م/48 نهار/ داخلى
المستشفى – حجرة هبة
هبة قاعدة فى سريرها وحكمت بجوارها واخواتها جالسين حولها
حكمت : الحمد لله انك بخير ياحبيبتى
حنان : ده احنا كنا هانطير من الفرحة لما اتصلوا
هبة : انا حاسة انى كنت نايمة امبارح .. اصحى الاقينى نمت اسبوعين بحالهم
اسماعيل : الدكتور قال انك اتنفست تراب كتير لما اغمى
عليك وكويس انك الحمد لله فقت يابنتى
هبة : انا مش فاكرة حاجة خالص ..
هشام: ومفيش داعى تفتكرى .. البيت وقع وخلاص
هبة :صحيح يابابا ؟ البيت وقع
اسماعيل: ايوه يابنتى بقى كوم تراب
هبة :وانتوا قاعدين فين؟
حازم : قاعدين عند عمتى صفية فى البلد
حكمت :ماتقولش عند عمتك احنا قاعدين فى البيت القديم
هشام: كلمة بيت ياعزيزتى هبة تجميل لمكان اللى إحنا قاعدين فيه, إسمحى لى احكى لك تاريخه.
يبصو لهشام ويضحكو ويكمل : فى الماضى كانت الدار القديمة اللى إتربى فيها بابا مع أخته اللى ماشافتش تربية
إسماعيل : بس ياولد ,عيب كده
هشام: إيه يابابا , انا بأقول الحقيقة
هبة :وبعدين ياهشام.؟
هشام :وبعدين سكن فيها ناس تانية من ذوات الأربع
هبة :مش فاهمة حاجة ذوات أربع يعنى إيه ؟
هشام : حيوانات .. هو فيه ناس عندهم اربع رجلين
حكمت :من الآخر عمتك حولت الدار القديمة لزريبة وإحنا نضفناها وعايشين فيها
هبة: إيه؟ زريبة ؟؟طيب واحنا هانعيش هناك يابابا؟
اسماعيل :لأ ده وضع مؤقت وربنا يسهل ونشوف مكان هنا
