حنحنات بحرج و بعدات وجها من بين يديه و وقفات وهي كتحك فيديها و نطقات بهدوء: سمحلي خاصني نمشي
غالي حرك راسو بالإيجاب و هو معجبوش الحال حيت كيحاول يتقرب منها و هي عاد مكتزيد تبعد عليه و هادشي بسبب انها باقا مولفاتوش.
قبل متحل الباب سمعات صوتو الشجي: غدا وجدي راسك انخرجوا
ميساء ضارت عندو و نطقات بصوت رقيق: واخا
وحلات الباب و خرجات هبطات فالمصعد حتى الطابق السفلي و توجهات الكوزينة عند ماماها.
خديجة وهي حجبانها معقودين: فين غبرتي نتي من صباح و انا كنقلب عليك
ميساء دوزات يديها على عنقها و نطقات بتلعثم: اا انا كنت فالجردة علاش فاش بغيتيني
خديجة طلقات ملامحها: والو غير شفتك غبرتي وكان
ميساء نطقات و هي متوجهة تجاه ابتسام لي كانت واقفة مع باقي الخادمات لي باقة متعرفات عليهم.
وقفات عليهم و حطات يديها على كتف ابتسام و نطقات بمزاح: حبي لاباس
ابتسام ضارت شافت فيها و باستها وهي مبتاسمة: لاباس ملي شفت هاد الزين ( و ضارت عند صحاباتها لي كانوا زوج بنات اخرين فنفس عمر ابتسام) البنات شتكم متعرفتوش على ميساء
البنت اللولة بضحكة بشوشة و ملامحها هادئة و شعرها احمر سابغاه: انا ماجدة
البنت الثانية حتا هي ضحكات ليها و هادي العكس كانوا ملامحها حادة ماشي فحال البنت لاخرة: و انا أية
ميساء ضحكات حتى تسدوا عويناتها و بانوا غمزاتها و نطقات: متشرفين انا ميساء
ماجدة و اية فدقة وحدة: الشرف لينا ازين
ابتسام وهي كتضحك و هضرات بمزاح: ضاع عمركم ملي متعرفتوش على هاد الفنة من اول نهار ياختي حلوة
ماجدة كتبتاسم فوجه ميساء: ياختي عندك الحق و ماشاءالله فنة ياك ا اية
اية حتي مبتاسمة: اه الله يحجبها
ميساء حنيكاتها توردوا من مدحهم و نطقات بصوت خجلان و هي كتفرك يديها: حتا نتوما فنات ماشاءالله عليكم
توجهات خديجة لعندهم وهي عاقدة حجبانها: ياختي الجماعة لي بقات ليكم( و خنزرات فميساء) هاديك سليعفانة خلي البنات يخدموا ماشي نتي معندك ما يدار تلهي بنادم على شغالو
ميساء خرجات عينيها و دارت راسها مصدومة : هاااااء ياك اخديجة ياك دبا وليت كنصدعكم سري سري انا لي كنجي نعطيكم طاقة إيجابية (قلبات عينيها) ولا نتوما سركم غير الطاقة السلبية
ابتسام: و مالك ياختي جمعتينا معاها حنا بعدا كتعطينا طاقة إجابية جيدة جدا
ميساء هزات راسها بفخر: اوا هكاك الله يجيب لي يقول الحق
خديجة دارت يديها على نصها و دوات بسخرية: اه شكرا بزاف الالة ميساء على الطاقة ديالك( علات صوتها و دوات بجدية) خرجي خرجي خلينا نقديو شغالنا قالاك طاقة إجابية
خرجات ميساء و هي كتنكر مشات لبيتها كلسات شوية حتى وصل وقت لعشا و خرجات تعشات و رجعات لبيتها و قضات روتينها الليلي و ستسلمات لنوم.
اصبحنا و اصبح الملك الله❤️
فاقت بطلتنا كتكسل دخلات لحمام دارت روتينها صباحي و خرجات من البيت توجهات الكوزينة و فطرات و قالت لماماها بلي خارجة ولكن فالأصل كانت خارجة مع غالي.
دخلات البيت و هي حايرة فشنو تلبس فالخر ختارت اونسومبل سروال باط ديليفون فالغوز بيبي كيجي مزير من الفوق و شوميز ديالو كتجي طويلة من لور و قصيرة من القدام وحتا هي فنفس اللون و لبسات فرجليها سبرديلة بيضة و فيها شوية ديال الغوز جاتها لبيسة فنة و مستورة و كلاس، مشطات شعرها و خلاتوا مطلوق على راحتوا و دارت مرطب لفمها فقط و هزات صاك صغيور كحل و كلمسة اخيرة رشات عطرها الجذاب، كانت اطلالتها انيقة و بانت بعقلها على عكس المعتاد حيت ممولفاش كتلبس هاكا.
خرجات و فطريقها طلاقات ابتسام كتمسح فالغبرة و غير شافتها حلات فمها بدهشة: ياختي ياختي على الزين جيتي فنة
ميساء بتاسمات بخجل و نطقات بهدوء: شكرا احبيبة ديالي
خرجات و لقاتوا واقف فنفس البلاصة لي كيوقف فيها وهاد المرة كانت سيارتوا رونج روڤر بيضاء و هو كان لابس تيشرت كحل و برز الوشامات لي فدراعوا و عنقوا و جينز رمادي و سبرديلة بيضة و داير نضارات شمسية.
و كيف خرجات دار ليها صكان بعينيه من راسها لرجليها حتى تأكد بلي كلشي مزيان عاد تبسم برضى واخا ماشي ثام حيت مبغاهاش طلق شعرها ولكن مبغاش يخنقها مدام هي معاه فدير لي بغات.
وصلات لسيارة و حلات الباب و طلعات و بتاسمات فوجهوا ابتسامة طفولية على غير المعتاد: صباح الخير
غالي ببتسامة صغيرة و نطق بصوت شجي: صباح النور
ميساء بتساؤل: فين غنمشيو
غالي ديمارا و نطق و هو عينيه على طريق: دابا تعرفي
بقا كيسوق المدة حتى وقف قدام قصر فااخر فحال القصر لي ساكن فيه هو وقف طوموبيل قدام الباب رئيسي، و فور منزل جات كتجري عندو بنية صغيرة كانت كتلعب فجردة و تلاحت عليه معنقاه.
البنيتة بطفولة: بااابااا
غالي هزها لعندوا وهو كيبوس فيها: الزين دباباها
تواب بهدرة معكلة: بابي توحستك بزاف علاس مبقيتيس كتزي تسوفني
غالي ضرب على نيفها: هاني جيت شفتك دابا
هز عينيه لقا المربية ديالها قدامو كتشوف فيه و دوات بلباقة: مرحبا بيك اسيدي
غالي حرك ليها راسو و توجه بتواب لمقعد الخلفي و ميساء غير كتشوف مفاهمة والو.
وقفوا صوت المربية: ولكن اسيدي شنو غنقول لمدام..
غالي خنزر فيها و هضر بجدية: قولي ليها جيت ديتها كاين عندك شي مشكيل
المربية حنات راسها: لا اسيدي تفضل
حيدات من طريقوا و طلع فمكان السائق و دور عينيه على ميساء لقاها كتشوف فتواب من الزاج و هي معارفة مدير، ضار عند تواب و هضر بحنية غريييبة و على غير المعتاد: اجي ابابا
تواب مشات لعندوا و لسقات فيه و هي كتشوف فميساء بملامح متعجبة و الصمت بناتهم حتى غالي قطع هاد الصمت و هو كيشير لميساء: هادي ميساء
تواب نطقات سميتها بتلعثم حيت يلاه كتعلم تهضر: ميساء
ميساء و اخيرا قدرات تهضر و كانت مبتاسمة و دوات ببرائة: و هاد لابخانسيس شنو سميتها
تواب ضحكات حتى تسدوا عينيها و ضارت عند غالي وهي فرحانة: بابي قالت ليا بخانسيس
ميساء شافت فغالي لقاتوا متكي على الكوسان و كيشوف فيها بهيام و مدات يديها تجاه ميساء و حركات ليها عينيها زعما نقدر نهزها هو حرك ليها راسو بالإيجاب و هزاتها حطاتها فوق فخاضها.
و هضرات و هي مبتاسمة: انا سميتي ميساء ونتي
تواب كتضحك ولكن حشمانة حيت ميساء كتبقى غريبة عليها و نطقات بصوت خافت: انا سميتي تواب
ميساء باستها بخفة و هضرات بطفولة مسايرة تواب: سميتك زوينة فحالك
تواب زادت بتاسمات: حتى نتي زوينة و كتشبهي لهادوك الأميرات لي كنتفرج فيهم مع مامي ( هزات عينيها فغالي) ياك ابابا
غالي كيشوف فميساء بهوس حيت كل مرة كيشوف فيها جانب فشكل و كل جانب كيخليها يبغيها كثر و كثر: اه ابنتي هي حسن من هادوك الأميرات
ميساء حنيكاتها توردوا و غرقات فحويجها مقدراتش تهز فيه راسها و كملات التعارف مع ميساء و نساجمات معاها فالهضرة الشي لي عجب غالي و بغاها انها تكون عندها علاقة زوينة مع بنتوا حيت من المحتمل تاخد بلاصة ماماها.
غالي بقا كيسوق حتا شوية دور عينيه و شاف بنتوا متكية على صدر ميساء و ميساء كتدوز ليها على شعرها بحنان.
غالي نطق بصوت شجي: فين بغيتي نمشيو
ميساء بإندفاع: المول عافا ( حسات على راسها و سكتات) احم احم فينما بغيتي معنديش مشكل
غالي رجع دور عينيه لطريق و هو كيسوق بشوية على عكس السرعة لي كيمشي بيها ديما بحكم معاه بنتوا وهي كالسة القدام.
دازت مدة و كان واقف قدام المول ميساء حسات بالطوموبيل وقفات على الحركة و هزات عينيها و شافت بلي هوما قدام المول و ضارت عندوا و بتاسمات ليه ابتسامة ممتنة واخا هو مشافهاش ولكن مهم 🙂
نزل و نزلات ميساء و هي هازة تواب بين يديها و تواب كضور عينيها على المكان بعينيها الكبار زرقين.
تواب ببرائة: طاتي ميساء نزليني بغيت نمشي
نزلاتها ميساء و شدات ليها فيديها و غالي مبتاسم و عاجبوا الحال حيت حس بطعم أسري زويين، توجه لعندهم و شد تواب من يديها بحكم هي كانت الوسط و فاليمن ميساء و فليسر غالي كانوا كيبانو فحال شي اسرة كتكون من زوج و زوجة و بنتهم 🥹❤️
دخلوا المول و غالي كل مرة كيضور يشوف فميساء و فبنتوا لي نساجمات مع ميساء فالهضرة من جديد....
يتبع..
تصبحوا على خير ❤️
VOUS LISEZ
مهووس ميساء ( موقفة)
Action🛑🛑🛑🛑🛑🛑🛑🛑🛑🛑🛑🛑🛑🛑 ليوم جبت ليكم رواية نارية من اول كتاباتي 🔥🔥🔥 رواية مختلفة على باقي الروايات قصة فريدة من نوعها خفيفة على القلب و اهم حاجة داكشي لي كيعجبكم 😉😉😉😉😉.... البطل....شخصية باردة..مختلة..مهووس بالبطلة..متعجرف..قوي......وك...
