م/ 217 نهار/داخلى
بيت الحاج مجدى
مجدى قاعد مع زوجته و متحفز ويرن الجرس ويقوم يفتح بسرعة قبل زوجته
أم فوزى: بالراحة عليه ياحاج
الحاج مجدى: إسكتى إنتى ياأم فوزى ..
يفتح الحاج مجدى الباب ويدخل عزت :السلام عليكم
الحاج مجدى :وعليكم السلام ورحمة الله وبركاته أدخل
عزت : إزيك ياماما.. طابخة إيه النهاردة ؟
الحاج مجدى: بتسأل ليه ؟هاتآكل هنا برضه؟
عزت : إيه يابابا هو حضرتك متضايق إنى بآكل عندكم مانتعارف جهاد و..
الحاج مجدى: كداب ...إنت كداب
عزت : أنا يابابا؟؟؟
الحاج مجدى :بقى تفهمنا إن مراتك بتآخد الفلوس منك أول بأول ومش بتطبخ ولا تعمل أكل ومنشفاها عليك وتخلينا نظلمها كلنا وتطلع إنت اللى بتعمل كده؟؟؟
عزت : يابابا .. انا
الحاج مجدي: إنت معندكش دم؟ إزاي؟ تسيب مراتك كده؟ معندكش إحساس
عزت: معقول يابابا تهزأنى كده وانا فى السن ده ؟
الحاج مجدى: هزقك وأضربك إن لزم الأمر ولا كبرت علي؟
يقف عزت بغضب عزت : يا بابا
الحاج مجدى: أقعد مكانك ومش عايز أسمع منك ولاكلمة
يقعد عزت ويكمل والده : تبهدل مراتك وإبنك ليه؟ أنا كنت عندك في البيت، كنت في نص هدومي ومراتك بتوريني
المطبخ والثلاجة.... في حد في الدنيا يعمل كده؟
عزت : أنا عايش على قد ما بحبش الإسراف
الحاج مجدى: إسراف، هو إنت بتصرف خالص؟ فين مرتبك؟ فين فلوس الدروس؟ ده الشحات هيبقى بيته مليان عنك.
