مهووس ميساء ( موقفة)

part 34

دخلو و ميساء كضور عينيها بتوثر على القصر لي كان لا يَقُل فخامة على القصر ديال غالي، ميساء فوسط تبركيك ديالها قاطعها صوت سمية: تفضلي ابنتي دخلي الصالون قبل ميتحط العشا
ميساء هزات فيها عينيها و نطقات ببراءة: تبغي نعاونك فشي حاجة اخالتي
سمية بتاسمات بحب: لا ابنتي غي دخلي رتاحي ربي خليك
تمشات سمية و ميساء موراها حتى دخلو الصالون كيف دخلو لمحات غالي كالس بثقة كيتناقش مع المختار على شي أمور ديال الخدمة و كيف لمحها دخلات دار ليها اشارة بعينيه باش تكلس حداه و داكشي لي كان نيت مشات كلسات حداه و تواب لي كانت حدا المختار كيف شافت ميساء مشات تمخشات فيها.
سمية مشات طلات على الخدمات و فين وصلو فالعشا و رجعات لصالون كلسات حدا ميساء من الجيهة لخرى.
سمية: مرحبا بيك ابنتي دار دارك
ميساء بتاسمات بإمتنان: ربي يخليك اخالتي
سمية: شحال فعمرك
ميساء بعفوية: 16العام
سمية تلاشات ضحكتها و نطقات بحزن: كون كانت بنتي معايا كانت اتكون قدك فالعمر
عم الصمت و غالي خنزر ف سمية بطريقة خلاتها توثر و نطقات بتلعثم: احم احم نوضو تفضلو العشا وجد
ناضو كلسو ف لاصال أمونجي و الخدامات غاديين جايين كيحطو فالعشا، كلسات ميساء حدا غالي و تواب حداها من الجيهة الأخرى و المختار مترأس الطابلة و حداه سمية.
المختار: فين هو داك ولدك
سمية: ايكون غي ف بيتوا
المختار تنهد: تربيتك العوجة الولد كنشوفوه من الشهر لشهر
سمية خرجات فيه عينيها زعما سكت: المختار ويلي ماشي وقت هاد الهدرة دابا (و دورات عينيها تجاه ميساء لي كانت كتوكل تواب) بنتي شفتك مكليتيش
ميساء بتاسمات فوجها: هانا اخالتي غناكل
اما غالي كان كينقب من طبسيلو بلباقة و مرة مرة كيشوف ف ميساء لي كتوكل تواب و شادة ليها الخاطر.
ميساء بإلحاح: زيديك احبيبة غير هادي
تواب: لا مبغيتش بغيت لاسوب
يلاه بغات تنوض و هي توقفها سمية: غير كولي ابنتي انا نكب ليها
كبات ليها سمية لاسوب و عطاتها ليها و يلاه بغات ميساء تبدا توكلها حتى نطقات ببرائة: مامي خليني انا ناكل بوحدي
خلاتها ميساء على خاطرها و بدات كتاكل حتى هي حتى سمعات شهقة.
تواب بألم: ايييييي
ميساء ضورات عينيها تجاها بخوف: مالكي احبيبة
غالي ضور عينيه لعندها و هو كيشوف فيهم بملامح جامدة (راه مريض هاد السيد معندوش الكبدة على بنتو 🙂)
سمية: أ رسول الله مالها
تواب كتشهق: هئ هئ كتحرقني بزااف
المختار: ديرو ليها الما بارد دغيا
ميساء وقفات و هزاتها بسرعة و هي الخوف على ملامحها: خالتي فين الحمام عافاك
سمية شافت واحد الخدامة دايزة: مروة مروة اجي ابنتي دي ميساء الحمام
مشات ميساء مع الخدامة و كلسات سمية و تنهدات و نطقات بدون متحس: كون كانت مامات تواب باقا عايشة مكانتش غتخاف عليها فحال هاد البنت ( و ضورات عينيها تجاه غالي لي كان غير مبالي) غالي فين تعرفتي اولدي على هاد البنات ملاك ماشاءالله و زايدون هي صغيرة عليك على مضهرلي
غالي هز فيها عينيه و ميل راسو: سمية سولتي بزاف ليوم لا
المختار بغا يلطف الجو: فيناهو طه
باقي مكملها حتى سمعو صوتو نازل مع الدروج كيتمختر لابس كيطمة كحلة و داير يديه فجيبو: هاهو جا
سمية هزات فيه عينيها: فين تعطلتي نتا
طه: منعسوش الوليدة (لمح غالي و نطق بمرح) با غالي نورتي توحشناك
غالي هز فيه عينيه و عاود نزلهم، طه جر الكرسي لي فجنب ديال غالي (الكرسي لي كانت كالسة فيه ميساء) يلاه بغا يكلس و هو يوقفو صوت غالي الخشن المبحوح: متكلسش تما
و جر ليه واحد الكرسي حداه برجليه باش يكلس فيه، سمية بإستغراب: علاش اولدي
غالي هز فيها عينيه و نطق بثقة: كانت كالسة فيه ميساء
شهقو فور مكمل جملتوا واش لهاد الدراجة كيغير عليها لدرجة مبغاش راجل يكلس فوق كرسي باقي فيه الدفئ ديالها.
مدازش بزاف حتى لمحو ميساء جايا شادة لتواب فيديها.
سمية: ياك ماشي شي حاجة خايبة ابنتي
ميساء مبتاسمة: لا اخالتي غير حرقة خفيفة (و نزلات عينيها لتواب) ياك احبيبة
حركات تواب راسها بالإيجاب وهي مبتاسمة، كيف ضورات عينيها لمحات طه و مشات كتجري عندو: عموووو طه توحشتك بزاااااف
طه هزها و كلسها فوق رجليه: كون تشوفي انا ازرقة العينين غبرتي علينا هاد باك مبقاش كيجيبك عندنا
تواب حركات راسها بالنفي: لا انا دابا انبقى نجي ديما مع ماما ميساء
طه هز عينيه نحو ميساء و تلاشات ابتسامتو و هو كيحقق فيها حس برابط قوي كيجمعهم و ميساء كذلك بقات ساهية فيه و فعينيه و كولشي مفيقهم غير غالي لي قلب الكرسي لي كان كالس عليه و نطق بعصبية و عينيه حمرين و عروق يديه برزو: يلاه نمشيو
المختار: بقاو اولدي مازال وو..
قاطعو قبل ميكمل: مبغيت نسمع والو (شاف فميساء و دار ليها بعينيه زعما يلاه)
تواب بزعل: بابا انا بغيت نبقا مزال
غالي شاف فيها بحدة و دار يديه على فمو: شووووت
ميساء مشات كطير جرات تواب من يديها و مشات سلمات على سمية و مشات كتجري من موراه تابعاه و هي طايح ليها الما فركابي....

يتبع..
البنات دعواتكم راني مريضة والله ❤️