شدات فدراعها لي كيعطيها الحريق و نزلات دمعة باردة على خذها كتعبر على الحكرة لي كتحس بيها و الوحدة اه كتحس براسها وحيدة بدون ام و عائلة تحتامي فيها... تمشات بخطوات بطيئة تجاه السانسور حتى تحل و دخلات متكية على المراية و هبطات حتى البيت تواب دخلات و تكات فوق السرير مكيمشة فراسها و معنقة واحد نونوس على شكل دب وهي كتبكي فصمت كيتسمعو غير شهقاتها لي كيطلعو من حين لأخر.
سد الباب و هو صدرو كيطلع و ينزل بعنف و هو عينيه حمرين كيحس براسو مزير حيت شافتو فديك الحالة مرضاااااش تشوفو ضعيف و نضرات الشفقة فعينيها ... جاتو شحال من كريز و خطر من هادي و ديما كيكون بوحدو و كيصارع الموت بوحدو ماشي حتى اليوم عاد غتجي باش تعاونو هادشي علاش متقبلش مساعدتها نهائيا واخا هي بغات تعاونو بنية حسنة ولكن مرضو و نرجيسيتو كتغلب عليه ... مشا الثلاجة لي عندو فالغرفة خدا كاس و كب فيه الشارب و شربو دقة وحدة على و عسى نار لي كيحس بيها تطفى و هز قرعتو و خرج البالكون و كلس مرجع راسو لور كيفكر و مرة مرة كيرشف من القرعة ديال الشراب و شعرو الاسود الكثيف كيتحرك مع الريح.
كانت ناعسة و فمها محلول شوية كتنفس منو كيتسمعو انفاسها صغار فحال البيبي و شعرها الطويل الحريري مليوح فوق سرير بإهمال ... كانت داخلة ف سباتها حتى كتحس بشي يديات صغار كيتحسسو وجها حلات عويناتها الخضرين المشفرين بتثاقل حتى كتلقى قدامها تواب مبتاسمة ابتسامة بريئة ... كيف شافتها حلات عويناتها باستها فخدها و نطقات بصوت طفولي و هضرتها معكلة: مامي نتي علاس ناعسة هنايا ... ميساء بتاسمات وهي كتحسس شعرها الرطيطب: نتي شكون بدل ليك حوايجك ... تواب: خالتي ابتسام بغات دوس ليا هنايا ولكن لقاتك ناعسة و داتني لبيت اخر دوسات ليا و بدلات ليا و داتني صيبات ليا ليكخيب سوكولا فحال لي كديري ليا و طلعاتني باش نبقا نلعب بينما تفيقي ولكن نتي تعطلتي فالنعاس و بغيت نفيقك (كانت كتهضر و كتعبر بيديداتها بطفولة)... ميساء بتاسمات ليها ابتسامة دابلة و نطقات: اجي احبيبة اجي ... جراتها خاشياها فيها و هي كدوز يديها فوق راسها بحنان و مرة مرة كتبوس راسها بحب.
بقاو على هداك الحال حتى سمعو دقان فالباب و هي تنطق ميساء بصوتها الأنثوي المحلون من عند الله: دخل ... دخلات ابتسام و هي مبتاسمة و نطقات بلطف: هاي هاي هاي هانتي بديتي تأكتيفي مود الأمومة ... ميساء كلسات و كلسات تواب فوق من فخاضها لي كانت كاعما مسوقة كتلعب بواحد باربي فيديها و نطقات مبتاسمة : اوا شنو راه وليت ام اولا ... ابتسام قربات منها و بغجات ليها حناكها ببوسة: ام و احسن ام فالعالم... و باست تواب هي الأخرى لي فينما كيبوسها شيحد كتنزاعج و كتبدا تمسح فحنيكاتها و هي تنطق ابتسام بقلق مصطنع: وا شوفي ليك شنيولة مبغاتنيش نبوسها ... تواب خشات راسها فصدر ميساء و هي كتضحك و نطقات ميساء كضحك هي الأخرى: ههههههه بعدي ليا من بنتي ... ابتسام هزات يديها فيهم: ايه ايه متحماوش (ضربات راسها بخفة) ويلي نسيتوني حتى علاش جيت يلاه هبطو تعشاو راه وجد العشاء ... ميساء لبسات صنيديلتها و وقفات تواب و ناضت خارجة من البيت وهي مرة مرة كتدوي مع ابتسام ... يلاه بغا يتحل الاسانسور و هي تنطق ابتسام: ميساء ختي خليني نخرج انا الولة نمشي الكوزينة باش ميتجبدش ليك المشاكيل مع ديك العقروشة د نرجس... ميساء: اصاحبتي انا كعما مسوقة ليها ... ابتسام طبطبات على كتفها : خاصك تكوني مسوقة حيت هاديك لفعة ف صيفت انسان ... مخلاتش لميساء وقت فين تعارض و خرجات من السانسور كتزرب فالمشية ... خرجات ميساء من موراها وهي شادا فيدين تواب لي كتلبد فعويناتها فيها الموت ديال النعاس ... كانت جالسة نرجس لابسة كسوة زرقة حد الركبة و جامعة شعرها الأشقر جميعة انيقة و مقابلة معاها عطاء لابسة كسيوة حمرة حد الفخض و تعكيرة حمرة و صباط طالون كيف عادتها ... ميساء تنهدات براحة ملي ملقاتوش فالطابلة حيت مكانتش باغا تشوف وجهو نهائيا ... وصلات الطبلة و كلسات و كلسات تواب فالكرسي لي حداها و نطقات بصوت خافت: بصحتكم ... نرجس كانت كتاكل بكل لباقة و رقي و كيف لمحات وجودها حطات الموس و الفورشيط و نطقات وهي على وجها ابتسامة مستفزة: معلموكش الأداب و بلي خاصك تكلسي فالطبلة فالوقت و الى جيتي معطلة متكلسيش ولا اه نسيت نتوما فدوك الاحياء الشعبية لي كبرتي فيهم علموكم غير الهمجية و قلة الاحترام ... عطاء شافت فميساء بنضرة انتصار و هي كتسنا ردة فعلها و تأثير كلام نرجس على ميساء ... ميساء كانت كتنقي الكروڤيط و كتحط فطبسيل ديال تواب لي هاد الأخيرة مفاهمة والو هزات ميساء راسها و شافت نيشان فعينين نرجس و نطقات وهي مبتاسمة: لالة نرجس كيبان ليا عمرك مشيتي الأحياء الشعبية و شفتيهم كيفاش عايشين حياة بسيطة معندهمش و مخاصهمش و عايشين بلا بروطوكول و فرحانين بالهم هاني و كيبغيو بعضياتهم (هزات السومون و حطاتو فطبسيلها وهي مزال كتهضر و كيف كملات هزات عينيها فيها مرة اخرى و غمزاتها) معندهمش نفاق فقاموسهم نتي مغتفهميش هادشي بطبيعة الحال حيت حياتك كلها كدوب و نفاق و امراض نفسية ... نرجس زيرات على المنديل فيديها وهي مكززة على سنانها و وجها رجع حمر... ميساء قطعات قطعة من السومون و حطاتها ففمها كتمضغها ببطئ حتى سرطاتها بشوية عليها و كملات هضرتها: اما بالنسبة الماكلة و انني خاصني نكلس فالوقت هادشي مكيخصكش حيت كيفما كتشوفي هادي داري امدام و نتوما ضياف عندي و الضياف خاصهم يشوفو و يسكتو ... نرجس ناضت خابطة طابلة بيديها وهي كترعد بالعصاب: هادي دار ولدي و ماشي من حقك تهدري معايا هاكا حتارميني ولا مغيعجبكش الحال ... ميساء: انا كنت محتارماك نتي لي محترمتينيش و دابا انا لي كنقول ليك حترميني ولا مغيعجبكش الحال امدام نرجس ... نرجس خنزرات فيها و زادت كتمشى بسرعة وهي متوجهة السانسور ... و عطاء كتشوف ف ميساء شي شوفات ديال القتيلة و كيف لمحاتهوم ميساء نطقات مخنزرة فيها: تبعيها شنو كتسناي نسيفطو ليك عودة عركانة ... ناضت عطاء و نطقات كتعوج : على نيفو... و مشات كتلوا تابعة خالتها تقولي غير البوطو كيتمشى ... ميساء نطقات قالبة عينيها :الخلا و الجلا ... و ضارت كتضحك مع تواب لي مسكينة مفهمات حتى حاجة و غير كتاكل فصمت.
كملو ماكلتهم و طلعات ميساء تواب تنعس و هبطات شادة الستون مع البنات حتى عياو و هبطات كل وحدة فيهم لغرفتها و ميساء حتى هي نزلات لبيتها القديم هي و ماماها الى عقلتو....
يتبع....
ڤوط البنات راه الدعم ميت ❤️
VOUS LISEZ
مهووس ميساء ( موقفة)
Action🛑🛑🛑🛑🛑🛑🛑🛑🛑🛑🛑🛑🛑🛑 ليوم جبت ليكم رواية نارية من اول كتاباتي 🔥🔥🔥 رواية مختلفة على باقي الروايات قصة فريدة من نوعها خفيفة على القلب و اهم حاجة داكشي لي كيعجبكم 😉😉😉😉😉.... البطل....شخصية باردة..مختلة..مهووس بالبطلة..متعجرف..قوي......وك...
