بيت إسماعيل – سلم البيت
عائلة إسماعيل طالعين وتقول حكمت: حلوة قوى الحفلة انا إتبسطت .
هشام: أيوه .. ربنا يتمها له بخير.
إسماعيل: يارب ....
جيهان: وجلال لما غنى عمل جو حلو قوى ..
جلال: هدية لعريس دول جيراننا من سنين ونعتبر أهل على رأيى بابا...
يبص إسماعيل لجلال بفخر: شرفتنى والله ياجلال وبيضت وشى.
هشام: ياسلام دلوقتى شرفتنى ياجلال فاكر لما قال لك أغنى عملت إيه؟؟
إسماعيل: أنا كنت خايف عليه .. لحاجة زى دى تفسده
حكمت: إحنا الحمد لله مربيين ولادنا كويس ..
يوصلو لشقة إسماعيل ويقول: ياللا ياولاد تصبحو على خير..
جلال: وحضرتك من اهله...
يدخلو لشقتهم ويطلع جلال وسلمى وتقول: آه
جلال: إيه ياحبيبتى؟؟
سلمى: من اول الفرح ظهرى كان بيوجعنى قوى
جلال: وليه مقلتيش...
سلمى: وجع بيروح وييجى ... دلوقتى أفرد ظهرى وأرتاح...
قطع
شقة جلال ح حجرة النوم
جلال وسلمى نايمين وفجأة تقوم سلمى وتتوجع : جلال.. جلال.. قوم ..
يقوم بسرعة : فيه إيه؟
سلمى: وجع جامد قوى.. نادى لى طنط بسرعة..
يقف جلال وهو مرتبك: هاتولدى؟ هاتولدى؟؟؟
سلمى: مش عافة بس.. آه ...
يلف جلال حول نفسه وهو ملبوخ ويبحث عن الشبشب ويقول: هانزل حالا.. .
يتجه للباب ويرجع لها تانى: إسمعى إمسكى نفسك لحد ما أجيب ماما...
سلمى: آه بسرعة ياجلال..
يخرج جلال من الشقة بسرعة .. وتصرخ سلمى
قطع
شقة إسماعيل – الصالة
الشقة مظلمة ويدق الباب بقوة ويخرجو من الحجرات ويقول إسماعيل: ياساتر يارب.. خير!!
جلال: إتحو بسرعة بابا ,, ماما
حكمت: ده جلال.. إفتح يا إسماعيل
يضئ حازم النور ويفتح إسماعيل الباب ويدخل جلال وهو يرتجف: بتولد .. سلمى بتولد ياماما... .
حكمت: ياحبيبتى يابنتى ....
جلال: ألحقوها ...
هشام: نجيب دكتور وإلا نوديها المستشفى...
