បញ្ឆោតស្នេហ៍សុភាពបុរសក្លែងក្លាយ(សេរីបញ្ឆោតស្នេហ៍វគ្គ២)ចប់

ភាគ៥២

“ ចាប់ដៃគ្នារត់ចោលរោងការ ”

   ពីរសប្ដាហ៍ក្រោយមក

   អេវីលនិងរ៉េណា មកផ្សារដើរទិញអីវ៉ាន់ចាំបាច់ខ្លះដែលត្រូវប្រើក្នុងពិធីនៅសប្តាហ៍ក្រោយនេះ។
   « ទិញបានគ្រប់ចំនួនហើយ ពួកយើងត្រឡប់ទៅវិញទៅ » រ៉េណា ចេញពីក្នុងហាងមកព្រមជាមួយអីវ៉ាន់ពេញដៃ ទើប អេវីល ដែលឈរចាំរហ័សចូលទៅជួយនាងកាន់អីវ៉ាន់។
   ទីងៗ
   សំឡេងទូរស័ព្ទក្នុងហោប៉ៅរបស់ អេវីល រោទិ៍ឡើង ទើបគេរហ័សដាក់អីវ៉ាន់ចុះហើយលើកទូរស័ព្ទសិន។
   « ខ្ញុំលើកទូរស័ព្ទបន្តិចសិនណា » អេវីល ប្រាប់ទៅ រ៉េណា ហើយក៏ថយទៅនិយាយទូរស័ព្ទក្បែរនេះ។
   « ហាឡូ...ខ្ញុំ អេវីល លីអូណា និយាយ »
   “ លោក អេវីល ខ្ញុំគឺគ្រូពេទ្យដែលលោកបានជួយនៅថ្ងៃមុនណា តើលោកទំនេរទេ? ខ្ញុំចង់ជួបលោក ព្រោះខ្ញុំមានរឿងសំខាន់ចង់ប្រាប់លោកឲ្យដឹង ”
   « បាទ បាន ពេលនេះខ្ញុំនៅខាងក្រៅល្មម អញ្ចឹងចាំខ្ញុំផ្ញើរទីតាំងទៅឲ្យលោកគ្រូពេទ្យណា » អេវីល និយាយចប់ហើយក៏ដាក់ទូរស័ព្ទចុះជាមួយទឹកមុខព្រួយបារម្ភ ទើប រ៉េណា បានឃើញហើយរហ័សដើរមកសួរគេ។
    « តើមានរឿងអ្វីមែនទេ? »
    « គឺលោកគ្រូពេទ្យដែលពួកយើងជួយថ្ងៃមុន គាត់ចង់ជួបពួកយើង ប្រាប់ថាមានរឿងសំខាន់ចង់ប្រាប់ ស្តាប់តាមសំឡេងទៅដូចជារឿងធំខ្លាំងណាស់ »
    « ចឹងយើងរកហាងមួយអង្គុយចាំគាត់សិនទៅ »

    មួយសន្ទុះក្រោយមក
    ងក់!
    លោកគ្រូពេទ្យឈប់ឡាននៅមុខហាងកាហ្វេមួយកន្លែងដែល អេវីល បានផ្ញើរទីតាំងមកឲ្យលោក។ មិនបង្អង់យូវ័យចំណាស់ឱនយកសាមីពណ៌ត្នោតក្នុងឡានហើយក៏ប្រញាប់ចូលទៅក្នុងហាងដើម្បីជួបកំលោះក្រមុំទាំងពីរ។
    « លោកគ្រូពេទ្យនៅខាងនេះ » អេវីល ក្រឡេកឃើញលោកគ្រូពេទ្យដើរចូលមកក៏រហ័សហៅ ព្រោះខ្លាចលោករកគេនិងរ៉េណាមិនឃើញ។
    លោកគ្រូពេទ្យដើរមកតាមការហៅរបស់ អេវីល ហើយក៏ចូលអង្គុយតុទល់មុខពួកគេ។
    « លោកគ្រូពេទ្យមានការអ្វីសំខាន់ចង់និយាយជាមួយពួកយើងមែនទេ? » រ៉េណា សួរទៅលោកគ្រូពេទ្យដោយការចង់ដឹង ទើបលោកគ្រូពេទ្យហុចសាមីដែលកាន់មកឲ្យទៅនាងនិងអេវីលដើម្បីបើកមើល។
    « លទ្ធផលពិនិត្យ...! » អេវីលនិងរ៉េណា ចំហរមាត់និយាយលែងចេញក្រោយបានឃើញខ្លឹមសារនៅក្នុងក្រដាសមួយសន្លឹកនេះហើយ។
    « ខ្ញុំពិតជាសុំទោសចំពោះអ្នកទាំងពីរខ្លាំងណាស់ដែលបានលួចក្លែងបន្លំឯកសារពិនិត្យរបស់អ្នកទាំងពីរ » លោកគ្រូពេទ្យឱនមុខចុះដឹងកំហុសគ្រប់យ៉ាង។
     « ហេតុអ្វីបានជាលោកធ្វើបែបនេះ? » អេវីល ស្ទុះក្រោកឈរផុតកៅអីស្រែកគំហកដាក់លោកគ្រូពេទ្យតាមកំហឹងដែលមាននៅក្នុងខ្លួនពេលនេះ បើលោកគ្រូពេទ្យយកលទ្ធផលពិនិត្យពិតប្រាកដនេះចេញមកតាំងពីដំបូងរឿងរបស់គេនិងរ៉េណា ក៏មិនពិបាកដល់ថ្នាក់នេះដែរ។
     « ស្ងប់អារម្មណ៍សិនទៅ អេវីល ខ្ញុំថាយើងស្តាប់លោកគ្រូពេទ្យសិនទៅ » រ៉េណា ប្រាប់គេឲ្យស្ងប់អារម្មណ៍ហើយទាញឲ្យគេអង្គុយចុះវិញ។
      « គឺខ្ញុំត្រូវលុយពង្វក់ចិត្តឲ្យធ្វើរឿងខុស ប៉ុន្តែពេលនេះខ្ញុំដឹងខ្លួនខុសហើយ ទើបចង់មកលុបលាងកំហុសរបស់ខ្លួនឯង »
      « លោកនិយាយបែបនេះមានន័យថាមានអ្នកយកលុយទៅជួលលោកឲ្យធ្វើរឿងមួយនេះហើយមែនទេ? តើលោកស្គាល់ថាគេជាអ្នកណាទេ? » រ៉េណា សួរបន្តដោយការសង្ស័យ។
      « ខ្ញុំមិនដឹងថានាងជាអ្នកណាទេ ប៉ុន្តែនាងមានវ័យចំណាស់ប្រហាក់ប្រហែលនឹងខ្ញុំដែរ នាងមិនបានប្រាប់អ្វីមកច្រើនទេ គ្រាន់តែយកលុយមកហុចឲ្យខ្ញុំរួចប្រាប់ឲ្យរៀបចំក្លែងក្លាយមួយសន្លឹកឲ្យអ្នកទាំងពីរប៉ុណ្ណោះ »
      « មនុស្សស្រីវ័យចំណាស់នៅជិតខ្លួនរបស់ពួកយើងមានតែបីនាក់ប៉ុណ្ណោះ » អេវីល និយាយឡើងដោយការសង្ស័យហើយក៏ចង់ប្រាប់ឲ្យ រ៉េណា ពិសោធន៍នៅពេលនេះ។
      « ចឹងលោកនៅចាំមុខរបស់មនុស្សម្នាក់នោះបានទេ? » រ៉េណា សួរបន្ត។
      « ខ្ញុំគិតថាខ្ញុំអាចចាំបាន »
      « ចឹងខ្ញុំនឹងបើករូបថតឲ្យលោកសាកមើលណា » រ៉េណា លើកទូរស័ព្ទមកហើយចុចបើករូបអ្នកម៉ាក់របស់នាងឲ្យលោកគ្រូពេទ្យមើលមុនគេ ទាំងក្នុងចិត្តព្រួយបារម្ភជាខ្លាំង។
      « មិនមែនម្នាក់នេះទេ »
      រ៉េណា ធូរទ្រូងបន្តិចពេលដឹងថាអ្នកដែលធ្វើរឿងនេះមិនមែនជាអ្នកម៉ាក់របស់នាង។
      « ឬក៏ជាម្នាក់នេះ? » អេវីល បើករូបអ្នកស្រី រ៉ាវ៉ាន់ ឲ្យលោកគ្រូពេទ្យមើល។
      « បាទ គឺម្នាក់នេះហើយ ខ្ញុំចាំបាន »
      « លោកប្រាកដទេ » អេវីល សួរបញ្ជាក់ម្តងទៀតព្រោះគេមិនជឿទេថាអ្នកមីងរបស់គេជាអ្នកធ្វើរឿងមួយនេះ។
     « បាទ ខ្ញុំប្រាកដណាស់ »
     « អ្នកមីង រ៉ាវ៉ាន់ » អេវីល ស្ទុះក្រោកឈរឡើងទាញឯកសារពិនិត្យប្រញាប់ចាកចេញទៅយ៉ាងលឿន ទើប រ៉េណា រហ័សរត់ទៅតាមគេដែរ។
     « អេវីល ចាំខ្ញុំផង »