عـشق الـجبـال (فصـليـة)

عشق الجبال(فصلية)

كتبتلكم بارت طويل عوضتكم لان البارحة مانزلت 🌺 ياله نبلش
************
عشق الجبال(فصلية) البارت 59
****************************
في مكان اخرر ... ام شاكر وفرحة راحن علئ ام موسئ .. ام موسئ .. مرة علوية من اهل الله تكشف بالقران بس ماتعرف بتبطيل هاي الاعمال بس تنصح بهيج حالات شنو يسون .. ام شاكر وفرحة .. حجن الصار لأم موسئ بالتفصيل .. ام موسئ ... هسة نفتحلة القران ونشوف ... بدت ام موسئ تشوف بالقران ... ام موسئ ... لااله الاالله هذا الولد مسحور وسحرة قوي يعني بمرور الوقت راح صحتة تروح. ام شاكر ... يمة اسم الله يمة وليدي وشنو الحل خية ... ام موسئ ... عندي ملح خشن مقري علية هذا اني مسويتة لثواب والاجر امسحو بي البيت وخلو بكل زواية البيت وسورة البقرة دائما ورئ صلاة العصر تشغلوها وباقي الاوقات هاي الرقيات الشرعية موجودة بالتلفون هم شغلوها بس لازم تلكون احد مختص بهاي الاشياء ... فرحة ..  خية انتي ماتعرفين احد .. ام موسئ لاوالله ياخية .. ام شاكر مشكورة خية ماقصرتي .. ام موسئ ... لااني اسويت ياريت يطلع بأيدي شي اساعدكم بي ...
في بيت ابو شاكر ... فرحة وام شاكر .. ام شاكر  .. خية شلون نفتح الموضوع منو يكول يصدكون بهذا الحجي ..فرحة ..  خلي نسوي الكالت علية بدون مانحجي وخلي نشوف اكو اعراض تصير بليث وبعدين نتصرف .. ام شاكر ...خية فريحة اني خايفة على وليدي ماتهنة ولاارتاح خاف انوب يتمرض .. فرحة .. ان شاء الله ماكو شي والله اني حسيت بي شي هل الولد انهدمت حياتة وماحاس بشي حسبي الله ...
...........................................
أربيل .. الساعة 10:40 صباحا ... وصال ... اخذنا أبوية للعلاج الطبيعي وبعدين اخذتة كعدنا بالحديقة .. رائد خلص ويانا العلاج الطبيعي ساعدني بأبوية وبعدين راح للبيت يسبح ويغير ملابسة  ويرجع ... كاعدة مقابيل ابوية واسولف ويا حتئ لايحس بملل ..  سمعت صوت بنية قريب علينا سلمت ... التفتت وشفتها هاي البنية الي امها تخربطت .. ضي .. مرحبا ... وصال .. اهلا وسهلا تعالي استريحي ... ضي .. شكرا بس اني بوحدي وامي نامت وضياء راح للبيت يجيب اغراض محتاجيها فمليت بوحدي .. وصال .. يا گلبي تعالي اگعدي شنو حابة تشربين .. ضي .. لا ماريد شي قبل مااطلع شربت عصير .. وصال .. عافيات حبيبتي .. ضي ... هذا ابوج ... وصال.. اي هذا الحلو ابوية .. ابتسم عدنان من كلام وصال .. ضي .. الله يحفضة الج ... وصال ... اامين ويحفظلج امج .. ضي .. فدوة لگلبج ...البارحة مصارت فرصة اتعرف عليج .. وصال .. اي صحيح الله يعينكم .. ضي.. اني ضي 19 سنة ... مرحلة اولئ كلية تربية قسم رياضيات .. وصال .. يحبيبتي بكد اخوية علوش اهلا وسهلا بيج .. ضي .. اهلا بيج .. وانتي ... وصال .. اني وصال 29 سنة .. ضي .. العمر كلة ... وصال .. حبيبتي يسلم عمرج .. ضي .. اني وماما واخوية ضياء .. ماالنا غير بعض بابا متوفي من اني بصف الثاني متوسط .. فبقينا وحدنا احنا الثلاثة مالنا غير بعض ... وصال ... ياعمري الله يحفظكم .. ضي .. اخوية ضياء مهندس ورجل اعمال عمرة 38 سنة ... وصال .. ماشاء الله زين ليش مامزوج لسة لو مزوج .. ضي ... مزوج بس زوجتة توفت من خمس سنوات بحادث سيارة .. وصال ... لاحول الله ...الله يرحمها ... ضي .. وبعد مفكر لابزواج ولاارتباط ... وصال... ماعندة اطفال ... ضي ... للاسف لا .. ضياء ترك نفسة واهتم بينا اني وامي وشغلة شكد ماما رادت يزوج بس هو رافض هذا الشي ... وصال.. اكيد جان متعلق بزوجتة وباقي علئ ذكرياتها ..ضي ... لا ضياء ازوج زواج تقليدي وهي جانت مهملة بواجباتها اتجاه زوجها بس هو مو لان اخوية واريد احمدة لا والله بس هو ابد مقصر وياها وجان مدللها حتئ هي جانت متريد تخلف جانت تكول اريد اتونس اشبع طلعات الحك علئ الخلفة ودوختهم هو رغم انو يعشف الاطفال بس معارضها كال هذا الشي حقها وخلااها علئ راحتها بس هو رغم تقصيرها وحبها للمادة واسلوبها المو  حلو اتأثر بوفاتها .. وضل مهتم بشغلة وبينا ورافض الزواج .. وصال .. الله يكون بعونة زين شلون وين عرفها وصارت القسمة... ضي .. عمي لح علية بنت صديقة لعمي وضل يلح ولازم تزوج ومايصير تبقئ بدون زواج وهاي خوش بنية وناس معروفين وصارت القسمة ... ضي .. تعالي گوليلي هذا هو زوجج الي جان وياج البارحة ... وصال ... هههههه لا هذا رائد ابن عمتي هذا مثل اخوية تؤئم روحي ... ضي ... يااا فدوة لعد عبالي زوجج لعد زوجج وين .. وصال .. اخذت نفس وزفرتة ... اني منفصلة ... ضي ... اووو اسفة .. وصال .. لاحبي ليش تتأسفين .. ضي .. لازم بالجديد منفصلين لان انتي حامل .. وصال ... اي صار ستة اشهر منفصلين .. ضي .. ياگلبي الله يعوضج بالاحسن .. وصال .. ابتسمت تسلمين حبيبتي ...ضياء .. رحت للبيت اجيب اغراض محتاجيها ... ورجعت مالكيت ضي بالغرفة وامي نايمة كلت اكيد كاعدة برة .. صدك طلعت وجان اشوفها كاعدة ويا هاي البنية الي ويانا بالمستشفئ .. شكد حلوة لابسة تراك اسود عريض وشايلة شعرها كعكة ومندمجات يسولفن ويمهن رجال كبير بالعمر وكاعد علئ كرسي متحرك ... تمشيت باتجاهم بس ابطء .. وصال .. اكو ضي هي امج شنو مرضها ... ضي .. صمامات القلب مسدودة وعمليتها بعد كم يوم ... وصال ... ياكلبي الله يشافيها الكم ... ضي ... ااامين .. ضياء .... السلام عليكم .. وصال وضي .. وعليكم السلام ..ضي ... حبيبي شوكت اجيت ..ضياء .. قبل عشر دقائق .. تعال اكعد ويانا داندردش اني وصال .. وصال ... روح جيب جاي وتعال تفضل وضحكت ...ضياء .. ههههه هاي شلون لازم من اكعد اخسر جايات .. ضي ... ااي ااي هههه .. ضياء ..صار من عيوني .. الحجي هم اجيبلة .. وصال .. لالا ..ضياء .. ماشي ... راح ضياء وجاب جاي وكيك من الكافتريا .. وكعدو يدردشون .. وصال .. حست بابوها تعب .. وصال ... لازم اخذ ابوية للغرفة لان تعب ورائد لسة مااجة ..ضياء ... اني اساعدج لاتشيلين هم .. وصال.. اخذت ابوها للغرفة وياها ضياء حتئ يخلي وياها على سريرة ... وضي وياهم ..  وصال .. ياله حبيبي .. وابو مازن مايقبل وصال تحركة وياشر علئ بطنها ويحجي كوة حـ حـ حاا حااامل ... وصال ... واذا حامل حبيبي كلشي يروحلك فدوة .. وهو مايقبل يهز براسة ... ضياء ... بس شوية صيري على صفحة تعالي ضي الزمي بس العربانة من ارفعة اسحبيها .. ضي ... اي جاية ... وصال ..شال ضياء ابوية وخلا على سريرة وعدل نومتة .. وصال .. شكرا سويت عليك زحمة ... ضياء ... رفع حاجبة هواي تصرفين تشكرات ترئ اي واحد غيري يسوي هذا الشي فلاتشكريني ومن تحتاجين شي احنا هاي غرفتنا بصفج ... لتحاولين تحركي بوحدج ماشي ... وصال ... ابتسمت ماشي ... بهل الاثناء دخل رائد .. رائد ... السلام عليكم ... الكل وعليكم السلام .. رائد ... شبيكم صاير شي خالي بي شي .. وصال... لاماكو شي بس جنة برة وابوية تعب من الگعدة فـ دخلنا للغرفة ... رائد .. وصال خوما حركتي عمي انتي .. وصال ... لالا بس استاذ ضياء واختة هم الي خلو على السرير مخلوني اتقرب ... رائد... التفت لضياء جزاك الله الف خير تعبناك ... ضياء .. لايابة شنو السالفة قابل تگاطعت .. وهسة استأذن منكم ياله ضيو بنيتي ... رائد وصال ... الله وياكم .... رائد ... مبين هل الضياء خوش ضياء مبين انسان محترم .. وصال ... اي اختة جانت كاعدة يمنا برا وحجتلي عنهم .. رائد ... اهاا ناوشيني خلي اعرف هل الضياء .. وصال .. تعال اكعد خلي احجيلك ... وسردتلة كل الكلام الي دار بينها وبين ضي .. رائد.. تريديلج واحد ماعندة هم ماكو صحيح كل شخصية قوية وراها ماضي مايرحم .. وصال .. اي هي المصايب ووالمطبات تعلمنا هواي اشياء (( مويكول الأمام علي عليه السلام ... نتألم لنتعلم )) ..
((وتستمر الاحداث ادنااه ))...
بدت اعراض غريبة علئ ليث تعب وارهاق حتئ بدا يفقد وزنة مع العلم موعد زواجة من رحاب تقرر بعد اسبوع بس ليث تعبان وصار من يسمع صوت القران بالبيت يطلع مايبقئ بالبيت ... رحاب.📱يمة اني اريد بس الاسبوع يخلص حتئ نزوج ونفض هل الموضوع لان بدت اعراض تضهر على ليث وعمتي ام شاكر وعمتي فرحة مادري شدايسون يمة عفية اريد حل.
سعاد📱 ولج شيسون كليلي
رحاب 📱يمة شفت عمتي فرحة خلت بماي المسح ملح وشفتها ترش بزواية البيت وخو سورة البقرة ليل ونهار مشغليها حتئ ليث كام ميبقئ بالبيت ويتعارك وياهم ...
سعاد📱عزة ولج لازم اخابر ام بشار حتئ اشوف شتكول ونسوي
رحاب 📱يمة خلي اسوي شي بس حتئ يتم زواجنا حتئ لو تسوي عمل جديد.
سعاد📱 ماشي ماشي روحي هسة لااحد يسمعج وننفضح .. ونهو المكالمة ... ملاك ... جنت صاعدة لغرفتي اريد اطلع ملابس اريد اسبح وشفت باب السطح شوية مفتوحة تقربت اريد اشوف شكو وسمعت رحاب تبسبس بالتلفون مدااسمع لان طالعة بالسطح تقربت اكثر .. سمعتها تحجي تكول سوي عمل جديد بس حتئ يتم زواجنا .. انصدمت وخليت ايدي علئ حلكي اكتم شهكتي ونزلت بسرعة حتئ مااخذت ملابس .. الوب مااعرف شسوي ماكو غير احجي لعمتي على السمعتة كل حيلي كام يرجف يعني تريد اسوي جديد معناتها هي مسوية واحد قديم لااله الاالله شنو هاي من بشر معقولة توصل بيها لهل الدرجة بالائذية ...ملاك .. عمة اريد اكولج شي ... كولي يمة ندئ جانت كاعدة يم عمتها فرحة ..  ملاك .. عمة سمعت رحاب تحجي بالتلفون مااعرف ويامنو .. وحجت ملاك الي سمعتة ... ندئ... اني هم سمعتها قبل فترة بس مفتهمت علئ شنو تقصد جانت تحجي وياامها ..فرحة ... عزة بعينج رحاب يعني مسوية للولد ... صخام الصخمني .. فرحة...ندئ وانتي ليش مكلتيلي بساعيتها .. ندئ .. عمة والله مفتهمت شي اجي احجيلج واني ممفتهمة شي ... ملاك ... هي واضحة من تغير ليث وانفصل عن وصال والريحة الموطيبة كلة جان گدام عيونة بس احنا انثولنا والله جنت شاكة بيها هسة عمة شنسوي ... فرحة ... اني لازم احجي لابو شاكر وهو يتصرف ...  وفعلا فرحة حجت لابو شاكر علئ كلشي وعلى البنات شسمعن من جانت رحاب تحجي بالتلفون ... ابو شاكر ... فرحة انتي شتحجين معقولة رحاب تسوي هيج ... فرحة ... واكثر من هيج اسوي .. ابو شاكر ... يافرحة شنسوي وعرسهم هذا الاسبوع والعالم والسلف كلة يدري وعزمنا العالم اذا عاف البنية وهو عاقد عليها سيد ومحكمة والبنت بنت عمة شراح يكون موقفنا كدام العالم ... فرحة ..  همك العالم ماهمك ابنك شراح يصير بي انت تدري شلون تعبان ومتغير وصاير اعصاب اربع وعشرين ساعة بعدين هو عمرة ماراد رحاب... رحاب جابتة بالسحورة ... ام شاكر .. انت تريد الولد يزوج ياله نشوفلة جارة معقولة يبو شاكر .. ابو شاكر ... اول مرة احس نفسي عاجز مااعرف شسوي ابني وبنت اخوي عزيز گلبي ..تدرين شيصير بـ ابو محمد من يسع هذا الحجي وهو مريض ...ام شاكر ... يعني اعوف ابني يموت لو يزوج هاي الحية هاي الماتصير .. ابو شاكر ... مااعوف ابني يروح من ادية ولااخلي الناس تجيب طاري بنت اخوية يتعالج ويتم الزواج يرضة او مايرضة .. فرحة ... شلون يخوي تجبرة علئ الزواج ... ابو شاكر ..  اي اجبرة ولااحد يجيب طارينا بالموزين لاتنسين فرحة رحاب هم بنت اخوج ...  فرحة ... يخوي ماناسية بس السوتة ماينسكت علية ياما ناس راحت بسبب هل الاسحار الله يجفينا الشر .. ابو شاكر ... المهم خلو الموضوع سكتة وليث باجر طالع بي لنجف اعرف سيد هناك هواي ناس حمدت بي .. ام شاكر .. استغفرالله ياربي استغفر الله والله راح اتخبل ... ابو شاكر .. هدي شوية يمرة محلولة ان شاء الله ...  يوم بعد يوم ليث تسوء حالتة وحتئ اكلة قل جسمة نحف مبين علية التعب .. ابو شاكر .. حجة لشاكر حتئ ياخذون ليث ويتجهون لنجف .. رحاب .. ميتة من الرعب مااعرف يجتمعون بغرفة عمتي ام شاكر مااعرف شدايسون بس كلبي يوجعني ياربي شدايصير انوب امي تاخرت مدا تفضني وتروح لام بشار لان ام بشار كالت هذا الشغل يتاخر اربع خمسة ايام واني مابقئ شي علئ موعد عرسي غير اربع ايام .. ليث اشترئ غرفة الي جديدة وجهزوها من كلشي .. بس اني الخوف والقلق كاتلني .... شاكر .. ليث كوم اسبح خلي نروح مشوار ... ليث .. وين انروح مالي خلك وحتئ مابية اسبح عوفني الله يرضئ عليك ... ليث الجان على الوجبات يسبح صار حتئ مايسبح كل 3 ايام من التعب الي ابجسمة ... شاكر .. ابوية كال انت وليث تروحون وياي بشغلة .. ليث .. هسة اني شلي شغل بشغلكم ...شاكر .. والله هذا طلب ابوية ولازم انفذة تكوم تسبح لو اسحلك اني للحمام .. ليث ... اووووف شكد تعاندون كايم اتغوسل ... شاكر .. يول ليش هيج تحجي ... ياله كوم والبس دشداشة ... ليث ... شاكر بالضبط وين تريدون تروحون ... والله جماعة ابوية ناس شيوخ بالنجف عندة واجب وهم يعزمهم علئ عرسك ...ليث ... النجف هنا هنا صدك جذب ..مااروح ...شاكر ... تكوم عاد لاادفرك علئ كلبك وعلي كوووم شكد صاير عجوزي ...ليث .. كايم لتعصب .. رحاب .. هاي وين راح تروح .. ليث .. وياابوية وشاكر لجماعة شيوخ .. رحاب .. هااا خوش .. خلي اخليلك عطر .. ليث .. ياله خليلي هههه ماتنسين العطر .. رحاب .. لا شلون انسئ اهم شي عطرك حبيبي .. ليث .. من تخليلي من العطر احس روحي تشتعل عليها تقرب عليها حضنتها حيل وبستها .. مابقئ شي كم يوم وتصيرين يمي ... رحاب .. حبيبي متشوقة لهذا اليوم .. ليث .. ياله اني رايح انتبهي علئ نفسج ... رحاب .. تمام حياتي الله وياك ... وراح ليث وشاكر وابوهم توجهو لنجف ...
((في مكان اخر)) ....
ضياء ورائد صارو صحبة .. وضي حجت لأخوها ضياء الي عرفتة عن وصال ... كاعدين ضياء ورائد وصال وضي صارو ينجمعون بالحديقة بعد ماينامون ام ضياء وابو مازن .. لان جو المستشفئ كلش ممل .. كاعدين يشربون جاي ...  وصال ... شوكت عملية الوالدة .. ضياء .. باجر ان شاء الله .. وصال .. الله يكومها بالسلامة .. ضياء .. الله يسلمج .. وانتو شوكت عملية عمي عدنان .. وصال .. بعد باجر .. ضياء .. ان شاء الله خير .. اي لان الدكاترة الوصلو من الخارج يبقون اسبوع بس ويرجعون ولازم بهل الاسبوع يكملون كل العمليات العدهم .. رائد .. اي صار اسبوع ننتظرة .. بهل الاثناء رن تلفون ضياء .. ضياء📱 هذا المحامي .. الو ها ايمن .. ايمن 📱 مرحبا استاذ
ضياء📱هلا ومرحبا كول ايمن.
ايمن 📱 استاذ اني اباب المستشفئ جبتلك الاوراق والعقود الي لازم توقعها ..
ضياء 📱 هااا تعال ادخل للمستشفئ اني بالحديقة كاعد ..
ايمن 📱 تمام استاذ جايك .. ونهئ المكالمة ..
رائد .. ضياء خوماكو شي .. ضياء .. لا ماكو شي بس جايبلي اوراق محتاجات توقيعي .. دقايق وصل المحامي ايمن وبيدة ملفات .. سلم علئ الكل وجاب كرسي وكعد حتئ يقدم الاوراق لضياء ويوقعهن .. طلع الاوراق وبدا ضياء يوقع بدون مايقرأ .. وصال .. انتبهت انو ضياء يوقع بدون مايقرأ علئ شنو يوقع والي لفت انتباهي انو المحامي مايفتح الاوراق من الطرف يرفع الورقة ويخلي ضياء يوقع .. وصال .. دقيقة ضياء لاتوقع .. انتبه المحامي وضياء لوصال .. المحامي بلع ريكة .. العفو اختي ليش مايوقع اني مستعجل وراية طريق ارجع لبغداد .. ضياء ..شكو وصال .. وصال .. كامت وصارت بصف ضياء .. ممكن الاوراق ضياء بلا زحمة عليك .. الكل منتبه لوصال مايعرفون شبيها وليش هيج اتصرفت .. ضياء .. رفع حاجبة ليش وانتي شمعرفج بالاوراق حتئ اشوفيها .. وصال .. انطيني الاوراق ضياء .. ضياء ... قدملها الاوراق .. المحامي .. بصفتج شنو تاخذين الاوراق انتي داتعطلين شغلي وحاول ياخذ الاوراق من وصال .. بس وصال .. جانت منتبه لحركتة ورفعت ايدها حتئ لا ياخذهن وعاطت بوجها .. وصال .. اكعد لاتصرف مثل الاطفال بعدين شكو خايف من الاوراق .. المحامي .. لاتصيحين من فضلج واني مخايف من شي بس اني وقت ماعندي وطريقي طويل ولازم ارجع .. وصال .. لاتخاف واطمن مراح تتاخر واذا تاخرت ف عادي انت يم مديرك ... وجه المحامي كام ينطي الوان .. فتحت الاوراق وصال .. ضياء .. كام وصار بصفها ويطلع وياها بالاوراق .. وصال .. انتي شمفهمج بهاي الامور .. رائد ... ههههه شلون شمفهمها اذا وصال ماجستير قانون ومسؤلة الشؤون القانونية بشركات والدها اذا هي  ماتفتهم منو اليفتهم .. ضياء .. بصدمة شنوو شتكول وصال محامية .. وصال .. ابد مارفعت عينها من الاوراق ولاشاركت الحديث .. ضياء .. وصال انتي صدك محامية هههه خرررب.  وصال ... ضياء هاي الاوراق لو موقعها جان رحت بخبر كان .. ضياء .. شنو تكولين فهميني شبيها الاوراق .. وصال .. تفضل اقرة شنو بيها هاي الاوراق .. ضياء .. اخذت الاوراق وبديت اطلع عليهم وانصدمت صدمة عمري يردون يخلوني اوقع علئ مناقصات مو قانونية وعقد شراكة بوحدة من اكبر شركاتي ... لايانذل لاياحقير .. ولك ايمن وطفر علية ولزمة من ياخة قميصة تبيعني ولك اني لحم اكتافك من خيري هيج اجازيني وضربة بوكس .. طفر رائد من مكانة ولزم ضياء .. رائد ... اهدئ ضياء احنا بالمستشفئ ....العالم ضلت تباوع علينا ... ضياء .. ولك رائد شهدة تدري لو موقع جان حتئ سجن انسجنت وسحب المحامي من ياختة ... احجي لصالح منو تشتغل تحجي لو اتصل هسة بالشرطة احبسك هنا بأربيل اخليك تخيس احجي .. المحامي .. والله اني مالي علاقة هذا التخطيط من عمك سلمان هو سوة كل هذا ... ضياء ... من كال تخطيط عمك سلمان انصدمت هديتة وضليت مصدوم عـ عـ عمي سلمان ولك وصلت بيك الجرئة تتهم عمي ... المحامي ... والله العظيم ما تاهمة هو خطط لكلشي واني عبد المئمور واذا مصدكني هسة اتصل بي كدامك .. ضياء ... اتصل ياله بسرعة اتصل ... المحامي طلع تلفونة واتصل علئ سلمان عم ضياء .. وفعلا طلع هو المخطط لكلشي حجة وياالمحامي بدون مايعرف انو ضياء دايسمع كلامة ... ضياء ... يمسح وجه بأيدة من التوتر والصدمة عمي هيج يسوي بية الغريب شيسوي .. والتفت للمحامي ... انت ماالك شغل عندي لان انت عضيت الايد الي انمدتلك روح خلي سلمان يشغلك عندة .. ماريد اشوف وجهك ياله تحرك ... وطلع المحامي بدون مايحجي وبسرعة ... ضياء ... وصال مااعرف شلون اشكرج .. وصال ... علئ شنو تشكرني ماكو شكر بيناتنا .. بس ياضياء انتبه من توقع شي اقرأ العقود كلها حتئ لو الطرف الاخر مستعجل يريد يموت يريد يحترك لازم تقرأ .. ضياء .. كلشي ولامتوقع هيج يسوي وربي مصدوم لا والتكتل اكثر انو عمي اخو ابوية يريد يوكعني ويستغلني ... لاحول ولاقوة الا بالله .. زين انتي ليش ماكلتي اني محامية اني تفاجئت بيج هم .. رائد ... وصال متحب تحجي عن نفسها هذا طبعها ... ضياء ... وصال جميلج علئ راسي اشيلة طول عمري لو ما تدخلج جان رحت على كولتج بخبر كان بس تعالي كليلي شلون شگيتي بهذا الشي ... وصال...ههههه اول شي لفت انتباهي ارتباكة وثاني شي نضراتة الك وهو يقلب الاوراق وثالثا انو مايفتح الورقة كلها ينطيك بس مكان الي توقع بي ورابعا انت توقع بدون متقرا .. ضياء .. كل هاي الاشياء انتبهتي الهن بهاي الكم دقيقة معقولة .. رائد ... ههههههه وصال محقق كونال ماتفوتها فوتة .. ضياء .. والله سبعة .. وصال .. ياله خلي ندخل الوقت تاخر وباجر عدكم يوم طويل .. ضياء .. اي والله صدك .. ياله خلي ندخل .. ودخلو وراحو لغرفهم ضيائ وضي يم امهم ورائد وصال يم ابو مازن .. رائد ... والله عفية عليج بين كل هل المشاكل الي انتي بيها ومافاقدة ترگيزج ... وصال... ههههههه اااخ يارائد ااااخ .. ضياء ذكرني بوضعي هم اقرب الناس اله طعنو بي وهم المحامي نفس قصتي ويااسماء الجلبة .. رائد .. تدرين عندي ثقة بيج فوق ماتصورين انو راح ترجعين كلشي وراح تاخذين كلشي سلبة خالد .. وصال .. ان شاء الله .. بس انت تدري انو اني انعدمت الثقة عندي تماما .. رائد .. حقج وربي حقج .. وصال .. ياله كافي خلي انام تعبت .. رائد ..نامي وارتاحي يكلبي ... 
ضياء ... بعد الصار وموقف وصال .. وطريقة كلامها وياالمحامي النذل .. اتضحلي هاي البنية قوية عجبتني شخصيتها وصلابتها حسيت وراها شي قاسي اكو غموض بشخصيتها ليش مكالت اني محامية لازم اعرف كلشي عنها ..
في مكان اخر ...
ليث .. وصلنا النحف العصر .. ابوية كال انروح لفندق نرتاح ونصلي وناكل لكمة ونروح للعالم الي مااعرفهم منو لان ماذكر اسمهم كدامي .. وفعلا حجزنة غرفة بفندق قريب علئ الامير علي عليه السلام .. غسلنا وصلو اني مااعرف ليش ماكمت وصليت مع العلم اني اصلي بس صار فترة حتئ صلاتي هاملها مااعرف شبية .. ابو شاكر .. بوية ليث ليش ماصليت .. ليث .. مااعرف شجاوبة اكتفيت بعدين اصلي تعبان هسة .. ابو شاكر ... ينمرد گلبي علئ ليث وتدهور حالتة وحتئ صلاتة مقصر بيها التعب حتئ بوجها جوة عيونة صايرات اسود .. استغفر الله ربي واتوب اليه .. بوية شاكر انزل جيب اكل خلي ناكل حتئ نتوكل .. شاكر .. صار بوية .. ابو شاكر متفق مسبقا وياالشيخ الي راح ياخذون ليث اله ف اتصل بي حتئ يأكد انو هو وصل النجف ساعة ساعة ونص يكون يمة .. جاب شاكر غدا وتغدو وگ العادة ليث لكمة لكمتين وكام .. شاكر .. ليث ليش كمت ..ليث .. هاهية مااكدر اكل معدتي تاذيني اذا اكثر .. خلصو الغدا .. ونزلو شربو جاي .. وتوجهو لبيت الشيخ ...

لهنا ويخلص البارت شنو راح يصير يم الشيخ وضياء شراح يعرض علئ وصال .. كل هاي الاحداث نعرفها بالبارت القادم .. لاتنسون المتابعة والتصويت وتعليقاتكم الحلوة اااحبكم ..
لارين العامري
           ﮼أنامل ﮼گاتبه📒