دام عناقهم لمدة وجيزة حتى حس بيها تهدنات و بعد عليها و نطق بهمس مطمن: صافا
ميساء حركات راسها بالإيجاب و هي وجها حمر و عوايناتها مدمعين.
ديمارا طموبيل و توجه القصر ديال ماماه باش يحط تواب تما حيت فات الحال و خصها تنعس، بعد مدة من السياقة وقفات سيارتوا قدام القصر و نزل من الطوموبيل و نزل تواب و وجه كلاموا لميساء: هبطي
ميساء حركات راسها بنفي: لالا غير خليني انا انتسناك
غالي حرك راسوا بالإيجاب حيت مبغاش يضغط عليها و توجه الباب الرئيسي و حلوا ليه الحرس الباب و هوما حانين راسهم بإحترام دخل حتى لقدام الباب ديال القصر و رن فالجرس مدازش بزاف حتى حلات ليه الخدامة الباب و نطقات بإحترام: مرحبا بيك اسيدي واش نعلم مدام نرجس بحضورك
غالي حرك راسوا بالنفي و هو عاقد حجبانوا و نطق بجدية: لا ميحتاجش غير دخلي تواب
تواب كيف سمعاتوا بدات كتغبن و لسقات ليه فتيشورت ديالو: بابا هئ هئ عافاك بغيت نبقا معاك
غالي باس راس تواب بحنان و هضر محاولة منوا يطمنها: تواب انا انعاود نجي عندك كنواعدك و مبقاش بزاف و اتبداي تسكني معايا
تواب قلبات شفايفها بزعل: بابي..
قاطعها غالي و هو عاقد حجبانوا: مكتيقيش فيا
تواب حركات راسها بالإيجاب: كنتيق فيك
غالي: إذن دخلي دابا راه وقت النعاس
نزلها و هي دخلات كتجري تجاه بيتها و هو كيف شافها ختافات عطا بضهروا خارج من القصر و غير خرج سدات الخدامة الباب و سمعات صوت من موراها انثوي و رقيق
...: واش هو
الخدامة حنات راسها و هضرات بإحترام: اه امدام نرجس
نرجس حركات راسها بالإيجاب و هي عينيها كيلمعوا بدموع: تقدري تمشي
نساحبات الخدامة و كيف لمحاتها نرجس ختافات هزات عينيها السما محاولة منها تحبس دموعها و نطقات بحرقة: حتى لإمتى ا ولدي حتى الإمتى
نرجس هي الأم ديال غالي ولي شافها ميقولش والدة ولد فعمروا حيت باقا صغيرة و زوينة بعينين كبار زرقين و بشرة بيضة و شعر اشقر و طايتها مقادة و انيقة بزاف و مهلية فشكلها و فراسها.
خرج غالي من البوابة الكبيرة لقصر و توجه لسيارتوا و طلع فالمكان المخصص ليه و دور عينيه على ميساء لقاها كتفرك فيديها و فحالا باغا تقول شي حاجة.
ديمارا و هو عينيه على طرق و نطق بصوت شجي: نطقي
ميساء هزات فيه عينيها و نطقات بتساؤل: علاش تواب معيشاش معاك ياك نتا باباها
غالي دور عينيه لعندها و رجع ركز فطريق و نطق بحدة: انا مغنقدرش ديما نكون اب مزيان ليها
ميساء عوجات فمها و هضرات ببرائة: ولكن هي كتبغيك بزاف و حتى نتا
غالي زير على الفولون: ياك كتقولي انا مريض واش فنضرك هاد المريض تقدر تعيش معاه بنت صغيرة
ميساء نطقات بتساؤل عوتاني: وهي معامن عايشة
غالي قلب عينيه بملل و نطق بحشرجة: كتسولي بزاف
ميساء خرجات عينيها: ياااك اسيدي سري انا لي مسولاك
غالي حرك راسو بلا حولة و ركز فالطريق و مدامش بزاف حتى وصلوا قدام القصر و نزل و نزل دوك ليساشي لي ميساء خداتهم من عندوا وهي خايفة لا يشوفهم شي حد و عطاتوا بضهر زربانة ،يلاه خطات جوج خطوات و وقفات فحالا نسات شي حاجة و دورات راسها تجاهوا و نطقات و ابتسامة بريئة على وجها: شكرا
كيف نطقاتها عاودات ضورات وجها و دخلات كتسلت لبيتها باش متشوفهاش ماماها و داكشي لي كان دخلات و مشافتهاش كيف دخلات تنهدات براحة و دغية بدات كتستف فدوك الحوايج فالماريو و لاحت ليساشي تحت الناموسية عاد تنفسات صعداء و خرجات من البيت تجاه المطبخ تعشات و طبعا الجو لا يخلوا من الضحك و الروح الفكاهية ديالها، كملات مكلتها و فطريقها باش تخرج من الكوزينة لمحات ماماها شادا فراسها بألم و مشات عندها كتجري.
ميساء بخوف: ماما ماما مالكي
ابتسام لي كانت حدا خديجة: خالتي خديجة ياك لاباس
خديجة بصوت ضعيف وهي شادة فراسها: والو غير راسي كيضرني شوية متخافوش
أية بقلق على خديجة: خالتي خديجة عطي راحة لراسك
ميساء شدات ليها فيديها و داتها لأقرب كرسي و كلساتها: اجي كلسي اماما رتاحي راك كتعياي بزاف
خديجة بصوت خافت: عادي ابنتي هادشي ماشي شي حاجة غير راسي ضرني شوية
ميساء حركات راسها و عقدات حجبانها بقلق: كيفاش ماشي شي حاجة اماما داك النهار سخفتي و دابا راسك كيضرك رآه خاصك تمشي الطبيب
ماجدة شدات لخديجة فيديها: ميساء عندها الحق اخالتي خديجة
ابتسام: نوضي اخالتي سيري ترتاحي هاحنا انكملوا هادشي
خديجة سندات يديها على ميساء و ناضت كتعكز: متزيدوش فيه البنات راه هدشي عادي خصني غير شوية ديال الراحة
البنات دقا وحدة: ردي البال لراسك اخالتي
خديجة بتاسمات بتعب: الله يرضي عليكم ابناتي
خرجات خديجة و هي شادة فميساء و كتمشى بتعب و ميساء فجنبها بقاو كيتمشاو حتى وصلوا الغرفة ديالهم و دخلوا و ميساء عونات خديجة تبدل حوايجها و نعسات ديك الساعة وهي مرهقة.
كيف نعسات خديجة ناضت ميساء كتقدي روتينها الليلي و دمعة فعينيها من هدشي لي طرا لماماها، لبسات بيجامة و تخشات حدا ماماها و قبل متنعس باستها و نطقات بهمس: الله يخليك ليا ياربي.
و عنقاتها و نعسات.
فالوقت لي ميساء كانت داخلة فعالم الأحلام الفوق كان غالي كالس فالبالكون و هو لابس غير شورط و عريان من الفوق و الشيشة فيديه كيبخ دخان وهو ساهي و منشوي معاها و كيعاود احداث هاد النهار لي داز رائع بالنسبة ليه حيت حس بالطعم الأسري لي عمروا حس بيه واخا فايت ليه مزوج،وهو كيتفكر الأحداث ديال هاد اليوم جات فذاكرتوا لقطات من الماضي و ديك ساعة عينيه حماروا و ولاو فحال العافية و عروق يدوا بانو
فلاش باك...
طالع فالدروج و هو مبتاسم و هاز فيديه باقة من الورد حيت عارفها كيعجبها الورد بكاع انواعوا، حل الباب بهدوء حتى كيسمعها كتوشوش و كتدوي بشوية.
... بهمس: رآه مكنقدرش نخرج والله راه داير ليا الحبس بكنطرول مع الطبيبة هو اللخر كيمشي معايا ولا كيصيفط معايا شيفور طلع ليا فراسي
غالي عقد حجبانوا وهو كيتسائل معامن كتدوي، كيف لمحاتوا دخل خبات تيليفون دغيا من مورا ضهرها و نطقات و ابتسامة على وجها: غالي
غالي بحجبان معقودة: معامن كنتي كتدوي
سهام ضحكات بتوثر و هي كتقلب على شي كدبة: غير صحاباتي فالجمعية كانوا كيسلوا امتى انلتاحق بيهم
غالي بعدم تصديق: اممم مزيان
سهام وقفات حتى بانت كريشتها حتى لفمها و كانت زوينة بزاف و كتشبه لبطلتنا غير ميساء ملامحها بريئة كثر، توجهات عندوا و طلعات على صباع رجليها و قبلات شفايفوا بشغف و عينيها فعينيه: توحشتك اعمري
غالي طلعها و نزلها و جرها من مؤخرة راسها بقبلة عنيفة و هو كيبوس فيها و كيحرك يديه على انحاء جسمها و انتهى بيهم المطاف وهوما فوق السرير ملابسين والو سالاو و تغطاو بليزار و سهام كانت متكية على صدر غالي.
غالي نزل عينيه و حط يديه على كرشها المنفوخة بحب: بنتي لاباس عليها
سهام بتاسمات حتى تسدوا عينيها و حركات راسها بالإيجاب: لاباس ملي كيكون باباها حداها..(هزات فيه عينيها) شنو نسميوها
غالي بصوت شجي و حنون فنفس الوقت: تواب
سهام: وااو سمية زوينة بزاف
غالي طبع قبلة على راسها و نطق بهمس: نعسي ممزيانش ليك سهير
غمضات عينيها و نعسات فأحضانوا و مدازش بزاف حتى ستسلم حتى هو النعاس.
باك...
هاد الأحداث كاملة دازت فبالوا حتى عينيه حماروا و طرطق الكاس بين يديه كتى دم سال و هو متحركات فيه حتى حاجة و نطق بفحيح: قحبة...
غير نطق بهاد الكلمة وقف و هو كيرون فلبيت و كيضرب لي جات قداموا بجهالة حتى رون البيت كولو و جلس الأرض كينهج و هو عينيه فنقطة وحدة من موراها وقف و توجه لدريسينك لبس كيطمة كحلة و هز الكونطاكت و خرج من الغرفة و من القصر كامل نحو المجهول....
يتبع....💜
تصبحوا على خير كبيدات 🫠❤️🔥
VOUS LISEZ
مهووس ميساء ( موقفة)
Action🛑🛑🛑🛑🛑🛑🛑🛑🛑🛑🛑🛑🛑🛑 ليوم جبت ليكم رواية نارية من اول كتاباتي 🔥🔥🔥 رواية مختلفة على باقي الروايات قصة فريدة من نوعها خفيفة على القلب و اهم حاجة داكشي لي كيعجبكم 😉😉😉😉😉.... البطل....شخصية باردة..مختلة..مهووس بالبطلة..متعجرف..قوي......وك...
