عـشق الـجبـال (فصـليـة)

عشق الجبال(فصلية)

عشق الجبال(فصلية) البارت 58
****************************
وتستمر الاحداث .. ياله تعالو نكمل روايتنا ...
--------------------------------------------
مازن سوة مثل ماطلبت منة وصال ... مازن ... شنو هاي الاوراق وصال ... وصال .. ليش انت مشفتهم .. مازن ... اوراقج الخاصة شلون اگلب بيهم ... وصال ... ياالله مازن صدك تحجي غير اني اختك واذا شفتهم ... مازن .. وصال تعرفين طبعي كلش زين .. وصال ...اي اعرفة ..  شوف حبيبي اول شي  هاي الاوراق وكاله عامة الك عن كلشي املكة ... مازن .. شنوو شداتحجين ..  وصال .. قبل مااروح فصلية سويت هاي الوكاله حتئ تصرف انت من بعدي ... مازن ... بس وصال ...وصال.. قاطعتة بدون بس خلي اكمل احنا هسة مو بوضع مال بس وتسائلات مازن لازم نرجع الشركة والمصنع الضيعهن خالد ... مازن ...شلون ... اني راح افهمك شلون.....
****************************
في مكان اخر ...
****************************
ليث ... نزلت وجنا مقررين نزوج اني ورحاب وقدمت على اجازة واخذتها ..  دخلت للبيت وقت العصر مشغلين قران مااعرف اختنكت طلعت روحي وصداع ضل يضرب براسي ... انزعجت حيل من صوت القران ... رحت على الشاشة طفيتها ... ام شاكر ... ليش يمة مو هذا قران وراح يصير الغروب .. ليث .. يمة راسي يوجعني مااتحمل صوتة ... ام شاكر ... ليش يمة ماتتحمل صوتة القران شفاء للمرض وراحة لنفس ... ليث ...ماريد ماريد وخلا وصعد لغرفتة وهو مزعوج ... فرحة .. هذا ياهو الطفة القران .. ام شاكر .. ليث يكول راسي يوجعني ويزعجني صوتة ... فرحة ... صدك جذب گضينا عمرنا نشغلة هيج وقت شو خلي اشغلة هو مو صعد لغرفتة وراحت وشغلتة وعلتة هم .. ليث ... صعدت لغرفتي ذبيت نفسي على الجرباية  حتئ ماغيرت ملابسي ولاغسلت ابد ماعندي هاي الحالة ماادخل لفراشي اذا مااسبح واتعطر واتمدد .. ماحسيت علئ نفسي غير نايم .. ماحسيت غير المغرب حسيت علئ رحاب وهي تمشي اديها علئ وجهي .. ليث ... همممم خليني انام .. رحاب... اكعد حبيبي صارت المغرب واني مشتاقتلك .. ليث .. فتحت عيوني بتعب .. هلو حبيبتي ... رحاب .. حياتي مشتاقتلك .. وتقربت علية وحضنته وهو بادلها الحضن ... ليث مابقئ شي بس هذا الاسبوع نزوج ... رحاب ... اي حبيبي راح يصير شطولة الاسبوع .. ليث ... ههههه لا راح تلتهين بتجهيزات العرس ومتحسين بالوقت ... رحاب ... حبيبي كوم خلي نطلع اني وياك والله ضايجة ... ليث .. رحاب والله احس جسمي متكسر .. رحااب .. ليث لخاطري فدوة ... ليث ... صار حبيبي بس اغسل واغير ملابسي روحي جهزي نفسج ... رحاب ... فدوة لحبيبي وراحت ..  ليث ... اسمع صوت القراق جوة مشغل احس روحي تفور ومختنك .. كمت غسلت وغيرت ملابسي واني روحي ماطايقها الصداع يضرب براسي .. احس حتئ حركة ونار بگلبي ..  نزلت ..  احس صرت اعصاب فووول القران ابد مااطايق صوتة احس صوت بداخلي يكلي روح كسر الشاشة حتئ ميشغلوها ... ليث ... اني مو كلت لاشغلونة دااكللكم مصدع ليش هل العناد ... شاكر ...شبيك ليث شنو مانشغل قران بالبيت وقت الغروب قابل هاي جديدة عليك ... ليث ... يووووه داكول طفو طفوو وشال الشاشة ورگعها بالكاع وشكو تحفية على الميز كسرها صارت عندة نوبه هسترية الكل وكف مصدوم وضل يصرخ ماااريد اسمع قران لاتعاندون لاتعاندون ليش تأذوني ... ركض علية شاكر يحاول يهدي الكل اجة يركض مستغرب من ردة فعل ليث ... ومن كد ماصيح انبح صوتة ضل يسعل بقوة اختنك وتقيء ... ام شاكر ... يمة وليدي شجاك يمة شاكر اخوك اختنك .. ركض جابو مي غسلولة وشربو ويحاولون يخلو يهدئ ويرتاح ... فرحة .. صافنة ومتعجبة بالصال ... اكيد بي شي ليث موخالي ياربي دخيلك ..  رحاب ... ضلت جامدة بمكانها ومرعوبة مو علئ ليث مرعوبة لااحد يشك بشي من خلال تصرف ليث ... فرحة ... ام شاكر خية ابنج موخالي ... ام شاكر ... يعني شنو موخالي فرحة فهميني ... فرحة ... ليث يمكن مسويلة عمل والعياذ بالله ... ام شاكر ... ضربت على صدرها بيدها يمة اسم الله منو يسويلة وليش ... فرحة ... منو وليش هذا الي دايصير كدامج كله داتحسي طبيعي والريحة الكريهة الي كالت عليها وصال تحسي شي طبيعي حتئ ملاك البارحة هم شامة هل الريحة بغرفة ليث ...ام شاكر ... صخام الصخمني ولج خية والحل اذا صدك ابني يروح من ايدي ..  فرحة ..  تعرفين ام موسئ العلوية الي بالفرع الورانا ... ام شاكر .. اي اي اعرفها .. فرحة ... باجر نروح اني وياج بدون محد يدري ونحجيلها وبلكي تلكانة حل ... ام شاكر ... اي اي نروح الصبح اني وياج بالبسكوت ...
****************************
وصال ... اخذنا ابوية اني ورائد وعمتي عفاف للمستشفئ علمود العلاج الطبيعي وهم يجرون اله فحوصات علمود يحددون عمليتة .. اني صرت بشهر الخامس وضعي زين بينت بطني شوية بس بالسونر مابين شنو جنس الطفل .. المهم .. الدكتور كال لازم يبقئ بالمستشفئ حتئ نسيطر على ضغطة ومنة يكون قريب على العلاج الطبيعي لان الدكتور التركي خمس ايام ويجي لأربيل واحنا حاجزين يمة ..  دخلنا ابوية للمستشفئ وكملنا الاجراءات ..  وصال ... اني باقية يمة رائد اخذ عمتي ورجعو للبيت .. عفاف ... انتي ارجعي للبيت ارتاحي يمة انتي حامل ..  وصال ... عمة انتي تعبانة اكثر مني واني من اتعب ارجع وانتي تجين بمكاني نتناوب علية .. رائد ..  بس اني مااتركج وحدج متكدرين لازم رجال وياج اخذة للحمام شي انتي وبطنج وين تكدرين .. وصال ..  تمام روح وصل عمتي للبيت وتعال ..رائد ..  خوش محتاجة شي اجيبة وياي الج ... وصال ... اي خلي عمتي تخلي ملابس لابوية وجيبلي تراكسود شوية مريح وعلاجي هي عمتي تعرفة ... رائد ... تمام ياله يمة .. عفاف .. وصال لا تتحركين هواي ولا تكعدي لوحدج سمعتي بروح امج ..  وصال ... ماشي يگلبي لايضل بالج ... وصال .. اباوع على ابوية نايم خلي يرتاح .. كلت اطلع اشرب فنجان گهوة اصحصح بيها ماطول بابا نايم .. سديت الباب وطلعت توجهت لكافتريا المستشفئ ... اخذت كوب گهوة وتوني اريد اكعد مااحس غير صوت رجال .. دقيقة دقية خيتي لاتكعدين اجمدت شكو .. التفت واشوف شاب سبحان الخالق طول وجسم ولابس كلة اسود وبيدة تاب .. دقيقة خيتي الكرسي ممخلة عدل جان وكعتي لو كاعدة ... وصال ..  انتبهت صدك الكرسي ممخلة عدل يعني لوكاعدة جان انگلبت علئ ضهري ..  وصال .. منتبهت علية شكرا جزيلا .. ضياء ..  لا علئ شنو تشكريني ... وخلا ودخل للمستشفئ ..  اخذت نفس وزفرتة باله اني لو كاعدة ومكلوبة على ضهري والگهوة بيدي وصرت فرجة لأمة محمد جان اسويت وانوب عتريسي يتعور يمة وليدي ... ضياء ..مرحبا اني ضياء... مهندس ورجل اعمال عمري 38 سنة ارمل .. جنت كاعد برة بحديقة المستشفئ ادخن وبيدي التاب اتابع شغلي .. رفعت راسي اريد اخذ نفس من الجكارة وطلعت بنية من المستشفئ سبحان الخالقها العيون حديقة خضرة الوجه المعاني مرسومة رسم لابسة كاجول قميص ابيض وجنز ازرق وحذاء رياضي ..  والشعر تكول ليل ضفيرتها عابرة خصرها مشيتها مشية حامل وحتئ بطنها مبينة هنياله الماخذج .. اخذت گوفي ورادت تكعد انتبهت علئ الكرسي الي رادت تكعد علية شفتة مو عدل يعني بس تكعد توكع وهي اجتي  بدون متنتبه تريد تكعد  اني صحت وكمت بسرعة اتجاها وكتلها انتبهي خيتي ..  شكرتني اني بعدها دخلت للمستشفئ ..  وصال .. شربت الگهوة ودخلت اشوف ابوية خاف يكعد ويحتاج شي .. دخلت بعدة نايم واجة رائد جايبلي ملابس اخذت الملابس وغيرت احس شوية ارتاحيت ... رائد .. راح اطلع اجيب اكل مشتهية شي معين ..وصال .. لا تعرف شحب .. رائد .. اكيد اعرف يروح رائد ... طلع رائد .. وبقيت اگلب بتلفوني ... طبعا اني غيرت خطي وحساباتي سديتهن وفتحت حسابات جديدة ابتعدت عن ليث وعائلتة تماما مااكللكم تخطيت لا بس اكو شي ابقئ من شي صح اهل ليث مااذوني بشي بس ليث طلعني من حياتة وحياة عائلتة لهذا اتقبلت الموضوع لان الي لكيتة كدامي اكبر من انو اضل دافنة نفسي بليث ... لكيت كدامي ابوية المريض شغلنا الي خسرنا بسبب خالد ف كل هاي الامور خلتني اتقبل خسارة ليث ..  وانتبه علئ الجاي .. اجة رائد جاب عشا وتعشنة وعشينا ابوية واخذة رائد للحمام انطيتة العلاج وخلينا بالسرير وشوية ونام .. رائد ... تجين نطلع برة بالحديقة نشرب جاي لوتعبانة ... وصال ... اي والله نطلع ماطول ابوية نايم ... رائد ... ياله لعد .. وصال .. طلعنا اني ورائد للحديقة واجتي عيني واشوف نفس الولد الي شفتة الظهر .. گاعد بنفس المكان لابس تراك زيتوني وبيدة تلفونة وعينة بي وبيدة الثانية جكارة ..  رائد ... هااا علئ شنو صفنتي ..  وصال ... هااا علئ هذاك الولد .. رائد ... ياولد وينة انتبه وشافة ... شبي .. حجتلة وصال علئ الموقف .. رائد ... خلف الله علية غير تنتبهين ياوصال ... وصال ... ماادري والله كلها ولاابالي الكرسي مو عدل الحمدلله عدت ... دقايق كاعدين .. ومانسمع غير صريخ بنية ضياااااء الحكني ضياااااء امي امي مادري شبيها ماشوف غير الولد طفر من مكانة ويركض بتجاه البنية بصراحة جمدت بمكاني .. وصال ..  رائد خلي نشوف شبيهم خطية .. رائد .. كام بسرعة ولحكة واني هم بس اني ماامشي سريع اخاف علء عتريس علئ كولة رائد .. وصلت غرفتهم قريبة على غرفتنا وانشوف الدكاترة والممرضين ناس طابة وناس طالعة والبنية الي طلعت اصرخ مستمرة بالبجي والصراخ .. تقربت عليها ... اهدي ان شاء الله ماكو شي .. البنية ... اامي اااامي وكف گلبها ياالله ااامي ماعندي غيرها ياربي كلشي ولاامي .. وصال... حضنتها احاول اهديها دقايق مرت مو طبيعية تحبس الانفاس ... شوية وطلع الشاب الي جنت احجي لرائد علية والي اتضح انو اسمة ضياء .. ضياء .. تخربطت امي. وطلعت اختي ضي تصرخ دخلت لكيت الاطباء داير مدايرها ويسعفون بيها مابقئ بية نقطة دم احس گلبي يريد يطلع من مكانة ياربي ماعندي غير امي واختي بهاي الدنيا ياربي اخذ من عمري وانطي لأمي ... امي عدها صمامات القلب مسدودة ومحتاجلها عملية ماكدرت اطلع بيها للخارج لان وضعها الصحي ابد مايسمح لسفر فكالو اكو مجموعة اطباء جايين من تركيا ف حجزت الها وننتضر الطبيب المختص يوصل كالو اسبوع ويوصل خلوها تحت المراقبة لان صحتها موتمام واني واختي ضي نايمين بيها بالمستشفئ... استقر وضع امي وطلعت من يمها اريد اشوف ضي الي ملخت روحها طلعت لكيت هاي البنية يمها حاضنتها  وتهدي بيها وتشربها مي .. توجهت عليها قطع طريقي شاب .. رائد ... هاا خوية طمنا شلونة مريضكم .. ضياء ... الحمدلله عدت علئ خير شكرا الك .. رائد ... اني رائد اني هم نايم بخالي بهاي الغرفة الي بصف غرفتكم اي شي تحتاجة الخطية بركبتك .. ضياء تسلم الله يحفظك .. ضياء .. تقدمت لضي .. ضي بوية كافي .. ضي .. ضياء امي شلون صارت .. ضياء ... الحمدلله بوية لاتخافين امنا قوية .. وصال ... حمدلله علئ سلامتها ماتشوف شر ... ضياء .. الله يسلمج شكرا لان جنتي يم اختي .. وصال .. علئ شنو الشكر ماسويت شي ... رائد ... تقرب الهم حمدلله علئ سلامتها احنا نترخص ياله وصال خلي يرتاحون .. ضياء ... شكرا جزيلا ماتشوفون شر .. وراحت وصال ورائد ... ضياء ... هذا اكيد زوجها هههه اسمها حلو وصال ..

لهنا ويخلص البارت ولاتكولون قصير لان 🔪🔪 بارتين نزلت اليوم الكم ننتضر الاحداث بالبارت القادم نشوف شراح يصير وهذا الشاب الوسيم شنو راح يكون دورة بحياة وصال وبروايتنا .. لاتنسون المتابعة والتصويت وتعليقاتكم الحلوة احبكم 😘

لارين العامري
            ﮼أنامل ﮼گاتبه📒

خلي اشوفكم ضياء 😉👇👇