مهووس ميساء ( موقفة)

part 1

غادا كتجري كيف كل صباح و لي داز من حداها كتسلم عليه و ضحك معاه من طبعها ضريفة و روحها زوينة صغير و كبير كيبغيها بطيبوبتها و برائتها المفرطة لي كتخليها دخل لقلب بسرعة.
كتجري و لي داز من حداها كتسلم عليه
..:عمي حميد لباس عليك
العم حميد: (بإبتسامة واضحة) لباس ابنتي حمدالله
..:با سعيد خلي ليا شي خبزا مع 12 راه انتغدا عندك و كثر لحرور
سعيد:بشوية عليك ا ميساء دبا طيحي ( تنهد و ابتسامة على فمو و قال ف  خاطروا) الله يحجبها هاد البنت هي نوارة ديال درب
نخليو ميساء تجري متوجهة لمكان لي غادا ليه و اجي نعرفكم على بطلتنا سميتها ميساء المالكي بنت ضريفة و فنفس الوقت شخصيتها قوية و لعوبة و بريئة كلشي مخلط فيها ههه اما على شكلها ف هي زوينة مشاء الله عينين كبار خضرين و مشفرين شعر زعر واصل حتال مؤخرتها نيف صغيور و فم غوز لاطاي ديالها زوينة واخا قصيورة و قزمية .
بقات كتجري حتا وصلات قدام باب ليسي و بدات كدق و تخبط
ميساء:(بملامح منزعجة) عزيز حل الباب حل و حل المسخوط راه عندي فرض راه الا سقط غي بمسبتك
حارس المدرسة حل الباب و على ملامحوا العصبية: مالنا شكاين
ميساء دارت يديها على نصها: بغيت شي سبيسيال بيان كلاصي هاااء وراه باينة بغيت ندخل
عزيز: بقاي تجي فالوقت و ادخلي فحالك فحال تلاميذ لاخرين اما دبا ( لاسق يديه مع بعضياتهم) الباب تسد
ميساء بتاسمات بشر و قربات منو : عويزيز قالو ليا راك بالليل كتكون عندك القضية زاهية ياخويا مع مرت العسكري غي راجلها كيمشي من ليمن كضور ليها من ليسر (شافت ف ضفرانها ب عجرفة) دبا شبانلك لا عرف مصطفى المدير و العسكري بالبلان منتا بخدمة منتا بعضامك صحاح
عزيز بدا كيعرق و كينشف و خاف لا يكون سمعها شي واحد: دخلي دخلي يا مجبد لبلا الله يعفوا عليا من هاد المدرسة و نتفك من كمارتك يخخخ
ميساء خرجات فيه عينيها و دوات بطريقة مشرملة : تشا ريح اعزيز دبا هاد زين كامل و كمارة عوجة الله يسمح ليك (دخلات و هي كتدوي) ولكن نعدرك نتا داير هادوك نضاضر قاع الكاس مكتعرف من الدرا لمن الخرا
عزيز حيد صباطو و شير عليها جاب الله هربات: سيري بغيت لك موصيبة يا الموصيبة
مشات كتجري ميساء و هي كتفكر كيفاش ادير تفك من داك الأستاذ المعقد ديال الماط
ميساء مخصرة ملامحها : صداع اخر مع داك القواد
بقات غادا و كتنكر حتا وصلات و دقات فالباب جوج دقات خفاف حتى تحل الباب و خرج منو راجل غليض كرشو سابقاه و قرع طلعها و هبطها و حقق ف لبسها كانت لابسة جينز مقطع من ركابي بوي فراند ولكن هي جاها نيشاء حيت مهورة و لابسة قبية كحلة و كاسكيط كحلة و جوردن ف رجليها.
ميساء بإبتسامة بريئة: صباح الخير استادي
استاذ قلب عينيه: اشمن صباح بقا راه 11 هادي كون غا بقيتي حتا تغداي لاش جايا محنة
ميساء: استاذ راه فكرت نتغدا عاد نجي فالعشية ولكن قلت لا خصني ضروري نشوفك ا استاذ ولا ايدوز عندي نهار خاري (استاذ خنزر فيها و هي تحس على راسها) بغيت نقول خيب سمحلينا ا استاذ لسان مفيه عضم
استاذ: راه لعضام هما لركبتي فيا (قوس حجبانوا) سيري جيبي ورقة الدخول ولا مكين دخول
ميساء حيدات كاسكيط و حركات راسها حتا تطلق شعرها رطب و طاح ليها على عينيها عطاها جاذبية خاصة و دوات بجدية: استاذ راك عارف علاقتي مع الحراسة و ايعيطوا على ماما و ماما مبغيتش نزيدها مشاكيلي كنواعدك اخير مرة نجي معطلة ( رمشات ب عينيها محاولة منها تحبس دموعها)
استاذ لمس الجدية فكلامها حنحن و حل ليها طريق تدخل و نطق: اخير مرا سمعتي راه غير نقاطك كيشفعوا ليك اما والله ما تعتبيها.
بتسمات بإمتنان : شكرا ا استاذ
دخلات و الأعين كلها تحولات ليها و خصوصا اعين الشباب لي غياكلوها و هي ممسوقاش كتمشى بالثقة و ثبات تمشات حتى لخر ديال صف و كلسات بوحدها فور مكلسات بدات كتشارك واخا مشاغبة ولكن قراية و ذكية و هدشي لي كيشفع ليها مع الأساتذة صونات ساعة دليل على انتهاء الحصة الصباحية خرجات من المدرسة و دارت كاسكيط ديالها كتمشا ب ثبات و بالثقة كبيرة غادة بوحدها و لي داز من حداها كيلوح ليها الهدرة و هيا دايرة سماعات ف ودنيها ممسوقة لحد تمشات حتا وصلات لدربهم و مشات عند با سعيد تغدا عندوا بحكم ماماها خدامة وصلات عندوا و بتسمات بطريقة لعوبة: با سعيد اوا تهليتي ليا ف لخبزة ديالي
با سعيد راجل كبير و ضاهر عليه الوقار و الطيبوبة كيبيع سوندويتشات فراس الدرب و كيترزق الله : اييه على شحال عندنا من ميساء غير وحيدة
ميساء ضحكات حتى بانوا غمازاتها : الله يطول لينا فعمرك
با سعيد : امين انوارة ديالي
خدات الخبزة و تمشات حتى لدارهم في إنتضار العشية باش تمشي تقرا،وصلات و حلات الباب و دخلات باش تبان دار صغيرة متكونة من صالون تقليدي و مراح صغير و كوزينة بسيطة و جوج بيوت مقابلين مع بعضياتهم لي توجهات ميساء لواحد فيهم و فتحاتوا كان بيت صغير ولكن زوين و منضم كان فلون الوردي و البيض كيتوسطوا سرير ديال شخص واحد محطوطين فوقوا نونوسات و باربيات فحال دراري صغار و كزافوز فيه مراية و مستلزمات لي كتحتاج و ماريو و شي تخربيق اخر.
حلات شكارتها و جبدات منها ديك الخبزة و توجهات الكوزينة خدات من تلاجة مناضة و كلسات كتاكل حتا ضربات 1:30 عاد ناضت كتجر فرجليها باش تمشي تبدل تمشي تقرا لبسات دجين كحل طالع على الكرش و لاسق مع طوب بيض قصير و سبرديلة بيضة و كويرة كحلة قصيرة و خلات شعرها مطلوق و دارت ضفيرات صغار و كتفات ف كلوس لفمها فقط و بدلات ادواتها و كلمسة اخيرة رشات عطرها الخفيف ولكن زوين هي من ديما مهلية فراسها و ديما أنيقة و كتبغي تكون ف أبهى حلة
هزات شكارتها و سدات الباب ب ساروت و بدات كتمشى بشوية عليها حيت كاعما معطلة و لي داز كضحك معاه و تبتاسم ليه فوجهوا حتا شافت واحد البنيتة صغيرة فنة و واقفة حداها ماماها ميساء ضحكات حتى تغمضوا عينيها و مشات كتجري لعندها و نزلات على ركابيها
ميساء بالضحيكة و صوت ديال الاطفال: سوجود حبيبة لاباس عليك
سوجود شافت ميساء بدات كترطى باش تهزها و كتضحك : زيني زيني (زعما هزيني)
ميساء هزات سوجود و بدات كتبوس فيها و دغدغها: يختي على زيين لي عطاني ربي ياهاد البنت مالك على هاد الحلاوة راك غطلعي ليا السكار
سوجود تاهيا باستها و قالت بصوت صغيور و معكل و دوات ب صوت طفولي: علاس مكتزيس تسوفيني طاطا ليساء (زعما ميساء)
ميساء شدات على قلبها كتمثل: ايييي قلبي الله يلكيها ليك ا ميساء علاش كعما كتجي تشوفي هاد الحلاوة (دارت راسها كتفكر)  اممممم شنو خاصنا باش نتصالحوا مع هاد الفنون اممم لقيتها ( جبدات بكية د شكلاط من شكارتها حتى عينين سوجود لمعوا عينيها من الفرحة ) هاكي ازين ديال العالام انا خارجة مع 6 نخرج و نجي نلعب معاك (هزات راسها ف مامات سوجود لقاتها مبتاسمة بحب ) ياك اخالتي نادية
نادية: اه احبيبة وقتما بغيتي اجي عندها راك عزيزة عليها و كتفرحيها
ضحكات ميساء و باست سوجود و نادية و مشات بالزربة حيت تعطلات خلات نادية كتضحك من موراها

يتبع.... أرائكم كبيدات