/26 ليل/ داخلى
شقة جهاد
شقة حديثة ( جهاد بنت اسماعيل الكبيرة متزوجة من عزت بعد قصة حب (يعمل مدرس وهو بخيل
ولديها ابن صغير اسمه كريم ) تخرج جهاد من المطبخ
جهاد: عزت... انت ياعزت
يخرج من حجرته عزت: عايزة ايه ياجهاد؟
جهاد: مش تهز طولك كده وتنزل تجيب حاجة للعشاء
عزت: اعملى عشاء من اللى عندك
جهاد :معدش حاجة وكل اللى ماما بعتته مع جيهان أختى خلص
عزت: اتصرفى ياجهاد وبعدين انا مش هاتعشى
تبص له بغيظ جهاد: هو انا باقول علشانك انت .. يا أخى خلى عندك احساس انا باقول علشان جيهان
وكريم ,يعنى يصح اخلى اختى تنام من غير عشاء؟
عزت : احسن تنام خفيفة بدل ماييجى لها كوابيس
جهاد : اعمل فيك ايه؟ حس بقى اتفضل انزل دلوقتى حالا وهات حاجة للعشاء اتفضل
عزت: طيب ياساتر عليكى
يخرج من الشقة وهو يصدر اصوات اعتراض
جهاد : ياساتر عليك انت اف
تخرج جيهان من الحجرة
جيهان: ايه بتزعقى مع مين؟
جهاد :هايكون مع مين يعنى؟ مع قسمتى السوداء وبختى المايل
جيهان: يبقى عزت
جهاد: هو فيه غيره؟
تجلس جيهان على الكنبة جيهان تعرفى ياجهاد انت احد الأسباب اللى مخليانى اخاف من الجواز
جهاد : مش كل صوابعك زى بعضها ياجيهان
جيهان :ايوه بس انت واخدة عزت عن حب ودلوقتى بتثبتى لى ان الحب وحده لايكفى
تتنهد وتجلس بجوار جيهان جهاد عزت ماكانش كده ابدا بس بعد ماأخوه مات اتغير 180 درجة
جيهان: الله الغنى عن الجواز كله ياحبيبتى لو كان بالشكل ده أنا افضل انى اعيش فرى حر زى الطير من غير قيود
تضحك جهاد :قال يعنى ماما هاتسيبك؟
جيهان :والله هى وطنط روحية صعبانين على قوى بيبذلوا جهود دؤوبة ومتصلة لجوازى بأى طريقة
جهاد: انت لحد دلوقتى جبتى لهم ضغط بس اما نشوف هاتعملى فيهم ايه؟
تضحك جيهان: مش هاسكت غير لما يبطلوا
جهاد: انت عارفة ان ماما مش هاتطمأن عليك غير لما تتجوزى لحد ماتخلصى الماجستير اللى انت واخداه حجة
