بقات واقفة مخرجة عينيها من كلامو و نطقات بهمس: افف شحال قلبو قاصح
و مشات خارجة الجردة ترتاح شوية خرجات حتا الهواء ضرب ليها فوجها خلاها تغمض عويناتها و تمشات ببطء حتى لواحد الأرجوحة كاينة تما و كلسات فيها كتفكر ف غالي و شنو هاد الشخصية المتقلبة لي عندو و علاش هو هاكا و علاش قتل سهام و بزاف ديال التساؤلات فراسها كيخليوها تبقا تائهة، بقات جالسة لمدة حتى شافت الطرونسبور ديال الروض ديال تواب وقف و هبطات تواب كتضور ف عويناتها و كيف لمحات ميساء مشات كتجري لعندها.
تواب كتجري و كتضحك و نطقات بصوت عالي: مااامي
ميساء توجهات لعندها ببتسامة و هزاتها بزز حيت كتحس بالألام فجسمها كولو ولكن حولات تناساه و نطقات بحنان: حبيبة داز عندك نهار مزيان
تواب هزات راسها بالإيجاب: اه زوين بزاف ونتي
ميساء بتاسمات ليها فوق خاطرها: حتى انا احبيبة
تواب عقدات حجبانها و قلبات شفايفها بزعل و هي كتضور عينيها على وجه ميساء: ماما ميساء مالكي فوجهك
ميساء كتقلب على شي كدبة: والو اماما غير تضربت مع الباب وصافي يلاه احبيبة ندخلوا باش نبدلك حوايجك و نصايب ليك شي حاجة زويينة فحالك تاكليها
دخلوا الدار و ميساء طلعات تواب لبيتها دوشات ليها و بدلات ليها لبساتها بيجامة ديال الدار مريحة و هزاتها هابطة بيها الكوزينة.
ميساء و هي كتمشى و كتضحك مع تواب: امم شنو بغات الحبيبة دماماها تاكل
تواب حطات صبعها على فمها زعما كتفكر: بغيت كيك ديال الشكلاط
ميساء بتاسمات: ولكن هاد المرة انصيبوه انا وياك اتعاونيني ياك
تواب صفقات بيديها بفرح: اه انعاونك
و دخلوا الكوزينة جبدات ميساء داكشي لي غادي تحتاج و دارت كرسي لتواب باش توصل البوطاجي و بداو كيصيبو ديك الكيكة لي ميساء عطات لتواب هي تصايبها و تواب كانت فرحانة بزاف حيت تجربة جديدة عليها و فعلا تواب ولات فرحانة بزاف مع ميساء حيت واخا تزادت و ملعقة من ذهب ففمها و ضايرين بيها المربيات ولكن عمرها حسات بهاد الإهتمام و الحب لي كتقدموا ليها ميساء و كتحس بيه من القلب.
سالاو ديك الكيكة و تواب كانت اطير بالفرحة و ميساء كتحفزها و فكل مرحلة كتقوليها برافو عليك و كتشجعها، دخلات ميساء الكيك الفران و كلسات تواب حداها كتلعب و بدات كتطيب فالعشا كيف سالات كلسات كتسناه يطيب و الجو لا يخلو من الضحك و النشاط بينها و بين تواب.
طاب العشا وكلات تواب و هي فطريقها باش تنعسها نطقات تواب بصوت تعبان: انا مبغيتش نعس حتى يجي بابا
ميساء هزاها بين يديها: لا خاصك تنعسي و ملي ايجي باباك انفيقك صافي
تواب عينيها كيتغمضو: لا بغيت نبقا
ميساء: الى جا باباك و لقاك باقا فايقة غادي يخاصم علينا بجوج
فهاد الأثناء كانت تواب غلب عليه النعاس فوق كتف ميساء و دخلاتها لبيتها حطاتها و باست على راسها و غطاتها و خرجات هابطة لتحت كتسنى غالي يدخل و هي الأخرة اتموت بالنعاس ولكن كتقاوم و مدازش بزاف حتى شافتو داخل كيتمشى بخطى تابتة و كيف شافها هكاك توجه لعندها و باس ليها راسها و نطق بصوت مبحوح:فين تواب
ميساء حكات عينيها محاولة منها تطرد النعاس: نعستها بزز حيت بقات كتسول فيك بزاف المرة جايا جي بكري متخليش بنتك كتقاوم النعاس باش تشوفك
غالي هز فيها حجبانوا: باراكا من الهضرة و تبعيني لفوق باغي نهدر معاك
طلع هو و تبعاتوا ميساء كتجر فرجليها و كيف دخلات البيت لقاتوا كالس فوق الفوطوي و حاط رجل فوق رجل و كيتسناها كيف دخلات شير ليها بيديه زعما كلسي توجهات الفوطوي و كلسات مقابلة معاه وهي متسائلة فاش باغي يدوي معاها.
غالي توجه الخزنة و ميساء متبعة ليه العين و جبد واحد الملف و قرب لعندها و عطاه ليها.
ميساء علامات الدهشة على وجها و نطقات بتساؤل: شنو هذا
غالي طرطق عنقو و رجع لبلاصتوا: حليه و شوفي
شداتوا ميساء و حلاتوا و بدات كتقرى فيه و مع كل كلمة كيخرجوا عينيها بصدمة، هزات فيه عينيها و نطقات بتلعثم: ش شنو هادشي
غالي ببرود: وقعي
ميساء وقفات وهي معصبة و نطقات بصوت عالي نوعا ما: واش نتا مريض ولا شنو انا باقا صغيرة و ماباغاش نتزوج بهاد الطريقة
غالي وقف و خنزر فيها حتى خلعها بنضراتوا و بدات كترجع اللور و هو قدامها: اول حاجة صوتك ميعلاش عليا و ثاني حاجة اتوقعي و بزز منك
ميساء عينيها عمروا دموع: لا انا ماغاديش نوقع واخا تقتلني فهاد البيت كنفضل نخرج جثة من هنا ولا نتزوج بهاد الطريقة
غالي دور وجهو جنب و ضحك ضحكة استهزاء: اذن معزيزاش عليك ماماك
ميساء وجها ولا حمر و نطقات بتساؤل: م مفهمتش
غالي زاد قرب لوجها و نطق بفحيح: يا غادي توقعي على هاد الوراق و ماماك غتكمل العلاج ديالها كيفما خاصو يكون يا غادي ترفضي و غادي يلوحوها الزنقة حتى تموت تما
ميساء نزلات دمعة من عينيها و نطقات بهمس: ميمكنش تكون خايب حتال هاد الدرجة
غالي بنفس الهمس ديالها: كثر ما تخايلي
ميساء حركات راسها بخيبة امل: كنت غالطة فيك بزاااف انا مقدراش نصدق هادشي لي كدير فيا (قربات حتال لعند وجهو و نطقات بفحيح) عمرني انسى ليك هادشي و الأيام بناتنا
و توجهات لديك الطابلة و وقعات على دوك الوراق و خرجات كتجري من البيت متوجهة لبيتها كيف دخلات سدات الباب و تكات عليه و بدات كتبكي بحرقة و كتنطق بهمس:علاش قلبك قاصح حتال هاد الدرجة
و هزات واحد الڤاز تما و فزعاتوا حتى تضرب مع الحيط و تهرس و غوتات بألم حتى صوتها تردد فأرجاء القصر: اااانااااااا كنكرههههك هئ هئ كنكرهك الله ياخد فيك الحق رونتي ليا حياتي هئ هئ...
ما اصعب ان تعيش في حيرة من شخص يوما تراه يحبك و يوم لا تدري من يكون..!
يتبع..💙
VOUS LISEZ
مهووس ميساء ( موقفة)
Action🛑🛑🛑🛑🛑🛑🛑🛑🛑🛑🛑🛑🛑🛑 ليوم جبت ليكم رواية نارية من اول كتاباتي 🔥🔥🔥 رواية مختلفة على باقي الروايات قصة فريدة من نوعها خفيفة على القلب و اهم حاجة داكشي لي كيعجبكم 😉😉😉😉😉.... البطل....شخصية باردة..مختلة..مهووس بالبطلة..متعجرف..قوي......وك...
