نفهمو
خرجت سعاد و حبيبة خبطت فمها
حبيبة : عييت نقولك شدي هداك لسان والو
ناضت وقت سمعت الباب كان سفيان و سيف جاو عيدو على بعضهم و خرجوا لبرا بارسكو بداو الجيران يذبحوا
أنت تقرأ
اليتيمة الهاربة { سيف و ملك } _ باللهجة الجزائرية 🇩🇿 _
Romanceحكايتنا تحكي على ملك لي هربت من دارهم باش تعيش حياة جديدة بعيدة على الضرب و الاهانة ...... كيفاش راح تكون هاد الحياة لي خيرتها ملك و واش راح يصرا فيها هذا كامل نعرفوه فالكرونيك
