شقة جلال- الصالة
جلال يفتح الباب ويدخل هشام ويقول جلال: إيه ياهشام, لازم ابعت لك علشان تيجى ..
هشام: لأ مانا بأشوفك كل يوم مش محتاج عزومة ..
جلال: تعالى ياحبيبى أقعد؟.
يدخل هشام ويجلس بجوار جلال اللى ينادى: يا أم حسين.. يا أم حسين إعملى لنا شاى من يديكى الحلوين ..
تخرج سلمى من الحجرة وهى تحمل إبنها وتقول: من عنيه.. إزيك ياهشام؟؟
الحمد لله ..
تناول حسين لجلال وتقول: خد إبنك على ماأعمل لكم شاى , وأجيب لكم كيك ...
جلال: تسلم إيدك من دلوقتى..
تدخل سلمى المطبخ ويقول جلال: إيه بقى ياهشام مش هاتخرج من حالتك دى؟؟
يتنهد هشام بحزن ويقول: يعنى اعمل إيه؟ خسرت شغلى بعد كام شهر وبقيت عاطل ..
جلال: ولا عاطل ولاحاجة.. مسيرك تلاقى شغل تانى؟؟؟
هشام: انا فرحت لأنى إشتغلت بشهادتى دلوقتى هاضطر أشتغل أى حاجة علشان أصرف على نفسى..
جلال: وفيها إيه مانا بأغنى فى النادى والأفراح
هشام: أيوه لكن عندك وظيفتك وهاتفضل محافظ عليها
تقترب سلمى بالشاى والكيك وتقول: أنا مش متعودة منك على اليأس ده ياهشام,, ده إنت كنت الفرفوش بتاعنا وعمرك مايأست كده...
جلال: قولى له.. ده إحنا كلنا بنآخد منك الطاقة والإيجابية ....
هشام: باينى خلصتها عليكم....
يضحكو وتقول سلمى: لأ لسه .. الإنسان عمره مايتغير من أول مشكلة تقابله , لازم تقاوم وتحارب علشان تقدر تنجح وتحقق اللى بتتمناه...
ينظر لها هشام فى صمت.
قطع
بيت إسماعيل
جيهان تخرج من البيت لتذهب للعمل ويلحق بها أشرف بسرعة: جيهان,, صباح الخير..
جيبهان صباح النور. إيه اللى مصحيك بدرى كده؟
أشرف: بصراحة,, علشان اشوفك...
تنظر له جيهان بدهشة ويكمل: تعمدت انزل فى ميعادك علشان أعزمك اوصلك ونتكلم...
جيهان :نتكلم فى إيه؟؟
أشرف: فى موضوع شاغلنى من زمان وعايز آخد رأيك؟؟
جيهان : وليه أنا؟؟
أشرف: لأنك إنسانة ناضجة وتفكيرك بيعجبنى... تسمحى لى أوصلك؟؟؟
