عـشق الـجبـال (فصـليـة)

عشق الجبال(فصلية)

عشق الجبال(فصلية) البارت 65
***********************
ليث  ...من الليل اتصلت بمراد وبلغته انه يدز اثنين رجال واحد يخلي يم بيت مازن والثاني يخلي  يم بيت اهل  وصال حتى يراقبون وصال منين تطلع لان اني ما ادري وين وصال حاليا بيت مازن لو بيت اهلها مراد ... انت شمدريك  وصال موجوده ببغداد ..ليث.. عرفت ومن اوصل لبغداد نلتقي بالشقه واحجيلك  التفاصيل بس هسه ضروري ادز اثنين من هسه حتى يعرفون وصال وين تروح ويدزون الي موقعها.. مراد... تدلل اعتبر الموضوع صار ..وصال... وصلنا للشركه اللي بيها خالد ودخلنا اني وضياء ورائد الكل  ينظر النه ما يعرفني اني منو لان الموظفين اللي بالشركه ناس جدد ما اعرفهم ولا يعرفوني وصلنا للسكرتاريه وحاولت تمنعنا ..السكرتيره ..ممنوع اخوان تدخلون الاستاذ خالد عنده اجتماع ومدت ايدها على التليفون نظرت الرائد افتهم نظرتي وراح وخلى ايدة على التليفون منعها من  الاتصال ..رائد.. بنيتي ماكو داعي تتصلين هو الاستاذ خالد ينتظر الست وصال ...السكرتيره.. بس يا استاذ هو عنده خطار لازم انطيه خبر ..رائد ..لا ما حاجه ..وصال... توجهنا اني وضياء لمكتب خالد وفتحت الباب بدون ما استاذن واشوف موقف مقزز كدامي شفت اسماء بحضن خالد ويبوسون بعض من شافوني تفاجئوا طفرت اسماء من حضن خالد وخالد نهض بسرعه من الكرسي.. ضياء ..يابنت الحلوة من يمي سويتي روحج شريفة روما طبعا حجئ بصوت ناصي بس وصال سمعتة .. اسماء ...وصال انت شو تسوين هنا.. خالد ...وصال شوكت  وصلتي تفضلي.. وصال.. ردت على اسماء اني ما جايه لبيت ابوج حتى تكولين شنو  اسوي هنا اني جايه بشركتي وتفضلي اطلعي بره واسمي لا تنطقين على لسانك لان تنكسيه يلا اطلعي بره ..اسماء... اني المديره القانونيه لهاي الشركه ومن حقي احضر كل الاجتماعات.. وصال.. ههه مديره قانونيه ومكتبها باحضان خالد والله مديره محترفه بشغلها وبكل المجالات ..اسماء ...تريد ترد على وصال بس قاطعها ..خالد... بصرخه قويه اسماء روحي المكتبج  بعدين نحجي اي اي وصال شلونك شخبارج شوكت  وصلتي شوكت  اجيتي تفضلي استريحي اطلبلج   شي تشربي ...وصال ..اني بالشركه مالتي وشوكت ما احب اطلب شيء اني اتصل واطلب ماكو داعي تطلبلي انت ..خالد.. باستغراب الشركه مالتج ما دا افتهم ممكن توضحين.. وصال.. كانت بايدها ملفات شمرتهم على المكتب كدام خالد اقرا وانت تعرف وتفتهم شنو دا احجي او راح افهمك اسرع اني شريكتك الجديده وصلت. الفكرة قرا الاوراق خالد وانصدم انتوا اشكاعد  تلعبون اشداسون   وبعدين انتم منين تعرفون بعضكم ...ضياء ..لا نلعب ولا شيء كل ما بالموضوع اني بعت حصتي من الشركه الست وصل وهذا كل ما بالامر.. وصال ...شغله منين تعرفون بعض هاي الشي  ما يخصك  ولايعنيلك  اصلا اما شدا  تلعبون  فمهما لعبنا ما راح نوصل للعب مالتك يا استاذ خالد ...خالد... هذا نصب واحتيال واني ما راح اسكت على هذا الشيء ...وصال ...كل امورنا وكل اوراقنا قانونيه وشغله النصب والاحتيال من تحجيها اخذلك نظره على نفسك بطريقك النصب والاحتيال هاي شغلتك مو شغله وصال ولا الي يشتغلون ويا وصال مو انت نفسك بالنصب والاحتيال ضيعت الشركه التعبو بيها  اهلنا واما شغلت شدا  نلعب احنا لعبنا مثل الحيه والدرج انت لدغتني بالبدايه وبعدين عندنا اللعبه واني الي لدغتك ونهيتك نهائي. هل المرة والجاي اكثر من الي راح وها على فكره انت واسماء نفس الطينه متوالمين عجبتوني ثنائي ولا اروع بالنصب والاحتيال والخداع والغدر والخذلان تذكر باخر اجتماع شكتلك ياخالد كلتلك راجعتلك واهاي اني وفيت بوعدي ورجعتلك .. ها صدك  خاف انسى اريد اكولك علئ شغله انت معزوم الخميس الجاي ان شاء الله على افتتاح الشركه والمصنع الي دمرتهم يا استاذ خالد وهسه  اترخص منك ..وطلعت وصال وضياء راحوا المكتب ضياء ..واجة رائد وراهم ..رائد.. ها طمنوني بشروا اشصار ..ضياء... والله بنت خالك طلعت مو قليله وطلعت ذيبه سحلت خالد سحل بالاضافه الى اسماء هانتها اهانه تسوى عمرها ..رائد... والله عفيه عليج اني هسه راح اروح لان عندي شغل انتم باقين ضياء ووصال... اي باقين شويه عدنا اوراق لازم تشوفها وصال..  وصال... اني  شويه وطالعه اخلص الاوراق  واطلع ..رائد ...تمام لعد  نلتقي بالبيت ان شاء الله باي .. خالد ...بمكتبه متهستر ما يعرف شنو دا يسوي وشنو الي دا يصير اصلا ...خالد ...اني كنت اعرف اكو شيء مو طبيعي بس ما توقعت انه وصال تطلع موجوده وهي الي دا تشتغل وتوكعني وهي الي دا تحفر جواي هي وهذا النذل ضياء وبدا يعصب ويفلش بالاوراق اللي على المكتب مستحيل مستحيل افوتها الكم هاي مو النهايه يا وصال اني وانت والزمن طويل
ليث .. وصلت بغداد والشباب الي مخليهم مراد وصلولي الاخبار انو هي طلعت من بيت اهلها مع شباب ثنين بس كل واحد بسيارتة وراحت لمكان شركة ودزولي موقع الشركة رحت علئ مكان الموقع وضليت انتظر بس بعدت عن المكان قرابة 100 متر وكالوا انو هي بعدها ماطلعت شوية وشفت رائد طلع صعد سيارتة وتحرك .. ضليت انتظر .. تقريبا ثلاث ارباع الساعة
(( لقاااء الجبلين ))🍂
...........................
وجاان تطلع وصال ..ليث .. طلعت بهيبتها واناقتها لابسة رسمي ورافعة شعرها وهي تنزل الدرجات بكل ثقة لبست نضاراتها الشمسية اني تحركت بسرعة بالسيارة وصفيت سيارتي ورئ سيارتها ونزلت بسرعة التفتت علية وتلاكينا وجه بوجه ضلينا صافنين ابعضنا دقايق.... وصال .. من طلعت من الشركة واني متوجها لسيارتي حسيت اجتي سيارة سريع وصفت ورئ سيارتي انفتح باب السيارة التفتت وانصدمت من شفت ليث مقابيلي .. ااااه ياوجعي .. اصعب موقف يصير وياي ..((وصال تگول ...صـارت عيـنة بعـيونـي وردت اعبـره
وسيـطرت كـوة عـرفت انـوخذ شـي
منـي واحـس أنبـاك هسـتوة بديـت
اتـلمس ابصـدري اثـاري الگـلب ماهـوه)) ليث .. تقدمت بتجاها وهي ماتحركت .. ليث .. شلونج وصال .. وصال .. الحمدلله بخير ماطول اشتم الهوئ .. ليث .. ياربي دومج تكونين بخير .. وصال .. تسلم ... ليث .. وصال ممكن نحجي .. وصال .. ماكو بيناتنا حجي .. ليث .. من فضلج وصال مااخذ من وقتج هواي .. وصال .. بخصوص شنو نحجي .. ليث .. هيج واكفين بالشارع خلي نكعد بمكان ونحجي اترجاج .. وصال .. تمام اطلع بسيارتك واني امشي وراك .. ليث .. متاكدة راح تمشين وراية .. وصال .. والله لو ماريد جان كتلك وشغلت ومشيت .. ليث .. اوكي بس لضوجين ياله .. صعد ليث سيارتة وصعدت وصال سيارتها ومشت ورئ ليث .. وصال .. اوووف ياربي مااريد اضعف ياربي انطيني القوة ياربي لتخلي ليث يكون نقطة ضعفي .. اذكرت عندي بالسيارة حلقة مااعرف ليش طلعتها ..وخليتها بأيدي اليسرئ .. وضليت ورئ ليث .. هذا وين رايح فجئة صف سيارتة مقابيل عمارة بمنطقة راقية .. استغربت .. نزل من السيارة. واجة يمشي علية اني ركنت سيارتي ونزلت ... وصال .. هاي وين راح نحجي ..  ليث ... هاي شقتي تعرفين بيها من زمان .. وصال ... رفعت حاجبها من كل عقلك جايبني لشقة انت شمفكرني هاااا من كل عقلك ادخل وياك لشقة وتوني اريد افتح باب السيارة حتئ اصعد .. ليث ... لزم ايدها وصال انتي هذا تفكيرج بية اني ليث ماتعرفين ليث .. وصال ... سحبت ايدي بقوة من ايدة واذا انت هسة رجال غريب بالنسبة الي مايربطنا اي شي .. ليث ... كلامها جرحني اعرف وصال اعرف وروح غيث ماعندي اي نية غير انو احجي وياج وبس وماكو مكان هادئ غير هذا المكان ماعندي اي قصد وربي ... وصال ... سديت باب السيارة بقوة واشرت بيدي تفضل خلي نشوف تاليتها ... يمشي واني ورئ صعد لشقة فتح الباب ودخل ..ليث .. تفضلي ... وصال ... دخلت الشقة حلوة اثاثها مرتب ونظيفة دخلنا مثل الصالة بيها تخم صغير وطبلات خليت سويج السيارة والتلفون على الطبله وكعدت ... ليث ... تشربين شي ... وصال ... ليث اني مجاية اتضايف احجي الي تريد تحجي وخليني امشي ... ليث... اجة گعد بصفها وصال اني اسف .. وصال .. التفتت عليه وضحكت بستهزاء ههه اسف علئ شنو اسف ... ليث... علئ كلشي ...وصال .. لاحدد اسف علئ اذيتك اسف علئ خذلانك الي اسف علئ البهذلة الي تبهذلتها اسف علئ العمر الضاع اسف علئ طلاكك وطردك الي بليلة ظلمة هااا علئ ياوحدة منهن تتأسف ... ليث .. بلعت ريكي ودنكت واجت عيني علئ ايدها ... شفت بيدها حلقة سحبت ايدها بسرعة ..ليث .. هاي ش شن شنوو حلقة بيدج ا اانـ اانتي مزوجة ... وصال .. بلعت ريكي وسحبت ايدي بقوة من ايدة ونهضت .. اي شنو الغريب تريد ابقئ بدون زواج لو انتضرك اصور انت هم شفت حياتك وازوجت ليش تريد اوكف حياتي لخاطرك ... ليث ... احسس نار صارت بكلبي والدم صعد براسي .. صدك تحجين ولج وصال ازوجتي وصرتي باحضان شخص ثاني غير ليث ...وصال ... شنو هل التفاها الي انت بيها ليش يمتئ جانت احضان ليث الي ولك انت شهر بعد مطلكتني خطبت وعقدت وعلئ منو رررحاااب رررحاااب مالكيت وحدة غير رحاب مو هاي رحاب الي جنت تكول مااطيقها بس اتضحلي انت واحد جذاب وكل الكلام الي جنت تكولة الي جذب انت فكرة الانتقام جانت معشعشة براسك كلت هاي اخر ورقة العبها هم بالمرة اكضي وكت وياها واشبع رغبتي وهم حتئ الكسرة الاخيرة تكون قوية متخليها تصحئ بعدها ..واني الغبية صدكت كلامك وانتظرتك بس تالي انتظاري تروح تخطب وتعقد ولك شهر واحد جنت مستعجل حتئ ماخليتني اكمل العدة وتخطب هذا كلة وتريد انتظرك لو اوكف حياتي علمودك لا انت ماتستاهل ذرة من حبي الك انت يادوب هسة تنذكر باثر موقف عابر ... ليث ... انصدمت بكلامها ايباااه هذا كل توقعج بية شكد حاقدة وشكد متخيلة امور غلط هذا الحجيتي عنة مو ليث لالا موليث ..  وصال .. كتلك انت يادوب تنذكر بالصدف فمااتوقع حاقدة لالا ابد .. بهل الاثناء دك تلفوني انتبه.. ليث علئ تلفون وصال صورة طفل المتصل حبيب ماما ..ليث ..هنا مو انصدمت احس انفجعت .. شلت التلفون حيب ماما ..  وصال ... هنا نقطة دم مابقت بية انطيني تلفون شنو هل التصرف .. ليث ... فتحت خط وسبيكر واشرتلها جاوبي .. وصال 📱بلعت ريكي .. الووو ..
عفاف📱 حبيبتي وصال هذا قسورة خبلني يريد يحجي وياج
وصال📱 انطي التلفون
قسورة 📱مامي حبيبي واين انتي
وصال📱 ياروح مامي اني عندي شغلة اخلصها واجي
قسورة 📱اني مااكل الاتجين اني وبابي ننتظرج ناكل سوة
وصال📱 حبيبي اذا جوعان اكل انت وبابي
قسورة📱 ما ما تجين وناكل اليوم بابي سجلني بالروضة اولاد وبنات هوااااااي والعاب
وصال📱 حبيبي هسة اجي واحجيلي تمام
قسورة 📱اوكي .. ونهت المكالمة طبعا قسورة يقصد بابا علئ جدة ابو مازن يصيحلة بابي ..
ليث .. احس هنا ادمرت صدك مزوجة وعدها طفل وعايشة حياتها ونستني .. وصال ..مااعرف الصار صح لو غلط اباوع علئ ليث مصدوم وصافن علية .. والدمعة باينة بعيونة لمعتهن .. ليث .. ايباااه كلها عايشة بس اني دفنت روحي بذكرياتج ... وصال .. اتعلمت منك انو اعيش مثل ماشفت حياتك وازوجت وعشت اني سويت مثلك ..ليث ...ولج اني طلكت رحاب من اكثر من سنة ولج الصار كلة جان شي مدبر وكعونا بي انتي اختفيتي دورتج هواي مالكيت الج اثر لو صدك عايش جان هسة مزوج ولج حتئ لمازن رحت اسئلة عليج كالي سافرت هي وابوية خارج العراق .. وانتي رحتي ازوجتي وخلفتي ..وصال ..  هذا الي صار وارجوك لاتطلع بعد كدامي احنا انتهينا من اربع سنوات .. وكل واحد منا اله حياتة ..ليث... صح انتي الج حياتج بس اني حياتي وين ايامي وسنيني ضاعن بينج وبين رحاب وسحرها ههههه اااخ يادنيا ... وصال .. اخذت سويج السيارة وردت اطلع صار هو وراية استوقفتني كلمة ليث ... ليث ... تحبينة .. وصال .. وكفت عضيت شفتي وغمضت عيوني وغصة بگلبي ... ليث ... جابوي ..تحبينة ... وصال .. التفتت علية اي احبة لان لان كل الاشياء تتعوض اني تعوضت بي .. ليث ... جوابها مثل السجين ونبت بگلبي .. وهو يحبج .. وصال .. اكيد يحبني .. ليث ... يعرف شنو تحبين وشنو تكرهين .. يعرف تخافين من الظلمة يعرف نومج ثكيل ههه جنت دائما استغل نومج الثگيل من صايرة بينا مشكلة اتسحب نص اليل واكعد يم جربايتج واضل اسولف واخر شي اخطف بوسة واطلع دائماجنت اسوي هذاالشي .. هو يعرف بهائ الاشياء عنج ... وصال .. بلعت ريكي .. حتئ اوخر الغصة الي ابلعومي .. اي يعرف مثل ماانت عرفت هو عرف .. ليث .. بس مايحبج بگد مااني احبج .. وصال .. عفتة وطلعت بسرعة واني كوة لازمة دمعتي لاتوكع اريد اوصل السيارة ...ركض صعدت السيارة وتحركت ... وضلت دموعي تنزل ليش ياربي ليشش ااااااااه واضرب علئ استيرن السيارة .. عيوني غوشن من البجي طبكت السيارة علئ صفحة وضليت ابجي واصرخ كل قوتي ولك ولك اني ماشفت حياتي بعدك ولك اني الي جنت ومازلت انام علئ عطرك ولك اني بعدك ماشفت رجال عشت بس لشغلي ولأبنك ولك اني الي جردت نفسي من كل الاحاسيس والمشاعر ااااااه ياليث اااااه مو وكتك تطلع گدامي ابد موكتك ااااااهئ ااااااهئ مسحت عيوني وحركت ابني ينتظرني لازم اوصل للبيت ... ليث.. من طلعت وصال اتصلت علئ مراد وكتلة تعال لشقة ... مراد.. ماشي جاي .. وصال .. وصلت للبيت .. تلكاني قسورة يركض ويصيح مامي فرحان بجيتي شلتة وبوستة وشميتة اوووف شهل العطر اليجنن .. وهو محاوط رقبتي بادينة ويبوس بية .. قسورة .. اني سبحيت وبدليت وكاعد انتظرج .. عود سبحت وبدلت .. وصال .. اووف اوووف رحت فدوة لهل الوجه ياله تعال ناكل .. دخلت للمطبخ واني شايلتة سلمت علئ عمتي وابوية .. عفاف .. هلاحبيبتي .. ابو مازن .. هلا ابنيتي شو تاخرتي .. وصال .. صارت عندي شغلة .. خليت قسورة علئ الكرسي قرب ابوية .. خلي اغسل واجي .. عفاف .. غسلي وتعالي داصب غدا حتئ تتغدين .. لان قسورة جوعان ومقبل ياكل الاتجين .. وصال .. اي هسة بس اغسل فديت الجوعان الميقبل ياكل الا امة تجي وكرصتة من خدة خفيف اداعبة .. بس هي بداخلها نار مشتعلة .. دخلت للحمام غسلت اباوع لوجهي بالمراية شفت عيوني حمر من البجي اخذت نفس وزفرتة بقوة علئ الله تهدئ النار الي بصدري بس هيهات شيهديها هل النار .. اجيت كعدت وياهم علئ طاولة الاكل وهم بدو ياكلون واني اوكل بقسورة وشاردة بغير مكان .. ابو مازن .. انتبهت لوصال وضعها مو طبيعي .. وصال بابا ليش ماتاكلين .. وصال .. هااا لا داكل بس قسورة جوعان .. ابو مازن .. شلون جان لقائج بخالد .. وصال .. تمام بس هو متقبل الفكرة وانصدم من شافني .. بس لشيل هم كلشي تمام .. ابو مازن.. وصال اجاوبني بس مخلت عينها بعيني اكو شي صاير وياها بنتي واعرفها .. ابو مازن .. الحمدلله والشكر سفرة دايمة .. عفاف .. الف عافية يكلبي .. ابو مازن .. وصال بابا اني انتضرج بغرفتي خلصي وتعالي .. وصال .. عرفت انو ابوها حس بيها شي .. تمام حبيبي هسة لاحكتك .. عفاف ..شكو اصاير .. وصال .. مااعرف هووووف .. عمة قسورة يمج اروح اشوف ابوية وراجعة .. عفاف .. علئ راحتج حبيبتي ... وصال.. دكيت باب غرفة ابوية ودخلت ... ابو مازن .. تعالي بنيتي سدي الباب وتعالي .. وصال ...سديت الباب واجيت يم ابوية كعدت بصفة ... ابو مازن .. اذا كل الامور ماشية تمام اليوم وياخالد واني متاكد من هذا الشي لان اعرفج واعرف شغلج .. شنو الصاير بحيث حتئ مبجيج ... وصال ... بلعت ريگي اريد بس اخلص من هاي الغصة يابة اليوم اليوم شفت ليث ... ابو مازن ... هذا الي جنت خايف منة اي وشصار .. وصال ... طلب انو نحجي بعد ما ضل يترجاني .. ابو مازن ... اي ... وصال ... ورحنا لشقتة ... ابو مازن ... اي ... وصال ... سردت لأبوها الصار وحتئ المكالمة الي صارت بينها وبين قسورة ... ابو مازن ... ياوصال اني اكلج حاولي تخلي يعرف بوجود ابنة تروحين توهمينة انو انتي مزوجة وعندج طفل متكليلي شبيج يابنتي ليش تعقدين وتصعبين الامور عليج ليش تخلي يعرف من غيرج .. وصال ... يابة اني ماجنت مدبرة لهذا الشي اصلا هي الامور بوحدها تعقدت هو افتهم غلط .. ابو مازن .. وانتي بدال ماتوضحيلة غلطة اكدتي ... وصال ... مااعرف هيج صار والله تعبت والله كافي ياناس ارحموني والله دااتحمل اكثر من طاقتي ... ابو مازن .. بنتي ارحمي نفسج انتي ولاضلين عايشة بالماضي وحاقدة علئ ليث بسبب الماضي الرجال شرحلج الي صار والصار لابيدة ولابيدج انتي ليش ماتريدين تعيشين مرتاحة ... اسمعي وصال ليث حاليا مايعرف بابنة واجة وبرر موقفة والرجل اذا ميهمة الشخص المقابل مستحيل يبرر اله اي تصرف من تصرفاتة واليوم ليث حجة بحب وياج وهو مايعرف بوجود ابنة بس اذا عرف من غيرج راح تلكين كدامج مو ليث المحب راح تلكين اب جريح انحرم من ابنة اربع سنوات ... وصال بنتي ليث يحبج وحبة باين من اسئلتة ومن تصرفة وتكولين هو سائل مازن ومازن كايلة مسافرة خارج العراق بعد شنو الي يسوي يابنتي ... وصال .. يابة اني ماردت احرمة من ابنة بس ردت الوقت المناسب ردت اصفي خالد حتئ التفت لهذا الموضوع بس الامور مشت عكس مااريد ... ابو مازن .. اسمعي مني ليث لازم يعرف بأبنة منج شخصيا مو من احد ثاني .. وصال ... ان شاء الله ...ابو مازن .. واكو شغلة ثانية اريد احجي بيها وياج .. وصال .. احجي يانور عيوني .. ابو مازن .. بنيتي الشراكة الي بينج وبين خالد اريدها تنفض .. يعني اتنازلي بحصتج من الشركة اله انتي لقنتي درس وخسرتي اضعاف الي خسرة النا والحمدلله گدرتي ترجعين گلشي واكثر هل الشراكة ابد ماحابها انهيها ويابنتي هو يبقئ ابن عمج والاظفر مايطلع من لحمة صح غلط بس اخذ الي يستحقة واكثر .. وصال .. والله يا يابة اني جنت مفكرة بهذا الشي ومايكون خاطرك الاطيب انت تامر واحنا انفذ .. ابو مازن .. الله يرضئ عليج بنيتي اني خلفت ثلاث ارجال مو ثنين .. وصال .. ياروحي انت ادلل بعد الافتتاح ان شاء الله راح اكمل اوراق التنازل لخالد .. ابو مازن .. الله يحفظج بنيتي ويسر امرج ويبرد گلبج .. وصال... اووف احلا دعاء من اعظم رجل بالعالم شو تعال خلي ابوس صار هواي مابايسة ااووووفيشش ياريحة گلبي شنو اليوم انت وقسورة سابحين من نفس الشامبو .. ابو مازن .. هههه لا هذا قسورة سابح بالشامبو مالتي .. ههههه .. وصال .. اخذت قسورة وصعدت لغرفتي دخلت سبحت ولبست تراك لو نيلي وبي خط ابيض .. نشفت شعري وحضنت قسورة ونمنا اني ويا ... وصال .. بين حلم لو حقيقة اسمع صوت صياح جوة وصوت عالي فزيت ..اي هذا حقيقة مو حلم .. طفرت من مكاني اريد اشوف منو ميزت الصوت هذا صوت خالد هذا علئ منو دايصيح علئ ابوية تخبلت نزلت ركض .. خالد.. انتو نصبتو علية انتو بكتو فلوسي وشركتي انت ماتعرف تلزم بنتك ..وصال .. صرت مقابيلة سمعت الكالة .. وصحت بصوت هييييي انت علئ منو داصيح ومنو سمحلك تدخل للبيت هااا .. خالد.. منو سمحلي ست وصال هذا بيت عمي شوكت مايعجبني اجي.. وصال .. اسمع خالد تحجي باحترام اهلا وسهلا تقلل ادبك الي تصرف ثاني وتعال بعدين منو الباك منو هااا منو الي نصب علئ الثاني انت اخر واحد تحجي بهاي الامور بعدين من تكول بيت عمي وشوكت مايعجبني اجي ليش وين جنت من جان عمك من مستشفئ لمستشفئ وين جنت من عمك دخل عمليات. وين جنت هااا وهو منو الي اذة عمة وصلة للمرض غير طيشك وطمعك وجشعك احجي شو سكتت هسة جاي تكول بيت عمي يااخي انت غير مرحب بيك بهذا البيت .. خالد .. وصال اني مراح اسكت علئ السويتي بية افتهمتي مراح اسكت .. وصال .. والله اعلئ ما بخيلك لامو خيلك اعلئ ما بزمايلك اركبة لان انت مو كد الخيل وشتريد اسوي سوي انت البديت واني مااخذت غير حقي ازيد مااخذت .. بهل الاثناء دخل ضياء .. ضياء .. هاي شكو اصواتكم واصلة ليبرة خالد هاي شسوي هنا ... خالد .. ههههه هههه هههههاااي اثاري انت من اهل البيت اشوفك داخل گبل لااحم ولادستور عمي انت عاجبك هذا الوضع .. ابو مازن .. ضياء منا وبينا ونسابتنا.  ضياء .. خالد لاضل تشمر بحجي ماله معنئ لا تلكا رد مايعجبك بس اني ساكت احترام لهل الدار .. بهل الاثناء .. نزل قسورة مخروع ويصيح مامي مامي ويبجي واجة لزم وصال من رجلها مامي .. وصال .. شالت قسورة اسم الله يروح ماما .. قاطعها خالد .. هلا والله وانوب عندج ابن والله شكد حلو باله هذا ابن منو لو متعرفين منو ابو لان انتي دايحة من محافظة لمحافظة .. وصال .. ماحسيت غير ضياء ضرب خالد بوكس وكعة للكاع .. ونام علية وضل يضرب بي .. ضياء .. لك حيوان اكو واحد يحجي بشرف بنت عمة .. وصال .. نطيت قسورة لعمتي .. وضليت اجر بضياء اني وابوية كوة جرينا  من فوك خالد .. ضياء كافي ضياء بروح ابوك كافي .. كوة بعدت ضياء من خالد الاحلفتة .. وصال .. اسمع خالد اني اشرف منك ابني ابو موجود واذا لكفك دايسلي علئ طرف لو دايس لابنة يسويك اربع وصل هاي وحدة وثنين اني مو مثلك بكل خرابة عندي گرابة تحب اذكرك لو ناسي وياله اطلع برة اذا اشوفك واصل عتبة بابنا اتصل بالشرطة عليك وانت تعرف شنو شرطة .. خالد .. سهلة سهلة .. وطلع وهو يتوعد النا .. وصال.. استغفر الله ياربي .. ضياء .. لا هذا مجنون علئ الاخر .. ابو مازن .. وصال استعجلي بشغلة قسورة ترئ الوقت يمشي مو لصالحج ..
ليث .. حجئ لمراد علئ الصار بالحرف .. مراد.. لهنا كافي بعد ليث البنية مزوجة وعدها طفل لاتخرب حياتها .. ليث .. وحياتي الخربت منو يصلحها هاااا كلي منو يصلحها .. مراد .. بيدك انت اصلحها. ازوج وعيش حياتك وانسئ .. ليث .. ولك مراد احبها ولك وراس امي احبها مداتطلع منا يأشر علئ گلبة وعلئ راسة تدري من شفتها اليوم احس گلبي طلع راح يمها يحوم داير مدايرها شلون اعيش حياتي اني بمجرد مااتخيلها ويا رجال ثاني ولك اموت الف موتة شلون انسئ واعيش واني حتئ من ابنها كتلتني الغيرة .. بس فهمني شلوووون .. ((ليث شيكول 🍂...انه احبك حتئ لوغيري خذاك انت تبقئ بداخلي مالك غرض وكلشي بالدنيا حلو يذكرني بيك ياخسارة عمري يالمالك عوض .. وكت كمت اسمك اسمعة من الغريب... قبل جنت اسمك اسمعة وياالنبض .. انت خلي ودمعتي ونجمي البعيد انت يقرونك علية وكت المرض🍂 )) مراد .. الله يعينك ياخوية ..
وتسمتر الاحداث بالمئامرات ...
----------------------------
طبعا خالد ماسكت ضل يبحوش لأحد ما حصل رقم ليث وقرر انو يأذي وصال بابنها بعد ماجمع معلومات من مصادرة الخاصة وعرف انو قسورة ابن ليث وليث مايعرف بي .. خالد .. هاي اول ضربة الج ياوصال .. اني اعلمج .. وصار وقت افتتاح الشركة الي رجعتها وصال هي والمصنع وبلشو شغل .. صفت كل الامور وصال بعد عدها تتنازل لخالد عن حصتها بالشركة مال خالد .. وتتوجه لموضوعها ويا ليث .. بس خالد جان اسرع منها .. بدا خالد يدز رسائل لـ ليث من رقم مجهول حتئ مامسجل .. رسائلة بالبداية كانت تلميحات تثير الشك عد ليث .. الرسائل 👈 (انت نايم ورجليك بالشمس ) (انت عشت مخدوع وراح تموت مخدوع) (انت ماتعرف طليقتك وصال شنو ضامة عليك) طبعا الرسائل كانت كل يوم وحدة يدزها ويقفل الخط بحيث ليث مخلة شي مسوا مكدر يعرف اي شي عن الرقم وحتئ مايلحك يرد علية ودز خالد رساله خلت ليث لاهو طايل سما ولاطايل ارض 👈( انت عندك ولد ابن وصال هو ابنك بس خافيتة عنك حارمتك منة قسورة هو ابنك واذا مصدك اتاكد بنفسك انت ضابط ومايعصئ عليك شي وراح اساعدك اكثر راح ادليك بروضة ابنك روح واسئل عن اسمة الثلاثي ... سلام )) وانقفل الخط .. ليث.. الرسائل الي تجيني ماخلت عقل براسي .. مراد.. يااخي هسة ليش حاير روح وتاكد من الروضة .. ليث ..  هو راح اروح
***********************
لهنا ويخلص البارت ننتضر الاحداث الجاية وشراح يصير وشراح يعرف ليث وصال شنو موقفها هذا كله بالبارت القادم ... حبايبي لاتسون المتابعة+ التصويت+ تعليقاتكم الحلوة ااحبكم 😘
لارين العامري
      ﮼أنامل ﮼گاتبه📒

يااخي هسة الشوك عوفة ..💔
هسة احجيلك بالحلفان الحلفوهن الي ولاوحدة صدكية 💔شنو الگاضهم لو صدك يشتاقون ..🍂
رحت بس تركت اثار رجلية ..💔الرادك يوصلك كل الاسباب اعذار الضروف التمنع من الجية جذبية ..🍂 ولايتحجحون بالعطش ..
العطش يحفر بير .. وجان عذرهم ضلمة وجانت اليلة گمرية ..
وماابالغ احجيلك مثل ماهية ..
گبل من معرفتهم شيبة مابية هي المشكله نتعلق ويرحون لا والتوجعك تشتاق لجية 💔
يااخي معقولة علينة جانو يمثلون💔
وشخصية العاشق فكرة جذبية💔
زين نفرض مثلو بس جانو يدمعون 🥺
جاا حتئ البواجي مو حقيقية 🥺
يل شفتهم لمعو وگضيتهم جنااي👏
وبعد فترة شفت زنجارهم بديه💔

وبسلامتكم ♥️🍂