مهووس ميساء ( موقفة)

part 92

كانت كالسة فالارض مكالية بضهرها على ناموسية رجليها البلقين حفيانين مسبوغين بالحمر و عينيها كينزلو منهم الدموع فحال الشتا وهي كتشوف فصورة ديال رضيع باينة عليه حديث الولادة، شهقات شهقة حارقة خارجة من اعماقها و نطقات بألم: فينك اولدي هئ هئ فينك

فلاش باك.....

كانت بنت فعمر زهور من العشرينات من عمرها لابسة كسيوة ديال الدار كحلة واصلة لسيقانها البيضين لي كانو مطيبزين، حاطة يديها على كريشتها المنفوخة وهي كتحس بوجيعات صغار كيجيوها ،فهاد الأثناء دخلات مرا كبيرة فالعمر لي كيف شافتها شادة على كرشها نطقات وهي عاقدة حجبانها بشر: مالك تاني

نرجس بألم: جاني الوجع اجدة

الجدة فاطنة نطقات مخيبة سيفتها: لا كانت شي عيطة عند العالي يهزك نتي و داك الحرامي

نرجس يلاه بغات تجاوبها وهي تغوت لربي لي خلقها ملي جاها وجع قوي مقدراتش تحملو و الما نازل مع فخادها: اييييييييييي غنموووووووووووت اسيييديييييييي ربيييييييي غنمووووووووووووت

فاطنة مشات كتجري شادة ليها فيديها: صبري و زيدي البيت متولديش ليا هنا

نرجس بدات كتمشى وهي رجليها فاشلين عليها كتحس بركابيها خاويين و الوجع غير مغادي و كيتزاد و شي حاجة قاصحة فالمهبل ديالها، بقات كتمشى بشوية وهي غير كتغوت بحر الألم حتى وصلاتها البيت لي كان فراشو بسيط متكون من حصاير فالارض و مانط و طابلة ديال الخشب صغيرة هادا هو حال بيوت البادية اغلبهم كيكونو بيوت بساط.

تحنات فاطنة كتقاد ليها المخدة و عوناتها حتى تكات و ناضت كتجري خارجة من البيت تسخن الما و تجيب فوطا و مانطا ، هزات داكشي ف بلاطو و رجعات بسرعة البيت لي فيه نرجس لي كانت عرقانة و وجها حمر غيطرطق و كلها كترعد بقوة الالم لي كتحس بيه.

حطات داكشي فوق ديك الطابلة ديال الخشب و حلات لنرجس رجليها محيدة ليها كيلوطها و طلات على مهبلها لي الفتحة ديالو وساعت مستعدة تخرج الجنين و نطقات: زحمي زحمي

نرجس بدات كتزحم وهي معرفاش و نطقات بصراخ مخلط مع البكاء: معرفتش كيفااااااش غنديييير

فاطنة بسخط: زحمي يا القحبة فاش كنتي دخليه كنتي عارفة ديك ساعة و دابا مبقيتيش عارفة زحمي زحمي نخرجو الحرامي

نرجس زادت فوتيرة البكا وهي كتحس بالألم متضاعف بدات كتزير على مهبلها و كتحس بشي حاجة كتخرج، نطقات فاطنة: زحمي زحمي زحمي راس بدا كيخرج

نرجس جمعات طاقتها كتنهج و زحمات زحمة وحدة و اخيرة قبل متفقد وعيها و تغمض عينيها من تعب، تسمع صراخ قوي فالغرفة دليل على خروج المولود، مسحات ليه فاطنة و نضفاتو قبل متلويه فمينطة وهو غير كيبكي طالق حلوقو، دوفرات نرجس برجليها و نطقات بنبرة ناقصة: فيقي رضعي البرهوش