مهووس ميساء ( موقفة)

part 25

فاقت فالصباح وهي كتحس براسها مقادراش تحرك كيف دورات وجها جات فيه هو لي كان ناعس و معنقها بقات كتشوف فيه شحال وهي كتأملوا و كيفاش عاقد حجبانوا حتى فنعاسو و فمو حميمر و شفاروا طوال و حجبانوا مقادين بقات كتشوف فيه شحااال حتى حسات على راسها و حولات تفك منوا و بعد عدة محاولات تفكات و خرجات من البيت على طراف صباعها و هبطات لبيتها دوشات و خرجات دهنات لحمها بكريمات و رشات عطور ديال الجسم كذلك و لبسات بيجامة بياسة وحدة حد الفخاد جايا مزيرة عليها و بيضة وفيها الفريز، و مشطات شعرها و خلاتوا على راحتوا و خرجات من البيت متوجهة لغرفة تواب.
حلات الباب لقاتها باقا ناعسة و قربات لعندها و بدات كتبوس فيها و تهر فيها.
ميساء وهي كتضحك: اميرتي صغيورة باقا ناعسة اممم
تواب حلات عينيها و بدات كتضحك وهي كتحاول تحبس ميساء باش متبقاش تهرها: طاتي ميساء ههههه صافي ههههههه
ميساء هزاتها و هي متوجهة بيها الحمام: دابا اندوشو احسن دوش ياك
دخلاتها الدوش و دوشات ليها فجو لا يخلو من الضحك و المداعبة ديال ميساء، و خرجاتها من الحمام و هي ملوية عليها فوطة و هازاها فحال البيبي.
ميساء و هي كتقلب فالبيجامات فالخر جبدات ليها بيجامة بياسة وحدة فالون الوردي لبساتها ليها و مشطات ليها شعرها و خلاتوا ليها على راحتوا و رشات ليها ريحة خفيفة ديال الدراري الصغار و شداتها من يديها.
ميساء: دابا انهبطوا نصيبوا الفطور لباباك ياك
تواب حركات راسها بالإيجاب: اه اطاتي انا انعونك
ميساء جرات ليها حناكها: يخليلي زين لي غيعاوني
دخلوا الكوزينة و كيف المرة السابقة حطات تواب فوق البوطاجي و ميساء مشات كتقلب فالكوزينة فالخر قررات تصايب كيكة ديال الشكلاط و صالاد فخوي (البنات ديك الساعة كانت تقريبا السبعة ديال الصباح و غالي كيفيق حتال التمنية) بدات كتقاد فداكشي و بدات بكيكة هي لولة و دخلاتها الفران من بعد بدات كتقاد فسالاد فخوي و دارت فيها جميع الفواكه و شي فواكه كاعما عرفاتهم ولكن حتا هوما دارتهم، جبدات الكيكة من الفران و دارت فوق منها صلصة الشوكولا و قطعاتها و دارتها فالتلاجة و بدات كتقاد فالقهوة لغالي و من بعد الحليب ليها و لتواب ملي سالات حطات كولشي فلاصال مونجي و كان دكشي زوين بزاف و شكلوا كيشهي.
ميساء كتشوف فالطابلة و هي فخورة: كيف جاك هادشي
تواب ببتسامة بريئة و معجبة: زوين بزاف اطاتي ميساء
ميساء هزاتها و حطاتها فالكرسي: حبيبة انطلع نفيق باباك و نجي صافي
تواب هزات راسها بالإيجاب و ميساء طلعات كتجري لبيتوا حلات الباب و دخلات لقاتوا مكينش فبلاصتوا و سمعات الما فالحمام و كلسات فوق السرير كتسناه يخرج.
مدازش بزاف حتى خرج لاوي فوطة على خصروا الشي لي خلا ميساء خدودها يتوردوا و تحني راسها بخجل: احم جيت غير نقوليك هبط تفطر
غالي قرب منها و هو كيطلعها و ينزلها و كيشوف فديك البيجامة كيفاش جاتها و كيف وقف قدامها نطق بنبرة أمرة: هزي راسك
ميساء هزات فيها راسها ببطء وهي خدودها ايطرطقو هو ضحك على شكلها و باسها فخدها و توجه الدريسينك و كيف دخل تنفسات صعداء و خرجات كطير من البيت.
كيف هبطات لقات تواب كالسة و جامعة يديها لعندها كلسات حداها و هزاتها حاطاها فوق رجليها و كتضحك معاها شوية زارتها فنيفها ريحة روجولية كتحمق منين ضورات وجها لمصدرها لمحاتوا كيتمشى بمشيتوا المعهودة و هو لابس سروال جينز كحل مقطع من ركابي و قبية كحلة و سبرديلة بيضاء.
بقات كتشوف فيه حتى قرب لعندهم و قرب باس راسها و راس تواب، تواب كيف شافتوا بدات كتعلق باغا تمشي لعندوا حتى هزها و هي حطات راسها على كتافوا كتبغيه بزاااف واخا عمرها عاشت معاه ولكن كان ديما حنين عليها واخا كيعاملها بقسوة شي مرات ولكن تواب واخا بنت صغيرة ذكية بزاف و كتفهم كولشي.
غالي كيشوف فطابلة بحب و شاف فميساء بفخر: هادشي كيبان زوين
ميساء بتاسمات حتى بانوا غمزاتها: كلس تفطر
غالي حرك راسوا بالنفي: انا مكنفطرش كنشرب غير قهوة كحلة فالصبح
ميساء ميلات شفايفها بزعل: وغير هاد المرة ما فيها باس
غالي كلس كيدير ليها خاطرها و تواب رجعات عند ميساء كتوكلها و هو خدا ليه طرف صغير ديال الكيكة و كياكل فيه و مرة مرة ميساء كتسولو واش عجباتك واش القهوة زوينة و كتحاول تدير اي حاجة تعجبوا و تفرحوا و فعلا نجحات فهادشي حيت لأول مرة كيحس بطعم العائلي و الأسري و يحس شي واحد كيهتم بيه و كيدير شي حوايج على قبلو.
كيف سالا وقف و هو كينفض حوايجوا و كيف شافتوا ميساء وقف وقفات حتى هي و هي هازة تواب و تبعاتوا.
غالي شاف تجاه ميساء: مقارياش اليوم
ميساء حركات راسها بالنفي: لا عندي عطلة ديال سيمانة
غالي حرك راسو بالإيجاب و حل الباب حتى كتوقفوا تواب بصوتها الطفولي: بابا متعطلش عافاك
غالي ضار لعندها و هو مبتاسم و قبل راسها بحنان و حرك راسوا بالنفي و هز عينيه تجاه ميساء و جرها من مؤخرة راسها و قبلها قبلة سطحية و نطق بحدة: يلاه دخلي متبقايش ليا مسفحة هنايا ( عطاها بالضهر و نطق بنبرة تهديدية) و نلقاك حليتي الباب لشي حد و انا مكاينش انخلي دار عشتك
ميساء سدات الباب وهي مصدومة من كيفاش كيتقلب دغيا و جرات تواب و دخلوا لصالون كيتفرجوا فروسوم و خالقين جو زوين بيناتهم شوية نطقات تواب.
تواب بطفولة: طاتي ميساء واش نتي غتزوجي نتي و بابا
ميساء خرجات عينيها و نطقات بتلعثم: نتي منين جبتي هاد الهضرة
تواب ببرائة: حيت بابا عمروا عامل شي حد زوين و نتي كيعاملك زوين بزاف (شدات تواب فيدين ميساء و نطقات بترجي) عافاك اطاتي ميساء تزوجي ب بابا حتا انا بغيت تولي عندي ماما
ميساء بتاسمات ليها بحب و جراتها عنقاتها حاطة راسها على صدرها: حبيبة ديالي انا فجميع الأوقات ماماك و من دابا تقدري تعيطي عليا ماما
تواب هزات فيها عينيها و بتاسمات وهي عينيها كيلمعوا: واش بصح
ميساء: اه بصح
تواب ضحكات ببرائة و تمخشات فميساء و نطقات بحنان: انا كنبغيك بزاف
ميساء قبلات راسها و نطقات بحب: و انا كثر احبيبة ديالي...

يتبع...