شقة اسماعيل- الصالون ليل/ داخلى
راضى بيتكلم وجيهان عينيها شبه مقفو
لة وبتنام راضى :وقلت للمقاول لأ كده مينفعش لازم تشوف الخامات المظبوطة ..
جيهان تتثاءب وتقاطعه جيهان : هى الساعة معاك كام؟
يبص فى الساعة راضى : 11 ونصف ..وبعدين بقى نختار الألوان الداكنة بتبقى جميلة قوى
جيهان :يعنى انت معندكش شغل بكرة
راضى : عندى طبعا بس انا بانزل متأخر ومستعد اسهر معاكى للصبح
تقف فجأة جيهان :وانا عندى شغل بدرى ومش ممكن اسهر اكتر من كده
يضحك راضى : اعملى حسابك انا باحب السهر ولازم تتعودى انه فى بيتنا مش هاننام قبل 3 او 4 الفجر ..
المهم بقى ماقلتلكيش المقاول نشف راسه
تقاطعه جيهان : راضى انا تعبت .. وعايزة انام من فضلك نأجل الكلام ده للمرة الجاية ممكن؟؟
يقف وهو مستغرب راضى : انت عايزانى امشى
جيهان : اخيرا فهمت .. انا جيت من الشغل وملحقتش ارتاح
يبص لها وهو متضايق راضى : ايه ده ياجيهان؟ معقول فيه واحدة يبقى خطيبها عندها وتطلب منه يمشى ..تعالى اقعدى نكمل كلامنا و.....
يمد يده للأمام وكأنه عايز يمسك يدها ويدخل اسماعيل
اسماعيل : ايه ده ماشى ياراضى
يحط يده فى يد راضى : مع الف سلامة ابقى سلم لى على الوالد والوالدة
راضى :ياعمى انا....
قطع
شقة اسماعيل- الصالة ليل/ داخلى
يخرج اسماعيل من الصالون وهو ماسك ايد راضى ويتجه بيه لباب الشقة
راضى : ياعمى انا كنت....
اسماعيل : مع السلامة ياحبيبى .. سلم على الجماعة
